Yet ishajlo isbꞌaqꞌ sat huneꞌ naj yu Komam Jesús
9
Yet yekꞌ Komam Jesús yinh isbꞌel hunel,
yilni Komam huneꞌ naj kaw maxhtikꞌa chu yilni yettaxtikꞌa ispitzkꞌahi.
2 Isqꞌambꞌen ebꞌyaꞌ chikuywi yinta Komam tuꞌ:
—Mam kuywawom,
¿tzet yinh yuxin mutzꞌan sat huneꞌ naj tiꞌ yet ispitzkꞌa naj?
¿Tom yu ismul ismam ismiꞌ naj mato yu ismul naj?
xhi ebꞌyaꞌ tet Komam.
Jesús cura a un ciego (Juan 9.1-41)
3 Yalni Komam xin:
—Maxhtaj yu ismul ismam ismiꞌ naj,
maxhtajpaxo yu ismul naj yuxinto hak tuꞌ ye naj.
Wal xin Komam Dios kaw choche iskꞌul chisyelo yip yinh naj,
yuxinto hak tuꞌ ye naj.
4 Kaw yilal inwatxꞌenan ismunil Komam anheintijan yaqꞌ isbꞌa tzꞌayikalto yukꞌaꞌ chiꞌah aqꞌbꞌal yet matxa chu komunlahi.
5 Yaqꞌ isbꞌa ayintokꞌojan yul sat yibꞌanhqꞌinal tiꞌ kaw hakaꞌ issajilqꞌinal wehayojan xol sunil anma,
xhi Komam.
6 Yet lahwi istzotel Komam xin,
istzubꞌlayo Komam sat txꞌotxꞌ,
issomni Komam nichꞌan tzꞌotzꞌew yu isqꞌabꞌ,
lahwi tuꞌ xin ismasniko Komam yinh isbꞌaqꞌ sat naj mutzꞌan sat tuꞌ.
7 Yalni Komam tet naj:
—Asiꞌ bꞌey haꞌ Siloé,
huneꞌ haꞌ etxan,
kat xin hatxꞌahnilo hasat,
xhi Komam tet naj.
(Siloé chiyal yelapnoj Aqꞌbꞌiltij.)
Hak tuꞌ xin yu isto naj bꞌey haꞌ Siloé tuꞌ,
istxꞌahni naj sat xol haꞌ.
Haxa yet ispaxti naj xin,
xayu yilni naj.
8 Yuxin haꞌ anma ayayo yatut iskawilal naj yebꞌ hunteqꞌanxa anma ohtanhe naj,
yal hakaꞌ tiꞌ:
—¿Kochan haꞌ naj tiꞌ chiꞌekꞌ tzꞌonhla qꞌano melyu?
xhi anma tuꞌ yinh naj.
9 Ay mak xin halni:
«Hoꞌ,
haꞌ naj tiꞌ,»
xhi.
Aypaxo mak halni:
«Machoj,
maxhtaj naj,
yaj etza hak tiꞌ jilni naj,»
xhipaxoj.
Wal naj xin yal naj:
«Hoꞌ,
hanintonan,»
xhi naj.
10 Yok anma isqꞌambꞌeno tet naj:
—¿Tzet xin mayu ishajlo hasat?
xhi anma.
11 Yalni naj xin:
—Huneꞌ yaꞌ,
Jesús isbꞌi,
haꞌ yaꞌ somni nichꞌan tzꞌotzꞌew,
ismasniko yaꞌ yinh insatan.
Lahwi tuꞌ xin,
yalni yaꞌ wetan:
“Asiꞌ bꞌey haꞌ Siloé,
kat hatxꞌahnilo hasat xol haꞌ,”
xhi yaꞌ.
Hak tuꞌ yu intohan intxꞌahnolojan insattiꞌan;
lahwi tuꞌ xin ishajlo insatan,
xhi naj.
12 Isqꞌambꞌen ebꞌnaj tet naj:
—¿Bꞌaytuꞌwal xin ay naj tuꞌ tinanh?
xhi ebꞌnaj.
—Kaw mach wohtajojan,
xhi naj.
Ok ebꞌnaj fariseo isqꞌambꞌeꞌ tzet kaw yu ishajlo sat naj mutzꞌantikꞌa sat
13 Lahwi tuꞌ xin,
yilaxto naj mutzꞌantikꞌa sat tuꞌ tet ebꞌnaj fariseo.
14 Yet iswatxꞌen Komam nichꞌan tzꞌotzꞌew yu ishajlo sat naj tuꞌ,
kaw kꞌuxan istzꞌayikal xewilal.
15 Yuxinto okpaxo ebꞌnaj fariseo tuꞌ isqꞌambꞌeꞌ tet naj hunelxa:
—¿Tzet yu ishajlo hasat tiꞌ?
xhi ebꞌnaj tet naj.
Istaqꞌwi naj:
—Yaꞌ Jesús masniko nichꞌan tzꞌotzꞌew yinh insatan,
lahwi tuꞌ xin intohan intxꞌahnolojan;
hak tuꞌ xin yu ishajlo insatan,
xhi naj.
16 Ay xin ebꞌnaj fariseo halni:
—Huneꞌ naj tuꞌ,
kaw mach yeto Komam Dios ye naj yuto mach chisyije naj istzꞌayikal xewilal,
xhi ebꞌnaj yinh Komam.
Yaj ay ebꞌnaj halnipaxoj:
—Yaꞌ Jesús tuꞌ,
mach mulumo yaꞌ.
Wal xin tato mulum yaꞌ,
¿tom chiyu isyeni yaꞌ hunu kꞌaybꞌalkꞌule hakaꞌ chisye tiꞌ?
xhi ebꞌnaj.
17 Yokpaxo ebꞌnaj fariseo isqꞌambꞌeno tet naj maxhtikꞌa chiyu yilni tuꞌ:
—Haxa hach tiꞌ,
¿tzet chawute hawalni yinh naj aqꞌni hajlo hasat tiꞌ?
xhi ebꞌnaj.
Yalni naj hakaꞌ tiꞌ:
—Haꞌ huneꞌ chiwute walnihan,
to kaw ischejabꞌ Komam Dios ye yaꞌ,
xhi naj tet ebꞌnaj.
18 Yaj kaw maxhtikꞌa yayto ebꞌnaj yahawil konhobꞌ Israel tuꞌ yul yanma tato hajlo sat huneꞌ naj tuꞌ yu Komam.
Haꞌ yute isnahni ebꞌnaj to kaw kꞌultikꞌa ye sat naj,
yuxinto awtelax ismam naj yebꞌ ismiꞌ naj yu ebꞌnaj.
19 Isqꞌambꞌen ebꞌnaj hakaꞌ tiꞌ:
—¿Ham naj tiꞌ,
heyuninal cheyala tato kaw maxhtikꞌa chu yilni yet ispitzkꞌahi?
¿Tzet yu ishajlo sat naj?
xhi ebꞌnaj.
20 Istaqꞌwi ismam naj yebꞌ ismiꞌ naj:
—Kaw yeli juninalanh naj,
kaw yelpaxoj maxhtikꞌa chiyu yilni naj yet ispitzkꞌa naj.
21 Yaj kaw mach johtajojanh tzet yu ishajlo sat naj,
yebꞌ xin mach johtapaxojanh mak aqꞌni hajloho sat naj.
¡Qꞌambꞌewe tet naj yuto ichamxa naj,
chiyu yalni naj teyet!
xhi.
22 Wal xin,
hak tuꞌ yute yalni ismam ismiꞌ naj tuꞌ yuto kaw chixiw tet ebꞌnaj yahawil yehiko yinh konhobꞌ Israel,
yuto halbꞌil yu ebꞌnaj hakaꞌ tiꞌ:
«Maknhetikꞌa chihalni tato haꞌ naj Jesús tiꞌ Cristo,
matxa chikochakti yul capilla tiꞌ,»
xhi ebꞌnaj.
23 Yuxinto hak tuꞌ yute yalni ismam ismiꞌ naj:
«Qꞌambꞌewe tet naj,
ichamxa naj,
xayu yalni naj teyet,»
xhi.
24 Lahwi tuꞌ xin,
yawtenpaxti ebꞌnaj naj hajlo sat tuꞌ hunelxa,
isqꞌambꞌen ebꞌnaj tet naj:
—Kaw chabꞌe Komam Dios kaw halilo isyelal jetanh,
wal xin kaw johtajanh ta kaw mulum huneꞌ naj chawal tiꞌ,
xhi ebꞌnaj tet naj.
25 Yalni naj xin:
—Hanintiꞌan,
kaw mach wohtajojan tato mulum yaꞌ maka machoj,
yuxin mach chiyu walnihan teyet;
hach kachannhe wohtajan to maxhtikꞌa chiyu wilnihan yet yalanhtokanoj,
wal tinanh xin xayu wilnihan,
xhi naj tet ebꞌnaj.
26 Isqꞌambꞌen ebꞌnaj hunelxa:
—¿Tzet kaw kaxhyute naj?
¿Tzet kaw yu ishajlo hasat tiꞌ yu naj?
xhi ebꞌnaj.
27 Yalni naj xin:
—Kaw mawalan teyet,
yaj to kaw mach cheyako yinh hekꞌul.
¿Tzet yinh xin cheyoche chiwalan teyet hunelxa?
¿Mato cheyoche chexokpaxo kuywo yinta yaꞌ?
xhi naj tet ebꞌnaj.
28 Yet yalni naj hakaꞌ tuꞌ,
istzabꞌniko ebꞌnaj isbꞌahni naj,
yalni ebꞌnaj tet naj:
—Hach tiꞌ,
ayachxako yinta naj,
wal hanhonhtiꞌanh yinta iskuybꞌanil yaꞌ Moisés tzujan honhanh.
29 Wal honhtiꞌanh kaw johtajanh tato haꞌ kaw Komam Dios anikano kuybꞌanile tet yaꞌ Moisés tuꞌ.
Wal naj chawal tiꞌ,
kaw mach johtajojanh bꞌaytuꞌwal titnako naj,
xhi ebꞌnaj.
30 Istaqꞌwikanh naj tet ebꞌnaj xin:
—Kaw chikꞌay inkꞌulan yuto mach heyohtajo bꞌay titnako yaꞌ,
yajaꞌ kaw cheyila hajlo insatan yu yaꞌ.
31 Kaw johtaj tato mach chabꞌe Komam Dios tzet chisqꞌan anma mulum,
hach kachannhe anma kaw ayko yanma yinh Komam,
kat yinayo isbꞌa tet,
hach kachannhe hunteqꞌan anma tuꞌ chaqꞌ Komam ispaj tzet chisqꞌanaꞌ.
32 Wal xin,
kaw maxhto bꞌay chijabꞌe isqꞌumal tato ay hunu mak chiyu yaqꞌni hajloho sat hunu anma maxhtikꞌa chiyu yilni yettaxtikꞌa ispitzkꞌahi.
33 Tato maxhtaj Komam Dios anheti yaꞌ tiꞌ,
kaw machim nino tzet chiyu iswatxꞌen yaꞌ,
xhi naj tet ebꞌnaj.
34 Istaqꞌwi ebꞌnaj tet naj:
—Wal hach hach tiꞌ,
kaw mulumach yettaxtikꞌa hapitzkꞌahi.
¿Tom chaxhok konhhakuyuꞌanh hawalni?
xhi ebꞌnaj tet naj,
hak tuꞌ yu istennilti ebꞌnaj naj tuꞌ yul capilla.
Anma mach chitxumchalo yu yinh tzet chal Komam Jesús
35 Yabꞌe Komam Jesús tato tenlaxilti naj hajlo sat tuꞌ yul capilla,
haxa yet ischahloyo naj yu Komam,
yalni Komam tet naj hakaꞌ tiꞌ:
—¿Chimhawayto yul hawanma yinh mak Aqꞌbꞌilti texol yu Komam Dios?
xhi Komam tet naj.
36 Isqꞌambꞌen naj tet Komam:
—Mamin,
¿mak huneꞌ chawal tuꞌ?
Hal wetan kat xin waniko wanmahan yinh,
xhi naj.
37 Yalni Komam tet naj:
—Kaw xahawil yinh;
Hanintonan huneꞌ mak bꞌay lanhan hatzotel tiꞌ,
xhi Komam.
38 Yet yabꞌen naj hakaꞌ tuꞌ,
yay jahno naj yinh sat Komam,
yalni naj:
—Kaw chiwako wanmahan tawinh Mam,
xhi naj.
39 Yalni Komam tet naj:
—Wal hanintiꞌan,
hulnajinan bꞌey yul sat yibꞌanhqꞌinal tiꞌ yunhe wilnihan tzettaj chiꞌeliko anma,
yuto ay anma tiꞌ kaw mach chiyu yilni,
yaj xin haninan chiwaqꞌ hajlohojan sat.
Aypaxo anma kaw kꞌul yilni,
yaj chimutzꞌikano sat wuhan yunhe matxa chiyu yilni,
xhi Komam.
40 Ay xin hunteqꞌan ebꞌnaj fariseo ayko iskꞌatanh Komam,
yet yabꞌen ebꞌnaj yinh tzet yal Komam tuꞌ,
yalni ebꞌnaj:
—¿Tom xin haꞌ hunonhanh mach chiyu jilnihanh hawalni?
xhi ebꞌnaj.
41 Istaqꞌwi Komam tet ebꞌnaj:
—Qꞌinalo tato mach chiyu heyilni tzettaj ye tuꞌ yet Komam Dios yehi,
kaw machim hemul.
Yaj cheyala tato kaw chiyu heyilni tzettaj ye tuꞌ yet Komam Dios,
yaj mach cheyijepaxoj,
yuxinto kaw ay hemul,
xhi Komam tet ebꞌnaj.