Ilwelax Komam Jesús yu naj matzwalil
4
Ayko Komam Jesús,
yalanh yip Komam Espíritu Santo yet yel istiꞌ haꞌ niman Jordán,
yet lahwi yah haꞌ iswiꞌ.
Yilaxto Komam Jesús yu Komam Espíritu Santo tuꞌ bꞌey huneꞌ txꞌotxꞌ desierto.
2 Haꞌ tuꞌ ehayo Komam 40 (kawinaj) tzꞌayik,
maxhtikꞌa xin waꞌi.
Lahwi tuꞌ xin yok naj matzwalil yilweno Komam yunhe yaniko ismul,
yuto kaw xanhohcha Komam.
3 Yalni naj matzwalil tet Komam:
—Tato Iskꞌahol Komam Dios hawehi,
hal tet huneꞌ chꞌen chꞌen tiꞌ meltzojabꞌiko chꞌen wahil,
xhi naj.
4 Istaqꞌwikanh Komam tet naj matzwalil tuꞌ xin:
—Yul Yum Komam Dios tzꞌibꞌnhebꞌilkanoj:
“Maxhnhetaj yu tzet chikolo yuxin ay koqꞌinal,
to yupaxo Istzotiꞌ Komam,”
xhihayoj,
xhi Komam tet naj.
5 Lahwi tuꞌ xin,
yilaxto Komam yu naj matzwalil bꞌay kaw nahat yekanokanh,
lembꞌilnhe xin isyeni naj sunil ej txꞌotxꞌ nimeta konhobꞌ ay yul sat yibꞌanhqꞌinal tiꞌ yebꞌ isqꞌalomal txꞌotxꞌ tet Komam.
6 Lahwi tuꞌ xin yalni naj matzwalil tet Komam:
—Chaxhwaqꞌakojan yahawo sunil hunteqꞌan txꞌotxꞌ konhobꞌ tiꞌ yebꞌ yinh isqꞌalomal.
Haꞌ hunteqꞌan tiꞌ aqꞌbꞌiliko yul inqꞌabꞌan,
yuxin chisje waqꞌnihan tet mak bꞌay choche inkꞌulan.
7 Ta chaxhay jahno insatajan,
kat hawinayo habꞌa wetan,
chiwaqꞌaꞌan sunil hunteqꞌan tiꞌ tawet,
kat yokkano hawu,
xhi naj matzwalil tet Komam.
8 Istaqꞌwikanh Komam Jesús tet naj matzwalil tuꞌ:
—Chal Komam Dios yul Yum hakaꞌ tiꞌ:
“Hanhechꞌan wetan chu heyinayo hebꞌa,
yuto heYahawil yebꞌ heDiosalpaxo wehan,
yebꞌ hanhechꞌan wetan cheyije,”a
xhihayoj,
xhi Komam tet naj.
9 Lahwi tuꞌ xin,
yilaxto Komam yul konhobꞌ Jerusalén yu naj matzwalil.
Yinahto naj Komam yinh iswiꞌ Yatut Komam Dios,
yalni naj:
«Chiwaqꞌaꞌtojan ebꞌnaj ángel kaxhistanheꞌ,
11 yunhe mach chaxhischayo ebꞌnaj sat txꞌotxꞌ
yunhe mach chilahwi hawoj yinh chꞌen chꞌen,b
xhihayoj,»
xhi naj tet Komam.
12 Istaqꞌwi Komam tet naj:
—Yaj halbꞌilpaxo yul Yum Komam Dios:
Mach chinheyakojan yinh ilwebꞌal yuto heYahawil wehan,
yebꞌ xin heDiosal wepaxojan,c
xhihayoj,
xhi Komam.
13 Yet yilni naj matzwalil ta matxa hunuxa tzet bꞌay chu issubꞌcha Komam Jesús yu naj,
isbꞌejnikano naj Komam hanikꞌ tiempohal.
El Diablo Tienta a Jesús
Yul ismajul Galilea yicheko Komam Jesús ismunil
14 Lahwi tuꞌ xin ismeltzopaxto Komam Jesús bꞌey Galilea,
ayko Komam yalanh yip Komam Espíritu Santo.
Sunil yul ismajul Galilea tuꞌ pujnakanh yabꞌelaxilo Komam.
15 Iskuyni Komam anma yul hunun konhobꞌ yul iscapilla ebꞌnaj Israel,
kaw sunil anma halni kꞌul-la tzotiꞌ yinh Komam.
Yet yapni Komam Jesús yul konhobꞌ Nazaret
16 Lahwi tuꞌ xin,
isto Komam Jesús bꞌey konhobꞌ Nazaret bꞌay chꞌibꞌkanh.
Hayet istzꞌayikal xewilal yokto Komam yul iscapilla ebꞌnaj Israel hakaꞌtikꞌa chu isbꞌey Komam yinh hunun tzꞌayik xewilal.
Yah linhno Komam bꞌay chꞌok linhno ebꞌnaj ijbꞌalom chiꞌilni Yum Komam Dios.
17 Yaqꞌlax teꞌ hum tet Komam,
teꞌ hum tzꞌibꞌnhebꞌilkano yu yaꞌ Isaías,
huneꞌ ischejabꞌ Komam Dios yet payat.
Isholnito Komam teꞌ xin,
yilchalo yu Komam bꞌay chal hakaꞌ tiꞌ:
18 «Ayko Yespíritu Komam Dios Jahawil winhan,
sikꞌbꞌil inkanhan yu walnihan tzotiꞌ kꞌul tet anma matzet ayko yipo yanma.
Aqꞌbꞌilintijan yu Komam yu walnihan ta chikol-lax makta hakaꞌ preso yehi,
yebꞌ yu waqꞌnipaxojan issajilqꞌinal yilaꞌ makta mach chu yilni,
yebꞌ yu inbꞌejtzonan mak ayko yalanh isyaꞌtajil.
19 Kinyatijan walaꞌan ta maꞌayilo istiempohal iskolni
Komam Dios iskonhobꞌ,
xhihayoj,»
xhi Komam.
20 Lahwi tuꞌ xin,
ischulnipaxkanayo Komam Jesús teꞌ hum tuꞌ,
yaqꞌni Komam teꞌ tet naj ay ismunil yul iscapilla ebꞌnaj Israel tuꞌ,
yay tzꞌonhno Komam.
Sunil anma ayikto bꞌey tuꞌ,
okkano tꞌanhno yinh Komam.
21 Yichiko Komam yalnilo tet anma hakaꞌ tiꞌ:
—Haꞌ yinh huneꞌ tzꞌayik tiꞌ,
yinh hesat mayijkano isbꞌa tzet tzꞌibꞌnhebꞌilkano yinh teꞌ hum tiꞌ,
xhi Komam.
22 Wal xin sunil anma kaw kꞌul istzotel yinh Komam Jesús.
Kaw kꞌay iskꞌul yuto kaw kꞌulchꞌan istzotel Komam.
Yichiko anma yalni tet hunun:
—¡Yaj iskꞌahol naj José ye naj tiꞌ!
¿Tzet xin chu yalni naj hakaꞌ tiꞌ?
xhi ebꞌnaj yinh Komam.
23 Yuxin yal Komam tet anma:
—Hex tiꞌ,
¿chimheyalaꞌ wetan yinh huneꞌ tzotiꞌ chal anma?:
“Hach anhtem anma,
anhtekano habꞌa,”
xhi.
Chimheyalpaxoj:
“Jabꞌehanh tzettaj ye tuꞌ hawatxꞌe bꞌey Capernaúm,
yuxin watxꞌepaxo yul hakonhobꞌ tiꞌ,”
kexchimi wetan,
xhi Komam.
24 Yalnipaxo Komam:
—Yinh kaw isyelal chiwalan teyet,
machi hunu ischejabꞌ Komam Dios xahan chiꞌil-lax yul iskonhobꞌ.
25 Naweti yinh istiempohal yaꞌ Elías,
ischejabꞌ Komam Dios payat.
Kaw yikta yox habꞌil machi yaqꞌ nhabꞌ,
yuxin hul huneꞌ niman wahil yibꞌanh anma sunil.
Yet huneꞌ tiempohal tuꞌ,
tzetkꞌa ebꞌix hunix jet Israelal,
26 yaj maxhtaj yinh ebꞌix tuꞌ alaxti yaꞌ Elías kolwal yu Komam wal xin hanhechꞌan yinh huneꞌ ix mach Israeloj,
huneꞌ ix ay bꞌey konhobꞌ Sarepta yul ismajul Sidón.
27 Nawepaxti yinh huneꞌxa ischejabꞌ Komam Dios chiyij Eliseo.
Yinh istiempohal yaꞌ,
tzetkꞌa jet konhobꞌ Israel ayko yabꞌil lepra yinh;d
yaj machi hunu ebꞌnaj tuꞌ yaqꞌ kawxo yaꞌ Eliseo;
hanhechꞌan huneꞌ naj mach Israeloj chiyij Naamán ay yul ismajul Siria,
hanhechꞌan naj tuꞌ yaqꞌ kawxo yaꞌ,
xhi Komam tet ebꞌnaj.
28 Hayet yabꞌen ebꞌnaj ayikto yul capilla tuꞌ yinh tzet yal Komam,
kaw tit ishowal ebꞌnaj.
29 Yah linhno ebꞌnaj,
yok tzabꞌno ebꞌnaj yinh Komam,
yinito ebꞌnaj Komam yinh istxam konhobꞌ yinh iswiꞌ huneꞌ witz bꞌay ayko konhobꞌ tuꞌ yu istennikanto ebꞌnaj Komam sat huneꞌ pahaw yalni.
30 Yaj wal Komam Jesús palan yekꞌto Komam xolbꞌal ebꞌnaj,
isto Komam.
Jesús Proclama el Cumplimiento de las Escrituras
Yet yaqꞌni kawxo Komam Jesús huneꞌ naj ayko ischejabꞌ naj matzwalil yinh
31 Lahwi tuꞌ xin,
isto Komam Jesús yul konhobꞌ Capernaúm yul ismajul Galilea.
Iskuyni Komam anma yinh hunun tzꞌayik xewilal yul iscapilla ebꞌnaj Israel.
32 Kaw xin chikꞌay iskꞌul anma yabꞌen iskuywa Komam,
yuto kaw habꞌan isyenilo isbꞌa ta kaw aqꞌbꞌil yip yu Komam Dios.
33 Yul capilla tuꞌ ayikto huneꞌ naj ayko ischejabꞌ naj matzwalil yinh,
yah yaw naj yinh kaw ip,
yalni naj tet Komam:
34 —¿Tzet hawok jinhanh hach Jesús ah Nazaret?
¿Tom chaxhhul konhhatanhtzelojanh hawalni?
Wohtajan mak anmahilach hach tiꞌ,
machi nino istxꞌojal ayko tawinh,
xhi naj tet Komam.
35 Iskachwa Komam yinh ischejabꞌ naj matzwalil tuꞌ:
—¡Kach hatiꞌ!
¡Elanh yinh naj!
xhi Komam.
Lahwi tuꞌ xin,
isqꞌojlaxayo naj sat txꞌotxꞌ yu ischejabꞌ naj matzwalil sata sunil anma.
Yel ischejabꞌ naj matzwalil yinh naj,
yaj machi islahwilal naj oki yet isqꞌojlaxayo naj.
36 Kaw kꞌayilo iskꞌul sunil anma yilni,
yalobꞌtanhen anma tet hunun:
—¿Tzet tzotiꞌal mayal naj tiꞌ?
¡Kaw aykano yip istzotiꞌ naj!
¡Kaw chiyijelax tzet chal naj,
yet chalni naj ta chꞌel ischejabꞌ naj matzwalil yinh anma,
yinh anhe chꞌel ebꞌnaj!
xhi anma yinh Komam.
37 Sunil yul ismajul huneꞌ konhobꞌ tuꞌ yebꞌ ej ishoyanil,
pujnakꞌo isbꞌi ta ay yip Komam.
Yaqꞌ kawxo Komam Jesús ismiꞌ yixal yaꞌ Simón Pedro
38 Hayet yelti Komam Jesús yul capilla tuꞌ,
isto Komam yatut yaꞌ Simón.
Kaw ay qꞌaꞌ yinh ismiꞌ yixal yaꞌ,
yuxin qꞌanlax tet Komam ta chaqꞌ kawxo Komam ixnam.
39 Ishitziko Komam iskꞌatanh ixnam,
yinilo Komam huneꞌ qꞌaꞌ tuꞌ yinh ixnam,
iskawxikanh ixnam.
Hunepixto xin yahwano ixnam,
iswatxꞌen ixnam tzet chislo Komam yebꞌ iskuywom.
Txꞌiꞌal anma kawxikanh yu Komam Jesús
40 Hayet lanhan isto tzꞌayik xin,
sunil anma bꞌeykꞌo yaqꞌaꞌkano isyawubꞌ tet Komam,
tzitamla yabꞌilal ayko yinh.
Hayet chanayo Komam isqꞌabꞌ yibꞌanh anma yaꞌay tuꞌ,
kat iskawxikanokanh.
41 Tzetkꞌa anma ayko ischejabꞌ naj matzwalil yinh kawxikanh,
toxanhe chꞌel yaw ebꞌnaj yet chꞌelkano ebꞌnaj yinh anma,
chalni ebꞌnaj hakaꞌ tiꞌ:
—¡Hach tiꞌ,
Iskꞌahol Komam Dios hawehi!
xhi ebꞌnaj.
Yaj kachlax ebꞌnaj yu Komam.
Machi chahlax tzotelo ebꞌnaj yuto yohta ebꞌnaj ta haꞌ Komam Jesús tuꞌ,
haꞌ ton Komam Cristo,
echmabꞌil yul yu ebꞌnaj Israel.
Yet iskuywa Komam Jesús yul iscapilla ebꞌnaj Israel
42 Hayet issajbꞌilo hunxa tzꞌayik xin,
yel Komam Jesús yul konhobꞌ,
isto Komam bꞌay machi anma chꞌekꞌi.
Istopaxo anma saywal yinh Komam.
Hayet yapni anma bꞌay ay Komam tuꞌ xin,
yeliko yaw anma yinh Komam ta mach chito Komam hunuxa konhobꞌ.
43 Yalni Komam tet anma:
—Yilal wekꞌan walnokꞌojan Tzotiꞌ Kꞌul yinh tzet chu yok anma yul isqꞌabꞌ Komam Dios yul hunteqꞌanxa konhobꞌ,
yu huneꞌ tuꞌ yuxin Aqꞌbꞌilintijan,
xhi Komam.
44 Hak tuꞌ yu yekꞌ Komam iskuyno anma yulajla konhobꞌ yul hunun iscapilla ebꞌnaj ah Galilea.