Ebꞌnaj yuxhta Komam Jesús mach yayto ebꞌnaj yul yanma yinh Komam
7
Lahwi tuꞌ xin,
istzabꞌniko Komam Jesús yekꞌ yul ismajul Galilea.
Matxa isje iskꞌul Komam ehoyo yul ismajul Judea yuto kaw chiyoche ebꞌnaj yahawil yinh ebꞌnaj Israel yaqꞌaꞌ kamo Komam.
2 Toxa xin chiꞌichiko huneꞌ qꞌinh Lexhpat isbꞌi,
huneꞌ isqꞌinh anma Israel,
Los líderes judíos quieren matar a Jesús (Juan 7.1-24)
—Mach chaxhkan bꞌey tiꞌ,
wal xin asiꞌ bꞌey Judea bꞌay kaw ay anma chikuywi tawintaj,
haxinwal chil anma kꞌaybꞌalkꞌule chilahawatxꞌe tiꞌ.
4 Yuto ta ay hunu mak choche chiꞌohtanhelaxi mach chiswatxꞌe hunu tzet ye tuꞌ bꞌay ewan,
yuxin yilal hayeni sunil kꞌaybꞌalkꞌule chilahawatxꞌe tiꞌ yinh sat anma,
xhi ebꞌnaj tet Komam.
5 Hak tuꞌ yute yalni ebꞌnaj yuto mach chayto ebꞌnaj yul yanma yinh Komam.
6 Yuxinto yal Komam tet ebꞌnaj hakaꞌ tiꞌ:
—Maxhto chiꞌapni istzꞌayikal inyenilo hinbꞌahan tet anma,
wal hex tiꞌ,
tzijxanhe tzꞌayikal kꞌul heyenilo hebꞌa.
7 Anma yul sat yibꞌanhqꞌinal tiꞌ mach chexisyaha,
wal hinan xin kaw kaj chinil-laxan,
yuto chiwalan tato kaw machiswalil sunil tzet chiswatxꞌe anma.
8 Asiꞌwe hex tiꞌ yinh qꞌinh tuꞌ,
wal hinan mach chintohan,
yuto maxhto chiꞌapni istiempohal inyenilo hinbꞌahan tet anma,
xhi Komam.
9 Yet lahwi yalni Komam hunteqꞌan tiꞌ tet ebꞌnaj xin,
iskankano Komam bꞌey Galilea.
To Komam Jesús yinh qꞌinh Lexhpat
10 Yet xato ebꞌnaj yuxhta Komam Jesús tuꞌ yinh qꞌinh istopaxo Komam,
yaj yinh ewantajil.
11 Kaw xin chissayikꞌo ebꞌnaj iswiꞌehal Israel tuꞌ Komam Jesús yinh qꞌinh tuꞌ,
chalni ebꞌnaj:
—¿Bꞌaytaxka tuꞌ ay huneꞌ naj winaj tuꞌ?
xhi ebꞌnaj.
12 Kaw xin nanantaxanhe chal anma yinh Komam,
ay anma chalni:
«Kaw kꞌulkano huneꞌ yaꞌ tuꞌ,»
xhi.
Aypaxo anma chihalni:
«Kaw machiswalil huneꞌ naj tuꞌ,
kaw tonhe chiyaqꞌ subꞌchaho naj anma,»
xhipaxoj.
13 Yajaꞌ xin kaw ewanta chitzotel anma tuꞌ yuto kaw chixiw anma tet ebꞌnaj yahawil yinh anma Israel.
14 Hayet kaw niman qꞌinh tuꞌ,
yokto Komam Jesús yul Yatut Komam Dios,
istzabꞌniko Komam iskuyni anma.
15 Kaw xin chikꞌay iskꞌul ebꞌnaj Israel tuꞌ yabꞌen tzet chal Komam.
Chilayalni ebꞌnaj hakaꞌ tiꞌ:
—¿Tzet chute huneꞌ naj tiꞌ yohtanhenilo sunil hunteqꞌan tiꞌ?
Yaj mach kuywina naj,
xhi ebꞌnaj yinh Komam.
16 Istaqꞌwikanh Komam tet ebꞌnaj:
—Haꞌ kuybꞌanile chiwalan teyet tiꞌ mach wetojan inchukilan,
yet Komam chejnheintijan.
17 Tato ay mak chiyoche chisyije tzet chal Komam Dios,
kaw yilal istxumniloj tato yet Komam ye kuybꞌanile tiꞌ.
Yohtapaxoj ta maxhtaj yul inwiꞌan inchukilan chiwitijan kat xin walnihan teyet.
18 Maknhetikꞌa yul iswiꞌ chiyiti tzet chiyaqꞌ iskuyuꞌ anma,
chiyute huneꞌ tuꞌ yunhe yok iswinajil sata anma.
Wal hanin chejbꞌilintijan yu Komam Dios,
haꞌ yalaxiko ismay Komam yu anma haꞌ chinsayan,
yuxin kaw isyelal sunil tzet chiwaltiꞌan,
kaw machi leqꞌtiꞌal yinh.
19 »Kaw aqꞌbꞌil isley Komam Dios teyet yu yaꞌ Moisés,
yajaꞌ machi hunujex cheyije tzet chal huneꞌ ley tuꞌ.
¿Tzet yinh yuxinto chinhepotxꞌan heyalni?
xhi Komam tet ebꞌnaj.
20 Istaqꞌwi ebꞌnaj xin,
yalni ebꞌnaj tet Komam:
—Etzanhem ay hunu ischejabꞌ naj matzwalil ayko tawinh.
¿Mak chaxhaqꞌni kamo hawalni?
xhi ebꞌnaj tet Komam.
21 Yalnipaxo Komam tet ebꞌnaj:
—Yu huneꞌ kꞌaybꞌalkꞌule inwatxꞌehan yinh huneꞌ tzꞌayikal xewilal kaw hesunil chikꞌayilo hekꞌul yinh.
22 Hatax ebꞌnaj heyichmam ichenkanokanh huneꞌ circuncisión,
haꞌ xin yaꞌ Moisés chihalni tato kaw yilal isyijelaxi.
Yuxinto waxanhka yinh istzꞌayikal xewilal,
cheyaqꞌ circuncidar nixhte unin winaj semanahil ixto ispitzkꞌahi.
23 Wal hex hex tiꞌ,
istzꞌayikalojabꞌ xewilal masan cheyaqꞌ circuncidar nixhte unin yunhe mach chemanhkꞌo isley yaꞌ Moisés heyalni.
Tato kaw hak tuꞌ cheyute,
¿tzet yinh yuxinto kaw chichiwa hekꞌul winhan yuto yet istzꞌayikal xewilal waqꞌni kawxojan huneꞌ naj?
24 Mach tonheho chexok heyilaꞌ yinh tzet chiswatxꞌe anma.
Tato cheyoche chexok heyilaꞌ tzet yehi,
ilwe yinh kaw istoholal,
xhi Komam tet ebꞌnaj.
Yal Komam Jesús bꞌay kaw istitikoj
25 Ay xin hunteqꞌan ebꞌnaj ah Jerusalén halni hakaꞌ tiꞌ:
—¿Machmi taj naj tiꞌ chal ebꞌnaj ispotxꞌoꞌ?
Los líderes tratan de arrestar a Jesús (Juan 7.25-53)
26 Kaw yinh sat anma lanhan istzotel naj lah,
yaj machi hunu mak chikachni naj istzoteli.
¿Mato xayayto ebꞌnaj jahawil tiꞌ yul yanma tato haꞌ naj tiꞌ Cristo?
27 Yet chul Komam Cristo tuꞌ,
machi hunu mak ohtanhe bꞌaytuꞌwal chikawistitiko.
Wal naj tiꞌ xin kaw johtaj bꞌaytuꞌwal titnako naj,
xhi ebꞌnaj yinh Komam.
28 Yet yabꞌen Komam yalni ebꞌnaj hakaꞌ tuꞌ,
haꞌ ton yet lanhan iskuywa Komam yul Yatut Komam Dios,
yalni Komam yinh kaw ip:
—Kaw kinheyohtajan heyalni,
yebꞌ xin heyohtaj bꞌaytuꞌwal titnaj inpaxojan.
Yajaꞌ kaw maxhtaj hinan witi hinbꞌahan inchukilan,
wal xin chejbꞌilintijan yu Komam Dios,
Komam kaw isyelalnhetikꞌa chala,
yaj mach heyohtajo Komam.
29 Wal intiꞌan kaw wohtajan Komam tuꞌ,
yuto yinh Komam titnaj hinan,
haꞌ kinanitijan,
xhi Komam.
30 Yet lanhan yalni Komam huneꞌ tuꞌ xin,
ay hunteqꞌan ebꞌnaj yoche inoto Komam yul teꞌ,
yaj xin machi hunu mak tzabꞌnayo Komam,
yuto maxhto chiꞌapni istiempohal bꞌay chikami.
31 Kaw xin hantanhe mak chanayto Komam yul yanma,
chilayalni hakaꞌ tiꞌ:
—Yet chihul Komam Cristo tuꞌ,
¿tom kaw ekꞌbꞌalto kꞌaybꞌalkꞌule chisye sata sunil tzet chisye naj tiꞌ jet?
xhi anma yinh Komam.
Ischej ebꞌnaj fariseo tzabꞌlaxoyo Komam Jesús
32 Yet yabꞌen ebꞌnaj fariseo tzet yal anma yinh Komam Jesús tuꞌ,
iskutxbꞌanayo isbꞌa ebꞌnaj yebꞌ xin ebꞌnaj yahawil sacerdote,
ischejnito ebꞌnaj ebꞌnaj mayor chitanhen Yatut Komam Dios yu istzabꞌnayo ebꞌnaj Komam,
kat yanikto Komam yul preso.
33 Yalni Komam hakaꞌ tiꞌ:
—Hanikꞌxanhechꞌan tiempohal ayinikꞌojan texol,
kat xin inpaxtojan iskꞌatanh Komam chejnheintijan.
34 Hex tiꞌ chexok saywal winhan,
yaj matxa chinilchahan heyu,
yuto mach chu heyapni bꞌay chinapni tuꞌan,
xhi Komam tet ebꞌnaj.
35 Yichiko ebꞌnaj yahawil konhobꞌ Israel tuꞌ isqꞌambꞌen tet hunun hakaꞌ tiꞌ:
—¿Bꞌaytaxka tuꞌ chito naj tiꞌ,
yuxin chal naj tato matxa chiꞌilcha naj ju?
Ay ebꞌnaj jet konhobꞌ pujanto xol ebꞌnaj griego,
¿ham tuꞌ chito naj kuywal xol ebꞌnaj,
kat yok naj iskuyno ebꞌnaj griego tuꞌ yalni?
36 ¿Tzet kaw chalilo huneꞌ chal naj tiꞌ:
“Chinhesayaꞌan,
yaj matxa chinilchahojan heyu,
yuxinto mach chiyu heyapni bꞌay chinapni tuꞌan?”
xhi naj,
xhi ebꞌnaj yinh Komam.
Huneꞌ isnuqꞌ ha haꞌ mach istanhbꞌal
37 Haꞌ islahobꞌal tzꞌayik qꞌinh tuꞌ,
haꞌ kaw ay yelapno ye yul sat anma Israel.
Yinh huneꞌ tzꞌayik tuꞌ xin,
ah linhno Komam Jesús,
yalni Komam yinh kaw ip hakaꞌ tiꞌ:
—Makex chitaj hetiꞌ titanhwe inkꞌatanhan,
kat heyukꞌni huneꞌ ha haꞌ chiwaqꞌan.
38 Hakaꞌ yalni yul Yum Komam Dios bꞌay chala:
“Haꞌ mak chiꞌanayto yul yanma winhan,
hakaꞌ chiyu ispitzkꞌa isnuqꞌ ha haꞌ chiꞌel yojomal,
hak tuꞌ chiyu ispitzkꞌa isnuqꞌ haꞌ yet qꞌinale yul yanma,”a
xhihayoj,
xhi Komam tet ebꞌnaj.
39 Yal Komam Jesús huneꞌ tiꞌ yinh Komam Espíritu Santo chischah makta chiꞌanayto yul yanma yinh Komam.
Yet huneꞌ tiempohal tuꞌ xin,
maxhto chiꞌayilo Komam Espíritu Santo isyayil maxhto chiꞌilaxto Komam yul satkanh.
Nananta yute istxumni anma yinh Komam Jesús
40 Yet yabꞌen anma kutxaniko tuꞌ yinh tzet yal Komam Jesús,
ay anma halni hakaꞌ tiꞌ:
«Yinh kaw yeli,
haꞌ yaꞌ tiꞌ ischejabꞌ Komam Dios halbꞌilkanoj ta chuli,»
xhi.
41 Aypaxo mak halni hakaꞌ tiꞌ:
«Haꞌ ton yaꞌ tiꞌ Cristo,
echmabꞌil yul ju,»
xhi.
Aypaxo huneꞌxa majan anma halni:
«Yaꞌ Cristo tuꞌ,
¿tom Galilea chitit yaꞌ heyalni?
42 Chal yul Yum Komam Dios tato haꞌ bꞌey yul konhobꞌ Belén,
yul iskonhobꞌ yaꞌ rey David chipitzkꞌa yaꞌ Cristo tuꞌ,
yuto yuninal yaꞌ rey David ye yaꞌ,»
xhi hunmajanxa anma.
43 Hak tuꞌ yu ispohnito isbꞌa anma yu Komam.
44 Aypaxo ebꞌnaj xin etza inito Komam yul preso,
yaj machi hunu mak yako isqꞌabꞌ yinh Komam.
Maxhtikꞌa ischah ebꞌnaj yahawil konhobꞌ Komam Jesús
45 Haxa yet ismeltzo ebꞌnaj chitanhen Yatut Komam Dios iskꞌatanh ebꞌnaj fariseo,
isqꞌambꞌen ebꞌnaj tet ebꞌnaj:
—¿Tzet yinh yuxinto machi maxeyiti naj Jesús tuꞌ?
xhi ebꞌnaj.
46 Yalni ebꞌnaj hakaꞌ tiꞌ:
—Kaw machi hunu mak kaw helan istzotel hakaꞌ istzotel naj,
xhi ebꞌnaj yinh Komam.
47 Yalni xin ebꞌnaj fariseo tuꞌ tet ebꞌnaj:
—¿Tom haꞌ hunex cheyaqꞌ subꞌchaho hebꞌa tet huneꞌ naj tuꞌ?
48 ¿Tom ay hunu ebꞌnaj yahawil chiꞌanayto yul yanma yinh tzet chal naj,
maka hunujonhanh hanhonh fariseo honhtiꞌanh?
49 Hanhkꞌanhe hunteqꞌan anma kaw mach yohtajo isley yaꞌ Moisés,
haꞌ chisubꞌcha yu naj,
yajaꞌ xin chiꞌay isyaꞌtajil yibꞌanh hunteqꞌan anma tuꞌ yu Komam Dios,
xhi ebꞌnaj.
50 Ay xin huneꞌ naj fariseo Nicodemo isbꞌi,
naj bꞌeykꞌo tzotelo tet Komam yet aqꞌbꞌalil,
haꞌ naj xin halni tet ebꞌnaj yetbꞌi tuꞌ:
51 —Haꞌ chiyute yalni koley tato mach chu iskawxiko ismul hunu naj yibꞌanh yalanhto maxhto chijabꞌe tzet chal naj,
yunhe johtanheniloj tzet iswatxꞌe naj,
xhi naj Nicodemo tuꞌ.
52 Yuxinto yal ebꞌnaj yetbꞌi naj tuꞌ tet:
—¿Tom ah Galilea hachpaxoj?
Wal xin say yul Istzotiꞌ Komam Dios kat hawilni tato ay hunu ischejabꞌ Komam Dios chitit bꞌey Galilea tuꞌ,
xhi ebꞌnaj.
53 Lahwi tuꞌ xin,
ispaxto ebꞌnaj yatut.