—Qꞌinaloj ta ay hunu ispeyabꞌil noꞌ meꞌ,

kat yokto hunu naj yul,

nan bꞌay xin chisholikto isbꞌa naj;

yinh kaw isyelal chiwalan teyet,

kaw elqꞌom huneꞌ naj tuꞌ.

2 Wal naj chiꞌokto yul ispultahil ispeyabꞌ noꞌ tuꞌ,

haꞌ ton naj tuꞌ chitanhen noꞌ.

3 Haꞌ naj chiwaynhen noꞌ xin chishaj naj ispultahil ispeyabꞌil noꞌ tet naj,

kat yokto naj iskꞌatanh noꞌ.

Kaw sunil noꞌ qꞌayna yabꞌen yul isnuqꞌ naj.

Kaw hununtajil yawtenilti naj noꞌ,

yuto ay isbꞌi hunun noꞌ yu naj,

hak tuꞌ xin chiyu ishajnilti naj noꞌ.

4 Yet chilahwi yinilti naj ismeꞌ tuꞌ,

kat xin isbꞌabꞌi naj sata noꞌ,

kat yok tzujno noꞌ yinta naj,

yuto kaw yohta noꞌ yul isnuqꞌ naj.

5 Yajaꞌ wal ta hunu naj komon,

mach chꞌok tzujno noꞌ yinta naj;

chixiwilo noꞌ tet naj yuto mach qꞌaynajo noꞌ yabꞌen yul isnuqꞌ naj,

xhi Komam.

6 Yal Komam huneꞌ yechel tuꞌ tet ebꞌnaj,

yaj maxhtikꞌa txumchalo yu ebꞌnaj tzet kaw yelapno yehi.

7 Yalnipaxo Komam Jesús:

—Yinh kaw yeli chiwalan teyet,

hanintiꞌan hakaꞌ ispultahil ispeyabꞌ noꞌ meꞌ,

kaw hak tuꞌ wehan.

8 Yet yalanhto yet maxhto chinhulan,

ay ebꞌnaj hulikꞌoj yaniko isbꞌa ebꞌnaj hekolomaloj.

Haꞌ hunteqꞌan ebꞌnaj tuꞌ xin,

kaw lahan ebꞌnaj hakaꞌ hunu naj elqꞌom chiꞌokto yul ispeyabꞌil noꞌ meꞌ tuꞌ,

yaj wal anma kaw yettikꞌa Komam Dios ye xin,

kaw maxhtikꞌa ishajbꞌa istxikin yinh tzet yal ebꞌnaj.

9 Hanintiꞌan,

lahan hinan hakaꞌ ispultahil ispeyabꞌil noꞌ meꞌ,

maknhetikꞌa chiꞌokto yul huneꞌ pulta tiꞌ chikolchahi.

Hakaꞌtikꞌa hunu noꞌ meꞌ chiꞌelti lowoj kat yapnipaxo yul ispeyabꞌ,

hak tuꞌ xin ye hunteqꞌan mak tuꞌ.

10 »Naj elqꞌom tonhe chihul naj eleqꞌ yebꞌ yaqꞌnikamo anma,

yebꞌ yetankantoj.

Yaj wal hinan,

hulna hinan waqꞌaꞌan qꞌinale mach istanhbꞌal tet anma chiyako isbꞌa yul inqꞌabꞌan.

Hunteqꞌan anma tuꞌ,

kaw niman chiyu ischahni iskꞌulal iskꞌul Komam Dios.

11 Wal hanintiꞌan,

kaw lahan hinan hakaꞌ hunu naj tanhem meꞌ kaw kꞌul.

Huneꞌ naj tanhem meꞌ kaw kꞌul tuꞌ,

kaw hinan yanma naj yaqꞌnikamo isbꞌa yinh ismeꞌ.

12 »Wal tato tonhe chitohlalax hunu naj chitanhen noꞌ meꞌ tuꞌ,

maxhtaj xin naj yahaw noꞌ tuꞌ chitanheni.

Hayet chiyilni naj yapni noꞌ oj,

chisbꞌejkano naj noꞌ kat yelkanh naj,

yuto mach yeto naj noꞌ,

kat yok noꞌ oj tuꞌ istzabꞌnayo noꞌ,

kat xin ispujnakanh noꞌ sunil.

13 Chiꞌelkanh naj chitanhen noꞌ,

yuto yinhnhe istohol naj ayko yanma.

Kaw mach chikam iskꞌul naj yinh noꞌ yuto mach yeto naj noꞌ.

14-15 »Wal hanintiꞌan,

kaw lahan hinan yebꞌ naj tanhem meꞌ kaw kꞌul,

haxa mak chako isbꞌa yul inqꞌabꞌan lahan hakaꞌ noꞌ meꞌ.

Kaw ohtabꞌil hinan yu Inmaman,

wohtapaxojan Inmamtuꞌan,

hak tuꞌ xin wepaxojan yebꞌ makta chako isbꞌa yul inqꞌabꞌan,

kaw johta kobꞌahanh yebꞌi.

Yinhton hunteqꞌan mak tuꞌ chiwaqꞌ kamo hinbꞌahan.

16 Aypaxo hunteqꞌan anma chinchahnihan yul yanma,

tonhe xin kaw mach jet konhobꞌoj.

Kaw yilal winitijan kat xin yok isyijeno kuybꞌanile chiwaltiꞌan,

kaw xin hunxanhe chukanoj yebꞌ hunxanhe mak chitanheni.

17 »Kaw xahan ayinan yu Inmaman yu chiwaqꞌ kamo hinbꞌahan yinh anma,

yaj chinchahpaxojan inqꞌinalan hunelxa.

18 Chiwaqꞌ inbꞌahan yinh kamikal yuto hak tuꞌ chiꞌel yinh inkꞌulan.

Wal xin,

kaw machi hunu mak chiyu kinispotxꞌnikamojan tato mach chisje inkꞌulan.

Kaw machi hunu mak chinkachnihan waqꞌni hinbꞌahan yinh kamikal;

aypaxo wipan inchahnihan inqꞌinalan hunelxa,

yuto hak tuꞌ inchejbꞌanilan yu Inmaman,

xhi Komam.

19 Yet yabꞌen anma Israel yinh tzet yal Komam tuꞌ,

ispohnipaxto isbꞌa hunelxa.

20 Ay hunmajan anma halni:

—¿Tzet yuxin cheyabꞌeto tzet chal naj tiꞌ?

Wal huneꞌ naj tiꞌ,

kaw chabꞌil locohal yu naj,

ayko huneꞌ ischejabꞌ naj matzwalil yinh naj,

xhi ebꞌnaj.

21 Ay hunxa majan anma halnipaxoj hakaꞌ tiꞌ:

—Tato ayko hunu ischejabꞌ naj matzwalil yinh naj,

¿tom hak tuꞌ istzotelo naj?

Yalnipaxo ebꞌnaj:

—¿Tom chu yu hunu ischejabꞌ naj matzwalil ishajni sat hunu naj kaw maxhtikꞌa chiyu yilni?

xhi ebꞌnaj.

22 Yinh istiempohal nhabꞌil chiꞌekꞌtzelax isqꞌinh Yatut Komam Dios^a bꞌey yul konhobꞌ Jerusalén.

23 Yet lanhan yekꞌ Komam Jesús istiꞌ Yatut Komam Dios tuꞌ,

huneꞌ chiyij Yamaqꞌil yaꞌ rey Salomón,

24 yok hoyno ebꞌnaj Israel yinh Komam,

yalni ebꞌnaj hakaꞌ tiꞌ:

—¿Kaw bꞌaqꞌinh chonhhawilojanh yinh huneꞌ kabꞌkꞌulal tiꞌ?

¿Mak kaw anmahilach?

Yinh kaw yeli,

tato hach tiꞌ Cristo hach,

kaw maqꞌbꞌil hawalnilo jetanh,

xhi ebꞌnaj.

25 Istaqꞌwikanh Komam tet ebꞌnaj:

—Kaw xawalan teyet,

yaj kaw mach cheyayto yul heyanma.

Sunil kꞌaybꞌalkꞌule chinwatxꞌehan yu yip Inmaman,

haꞌ kaw chiyeniloj mak anmahil hinan.

26 Wal hex hex tiꞌ,

kaw mach chinhechaytojan yul heyanma,

yuto kaw maxhtikꞌa wetojan heyehi hakaꞌ walnihan yalanhtokanoj.

27 Makta kaw wetan yehi,

kaw chishajbꞌa istxikin yinh tzet chiwalan;

kaw xin wohtapaxojan huneꞌ mak tuꞌ.

Hakaꞌtikꞌa chiyu yok tzujno noꞌ meꞌ yinta istanhemal,

hakpax tuꞌ chiyu yok tzujno wintajan.

28 Wal xin,

hanan chiwaqꞌan isqꞌinal mach istanhbꞌal,

machi bꞌaqꞌinhal chikami,

machi hunu mak xin chiyu yinilo yul inqꞌabꞌan.

29 Wal xin haꞌ Inmaman,

kaw ekꞌbꞌalkano sata sunil maka,

haꞌ aqꞌnhe anma tiꞌ wetan.

Kaw machi hunu mak chiyu yinilo hunteqꞌan tiꞌ yul isqꞌabꞌ Inmamtuꞌan.

30 Hanintiꞌan yebꞌ Inmaman,

kaw huneꞌnhe jehanh,

xhi Komam.

31 Hak tuꞌ yu istzabꞌnipaxiko ebꞌnaj yahawil konhobꞌ Israel tuꞌ issikꞌnikanh ischꞌen yunhe isqꞌojnikamo ebꞌnaj Komam yalni.

32 Yalni Komam Jesús tet ebꞌnaj:

—Yu ishelanil Inmaman,

yuxin kaw hantanhe tzet kaw kꞌul chinwatxꞌehan texol.

¿Bꞌaytet yinh yuxin chinheqꞌoj kamojan heyalni?

xhi Komam tet ebꞌnaj.

33 Istaqꞌwi ebꞌnaj yahawil yinh ebꞌnaj Israel tuꞌ:

—Mach chaxhkoqꞌojkanhanh yu hunu iskꞌulal chawatxꞌe,

wal xin yu chaxhbꞌuchwa yinh Komam Dios,

yuto hach tiꞌ kaw komon anma hach,

yaj chawaliko habꞌa Diosal,

xhi ebꞌnaj tet Komam.

34 Yalni Komam Jesús:

—Istzotiꞌ Komam Dios tzꞌibꞌnhebꞌilkano yet payat aqꞌbꞌilkano teyet,

chal hakaꞌ tiꞌ:

“Haninan chiwalan tato dios hex,”^b

xhikanoj.

35 Kaw xin mach chiyu komanhkꞌon tzet tzꞌibꞌnhebꞌilkanoj,

yuto kaw Komam Dios tuꞌ halnhekanoj diosal yinh mak bꞌay aqꞌbꞌilkano Istzotiꞌ.

36 Haꞌ Komam Dios anheintijan yul sat yibꞌanhqꞌinal tiꞌ,

yajaꞌ ¿tzet yinh xin cheyalpaxoj tato bꞌuchwal chiwuhan yinh Komam Dios yet chiwalnihan tato kaw Iskꞌahol Dios wehan?

37 Tato mach chinyijehan chejbꞌanile aqꞌbꞌil wetan yu Inmaman,

mach cheyayto yul heyanma winhan.

38 Wal xin haꞌ tzet chal Inmaman,

haꞌ chinwatxꞌehan.

Waxanhka kaw mach chinhechaytojan yul heyanma,

chahwe yul heyanma tzet chinwatxꞌetiꞌan.

Hak tuꞌ xin chiyu heyohtanheniloj tato kaw ayko Komam Dios wetbꞌihojan,

ay inpaxikojan yinh Komam,

xhi Komam tet ebꞌnaj.

39 Kaw xin yoche ebꞌnaj istzabꞌayo Komam,

yaj iskolilo isbꞌa Komam yul isqꞌabꞌ ebꞌnaj.

40 Lahwi tuꞌ xin,

istopaxo Komam qꞌaxepxakꞌto haꞌ niman Jordán,

bꞌayah haꞌ iswiꞌ anma yu yaꞌ Juan yet yalanhtokanoj,

haꞌ bꞌey tuꞌ xin kankano Komam.

41 Kaw hantanhe anma apni ilno Komam bꞌey tuꞌ,

yalni hakaꞌ tiꞌ:

—Yinh kaw yeli waxanhka machi hunu kꞌaybꞌalkꞌule isye yaꞌ Juan jet,

yaj sunil tzet yalkano yaꞌ yinh yaꞌ Jesús tiꞌ kaw yeli,

xhi anma tuꞌ.

42 Kaw xin hantanhe anma anayto yul yanma yinh Komam Jesús bꞌey tuꞌ.