Apni Komam Jesús bꞌey Nazaret
6
Lahwi tuꞌ yel Komam Jesús yul konhobꞌ Capernaúm,
yapni Komam yul iskonhobꞌ,
haꞌ ton Nazaret;
tzujanpaxo xin ebꞌyaꞌ iskuywom Komam yintaj.
Marcos 6:1-29
2 Haxa yinh istzꞌayikal xewilal,
yok Komam iskuyno anma yul capilla.
Hayet yabꞌen anma iskuywa Komam kaw kꞌayilo iskꞌul,
yalni anma tuꞌ hakaꞌ tiꞌ:
—¿Bꞌaytuꞌwal bꞌey naj tiꞌ iskuyuꞌ hunteqꞌan tiꞌ?
¿Bꞌaytuꞌwal chíti naj ishelanil yebꞌ yip iswatxꞌen hunteqꞌan kꞌaybꞌalkꞌule chisye tiꞌ?
3 ¿Tom maxhtaj naj tiꞌ naj hutxꞌum teꞌ,
naj yunin ix María?
yebꞌ ¿tom mach yuxhtajo isbꞌa naj yebꞌ naj Jacobo,
naj José yebꞌ naj Judas,
yebꞌ naj Simón?
¿Tom xin maxhtaj koxol tiꞌ aypaxo yanabꞌ naj?
xhi ebꞌnaj.
—Sunil ischejabꞌ Komam Dios yul hunuxa nan konhobꞌal kaw xahan chiꞌil-laxi,
wal yul iskonhobꞌ xin mach xahano chiꞌil-lax yu yet konhobꞌ,
yebꞌ yu mak ayto yu isbꞌa yebꞌi yebꞌ yu ej yuxhtaj,
xhi Komam.
5 Mach txꞌiꞌalo kꞌaybꞌalkꞌule isye Komam bꞌey tuꞌ,
kachannhe haywanhnhe mak yaꞌay bꞌay yayo Komam isqꞌabꞌ,
iskawxiloj.
6 Kaw xin kꞌay iskꞌul Komam yuto hunteqꞌan anma ay bꞌey tuꞌ mach yayto yul yanma yinh Komam.
Ischejto Komam Jesús ebꞌyaꞌ iskuywom yalaꞌkꞌo Istzotiꞌ Komam Dios
Lahwi tuꞌ xin,
isto Komam Jesús iskuyno anma yinh Istzotiꞌ Komam Dios yulaj konhobꞌ ayko yinh ishoyanil tuꞌ.
7 Yawten Komam ebꞌyaꞌ 12 (kabꞌlahonhwanh) iskuywom,
yanito Komam ebꞌyaꞌ yinh katawanh.
Yaqꞌni Komam yip ebꞌyaꞌ yinilo ischejabꞌ naj matzwalil yinh anma.
8 Yet yalanhto maxhto chito ebꞌyaꞌ tuꞌ,
yalnikano Komam ischejbꞌanil ebꞌyaꞌ hakaꞌ tiꞌ:
—Matzet cheyito yinh hebꞌel,
mach cheyito hetzꞌispa yebꞌ tzet cheloh,
yebꞌpaxo hemelyu.
Wal xin hanhkꞌanhe heqꞌojoch cheyitoj,
9 yebꞌ hanhe hexanhabꞌ ayko yinh heyoj,
hanhechꞌan cheyitoj,
machi xin cheyipaxto hehelbꞌal.
10 Hayet chexapni yul hunun konhobꞌ,
haꞌ teꞌ nha bꞌay cheqꞌan bꞌay chexwayi,
hanhe bꞌey tuꞌ chexapni wayoj masanta yet chexmeltzohi.
11 Yajaꞌ tato ay hunu konhobꞌ bꞌay mach chexchahlax yu anma yebꞌ mach choche yabꞌe tzet cheyala,
chexel yul huneꞌ konhobꞌ tuꞌ,
kat hetziknikanilo ispojojal iskonhobꞌ anma tuꞌ yinh heyoj,
yunhe heyeniloj tato matxa heyok yinh hunteqꞌan anma tuꞌ,
xhi Komam.
12 Lahwi tuꞌ xin,
isto ebꞌyaꞌ iskuywom Komam tuꞌ yalno tet anma ta chisbꞌejkano iswatxꞌen istxꞌojal,
kat yaniko isbꞌa yul isqꞌabꞌ Komam Dios.
13 Kaw xin txꞌiꞌal mak bꞌay yilo ebꞌyaꞌ ischejabꞌ naj matzwalil,
txꞌiꞌal mak yaꞌay ismasiko ebꞌyaꞌ aceite yinh,
iskawxikanokanh.
Iskamikal yaꞌ Juan anikanh haꞌ iswiꞌ anma
14 Yabꞌelo naj rey Herodes isqꞌumal Komam Jesús yuto sunilxanhe bꞌay kꞌul istzotel anma yinh Komam.
Yalni naj Herodes hakaꞌ tiꞌ:
—Haꞌ huneꞌ naj tuꞌ,
haꞌ ton naj Juan anikanh haꞌ iswiꞌ anma xaꞌitzitzbꞌikanh,
yuxin ay yip naj iswatxꞌen kꞌaybꞌalkꞌule,
xhi naj.
15 Aypaxo mak chalni:
«Etzanhem yaꞌ Elías huneꞌ tuꞌ,»
xhi.
Aypaxo mak chalni:
«Huneꞌ yaꞌ tuꞌ ischejabꞌ Komam Dios ye yaꞌ,
hakaꞌ ebꞌyaꞌ ekꞌlena yet payat,»
xhi anma.
16 Hayet yabꞌen naj rey Herodes huneꞌ tuꞌ xin,
yalni naj:
—Haꞌ huneꞌ naj tuꞌ haꞌ ton naj Juan anikanh haꞌ iswiꞌ anma xaꞌitzitzbꞌikanh,
naj inchejan eloto iswiꞌ,
xhi naj.
17 Yuto yu ix Herodías,
yuxin ischej naj Herodes tzabꞌlaxoyo yaꞌ Juan,
iskꞌalbꞌalax yaꞌ yu chꞌen cadena,
yalaxikto yaꞌ yul preso.
Ix Herodías tuꞌ,
yixal yuxhta naj rey Herodes ye ix,
haꞌ ton naj Felipe.
Yajaꞌ yiqꞌkanh naj rey Herodes tuꞌ yixal yuxhtaj.
18 Yu huneꞌ tuꞌ,
yuxin kachwa yaꞌ Juan yinh naj Herodes hakaꞌ tiꞌ:
«Mach kꞌulo hawiqꞌni yixal hawuxhtaj,»
xhi yaꞌ.
19 Wal ix Herodías,
kaw ok ishowal ix yinh yaꞌ Juan,
yuxin yoche ix ispotxꞌoꞌ yaꞌ,
yajaꞌ machi yu ix,
yuto ayko istanhemal yaꞌ.
20 Wal naj Herodes chixiw naj yinh yaꞌ Juan tuꞌ yuto kaw yohta naj tato kaw tohol isbꞌeybꞌal yaꞌ,
yebꞌ ta machi nino istxꞌojal yinh yaꞌ,
kaw xin ilbꞌil yaꞌ yu naj.
Hayet chitzotel yaꞌ Juan tuꞌ kaw chabꞌe naj Herodes yinh tzet chal yaꞌ,
yajaꞌ mach chitxumcha yu naj yinh tzet wal yuten isbꞌa.
21 Yajaꞌ yet hunel xin yekꞌtze naj Herodes huneꞌ qꞌinh yuto tzꞌajna naj yinh ishabꞌilal,
yawten naj ebꞌnaj nimeta winaj chimunla yinta waꞌo yinh huneꞌ qꞌinh tuꞌ.
Yawtenpaxo naj ebꞌnaj yahawil yinh ebꞌnaj soldado yebꞌ ebꞌnaj iswiꞌehal yinh konhobꞌ Galilea.
Haꞌ tuꞌ xin apni istzꞌayikal bꞌay chu iswatxꞌen ix Herodías istxꞌojal yinh yaꞌ Juan.
22 Ix yunin ix Herodías tuꞌ,
okto ix kanhalwo yinh huneꞌ qꞌinh tuꞌ,
kaw xin kꞌul yu iskanhalwi ix yinh sat naj Herodes yebꞌ yinh sat ebꞌnaj ayko waꞌo iskꞌatanh naj,
yuxin yal naj tet ix:
—Qꞌan tzet chawoche wetan chiwaqꞌan tawet.
23 Kaw chiwalan yabꞌe Dios tato chiwaqꞌan tzet chaqꞌana,
waxanhka yikta tzet ayko yul inqꞌabꞌan,
xhi naj.
24 Hayet yabꞌen ix huneꞌ tuꞌ,
yelto ix,
isto ix isqꞌambꞌeno tet ismiꞌ:
—¿Tzettaxka chinqꞌanan?
xhi ix.
Yalni ix Herodías tet yunin tuꞌ:
—Haꞌ iswiꞌ naj Juan anikanh haꞌ iswiꞌ anma chaqꞌana,
xhi ix.
25 Isto ix yinh anhe iskꞌatanh naj Herodes tuꞌ,
yalni ix:
—Tinanh chiwochehan chawaqꞌ iswiꞌ naj Juan yul hunu plato wetan,
naj anikanh haꞌ iswiꞌ anma,
xhi ix.
26 Hayet yabꞌen naj rey Herodes huneꞌ tuꞌ kaw bꞌiskꞌulal eliko iskꞌul naj,
yajaꞌ matxa yu ismanhkꞌon naj yuto yal naj yinh sat ebꞌnaj kutxaniko tuꞌ ta chaqꞌ naj tzijxanhe tzet chisqꞌan ix.
27-28 Ischejni naj huneꞌ naj soldado yiqꞌalo iswiꞌ yaꞌ Juan.
Isto naj soldado tuꞌ yinolo iswiꞌ yaꞌ Juan yul preso,
yinito naj yul huneꞌ plato,
yaqꞌni naj tet ix qꞌopo tuꞌ.
Lahwi tuꞌ xin isto ix yaqꞌno tet ismiꞌ.
29 Hayet yabꞌen ebꞌyaꞌ iskuywom yaꞌ Juan huneꞌ tuꞌ,
yul ebꞌyaꞌ isqꞌanno isnimanil yaꞌ,
isto ebꞌyaꞌ ismujnokanoj.
Yet yaqꞌni waꞌo Komam Jesús howebꞌ mil ebꞌnaj winaj
30 Hayet ismeltzoto ebꞌyaꞌ ischejabꞌ Komam Jesús iskꞌatanh,
yichiko ebꞌyaꞌ yalni tet Komam yinh tzet iswatxꞌe yebꞌ yinh tzet bꞌey ebꞌyaꞌ yaqꞌaꞌ iskuyuꞌ anma.
Marcos 6:30-56
31 Lahwi tuꞌ xin yalni Komam tet ebꞌyaꞌ:
—Tonhwe xewo nino kochukil bꞌay machi anma chiꞌekꞌi,
xhi Komam.
Yal Komam hakaꞌ tuꞌ yutoxanhe chitenxi anma yinh Komam,
ay anma chitohi,
aypaxo anma chihuli.
Matxatikꞌa xin ishamanil Komam iswaꞌ yebꞌ ebꞌyaꞌ ischejabꞌ tuꞌ.
32 Yuxinto okto Komam yebꞌ ebꞌyaꞌ ischejabꞌ yul huneꞌ teꞌ barco,
isto Komam bꞌay machi anma chiꞌekꞌi.
33 Yajaꞌ txꞌiꞌal mak ilni isto Komam yebꞌ ebꞌyaꞌ,
istxumnilo anma bꞌay chiꞌapni Komam,
yuxin sunil anma ay yul hunteqꞌan konhobꞌ ayayo istiꞌ haꞌ tuꞌ,
to yu yoj bꞌay chiꞌapni Komam.
Bꞌabꞌel xin apni anma tuꞌ sata Komam yuxin hayet yapni Komam wejanxato anma yechmani.
34 Hayet yelti Komam yul teꞌ barco xin,
yilni Komam anma tenanayo tuꞌ,
istzꞌaykanh iskꞌul Komam yinh anma yuto lahan anma tuꞌ hakaꞌ noꞌ meꞌ machi mak chitanheni.
Hak tuꞌ yu yokpaxo Komam yalni txꞌiꞌal kuybꞌanile tet anma.
35 Haxa yinh qꞌejbꞌiyal xin ishitziko ebꞌyaꞌ iskuywom Komam iskꞌatanh,
yalni ebꞌyaꞌ xin:
—Mamin,
kaw qꞌejbꞌixa lah,
machi xin teꞌ nha bꞌay ayonh tiꞌ;
36 estam chachejto anma bꞌay ay ej teꞌ nha,
maka yulaj aldea ayko kohoyanil tiꞌ kat isloqꞌni tzet chislo,
xhi ebꞌyaꞌ.
37 Yalni Komam:
—Aqꞌwe tzet chislo anma hex tiꞌ,
xhi Komam.
Istaqꞌwi ebꞌyaꞌ:
—¿Tom chonhtohanh koloqꞌoꞌanh kabꞌ ciento denario ixim pan chiswah anma tiꞌ chal tuꞌ?
xhi ebꞌyaꞌ.
38 Yalni Komam tet ebꞌyaꞌ:
—¿Hayebꞌ ixim pan ay texol?
Ilwej hayebꞌ ixim,
xhi Komam.
Hayet yilni ebꞌyaꞌ,
yalni ebꞌyaꞌ tet Komam:
—Mamin,
howebꞌnhe ixim yebꞌ kakꞌonh noꞌ nixhte kay,
xhi ebꞌyaꞌ.
39 Yalni Komam tet anma tato chiꞌay tzꞌonhno sat cheqꞌanh tuꞌ yinh hunta majan.
40 Yuxin ay tzꞌonhno anma yinh 50 (lahonhebꞌ yoxkꞌal) yebꞌ yinh 100 (hokꞌal) yinh hunun majan.
41 Lahwi tuꞌ xin yinikanh Komam ixim howebꞌ pan yebꞌ noꞌ kakꞌonh kay,
istꞌanhxikanh Komam satkanh,
isqꞌanni Komam iskꞌulal Komam Dios yibꞌanh tzet chilolax tuꞌ.
Lahwi tuꞌ yok Komam isqꞌaxponoyo ixim pan,
yaqꞌni Komam ixim tet ebꞌyaꞌ iskuywom,
yok ebꞌyaꞌ yitxqꞌanoto ixim yinh anma;
yitxqꞌanpaxto ebꞌyaꞌ noꞌ kakꞌonh kay yinh anma.
42 Sunil anma waꞌi hantatikꞌa kaw yoche iskꞌul.
43 Hayet lahwi iswaꞌkanilo sunil anma tuꞌ,
yok ebꞌyaꞌ iskuywom Komam iskutxbꞌanokanh ixim pan yebꞌ noꞌ kay matxa lahwi yu anma;
kaw xin 12 (kabꞌlahonhebꞌto) motx nohkanh.
44 Howebꞌ mil ebꞌnaj waꞌ yu Komam bꞌey tuꞌ.a
Yet isbꞌelwikꞌo Komam Jesús yibꞌanh haꞌ lago
45 Lahwi tuꞌ ischejnito Komam Jesús ebꞌyaꞌ iskuywom yul teꞌ barco,
yunhe isbꞌabꞌito ebꞌyaꞌ sata Komam bꞌey konhobꞌ Betsaida isqꞌaxebꞌikꞌto haꞌ lago tuꞌ,
wal Komam xin kankano taqꞌlo tet anma.
46 Lahwi tuꞌ yahto Komam yinh iskꞌul huneꞌ wonhan yu istxahli.
47 Haxa yet yah aqꞌbꞌal xin yiktabꞌalxa haꞌ ayko teꞌ barco tuꞌ,
wal Komam aytokano yinh iskꞌul huneꞌ wonhan tuꞌ ischukil.
48 Yilnito Komam tato kaw yaꞌta chaqꞌle ebꞌyaꞌ iskuywom tuꞌ ismaqꞌni ha haꞌ yu yinikꞌo teꞌ barco tuꞌ yibꞌanh haꞌ,
yuto kaw ay yip istit jaqꞌeqꞌ sata teꞌ barco tuꞌ.
Haxa yet lanhanxa issajbꞌilo xin isto Komam istzujnoyo ebꞌyaꞌ,
isbꞌelwito Komam yibꞌanh haꞌ,
yajaꞌ isyelo Komam hakaꞌtanhe palan yekꞌto sata ebꞌyaꞌ iskuywom tuꞌ.
49 Hayet yilni ebꞌyaꞌ isbꞌelwi Komam yibꞌanh ha haꞌ tuꞌ,
ispixanmi kamom yalni ebꞌyaꞌ,
yuxin ah yaw ebꞌyaꞌ yinh kaw ip.
50 Kaw sunil ebꞌyaꞌ ilni,
isxiwkanh ebꞌyaꞌ,
yajaꞌ yal Komam tet ebꞌyaꞌ:
—¡Ayojabꞌ yip heyanma,
mach chexxiwi yuto haninan!
xhi Komam.
51 Lahwi tuꞌ yahto Komam yul teꞌ barco,
hayet ayxahto Komam yul teꞌ islinhi yekꞌ jaqꞌeqꞌ,
kaw xin kꞌayilo iskꞌul ebꞌyaꞌ iskuywom Komam yilni huneꞌ tuꞌ.
52 Waxanhka yil ebꞌyaꞌ yet iswatxꞌen Komam huneꞌ kꞌaybꞌalkꞌule yinh ixim pan,
yajaꞌ xin machi txumchalo yu ebꞌyaꞌ,
yuto maxhto chihajcha isnabꞌal ebꞌyaꞌ.
Yet yaqꞌni kawxo Komam Jesús hunteqꞌan anma yaꞌay bꞌey Genesaret
53 Hayet isqꞌaxponikꞌto Komam Jesús yibꞌanh haꞌ lago yebꞌ ebꞌyaꞌ iskuywom,
yapni Komam yul ismajul Genesaret,
isxekbꞌankano ebꞌyaꞌ isbarco istiꞌ haꞌ.
54 Yet yelti Komam yebꞌ ebꞌyaꞌ iskuywom yul teꞌ barco yohtanhenilo anma ta haꞌ Komam apni bꞌey tuꞌ.
55 Kaw xin sunil yul ismajul huneꞌ konhobꞌ tuꞌ pujbꞌalaxikꞌoj ta apni Komam.
Hayet yabꞌenilo anma bꞌay ay Komam yinito anma makta yaꞌay sat bꞌatxteꞌ iskꞌatanh Komam.
56 Tzijxanhe aldea yebꞌ konhobꞌ yebꞌ bꞌay pujanto yatut anma bꞌay ekꞌ Komam,
ilaxilti anma yaꞌay yulaj calla,
chisqꞌanni anma tet Komam ta chistzabꞌ anma yaꞌay tuꞌ Komam,
waxanhka hanhe istiꞌ xil isqꞌap Komam chistzabꞌa.
Sunil anma tzabꞌni Komam tuꞌ kawxikanokanh.