Chálo huneꞌ ix yinh ismul
8
Wal Komam Jesús xin to Komam bꞌey huneꞌ wonhan,
Olivo isbꞌi.
2 Yinh huneꞌxa tzꞌayikal xin,
yapni Komam hunelxa yul Yatut Komam Dios yinh kaw sahabꞌ sakꞌayal.
Kaw xin hantanhe anma apni iskꞌatanh Komam.
Lahwi tuꞌ xin,
yay tzꞌonhno Komam istzabꞌniko iskuyni anma tuꞌ.
3 Hunepixto xin yiniti ebꞌnaj fariseo yebꞌ ebꞌnaj chikuyni anma yinh isley yaꞌ Moisés huneꞌ ix ix tet Komam.
Kaw kꞌuxan ischahlo ix yinh ismul yu ebꞌnaj.
Yalaxiko ix xol anma kutxaniko iskꞌatanh Komam tuꞌ.
4 Yalni ebꞌnaj tet Komam:
—Mam kuywawom,
machahlo huneꞌ ix tiꞌ juhanh iskꞌatanh iswinaj.
5 Wal xin,
chal isley yaꞌ Moisés tato ebꞌix ix txꞌoj ye iswiꞌ hakaꞌ huneꞌ ix tiꞌ,
yilal isqꞌojlaxkamo ebꞌix,
yajaꞌ ¿tzimi chawute hawalnipaxo hach tiꞌ?
xhi ebꞌnaj tet Komam.
6 Yal ebꞌnaj hakaꞌ tuꞌ yunhe yilwen ebꞌnaj Komam,
yebꞌ yunhe yaykꞌay Komam yinh hunu istxꞌojal,
kat xin yok ebꞌnaj aqꞌokꞌule yinh Komam,
chute yalni.
7 Yaj xin tonhe ay kꞌonhno Komam,
istzabꞌniko istzꞌibꞌli sat txꞌotxꞌ yu yiximal isqꞌabꞌ.
Aynhetikꞌako xin ebꞌnaj isqꞌambꞌen tet Komam tzet kaw chiꞌelkaniko ix,
yuxinto ah tꞌanhno Komam,
yalni hakaꞌ tiꞌ:
—Maknhetikꞌa kaw machi nichꞌano ismul texol,
haꞌojabꞌ bꞌabꞌel chꞌaqꞌni chꞌen qꞌojbꞌal yinh ix,
xhi Komam.
8 Lahwi tuꞌ yaypaxo kꞌonhno Komam,
istzabꞌniko istzꞌibꞌli sat txꞌotxꞌ hunelxa.
9 Yet yabꞌen ebꞌnaj tzet yal Komam tuꞌ,
istxumni isbꞌa yanma ebꞌnaj ta machi hunu ebꞌnaj kꞌul,
yuxin hununtajil yu yel ebꞌnaj iskꞌatanh Komam.
Bꞌabꞌel el ebꞌnaj ekꞌna ichamtaxa,
lahwi tuꞌ istopaxo ebꞌnaj tzehtaj.
Hak tuꞌ yu iskankano Komam ischukil yebꞌ ix tuꞌ.
10 Lahwi tuꞌ xin,
yah linhno Komam,
isqꞌambꞌen Komam tet ix:
—Ix,
¿bꞌaytuꞌwal ay ebꞌnaj chiꞌaqꞌwi kꞌule tawinh?
¿Tom kaw machi hunu ebꞌnaj makaxhqꞌojnikamoj?
xhi Komam tet ix.
11 —Machoj Mamin,
machi hunu maka,
xhi ix tet Komam.
—Hakinpax tuꞌan,
mach chiwalan ta chaxhqꞌojlax kamo yu hamul.
Asiꞌ xin,
matxa chawako hamul hunelxa,
xhi Komam tet ix.
Komam Jesús haꞌ issajilqꞌinal yinh anma
12 Yalnipaxo Komam tet anma hunelxa:
—Wal hanintiꞌan,
kaw hakaꞌ issajilqꞌinal wehayojan xol anma yul sat yibꞌanhqꞌinal tiꞌ.
Maknhetikꞌa chꞌok tzujno wintajan chiwaqꞌan issajilqꞌinal yul yanma.
Yu huneꞌ issajilqꞌinal tiꞌ xin,
chischah isqꞌinal mach istanhbꞌal.
Matxa xin chiꞌekꞌ xol qꞌejholo,
xhi Komam.
13 Yalni ebꞌnaj fariseo xin:
—Kaw matzet chalilo tzet chawal tiꞌ,
yuto hach tiꞌ,
hach kaw chaxhtzotel tawinh,
xhi ebꞌnaj tet Komam.
14 Istaqꞌwi Komam:
—Waxanhka kaw hankawinan chiwalan yinh tzet wehan,
yaj kaw isyelal sunil tzet chiwalan.
Yuto hanintiꞌan wohtajan bꞌaytuꞌwal titnaj hinan,
kaw wohtapaxojan bꞌaytuꞌwal chikawintokojan.
Wal hex hex tiꞌ,
kaw mach heyohtajo bꞌaytuꞌwal titnaj hinan,
yebꞌ bꞌaytuꞌwal chintopaxojan.
15 Wal hex hex tiꞌ,
kaw komonnhetikꞌa chexok heyilaꞌ tzet ye anma,
yaj wal hinan mach tonhetikꞌaho chinokan wilaꞌan tzet chiꞌeliko anma.
16 Yajaꞌ yet chiwilnihan yinh tzet chiꞌeliko anma,
chiwilan yinh kaw istoholal,
yuto mach inchukilojan chiwilan tzet chiꞌeliko anma,
to haꞌ hun Inmaman anheintijan,
haꞌ chiꞌilni tzet chiꞌeliko anma wintajan.
17 Chal hekuybꞌanil tato ay kawanho testigo lahan yalni yinh hunu tzet ye tuꞌ,
kaw yel huneꞌ tuꞌ chal tuꞌ.
18 Ilwekꞌanabꞌ xin,
ay kawanh mak chaqꞌ testigohal.
Kaw testigo wehikojan winhan,
yebꞌ xin Inmaman anheintijan haꞌ chitzotel winhan,
xhi Komam tet ebꞌnaj.
19 Lahwi tuꞌ xin isqꞌambꞌen ebꞌnaj tet Komam:
—¿Bꞌaytuꞌwal ay hamam tuꞌ xin?
xhi ebꞌnaj.
Istaqꞌwi Komam tet ebꞌnaj:
—Hex tiꞌ,
mach kinheyohtajojan,
kaw xin mach heyohtajo Inmamtuꞌan.
Qꞌinalo tato kinheyohtajan,
heyohtapaxo Inmaman,
xhi Komam.
20 Hayet iskuywa Komam Jesús yul Yatut Komam Dios yalnikano Komam hunteqꞌan tiꞌ,
iskawilal bꞌay chibꞌey anma yaqꞌaꞌkano yofrenda.
Yaj xin machi hunu mak tzabꞌnayo Komam,
yuto maxhto chiꞌapni istzꞌayikal bꞌay chikami.
Haꞌ bꞌay chintohan mach chu hetohi, xhi Komam
21 Yalnipaxo Komam Jesús hunelxa:
—Hanintiꞌan chintohan,
wal xin chinhesayaꞌkꞌojan yajaꞌ mach chinilchahan heyu,
yuto mach chu heto bꞌay chinto tuꞌan.
Wal hex hex tiꞌ yinh hemul chexkamkantoj,
xhi Komam.
22 Yuxin yal ebꞌnaj yahawil yinh konhobꞌ Israel:
—¿Tom xin chispotxꞌ isbꞌa naj,
yuxinto chal naj tato kaw mach chu japni bꞌay chiꞌapni naj tuꞌ?
xhi ebꞌnaj yinh Komam.
23 Yalnipaxo Komam tet ebꞌnaj:
—Wal hex hex tiꞌ,
kaw yet sat txꞌotxꞌal heyehi,
wal intiꞌan yet satkanh wehan,
kaw yet yul sat yibꞌanhqꞌinal tiꞌ heyehi,
wal inpaxojan mach yeto sat yibꞌanhqꞌinal tiꞌ wehan.
24 Yuxinto kaw chiwalan teyet tato yinh hemul chexkami,
yuto mach chechayto yul heyanma tato haninan huneꞌ hakaꞌ chiwute walnihan teyet,
yuxinto kaw yinh hemul chexkamtoj,
xhi Komam tet ebꞌnaj.
25 Isqꞌambꞌenpaxo ebꞌnaj tet Komam:
—¿Mak hach anmahil chal tuꞌ?
xhi ebꞌnaj.
Yalni Komam tet ebꞌnaj:
—Halbꞌilxatikꞌa teyet wuhan yet yalanhtokanoj mak anmahilinan.
26 Kaw txꞌiꞌal tzet chiwalan teyinh yet chiwilnihan yinh tzet chexelikoj.
Yaj Komam anheintijan texol tiꞌ,
kaw yinh isyelal chitzoteli.
Yuxinto haꞌ tzet halbꞌil wetan yu,
haꞌ chiwalpaxojan tet anma ay yul sat yibꞌanhqꞌinal tiꞌ,
xhi Komam.
27 Yaj xin kaw maxhtikꞌa txumchalo yu ebꞌnaj tato haꞌ Komam Dios chal Komam.
28 Yuxinto yal Komam tet ebꞌnaj:
—Hayet chinheyanikanhan yinh teꞌ kulus,
haꞌ to tuꞌ chitxumchalo heyu tato Hanin Aqꞌbꞌilintijan texol yu Komam Dios,
kat xin heyohtanheniloj tato mach wetojan inchukilan sunil tzet chiwaltiꞌan.
Wal xin haꞌ tzet chal Inmaman wetan,
haꞌ chiwalan.
29 Haꞌ Komam anheintijan,
haꞌ ayko wetbꞌihojan.
Kaw mach chinisbꞌejkanojan inchukilan,
yuto hanhkꞌanhe tzet choche iskꞌul chinwatxꞌehan yinh sunilbꞌal tiempo,
xhi Komam tet ebꞌnaj.
30 Yet yalni Komam hunteqꞌan tuꞌ,
kaw hantanhe anma chahni Komam yul yanma.
Haꞌ isyelal haꞌ chꞌaqꞌni kolbꞌanile
31 Yalni Komam Jesús tet anma Israel chahni Komam yul yanma:
—Tato kaw hunelnhe cheyayto yul heyanma yinh tzet chiwalan,
yinh kaw yeli inkuywoman heyehi.
33 Yalni ebꞌnaj tet Komam:
—Hanhonhtiꞌanh jichmamanh ye yaꞌ Abraham,
kaw maxhto hunelo xakonhtxonhlaxanh ischejabꞌo hunu maka.
¿Tzet yinh yuxinto chawala “chexkolchakanoj?”
kachi,
xhi ebꞌnaj.
34 Istaqꞌwi Komam tet ebꞌnaj:
—Yinh kaw yeli chiwalan teyet,
mak kaw mach chisbꞌejkano yaniko ismul,
kaw txonhbꞌil isbꞌa tet mule.
35 Qꞌinalo hunu naj txonhbꞌil chejabꞌo tet hunu yahaw tinanh,
mach chiyu yok naj yetbꞌiho yuninal naj yahawil tuꞌ yinh hunelnhe.
Wal hakaꞌ naj kꞌahole xin,
kaw yetbꞌitikꞌa isbꞌa naj yebꞌ ismam yebꞌ ismiꞌ yebꞌ ej yuxhtaj.
36 Yuxin tato haninan chexinkolilojan yinh hemul,
yinh kaw yeli chexkolchakanoj yuto kaw Iskꞌahol Dios wehan.
37 Kaw wohtajan tato heyichmam yaꞌ Abraham,
yaj kaw cheyoche kinhepotxꞌoꞌan,
yuto mach cheyoche heyabꞌeꞌ kuybꞌanile chiwaqꞌtiꞌan.
38 Haꞌ tzet wilan bꞌey Inmamtuꞌan,
haꞌ chiwalan teyet,
wal hex hex tiꞌ kaw nan hemam,
yuxinto haꞌ tzet chal hemam tuꞌ haꞌ chewatxꞌe,
xhi Komam tet ebꞌnaj.
39 Istaqꞌwipaxo ebꞌnaj:
—Wal hanhonhtiꞌanh,
komamanh jichmam Abraham,
xhi ebꞌnaj.
Istaqꞌwi Komam:
—Tato kaw yel cheyala hemam ye yaꞌ Abraham tuꞌ,
ham tzet iswatxꞌe yaꞌ,
haꞌ chewatxꞌe.
40 Wal xin waxanhka haꞌ kaw isyelal halbꞌil wetan yu Komam Dios haꞌ chiwalan teyet,
yaj kaw cheyoche kinheyaqꞌaꞌ kamojan.
Wal yaꞌ Abraham cheyal tiꞌ,
machi hunelo yute isbꞌa yaꞌ hakaꞌ hex tiꞌ.
41 Yajaꞌ hex tiꞌ haꞌtikꞌa tzet chiswatxꞌe hemam,
haꞌ cheyupaxoj,
xhi Komam tet ebꞌnaj.
Yuxinto yal ebꞌnaj:
—Wal hanhonhtiꞌanh,
mach matnhebꞌil honhanh,
wal xin huneꞌchꞌannhe komamanh,
haꞌ ton Komam Dios,
xhi ebꞌnaj.
42 Yalnipaxo Komam:
—Tato yeli hemam Komam Dios tuꞌ,
xahanmi chinheyilan,
yuto haꞌ bꞌay ay Komam Dios titnaj hinan yet wulan bꞌey tiꞌ,
Maxhtaj hinan witi hinbꞌahan inchukilan,
haꞌ Komam Dios chejnheintijan.
43 ¿Tzet yinh xin mach chitxumchalo tzet chiwaltiꞌan heyu?
44 Wal hex hex tiꞌ,
haꞌ naj matzwalil,
haꞌ naj kaw hemam,
yuto haꞌ tzet choche iskꞌul naj,
haꞌ kaw choche hekꞌul hewatxꞌeꞌ.
Naj matzwalil tuꞌ,
kaw potxꞌom anma naj yichtaxtikꞌa yul naj sat yibꞌanhqꞌinal tiꞌ.
Kaw maxhtikꞌa isyelal yinh naj,
yuxin sunil tzet chiꞌahti yul istiꞌ naj mach yeloj.
Hayet chaniko naj leqꞌtiꞌal,
haꞌ tzet ye naj haꞌ chal naj,
yuto kaw leqꞌtiꞌ naj;
kaw ismam leqꞌtiꞌwom naj.
45 Wal hanintiꞌan,
haꞌ kaw isyelal chiwalan,
yuxinto kaw mach cheyayto yul heyanma tzet chiwaltiꞌan.
46 ¿Mak hunujex tiꞌ tinanh chiyu heyalniko yinh insatan tato ay inmulan?
Wal xin,
kaw isyelal sunil tzet chiwaltiꞌan,
yaj ¿tzet yinh xin mach cheyayto yul heyanma?
47 Haꞌ mak yet Komam Dios yehi,
kaw choche yabꞌeꞌ Istzotiꞌ Komam.
Wal hex hex tiꞌ xin,
mach yeto Komam Dios heyehi,
yuxinto mach chiyoche hekꞌul heyabꞌeꞌ Istzotiꞌ Komam,
xhi Komam tet ebꞌnaj.
Ayxatikꞌa Komam Jesús yet yalanhto maxhto chipitzkꞌa yaꞌ Abraham
48 Yalni ebꞌnaj yahawil yehiko yinh anma Israel tuꞌ tet Komam Jesús:
—Haꞌ ye juhanh chijalnihanh ta ah Samaria hach,
yebꞌ ta ayko huneꞌ ischejabꞌ naj matzwalil tawinh,
xhi ebꞌnaj tet Komam.
49 Istaqꞌwi Komam Jesús xin:
—Machoj,
machi hunu ischejabꞌ naj matzwalil ayko winhan,
wal xin to haꞌ wanikojan ismay Inmaman haꞌ chiwuhan,
wal hex hex tiꞌ chinheyinkaniltojan.
50 Wal hanintiꞌan,
maxhtaj yalaxiko inmayan chinsayan;
waxanhka ay huneꞌ Mak chiꞌaniko inmayan,
haꞌ huneꞌ tuꞌ xin chihalnoj mak kaw yel chala.
51 Yinh kaw isyelal chiwalan teyet,
maknhetikꞌa chiyijen tzet chiwaltiꞌan,
machi bꞌaqꞌinhal chikami,
xhi Komam tet ebꞌnaj.
52-53 Yalni ebꞌnaj:
—Wal xin kaw yel chijalanh tato ayko hunu ischejabꞌ naj matzwalil tawinh.
Yaꞌ Abraham yebꞌpaxo xin ebꞌyaꞌ ischejabꞌ Komam Dios yet payxa,
sunil ebꞌyaꞌ kamnatoj.
Wal chawute hawalnipaxo xin:
“Maknhetikꞌa chiyijen tzet chiwalan maxhtikꞌa chikamtoj,”
kachi.
¿Tom kaw ekꞌbꞌal hachto sata jichmam Abraham tuꞌanh yebꞌ sunil ebꞌyaꞌ ischejabꞌ Komam Dios ekꞌlena yet payat tiempo tuꞌ?
¿Tzet yelapno haweh hawalni?
xhi ebꞌnaj tet Komam.
54 Yuxinto yalpaxo Komam:
—Tato hankawinan chiwikanh hinbꞌahan,
kaw matzet chalilo huneꞌ tuꞌ,
yaj wal xin haꞌ kaw Inmaman chiꞌaniko inmayan.
Haꞌ Inmamtuꞌan xin,
haꞌ cheyal heDiosaloj.
55 Yaj hex tiꞌ,
mach heyohtajo Inmamtuꞌan,
wal hinan,
kaw wohtajan.
Yaj tato chiwalan ta mach wohtajojan Inmamtuꞌan,
lahanmi inleqꞌtiꞌalan yebꞌ hex chal tuꞌ.
Wal xin kaw chiwalan kaw wohtajan Inmaman,
yuxinto sunil tzet chal Inmaman wetan chinyijehan.
56 Yaꞌ heyichmam Abraham tuꞌ,
kaw tzala iskꞌul yaꞌ yet yabꞌeni ta chinhulan.
Hayet isyelax tet yaꞌ xin,
kaw tzalakanokanh iskꞌul yaꞌ sikꞌlebꞌil,
xhi Komam.
57 Yalnipaxo ebꞌnaj tet Komam:
—Hach tiꞌ,
maxhto hach yinh 50 (lahonhebꞌ yoxkꞌal) habꞌil,
kat xin hawalni ta hawil yaꞌ Abraham,
xhi Komam.
58 Yalni Komam:
—Yinh kaw isyelal chiwalan teyet,
yettax yalanhto maxhto chipitzkꞌa yaꞌ Abraham tuꞌ,
ay inxatikꞌahan,
xhi Komam.
59 Hak tuꞌ xin,
yu yinikanh ebꞌnaj chꞌen chꞌen yunhe isqꞌojnikamo ebꞌnaj Komam yalni.
Yaj yebꞌato isbꞌa Komam tet ebꞌnaj,
yelti Komam yul Yatut Komam Dios tuꞌ.