—Mam kuywawom,

kaw johtajanh tato haꞌ Komam Dios anhe hachti konhhakuyuꞌanh,

yuto machi mak chiyu iswatxꞌen kꞌaybꞌalkꞌule hakaꞌ chawatxꞌe tiꞌ ta mach ayoko Komam Dios yetbꞌihoj,

xhi naj tet Komam.

3 Yalni Komam Jesús tet naj:

—Yinh kaw yeli chiwalan tawet,

maknhetikꞌa mach chipitzkꞌa yinh iskayelal mach chu yok yul isqꞌabꞌ Komam Dios,

xhi Komam tet naj.

4 Isqꞌambꞌen naj Nicodemo tuꞌ xin:

—¿Tzettaxka chu ispitzkꞌa hunu anma yinh iskayelal tato ichamxa?

¿Tom chito yu ismeltzoko yinh ismiꞌ hunelxa kat xin ispitzkꞌa,

hawalni?

xhi naj tet Komam.

5 Istaqꞌwi Komam tet naj:

—Kaw yel chiwalkanojan tawet,

maknhetikꞌa mach chipitzkꞌa yu ha haꞌ yebꞌ xin yu Yespíritu Komam Dios,

kaw mach chiyu yok yul isqꞌabꞌ Komam.

6 Hayet chonhpitzkꞌa yinh komiꞌ,

yeli ay huneꞌ isqꞌinal konimanil chabꞌil ju tet komiꞌ,

yaj kaw yilal kopitzkꞌa yu Yespíritu Komam Dios yunhe kochahni isqꞌinal Espíritu Santo jinh.

7 Mach chikꞌay hakꞌul yuto chiwalan tawet ta yilal chipitzkꞌa sunil anma yinh iskayelal.

8 Hakaꞌtikꞌa jaqꞌeqꞌ tinanh,

kaw tonhe chijabꞌe yekꞌi,

yaj kaw mach johtajoj bꞌaytuꞌwal chikawistita,

kaw mach johtajopaxoj bꞌaytuꞌwal chikawistopaxikoj.

Hakton tuꞌ xin yeh anma chipitzkꞌa yu Yespíritu Komam Dios,

yinh yesalil chipitzkꞌahi,

xhi Komam tet naj.

9 Isqꞌambꞌen naj hunelxa tet Komam:

—¿Tzet xin chu yijni isbꞌa huneꞌ tuꞌ?

xhi naj.

10 Yalni Komam tet naj:

—Hach tiꞌ,

kaw kuywawom hawehiko xol ebꞌnaj Israel,

yaj ¿tzet yinh kaw mach hawohtajo huneꞌ tiꞌ?

11 Yinh kaw yeli haꞌ tzet ohtabꞌil juhanh haꞌ chijalanh,

kat jalnipaxojanh tzet ilbꞌil juhanh.

Wal hex kaw mach cheyayto yul heyanma yinh tzet chijalanh.^a

12 Yet chiwalnihan teyet tzet yelapno ye tzettaj ay yul sat yibꞌanhqꞌinal tiꞌ,

kaw mach cheyayto yul heyanma,

hajxamta chiwalan teyet yinh tzettaj ay yul satkanh chal tuꞌ,

kaw maxhtikꞌam cheyapaxayto yul heyanma.

13 »Wal xin,

kaw maxhto hunu mak xabꞌeyahto yul satkanh tuꞌ,

hach kachannhe Hanin Aqꞌbꞌilintijan texol yu Komam Dios,

titnaj hinan yul satkanh.

14-15 Hakaꞌ yu yanikanh yaꞌ Moisés huneꞌ yechel noꞌ labꞌa yinh te teꞌ bꞌey txꞌotxꞌ desierto,

kaw yilal hak tuꞌ chiyu wahlaxkanhan yinh teꞌ kulus,

yuxinto maknhetikꞌa chinchahnihan yul yanma,

mach chikꞌaytoj,

wal xin chischah huneꞌ isqꞌinal mach istanhbꞌal.

16 »Wal xin,

kaw xahankano ay anma ay yul sat yibꞌanhqꞌinal tiꞌ yu Komam Dios,

yuto yati Komam hunpilan Iskꞌahol koxol,

yuxinto maknhetikꞌa chichahni yul yanma,

mach chikꞌaytoj,

to kaw chischah huneꞌ isqꞌinal mach istanhbꞌal.

17 Hanintiꞌan kaw Iskꞌahol Komam Dios wehan.

Aqꞌbꞌilintijan yu Komam yul sat yibꞌanhqꞌinal tiꞌ,

maxhtaj yu wulan wanokojan isyaꞌtajil yibꞌanh anma,

machoj,

to yu inkolnihan yalanh ismul.

18 »Maknhetikꞌa chinchahnihan yul yanma,

mach chiꞌay isyaꞌtajil yibꞌanh,

wal mak mach chinchahnihan yul yanma xin kaw chitokano ismul yibꞌanh yuto mach chayto yul yanma winhan,

haninnhechꞌan Iskꞌahol Komam Dios intiꞌan.

19 Hulnajinan bꞌey yul sat yibꞌanhqꞌinal tiꞌ yunhe wanikojan anma xol issajilqꞌinal,

yaj xin kaw ay anma mach chiꞌocheni.

Haknhe tuꞌ xin kaw chikawxiko ismul yibꞌanh yu istxꞌojal chiswatxꞌe anma tuꞌ,

yuto yet qꞌejholo yehi.

20 Sunil hunteqꞌan anma chiwatxꞌen ismachiswalilal,

mach chiyoche huneꞌ issajilqꞌinal tiꞌ.

Mach chisjepaxti xol,

yuto mach chiyoche iskꞌul tato chꞌel yenhel sunil istxꞌojal chilaiswatxꞌe.

21 Yajaꞌ wal mak chiyijen kuybꞌanile aqꞌbꞌilkano yu Komam Dios xin,

chako isbꞌa xol issajilqꞌinal yunhe yixtanhwiloj ta haꞌ tzet chiswatxꞌe,

lahan hakaꞌ tzet choche Komam Dios,

xhi Komam tet naj Nicodemo tuꞌ.

22 Lahwi tuꞌ,

isto Komam Jesús yebꞌ ebꞌyaꞌ iskuywom bꞌey yul ismajul Judea.

Haꞌ tuꞌ xin ehayo Komam hanikꞌ tiempohal yebꞌ ebꞌyaꞌ;

chiyanikanh ebꞌyaꞌ haꞌ iswiꞌ anma.

23 Wal yaꞌ Juan xin,

ayko yaꞌ yanikanh haꞌ iswiꞌ anma bꞌey Enón iskawilal Salim,

yuto kaw txꞌiꞌal ha haꞌ bꞌey tuꞌ.

Haꞌ tuꞌ xin chiꞌapni anma iskꞌatanh yaꞌ yu yahkano haꞌ iswiꞌ.

24 Yu hunteqꞌan tiꞌ yet maxhto chiꞌalaxiko yaꞌ preso.

25 Yet hunel tuꞌ xin,

ok ebꞌyaꞌ chikuywi yinta yaꞌ Juan isteyele isbꞌa yebꞌ huneꞌ naj israelita yinh tzet chiyu kosajnhen kobꞌa hakaꞌ yalni chejbꞌanile.

26 Isto ebꞌyaꞌ yalno tet yaꞌ Juan:

—Mam kuywawom,

naj ayko takꞌatanh yet ayach bꞌey haꞌ niman Jordán,

naj hawal jetanh,

lanhan yanikanh naj haꞌ iswiꞌ anma.

Kaw xin hantanhe anma chiꞌokkano tzujno yinta naj,

xhi ebꞌnaj tet yaꞌ Juan.

27 Istaqꞌwi yaꞌ Juan tet ebꞌyaꞌ:

—Kaw machi hunu mak chiwatxꞌen huneꞌ munil tiꞌ tato maxhtaj Komam Dios chiꞌaqꞌni tet.

28 Wal hex hex tiꞌ,

xaheyabꞌe tzet walan teyet tato maxhtaj hinan Cristo hinan.

Wal xin kaw bꞌabꞌel kinchejlaxtijan yalanhto yet maxhto chihul Komam Cristo yul sat yibꞌanhqꞌinal tiꞌ.

29 Qꞌinalo ta ay hunu mohyilal tinanh,

haꞌ naj chimohyi tuꞌ,

haꞌ naj chiꞌiqꞌni ix ix,

wal naj yamigo naj ayko iskꞌatanh,

chitzala naj yabꞌen istzotel naj chimohyi tuꞌ.

Hak tuꞌ xin istzala wanmahan wabꞌenan yapni anma iskꞌatanh Komam Jesús.

30 Yuxin kaw yilal nixhtejal yokkano yip ismunil Komam,

wal hinan xin,

nixhtejal islahwipaxkano wettiꞌan,

xhi yaꞌ Juan tet ebꞌyaꞌ chikuywi yintaj.

31 Haꞌ Komam tit yul satkanh,

haꞌ kaw ekꞌbꞌal jibꞌanh kosunil.

Wal hanhonh tiꞌ yet sat txꞌotxꞌal jehi,

yuxin hanhe tzet ay yul sat yibꞌanhqꞌinal tiꞌ haꞌ chijala.

Wal huneꞌ Mak ekꞌbꞌal kosataj,

haꞌ ton Komam ispeto yul satkanh.

32 Yuxin haꞌ tzet ilbꞌil yu,

yebꞌ xin tzet abꞌebꞌil yu,

haꞌ chiyala,

yaj xin machi mak chiyayto yul yanma yinh tzet chiyala.

33 Yaj tato ay mak chichahni tzet chal Komam tuꞌ yul yanma,

huneꞌ mak tuꞌ chako isbꞌa yalniloj ta haꞌ tzet chal Komam Dios kaw yeli.

34 Huneꞌ Komam aqꞌbꞌilti yu Komam Dios,

haꞌ Istzotiꞌ Komam Dios chalikꞌoj,

yuto kaw nohnanhetikꞌako Komam Espíritu Santo yinh yu Komam Dios.

35 Kaw xahan ay Iskꞌahol Komam Dios tuꞌ yu,

yuxinto kaw yako Komam Dios Mame sunil tzettaj ye tuꞌ yul isqꞌabꞌ Iskꞌahol tuꞌ.

36 Hak tuꞌ xin,

makxanhetikꞌa chichahni Iskꞌahol Komam yul yanma,

chischah huneꞌ isqꞌinal mach istanhbꞌal,

yaj wal mak mach chichahni Komam yul yanma xin,

kaw mach chischah isqꞌinal mach istanhbꞌal,

to haꞌ isyaꞌtajil chischah yu Komam.