Huneꞌ mohyilal bꞌey konhobꞌ Caná
2
Haxa yet yoxihalxa xin,
yok huneꞌ mohyilal bꞌey yul konhobꞌ Caná ay yul ismajul Galilea.
Ayko ismiꞌ Komam Jesús xol huneꞌ mohyilal tuꞌ.
2 Awtebꞌilpaxo Komam Jesús yebꞌ ebꞌyaꞌ iskuywom yinh huneꞌ qꞌinh tuꞌ.
3 Yajaꞌ xin lahwilo isvino ebꞌnaj ay ismohyilal tuꞌ,
yuxin yal ismiꞌ Komam tet:
—Kaw malahwi isvino ebꞌnaj,
xhi ismiꞌ Komam.
4 Istaqꞌwi Komam xin:
—¿Tzet yinh wetan chawal huneꞌ tiꞌ miꞌ?
Wal xin maxhto chiꞌapni istiempohal inyenilo wipan tet anma,
xhi Komam.
El milagro en Caná (Juan 2.1-12)
5 Lahwi tuꞌ xin,
yalni ismiꞌ Komam tet ebꞌnaj chejabꞌ yinh qꞌinh tuꞌ:
—Yijewe hewatxꞌen sunil tzet chal naj teyet,
xhi ismiꞌ Komam.
6 Haꞌ bꞌey tuꞌ xin ayayo wajebꞌ nimeta chꞌen mok tzꞌahabꞌ.
Aymi oxebꞌo maka kanhebꞌo nimeta tzꞌahabꞌ haꞌ chiꞌayto yul hunun.
Yul hunteqꞌan mok tuꞌ chiꞌayto ha haꞌ chiꞌokniko yu ebꞌnaj Israel istxꞌahni isqꞌabꞌ hakaꞌ yalni ischejbꞌanil ebꞌnaj.
7 Yalni Komam tet ebꞌnaj chejabꞌ yinh qꞌinh tuꞌ:
—Nohtzewe hunteqꞌan mok tiꞌ yu ha haꞌ,
xhi Komam tet ebꞌnaj.
Hak tuꞌ xin yu yok ebꞌnaj isnohtzenoj.
8 Yet nohnaxa hunteqꞌan chꞌen mok tuꞌ xin,
yalni Komam tet ebꞌnaj:
—Iwelti haꞌ yul mok tuꞌ tinanh,
kat xin heyinito tet naj chiꞌilni yok anma sat mexha,
xhi Komam.
Hak tuꞌ yute ebꞌnaj.
9 Yabꞌlen naj chiꞌilni yok anma sat mexha tuꞌ ha haꞌ ok vinohal,
kaw xin mach yohtajo naj bꞌaytuꞌwal kaw istitiko hunteqꞌanxa vino tuꞌ.
Wal ebꞌnaj chejabꞌ tuꞌ xin,
yohta ebꞌnaj tzet yehi,
yuto haꞌ ebꞌnaj inilti ha haꞌ yul chꞌen mok tuꞌ.
Hayet yabꞌlen naj chiꞌilni yok anma sat mexha,
huneꞌ vino tuꞌ,
yawten naj naj mohyom tuꞌ,
10 yalni naj tet naj:
—Haꞌ chute anma,
to bꞌabꞌel chiꞌalaxikꞌo vino kaw kꞌul tet anma awtebꞌil,
yet chilahwi yukꞌni anma teꞌ vino kaw kꞌul tuꞌ,
kat xin yalaxikꞌo hunteqꞌan mach lahano iskꞌulal.
Wal hach tiꞌ yinhxa islahobꞌal chawaqꞌ vino kaw kꞌul,
xhi naj.
11 Haꞌ xin bꞌey yul konhobꞌ Caná ayko yul ismajul Galilea,
haꞌ bꞌey tuꞌ isye Komam Jesús bꞌabꞌel kꞌaybꞌalkꞌule.
Hak tuꞌ yu isyeni Komam ishelanil yip,
wal ebꞌyaꞌ chikuywi yinta Komam xin,
kaw yakanayto ebꞌyaꞌ yul yanma yinh Komam.
12 Lahwi tuꞌ xin,
isto Komam bꞌey yul konhobꞌ Capernaúm;
istopaxo ismiꞌ Komam yebꞌ yuxhta Komam,
yebꞌpaxo xin ebꞌyaꞌ chikuywi yintaj.
Haꞌ tuꞌ xin ehayo hayebꞌ tzꞌayikal.
Yet istzumbꞌenilti Komam Jesús ebꞌnaj txonhwom yul Yatut Komam Dios
13 Yet toxa chiꞌayilo qꞌinh Pascua,
isqꞌinh anma Israel,
isto Komam Jesús bꞌey yul konhobꞌ Jerusalén.
Jesús en el patio del templo (Juan 2.13-25)
14 Yet yokto Komam yul Yatut Komam Dios,
yilni Komam tato ayikto ebꞌnaj txonhom wakax,
yebꞌ ebꞌnaj txonhom meꞌ,
yebꞌ ebꞌnaj txonhom palamuch.
Aypaxo xin ebꞌnaj helom melyu tzꞌonhanikto bꞌey tuꞌ.
15 Hayet yilni Komam huneꞌ tuꞌ,
iswatxꞌenayo Komam huneꞌ tzꞌum yinh hunteqꞌan lasu,
yok Komam istzumbꞌenilti ebꞌnaj txonhom wakax yebꞌ ebꞌnaj txonhom meꞌ.
Istixhnipaxkanto Komam ismelyu ebꞌnaj helom melyu.
Ispakꞌchankanokanh Komam ismexha ebꞌnaj.
16 Yalni xin Komam tet ebꞌnaj txonhom palamuch hakaꞌ tiꞌ:
—Iwelto hunteqꞌan noꞌ chꞌik tiꞌ bꞌey tiꞌ,
mach chu heyaqꞌaꞌko yatut Inmaman txonhbꞌalil,
xhi Komam tet ebꞌnaj.
17 Hak tuꞌ xin,
yu isnahniti ebꞌyaꞌ chikuywi yinta Komam Jesús tzet tzꞌibꞌnhebꞌilkanayo yul Yum Komam Dios,
bꞌay chal hakaꞌ tiꞌ:
«Yu kaw xahan ay hawatut wuhan,
yuxin kaw yaꞌ chuko yinh wanmahan,»a
xhihayoj.
18 Isqꞌambꞌen xin ebꞌnaj yahawil Israel tet Komam:
—¿Tzet hunu chawaqꞌ yechelo jetanh yunhe johtanhenilojanh tato ay hawip hawatxꞌen hunteqꞌan tiꞌ?
xhi ebꞌnaj tet Komam.
19 Istaqꞌwi Komam:
—Uchkꞌaweyo huneꞌ Yatut Komam Dios tiꞌ,
kat xin wahnikanhan selel yinh oxebꞌ tzꞌayik,
xhi Komam tet ebꞌnaj.
20 Yalni xin ebꞌnaj yahawil yinh anma Israel tuꞌ tet Komam:
—Huneꞌ Yatut Komam Dios tiꞌ,
kaw 46 (wajebꞌ yoxkꞌal) habꞌil yitoj yet yahi.
¿Kaw xin oxebꞌnhechꞌan tzꞌayik chawutekanh selel hawalni?
xhi ebꞌnaj tet Komam.
21 Yaj kaw maxhtikꞌa txumchalo yu ebꞌnaj bꞌaytet huneꞌ nha bꞌay chitzotel Komam tuꞌ,
tonhka xin haꞌ Komam bꞌay chitzoteli.
22 Yuxin hayet yitzitzbꞌikanh Komam xol anma kamom,
isnahniti ebꞌyaꞌ chikuywi yinta Komam tato halbꞌilkano huneꞌ tuꞌ yu Komam.
Yanayto ebꞌyaꞌ yul yanma yinh tzet tzꞌibꞌnhebꞌilkano yul Hum yu ischejabꞌ Komam Dios yet payat,
yebꞌ yinh tzet yal Komam Jesús.
Kaw yohta Komam Jesús tzet ye yanma hunun anma
23 Yet aykꞌo Komam Jesús yul konhobꞌ Jerusalén yinh qꞌinh Pascua,
kaw hantanhe anma chahnayto Komam yul yanma yu kꞌaybꞌalkꞌule iswatxꞌe Komam bꞌey tuꞌ.
24 Yajaꞌ machi kawxi iskꞌul Komam yinh anma,
yuto kaw yohta Komam anma sunil.
25 Mach yechelto ay mak chihalni tet Komam tzet ye anma,
yuto kaw yohta Komam tzet ye yanma hunun anma.