Yet yilwelax Komam Jesús yu naj matzwalil
4
Lahwi tuꞌ yilaxto Komam Jesús yu Komam Espíritu Santo bꞌey txꞌotxꞌ desierto yu yilwelax Komam yu naj matzwalil.
2 Kaw xin yulbꞌal 40 (kawinaj) tzꞌayik yebꞌ 40 (kawinaj) aqꞌbꞌal mach waꞌ Komam,
lahwi tuꞌ isnhohchakanh.
3 Yapni naj matzwalil yilweno Komam,
yalni naj tet Komam:
—Ta yeli Iskꞌahol Dios hawehi,
hal tet hunteqꞌan chꞌen chꞌen tiꞌ meltzojabꞌiko chꞌen wahil,
xhi naj.
4 Istaqꞌwi Komam tet naj:
—Wal xin tzꞌibꞌnhebꞌilkano yul Yum Komam Dios tato maxhnhetaj yu tzet chikolo yuxin ay koqꞌinal,
to yupaxo Istzotiꞌ Komam,a
xhihayoj,
xhi Komam tet naj.
5 Lahwi tuꞌ yinito naj matzwalil Komam yul konhobꞌ Jerusalén,
iskonhobꞌ Komam Dios,
yinahto naj Komam yinh iswiꞌ Yatut Komam bꞌey tuꞌ,
6 yalni naj tet Komam:
—Tato kaw yeli Iskꞌahol Dios hawehi qꞌojayto habꞌa bꞌey tiꞌ,
yuto tzꞌibꞌnhebꞌilkano yul Yum Komam Dios hakaꞌ tiꞌ:
Chaqꞌati Komam Dios yángel kaxhistanheꞌ yunhe mach chaxhischayo ebꞌnaj sat txꞌotxꞌ,
haxinwal mach chilahwi hawoj yinh chꞌen chꞌen,b
xhihayoj,
xhi naj.
7 Istaqꞌwi Komam Jesús tet naj:
—Tzꞌibꞌnhebꞌilpaxkanayo yul Yum Komam Dios hakaꞌ tiꞌ:
“Mach chinheyakojan yinh ilwebꞌal yuto heYahawil yebꞌ heDiosal wehan,”c
xhihayoj,
xhi Komam.
8 Lahwi tuꞌ yinito naj Komam yinh iswiꞌ huneꞌ witz kaw nahat yekanokanh,
isyeni naj sunil ej konhobꞌ ay yul sat yibꞌanhqꞌinal tiꞌ yebꞌ isqꞌalomal konhobꞌ tuꞌ tet Komam.
9 Yalni naj tet Komam:
—Sunil hunteqꞌan chawil tiꞌ chiwaqꞌan tawet,
yaj tato chaxhay jahno insatajan kat hawinayo habꞌa wetan,
xhi naj tet Komam.
10 Istaqꞌwi Komam:
—Hach matzwalil,
hitzanhilo inkꞌatanhan yuto chal yul Yum Komam Dios hakaꞌ tiꞌ:
“Iweyo hebꞌa tet Komam Dios yuto heYahawil yebꞌ heDiosal ye Komam,
hanhe tet Komam xin cheyije tzet chala,”d
xhihayoj,
xhi Komam.
11 Yet yalni Komam Jesús hakaꞌ tuꞌ isbꞌejnikano naj Komam,
yapni hunteqꞌan ebꞌnaj ángel kolwal yinh Komam.
Yicheko Komam Jesús ismunil yinh yalni Istzotiꞌ Komam Dios bꞌey Galilea
12 Hayet yabꞌen Komam Jesús tato alaxikto yaꞌ Juan anikanh haꞌ iswiꞌ anma yul preso,
isto Komam yul ismajul Galilea.
13 Yajaꞌ xin mach kankano Komam yul konhobꞌ Nazaret,
wal xin to Komam yul konhobꞌ Capernaúm,
haꞌ tuꞌ xin ehayo Komam.
Huneꞌ konhobꞌ tuꞌ ayayo istiꞌ haꞌ mar Galilea,
txꞌotxꞌ chiyij Zabulón yebꞌ Neftalí.
14 Hak tuꞌ yu yijni isbꞌa tzet tzꞌibꞌnhebꞌilkano yu yaꞌ Isaías,
ischejabꞌ Komam Dios yet payat,
bꞌay chala:
15 «¡Txꞌotxꞌ Zabulón yebꞌ txꞌotxꞌ Neftalí,
txꞌotxꞌ ayikꞌto satakꞌto haꞌ Jordán,
txꞌotxꞌ ayayo istiꞌ haꞌ mar,
yul ismajul txꞌotxꞌ Galilea bꞌay ay txꞌiꞌal anma mach Israeloj!
16 Hunteqꞌan anma tuꞌ aytikꞌako xol qꞌejholo yajaꞌ wal tinanh xin xaꞌapni issajilqꞌinal tet.
Hunteqꞌan anma tuꞌ iskambꞌalxatikꞌa,
yajaꞌ wal tinanh xaꞌapni issajilqꞌinal yaqꞌlobꞌal yanma,»e
xhihayoj.
17 Haꞌ bꞌey tuꞌ xin ichiko Komam Jesús yalnikꞌo Istzotiꞌ Komam Dios,
chalni Komam:
«¡Bꞌejwekano hewatxꞌen istxꞌojal yuto yokxa Komam Dios ay yul satkanh Yahawo teyinh!»
xhi Komam.
Yet yawten Komam Jesús kanhwanh ebꞌnaj iqꞌomati kay
18 Hayet lanhan isbꞌelwi Komam Jesús istiꞌ haꞌ lago Galilea,
yapni Komam iskꞌatanh kawanh ebꞌyaꞌ iqꞌomati kay,
lanhan yanayto ebꞌyaꞌ ishakꞌ chiꞌinahti noꞌ kay xol haꞌ.
Ebꞌyaꞌ kawanh tiꞌ yuxhta isbꞌa,
haꞌ ton yaꞌ Simón,
yaꞌ chihal-laxpaxo Pedro,
yebꞌ xin yaꞌ Andrés.
19 Yalni Komam tet ebꞌyaꞌ:
—Okanhwe tzujno wintajan,
wal tinanh haxa anma chexok heyiqꞌahtij kat yok yul inqꞌabꞌan,
xhi Komam.
20 Yet yabꞌen ebꞌyaꞌ yalni Komam hakaꞌ tuꞌ,
isbꞌejnikano ebꞌyaꞌ ishakꞌ,
yok tzujno ebꞌyaꞌ yinta Komam.
21 Hanikꞌixto chito Komam Jesús xin yilnipaxo Komam kawanhxa ebꞌyaꞌ yuxhta isbꞌa,
haꞌ ton yaꞌ Jacobo yebꞌ yaꞌ Juan,
ebꞌyaꞌ iskꞌahol icham Zebedeo.
Ayahto ebꞌyaꞌ yul isbarco yebꞌ ismam tuꞌ,
lanhan xin isbꞌujni ebꞌyaꞌ ishakꞌ.
Yalnipaxo Komam tet ebꞌyaꞌ tato chiꞌoktzujno ebꞌyaꞌ yinta Komam.
22 Yet yabꞌen ebꞌyaꞌ huneꞌ tuꞌ yanikano ebꞌyaꞌ isbarco yebꞌ ismam,
yok tzujno ebꞌyaꞌ yinta Komam.
Kaw txꞌiꞌal anma iskuy Komam Jesús
23 Kaw sunil yul ismajul Galilea ekꞌ Komam Jesús,
iskuyni Komam anma yul hunun iscapilla ebꞌnaj Israel,
yalni Komam tzotiꞌ kꞌul yinh tzet chu yok anma yul isqꞌabꞌ Komam Dios.
Yaqꞌni kawxo Komam anma yinh sunilal yabꞌil ayko yinh,
yebꞌ anma chiꞌekꞌyaꞌ yanma.
24 Kaw xin pujnakanh isqꞌumal Komam yul ismajul Siria,
chiniti anma makta ayko yabꞌil yinh.
Ay mak chꞌekꞌyaꞌ yanma yu yabꞌil,
ay mak ayko ischejabꞌ naj matzwalil yinh,
aypaxo mak chilow yaxkamik yinh,
yebꞌ aypaxo mak kamnajilo isnimanil.
Sunil hunteqꞌan anma tuꞌ yaqꞌ kawxo Komam.
25 Kaw hantanhe anma ok tzujno yinta Komam;
ay anma ah Galilea,
ay anma ah Decápolis,
ay anma ah Jerusalén yebꞌ anma ah Judea,
yebꞌpaxo anma ay isqꞌaxebꞌikꞌto haꞌ niman Jordán.