Yet istzotel Komam Jesús yebꞌ huneꞌ ix ah Samaria
4
Yabꞌen ebꞌnaj fariseo ta chiyapaxokanh Komam Jesús haꞌ iswiꞌ anma yebꞌ xin ta kaw ekꞌnaxa anma tzujan yinta Komam satapaxo yaꞌ Juan;
2 (Waxanhka maxhtaj kaw Komam chiꞌanikanh haꞌ iswiꞌ anma tuꞌ,
wal xin haꞌ ebꞌyaꞌ chikuywi yinta Komam,
haꞌ ebꞌyaꞌ chiꞌanikanh haꞌ iswiꞌ anma.)
Jesús habla con una mujer samaritana (Juan 4.1-42)
3 Hayet yabꞌenilo Komam Jesús ta yabꞌe ebꞌnaj fariseo huneꞌ tuꞌ,
yel Komam yul ismajul Judea,
ismeltzoto bꞌey yul ismajul Galilea,
4 yajaꞌ xin,
kaw yilal yekꞌ Komam yul ismajul Samaria.
5 Yapni Komam bꞌey huneꞌ konhobꞌ chiyij Sicar ayko yul ismajul Samaria tuꞌ,
iskawilal huneꞌ txꞌo txꞌotxꞌ aqꞌbꞌilkano yet payat yu yaꞌ Jacob tet iskꞌahol José.
6 Haꞌ bꞌey tuꞌ xin,
ay huneꞌ kꞌuh watxꞌebꞌil yu yaꞌ Jacob.
Kaw xin xasiki Komam isbꞌelwi,
yuxin ok tzꞌonhno Komam istiꞌ huneꞌ kꞌuh tuꞌ yet lanhanxa yok chuman.
7-8 Wal ebꞌyaꞌ chikuywi yinta Komam tuꞌ xin,
to ebꞌyaꞌ yul konhobꞌ isloqꞌoꞌ tzet chilolaxi.
Hayet ayto ebꞌnaj loqꞌwo tuꞌ xin,
yapni huneꞌ ix ah Samaria iqꞌoti haꞌ yul huneꞌ kꞌuh tuꞌ,
yalni Komam tet ix:
—Aqꞌ nino hawaꞌ tuꞌ wukꞌuꞌan,
xhi Komam.
9 Istaqꞌwi ix tet Komam:
—Wal hach hach tiꞌ,
kaw ah konhobꞌ Israel hach,
¿tom kaw mach hawohtajoj tato ah konhobꞌ Samaria hinan?
¿Tzet yinh chaqꞌanpaxo ha haꞌ hawukꞌuꞌ wetan?
xhi ix tet Komam.
(Yal ix hakaꞌ tuꞌ,
yuto haꞌ anma Israel mach chischahle tzotelo isbꞌa yebꞌ anma ah Samaria.)
10 Yalni Komam Jesús tet ix xin:
—Qꞌinalo ta hawohta huneꞌ mak chiqꞌanni haꞌ tawet tiꞌ,
yebꞌ xin ta hawohta iskꞌulal iskꞌul Komam Dios chiyaqꞌ jet,
chimhaqꞌanpaxo hawaꞌ wetan,
katmi waqꞌnihan haꞌ chiꞌaqꞌni qꞌinale machi istanhbꞌal tawet,
xhi Komam tet ix.
11 Yalnipaxo ix tet Komam:
—Mamin,
kaw nahat yehayto haꞌ yul kꞌuh lah,
kaw xin machi hanet chiꞌinahti haꞌ.
¿Bꞌay xin chaxhto hawiqꞌati haꞌ chiꞌaqꞌni qꞌinale chawaqꞌ wettuꞌan hawalni?
12 Yaꞌ Jacob,
jichmam yettax payat tiempo,
haꞌ yaꞌ anhekano huneꞌ kꞌuh tiꞌ jetanh.
Ha haꞌ yul huneꞌ kꞌuh tiꞌ xin yukꞌ yaꞌ yebꞌ sunil yuninal,
yebꞌpaxo sunil isnoqꞌ.
¿Tom xin kaw ekꞌbꞌal hachto satapaxo yaꞌ Jacob tuꞌ?
xhi ix tet Komam.
13 Istaqꞌwikanh Komam tet ix:
—Sunil mak chiꞌukꞌni huneꞌ ha haꞌ tiꞌ chititpaxo istajintiꞌal hunelxa.
14 Wal mak chiꞌukꞌni ha haꞌ chiwaqꞌtiꞌan xin,
matxa bꞌaqꞌinh chitaj istiꞌ,
yuto huneꞌ ha haꞌ chiwaqꞌtiꞌan lahan hakaꞌ hunu isnuqꞌ ha haꞌ chiꞌahilo toptoni kat isbꞌelwi,
haꞌ chꞌaqꞌni qꞌinale mach istanhbꞌal tet,
xhi Komam tet ix.
15 Yalni ix tet Komam xin:
—Mamin,
aqꞌ huneꞌ haꞌ chawal tiꞌ wukꞌuꞌan haxinwal matxa chitaj intiꞌan,
matxa chinhulan iqꞌo haꞌ bꞌey tiꞌ,
xhi ix tet Komam.
16 Yalni Komam tet ix:
—As awteti hawichamil kat heyul bꞌey tiꞌ,
xhi Komam tet ix.
17 —Machi wichamilan,
xhi ix tet Komam.
Yalni Komam tet ix:
—Kaw yel chawala,
machi hawichamil.
18 Yaj howanhxa ebꞌnaj chawiqꞌle,
walpaxo naj iqꞌbꞌil hawu tinanh xin,
mach hawichamilo naj.
Yuxin kaw yel chawala,
machi hawichamil,
xhi Komam tet ix.
19 Hayet yabꞌen ix huneꞌ tuꞌ xin,
yalni ix tet Komam.
—Mamin,
wal tinanh,
kaw chitxumchalo wuhan tato kaw ischejabꞌ Komam Dios hawehi.
20 Ebꞌyaꞌ jichmamanh,
haꞌ tiꞌ hulikꞌo ebꞌyaꞌ iswiꞌ huneꞌ witz tiꞌ yiqꞌayo isbꞌa tet Komam Dios,
wal hexpaxo israelita hex tiꞌ,
kaw cheyala ta kachannhechꞌan yul konhobꞌ Jerusalén chiyu kotoh jinoyo kobꞌa tet Komam Dios,
xhi ix tet Komam.
21 Yalni Komam tet ix:
—Hach ix hach tiꞌ,
ayto sunil tzet chiwaltiꞌan yul hawanma.
Chiꞌapni huneꞌ tiempo yet matxa chexhul heyiqꞌayo hebꞌa tet Komam Dios bꞌey huneꞌ witz tiꞌ,
yebꞌ matxa yilalo chextopaxo bꞌey Jerusalén.
22 Hex ah konhobꞌ Samaria hex tiꞌ,
cheyiyo hebꞌa tet Komam Dios heyalni,
yaj xin mach heyohtajo Komam,
walonh Israel honhtiꞌanh xin,
johtajanh Komam Dios bꞌay chijiyo kobꞌahanh,
yuto koxolanh chiꞌel Iskolomal anma.
23 Wal xin lanhan yapni istiempohal,
haꞌ ton tinanh,
yet chiyinayo isbꞌa anma yinh istoholal.
Kaw xin chiyo isbꞌa tet Komam Dios yinh sunil yanma yebꞌ xin yinh kaw isyelal,
yuto hak tuꞌ choche iskꞌul Komam ta chiyiyo isbꞌa anma tet.
24 Wal Komam Dios,
kaw Espíritu ye Komam,
yuxin maknhetikꞌa chiyiyo isbꞌa tet Komam,
kaw yilal chiyiyo isbꞌa yinh sunil yanma yebꞌ xin yinh kaw isyelal,
xhi Komam tet ix.
25 Yalni ix tet Komam:
—Kaw wohtajan tato chul huneꞌ yaꞌ Mesías,
haꞌ ton Komam Cristo Kokolomal.
Hayet chihul yaꞌ tuꞌ xin,
haꞌ yaꞌ chikamhalni yinh tzet kaw yelapno ye sunil,
xhi ix tet Komam.
26 Yalni Komam xin:
—Hanintonan huneꞌ chawal tiꞌ,
huneꞌ lanhan istzotel tawet tiꞌ,
xhi Komam tet ix.
27 Hayet lanhan istzotel Komam tuꞌ xin,
yapni ebꞌyaꞌ iskuywom.
Kaw kꞌayilo iskꞌul ebꞌyaꞌ yilni istzotel Komam yebꞌ huneꞌ ix ix tuꞌ.
Wal xin kaw machi hunu ebꞌyaꞌ qꞌambꞌeni tzet yinh xin tzotel Komam yebꞌ ix,
yebꞌ xin tzet chal Komam yebꞌ ix.
28 Lahwi tuꞌ xin,
isbꞌejnikano ix istzꞌahabꞌ istiꞌ kꞌuh tuꞌ,
isto ix yalno tet anma yul iskonhobꞌ hakaꞌ tiꞌ:
29 —Katawej,
tonhwe jilaꞌ huneꞌ mak mahalni wetan yinh sunil tzet wehikojan.
¿Kꞌuxan tato haꞌ yaꞌ tuꞌ Cristo?
xhi ix.
30 Hayet yabꞌen anma huneꞌ tuꞌ,
istit anma yilno Komam.
31 Yet maxhto chiꞌapni anma iskꞌatanh Komam,
yalni ebꞌyaꞌ iskuywom Komam:
—Mam kuywawom,
waꞌanh,
xhi ebꞌyaꞌ tet Komam.
32 Istaqꞌwi Komam:
—Ay huneꞌ tzet chinlohan kaw mach heyohtajoj,
xhi Komam.
33 Yok ebꞌyaꞌ iskuywom Komam tuꞌ yalno tet hunun hakaꞌ tiꞌ:
—¿Tokꞌanabꞌ xin ay mak mahulikꞌo aqꞌno tzet chislo Komam tiꞌ?
xhi ebꞌyaꞌ.
34 Yalni Komam xin:
—Wal xin,
haꞌ tzet choche Komam chejnheintijan,
haꞌ chiwochehan chinwatxꞌehan,
kat xin inlahnihan ismunil aqꞌbꞌilkano yul inqꞌabꞌan.
Yuxin hayet chinwatxꞌenan ismunil tiꞌ,
kaw lahan yebꞌ hakaꞌ yet lanhan inwaꞌan.
35 Hex tiꞌ cheyala ta kanhebꞌto ixahaw bꞌay chikꞌuplaxkanh ixim trigo.
Kaw haktikꞌam tuꞌ,
yaj chiwalan teyet:
¡Tꞌanhxanhwetoj lah,
naweloj!
Kaw maꞌayilo istiempohal iskutxbꞌalaxiko anma wetan,
hakaꞌ chiyu iskutxbꞌalax ixim trigo yet chiqꞌanbꞌilo ixim.
36 Haꞌ naj chikꞌupnikanh ixim trigo chischah naj istohol,
yechel naj ye naj chiꞌinito anma iskꞌatanh Komam yu ischahni isqꞌinal chiyaqꞌ Komam.
Yuxin naj chitzꞌunni ixim yebꞌ naj chikꞌupnikanh ixim,
lahan istzala iskꞌul ebꞌnaj iskawanhil.
37 Hakaꞌ yalni anma chijabꞌe:
“Nan naj chitxihni ixim trigo,
nanxapaxo naj chikꞌupnikanh ixim,”
xhi.
38 Yuxin chexinchejtojan xol anma,
hakaꞌ ebꞌnaj chikꞌupnikanh ixim trigo tuꞌ,
nan ebꞌnaj bꞌabꞌel munlanahi hakaꞌ yinh istxihnayo ixim,
hex tiꞌ xin kaw toxanhe chexekꞌ hekꞌupuꞌkanh ixim,
xhi Komam tet ebꞌyaꞌ.
39 Kaw txꞌiꞌal anma yul huneꞌ konhobꞌ ay yul ismajul Samaria tuꞌ chahnikano Komam yul yanma,
yuto kaw wiyom yalni ix hakaꞌ tiꞌ:
«Mayalilo yaꞌ wetan yinh sunil tzet xaleinwatxꞌehan,»
xhi ix.
40 Yuxin hayet yapni anma tuꞌ iskꞌatanh Komam,
yalni anma tet Komam tato chikankano Komam yul konhobꞌ tuꞌ.
Hak tuꞌ xin yu iskankano Komam kabꞌ tzꞌayikal bꞌey tuꞌ.
41 Kaw xin hantanheto anma chahnikano Komam yul yanma yet yabꞌen iskuywakanto Komam.
42 Yalni anma tet ix tzotel tet Komam hakaꞌ tiꞌ:
«Wal tinanh,
kaw chijaytojanh yul janmahanh,
yaj maxhnhetaj yu tzet maxawal jetanh,
to yu hanhkawonhanh majabꞌehanh tzet chal Komam,
yuxinto kaw johtajanh ta haꞌ Komam tiꞌ Cristo,
haꞌ Kokolomal kosunil yul sat yibꞌanhqꞌinal tiꞌ,»
xhi anma tet ix.
Yaqꞌ kawxo Komam Jesús iskꞌahol huneꞌ naj chimunla yinta naj rey
43 Yet islahwi kabꞌ tzꞌayik yekꞌ Komam Jesús bꞌey ismajul Samaria tuꞌ xin,
isto Komam bꞌey yul ismajul Galilea.
Jesús sana al hijo de un oficial (Juan 4.43-54)
44 Kaw xin halbꞌilxatikꞌa yu Komam tuꞌ tato kaw machi hunu ebꞌyaꞌ ischejabꞌ Komam Dios xahan chiꞌil-lax yul iskonhobꞌ.
45 Hayet yapni Komam bꞌey Galilea tuꞌ xin,
kaw kꞌul yu ischahlax Komam yu anma,
yuto yil anma tzettaj iswatxꞌe Komam yet yekꞌ qꞌinh Pascua bꞌey Jerusalén,
yet isbꞌeykꞌo anma yinh qꞌinh.
46 Yapni Komam Jesús bꞌey yul konhobꞌ Caná bꞌay eliko ha haꞌ vinohal yu Komam.
Haꞌ bꞌey yul konhobꞌ Capernaúm xin,
ay huneꞌ naj niman yelapno ismunil chimunla yinta naj rey,
ay xin huneꞌ iskꞌahol naj kaw txꞌoj ye iskꞌul yu yabꞌil.
47 Yet yabꞌen naj tato tit Komam Jesús bꞌey Judea yapni bꞌey ismajul Galilea tuꞌ,
isto naj yilno Komam.
Isqꞌanni naj tet Komam tato chito Komam yilaꞌ huneꞌ iskꞌahol naj kaw how yehiko yabꞌil yinh,
lanhanxa iskami.
48 Yalni xin Komam tet naj hakaꞌ tiꞌ:
—Wal hex tiꞌ,
tato mach cheyil sunil wipan yebꞌ ej kꞌaybꞌalkꞌule chinwatxꞌehan,
kaw maxhtikꞌam chinhechahan yul heyanma,
xhi Komam.
49 Yalni naj tet Komam:
—Mamin,
tonh yinh anhe yaqꞌ isbꞌa maxhto chikam inkꞌaholan,
xhi naj.
50 Yalni Komam tet naj:
—Paxanhto hawatut,
kawxa naj hakꞌahol,
xhi Komam tet naj.
Hak tuꞌ yu yanayto naj yul yanma yinh tzet yal Komam,
ispaxto naj yatut.
51 Yet ayko naj yinh isbꞌel bꞌey konhobꞌ Capernaúm tuꞌ,
yapni hunteqꞌan ebꞌnaj ismunlawom naj chahwal yinh yul bꞌeh,
yalni ebꞌnaj tet naj:
—Kawxa naj hakꞌahol,
xhi ebꞌnaj tet naj.
52 Isqꞌambꞌenilo naj mame tuꞌ tet ebꞌnaj ismunlawom:
—¿Hanikꞌ mawatxꞌilo iskꞌul inkꞌaholtuꞌan?
xhi naj.
Yalni ebꞌnaj:
—Ewitax yinh chꞌen hujebꞌ yel qꞌaꞌ yinh naj,
xhi ebꞌnaj.
53 Istxumni naj mame tuꞌ ta hakaꞌtikꞌa orahil chal ebꞌnaj ismunlawom naj tuꞌ,
hak tuꞌ orahil yet yalni Komam Jesús tet naj hakaꞌ tiꞌ:
«Kawxa naj hakꞌahol tuꞌ tinanh,»
xhi Komam.
Hak tuꞌ xin yu ischahnikano naj Komam Jesús yul yanma yebꞌ sunil mak ay bꞌey yul yatut.
54 Haꞌ huneꞌ kꞌaybꞌalkꞌule tiꞌ iswatxꞌe Komam yul ismajul Galilea lahwi isbꞌey Komam yinh qꞌinh bꞌey Judea.
Haꞌ xin iskabꞌ kꞌaybꞌalkꞌule tiꞌ iswatxꞌe Komam.