Yet iskam naj Lázaro
11
1-2 Bꞌey yul aldea Betania ay huneꞌ naj chiyij Lázaro yabꞌiꞌay,
haꞌ bꞌey tuꞌ xin aypaxo kawanh yanabꞌ naj,
María isbꞌi huneꞌ ix,
huneꞌxa ix xin Marta isbꞌi.
Ix María tuꞌ,
haꞌ ix aniko aceite kaw xuqꞌ sam yinh yoj Komam Jesús,
lahwi tuꞌ,
issuni tajo ix yoj Komam yu xil iswiꞌ.
Jesús resucita a Lázaro (Juan 11.1-57)
—Mamin,
kaw txꞌoj ye iskꞌul konohanh,
naj kaw xahan ay hawu,
xhito ebꞌix tet Komam.
4 Yet yabꞌen Komam huneꞌ chejbꞌanil tuꞌ,
yalni Komam:
—Huneꞌ yabꞌil tuꞌ,
mach chitanhkano yinh kamikal.
Wal xin haꞌ chiyenilo yip Komam Dios,
haꞌ xin bꞌay chiꞌixtanhwipaxilo wipan,
hanin Iskꞌahol Komam Dios intiꞌan,
xhi Komam.
5-6 Waxanhka kaw xahan ay ix Marta yebꞌ ix María yebꞌ naj Lázaro yu Komam Jesús,
yaj yet yal-laxi tato kaw yaꞌay naj Lázaro tuꞌ,
kaw kabꞌto tzꞌayik ekꞌ Komam bꞌey tuꞌ.
7 Lahwi tuꞌ xin yalni Komam tet ebꞌyaꞌ iskuywom:
—Tonhwepaxo ismajul Judea hunelxa,
xhi Komam.
8 Yalni xin ebꞌyaꞌ iskuywom tuꞌ:
—Mamin,
kaw tolto yoche ebꞌnaj yahawil konhobꞌ Israel kaxhisqꞌojoꞌ kamoj.
¿Tom xin chaxhtopaxo hunelxa hawalni?
xhi ebꞌyaꞌ tet Komam.
9 Yalni Komam tet ebꞌyaꞌ:
—Kaw johtaj tato kaw kabꞌlahonhebꞌ hora iqꞌbꞌil yu huneꞌ tzꞌayik,
yuxin tato tzꞌayikal chonhbꞌelwi,
mach komono chonhtxaqꞌmohi,
yuto sajqꞌinal.
10 Yaj tato xol qꞌejholo chonhekꞌ xin,
wal tuꞌ chonhtxaqꞌmohi yuto mach sajqꞌinal,
xhi Komam tet ebꞌyaꞌ.
11 Lahwi tuꞌ xin,
yalni Komam:
—Kaw mawaykanh jamigo Lázaro,
wal tinanh xin chintohan wiqꞌalojan iswayanh naj,
xhi Komam.
12 Yalni ebꞌyaꞌ iskuywom Komam Jesús tuꞌ:
—Mamin,
yaj tato wayanh chu naj,
chikawxokanh naj chal tuꞌ,
xhi ebꞌnaj tet Komam.
13 Yajaꞌ xin yinh iskamikal naj Lázaro yal Komam,
wal ebꞌyaꞌ iskuywom Komam xin,
tonhe chiway naj,
yalni Komam,
chute yalni ebꞌnaj.
14 Yuxinto kaw yal Komam yinh kaw habꞌan tet ebꞌyaꞌ:
—Naj Lázaro makam naj,
15 yaj kaw chintzalahan yuto machijinan yet iskam naj,
yu iskꞌulalo teyinh yunhe kaw heyaniko heyanma winhan.
Tonhwe jilaꞌ naj,
xhi Komam.
16 Yalni yaꞌ Tomás,
yaꞌ chihal-lax tioxh uninal tet hunteqꞌanxa ebꞌyaꞌ chikuywi yinta Komam:
—Tonhwe yinta Komam haxinwal hun kokam yebꞌi,
xhi yaꞌ.
Komam Jesús haꞌ chiꞌaqꞌni itzitzbꞌokanh anma yebꞌ haꞌ chiꞌaqꞌni qꞌinale mach istanhbꞌal
17 Yet yapni Komam Jesús bꞌey tuꞌ xin,
yabꞌen Komam tato kanhebꞌxa tzꞌayik ismuji naj Lázaro.
18 Haꞌ aldea Betania tuꞌ,
aynhem yiktajo legua yehilo yinh konhobꞌ Jerusalén.
19 Yuxinto kaw txꞌiꞌal anma ah Jerusalén bꞌeykꞌo yaqꞌaꞌ isnimanbꞌal iskꞌul ix Marta yebꞌ ix María yu iskamikal isnoh tuꞌ.
20 Hayet yabꞌen ix Marta tato lanhan yapni Komam Jesús bꞌey tuꞌ,
istit ix ischahno Komam,
wal ix María xin kankano ix yul nha.
21 Yalni ix Marta tuꞌ tet Komam yet ischahni isbꞌa ix yebꞌi:
—Mamin,
tato ayachikꞌo bꞌey tiꞌ,
kaw machim kam innohan.
22 Yaj xin kaw wohtajan tato sunil tzet chaqꞌan tet Komam Dios chiyaqꞌ Komam tawet,
xhi ix.
23 Istaqꞌwi Komam tet ix:
—Wal hanoh tuꞌ,
chiꞌitzitzbꞌokanh,
xhi Komam.
24 Yalni ix:
—Hoꞌ Mamin,
kaw wohtajan tato chiꞌitzitzbꞌikanh innoh tuꞌan yet chiꞌitzitzbꞌikanh kamom yet islahobꞌal tzꞌayik,
xhi ix tet Komam.
25 Yalni Komam xin:
—Hanintiꞌan chiwaqꞌ itzitzbꞌokanhan anma kamnaxa,
yebꞌ xin haninan chiwaqꞌan isqꞌinal mach istanhbꞌal.
Yuxinto maknhetikꞌa chinchahnihan yul yanma,
waxanhka chikami chiꞌitzitzbꞌikanh.
26 Yebꞌpaxo xin sunil anma itzitzto chinchahnihan yul yanma,
mach chikam yinh hunelnhe.
¿Chimhawayto yul hawanma yinh tzet chiwalan?
xhi Komam tet ix.
27 Yalni ix:
—Hoꞌ Mamin,
kaw chiwaytojan yul wanmahan tato hach tiꞌ Cristo hach.
Kaw Iskꞌahol Komam Dios hawehi,
halbꞌilkanoj ta chaxhhul yul sat yibꞌanhqꞌinal tiꞌ,
xhi ix Marta tuꞌ tet Komam.
Oqꞌ Komam Jesús yinh naj Lázaro
28 Lahwi yalni ix Marta hakaꞌ tuꞌ,
isto ix yawtenoti isnoh,
yalni ix tet ix yinh ewantajil:
—Aykꞌo Komam kuywawom bꞌey tiꞌ,
chaxhyawte Komam,
xhi ix tet ix María.
29 Yabꞌenhe ix María tzet yal isnoh tuꞌ xin,
yah lemna ix,
isto ix yilno Komam.
30 Maxhto xin chiꞌapni Komam Jesús yul aldea tuꞌ,
haꞌ bꞌay ischah isbꞌa ix Marta yebꞌ Komam,
haꞌ to tuꞌ xin ay Komam yet yapni ix María.
31 Wal anma ah Judea ayko yaqꞌni isnimanbꞌal iskꞌul ebꞌix yet yilni anma yah lemna ix María tuꞌ isto ix,
yok tzujno anma yinta ix yuto istxum anma tato chito ix oqꞌo bꞌay mujan isnoh tuꞌ.
32 Yet yapni ix María iskꞌatanh Komam Jesús xin,
yay jahno ix yich yoj Komam,
yalni ix hakaꞌ tiꞌ:
—Mamin,
tato ayachikꞌo bꞌey tiꞌ,
machim kam konoh tiꞌanh,
xhi ix tet Komam.
33 Yet yilni Komam Jesús yoqꞌkanh ix María yebꞌ anma ah Judea tzujan yinta ix tuꞌ,
yok bꞌiskꞌulal yinh iskꞌul Komam,
istzꞌaykanh iskꞌul Komam.
34 Isqꞌambꞌen Komam xin:
—¿Bꞌaytuꞌwal mujan naj heyu?
xhi Komam.
—Mamin,
tonh jilaꞌ,
xhi ix María yebꞌ anma tuꞌ.
—Haꞌ yaꞌ tiꞌ aqꞌni hajloho sat naj mutzꞌan sat,
¿tom xin mach anhcha naj Lázaro tiꞌ yu yaꞌ?
Hak tuꞌ xin machim kam naj,
xhi anma.
Yet yitzitzbꞌikanh naj Lázaro yu Komam Jesús
38 Kaw ekꞌna ok bꞌiskꞌulal yinh iskꞌul Komam yet yapni bꞌay ayikto naj Lázaro tuꞌ.
Haꞌ huneꞌ bꞌay mujan naj tuꞌ,
nhachꞌen yehi,
ayko huneꞌ chꞌen niman chꞌen ismajiloj.
39 Yalni Komam Jesús xin:
—Iwelo ismajil chꞌen,
xhi Komam.
Yalni ix Marta,
yanabꞌ naj Lázaro tuꞌ:
—Mamin,
konhitax kam naj tinanh,
kaw ayxam sam naj,
xhi ix.
40 Istaqꞌwi Komam Jesús:
—¿Tom machi mawalan tawet xin tato chawayto yul hawanma yinh tzet chiwalan,
kaw chawilaꞌ ishelanil yip Komam Dios?
xhi Komam tet ix.
41 Lahwi tuꞌ xin,
yilaxilo ismajil chꞌen bꞌay mujan naj tuꞌ,
istꞌanhxikanh Komam Jesús satkanh,
yalni hakaꞌ tiꞌ:
—Mamin,
kaw chiwaqꞌan yuchꞌandios tawet yu maxawabꞌe tzet mawalan.
42 Wohtajan Mam ta sunilbꞌal tiempo chawabꞌe tzet chiwalan,
yaj xin chiwalan hunel tiꞌ tawet yu sunil anma kutxaniko tiꞌ,
yunhe yanayto yul yanma ta hach tiꞌ anheintijan,
xhi Komam tuꞌ.
43 Yet lahwi yalni Komam huneꞌ tiꞌ xin,
yah yaw Komam yinh kaw ip:
—Lázaro,
elanhtij,
xhi Komam.
44 Hak tuꞌ xin yu yelti naj Lázaro tuꞌ,
bꞌekꞌbꞌiliko qꞌap yinh isnimanil naj,
pichbꞌilpaxto sat naj yu huneꞌ qꞌap.
Yalni Komam xin:
—Holwelo qꞌap yinh naj,
kat isto naj,
xhi Komam.
Issay ebꞌnaj yahawil konhobꞌ Israel yinh tzet chiyu yaqꞌnikamo Komam Jesús
45 Anma ah Judea apni ilwal yinh ix María,
kaw yilpaxo tzet iswatxꞌe Komam Jesús bꞌey tuꞌ,
yuxinto kaw hantanhe anma anayto yul yanma yinh Komam.
46 Aypaxo hunteqꞌan ebꞌnaj to halno tet ebꞌnaj fariseo yinh tzet iswatxꞌe Komam.
47 Hak tuꞌ xin yu yok ebꞌnaj fariseo islahtiꞌnhen isbꞌa yebꞌ ebꞌnaj yahawil yehiko yinh ebꞌnaj sacerdote yebꞌ xin ebꞌnaj yahaw konhobꞌ.
Yalni ebꞌnaj:
—¿Tzet wal juten tinanh,
huneꞌ naj tuꞌ kaw txꞌiꞌal kꞌaybꞌalkꞌule chisyekano naj?
48 Tato tonhe chijila chislahniko naj,
kaw sunil jet konhobꞌ tiꞌ chaqꞌayto yul yanma yinh naj.
Hak tuꞌ xin chiyu yulo ebꞌnaj yahawil konhobꞌ Roma,
kat xin yuchkꞌanayo ebꞌnaj Yatut Komam Dios,
kat xin yetanto ebꞌnaj kokonhobꞌ tiꞌ,
xhi ebꞌnaj tet hunun.
49 Ay xin huneꞌ naj Caifás isbꞌi,
iswiꞌehal yehiko naj yinh ebꞌnaj sacerdote yinh huneꞌ habꞌil tuꞌ.
Haꞌ naj halni:
—Hex tiꞌ kaw matzet heyohtaj.
50 Kaw mach chitxumchalo heyu tato ekꞌbꞌal kꞌul iskam naj tiꞌ selelo sunil anma,
hak tuꞌ xin matxa chitanhilo kokonhobꞌ tiꞌ chal tuꞌ,
xhi naj.
51 Wal xin mach yal naj Caifás huneꞌ tuꞌ yul yet ischukil,
yuto haꞌ naj yahawil yehiko yinh ebꞌnaj sacerdote huneꞌ tiempo tuꞌ,
yuxinto haꞌ Komam Dios aqꞌni yalaꞌ naj tato chikam Komam Jesús selelo sunil anma ah Israel.
52 Yaj maxhnhetaj yinh konhobꞌ Israel chikam Komam Jesús,
wal xin chikampaxo Komam yunhe iskutxbꞌaniko sunil yuninal Komam Dios pujanto yul sat yibꞌanhqꞌinal tiꞌ,
yunhe hunxanhe chiyute isbꞌa.
53 Yinh huneꞌ tzꞌayik tuꞌ,
islahtiꞌnhe isbꞌa ebꞌnaj yahawil konhobꞌ Israel tato chaqꞌ kamo ebꞌnaj Komam Jesús.
54 Yuxin matxa ekꞌ Komam Jesús xol anma bꞌey ismajul Judea,
wal xin to Komam bꞌey yul huneꞌxa konhobꞌ chiyij Efraín,
huneꞌ konhobꞌ ayko iskawilal txꞌotxꞌ desierto.
Haꞌ tuꞌ xin ehayo Komam yebꞌ ebꞌyaꞌ chikuywi yintaj.
55 Wal yul konhobꞌ Jerusalén xin,
toxa chiꞌichiko qꞌinh Pascua,
huneꞌ qꞌinh tuꞌ isqꞌinh anma Israel.
Kaw xin txꞌiꞌal anma yul hunun konhobꞌ apni bꞌey Jerusalén tuꞌ,
yu isyijen yaqꞌni sajbꞌo isbꞌa yet yalanhto maxhto chiꞌichiko qꞌinh tuꞌ.
56 Chixin ekꞌ anma tuꞌ saywal yinh Komam Jesús.
Yet kutxaniko anma yul Yatut Komam Dios,
chisqꞌambꞌen anma tet hunun hakaꞌ tiꞌ:
—¿Tzet kexchi?
¿Chimhulu yaꞌ Jesús yinh qꞌinh tiꞌ mato machoj?
xhi anma.
57 Ebꞌnaj fariseo yebꞌ xin ebꞌnaj iswiꞌehal sacerdote,
yalilto ebꞌnaj xol anma tato maknhetikꞌa yohta bꞌaytuꞌwal ay Komam Jesús,
chihal-lax tet ebꞌnaj yunhe istzabꞌnayo ebꞌnaj Komam.