Kuywa Komam Jesús yinh istzalanil huneꞌ wonhan yinh mak saqꞌal yet
5
Hayet yilni Komam Jesús tato kaw hantanhe anma apni iskꞌatanh,
yahto Komam yinh istzalanil huneꞌ wonhan,
yay tzꞌonhno Komam,
ishitziko ebꞌnaj iskuywom Komam iskꞌatanh.
2 Yok Komam iskuyno ebꞌnaj iskuywom tuꞌ,
yichiko Komam yalni hakaꞌ tiꞌ:
3 «Saqꞌal yet mak chitxumchalo yu ta mach chu iskolni isbꞌa ischukil,
yuxin yinhnhe Komam chikawxi iskꞌul.
Haꞌ mak tuꞌ yet ay yok yul isqꞌabꞌ Komam Dios.
4 »Saqꞌal yet mak chiyiqꞌ bꞌiskꞌulal yu istxꞌojal chiswatxꞌe,
yuto chiꞌaqꞌlax yaqꞌlobꞌal iskꞌul yu Komam Dios.
5 »Saqꞌal yet mak chewchotanhe chute isbꞌa yuto chischah huneꞌ txꞌotxꞌ haltebꞌilkano yu Komam Dios.a
6 »Saqꞌal yet mak choche iskꞌul iswatxꞌeꞌ tzet chal Komam Dios yuto chij isbꞌa tzet choche.
7 »Saqꞌal yet mak chitzꞌay iskꞌul yinh yet anmahil,
yuto hak tuꞌ chu istzꞌaypaxo iskꞌul Komam Dios yinh.
8 »Saqꞌal yet mak sajxa ye yanma yul sat Komam Dios,
yuto haꞌ anma tuꞌ chiꞌapni iskꞌatanh Komam.
9 »Saqꞌal yet mak chisayni aqꞌankꞌulal yuto chal Komam Dios yuninaloj.
10 »Saqꞌal yet mak kaj chiꞌil-laxi yu chiswatxꞌe istoholal hakaꞌ choche Komam,
yuto ayxako yul isqꞌabꞌ Komam Dios ay yul satkanh.
11 »Saqꞌal heyet yet chexbꞌahlaxi yebꞌ yet chexetalaxi,
kat ishobꞌlaxkanh leqꞌtiꞌal teyinh yuto tzujan hex wintajan.
12 Kaw aqꞌwe tzalaho heyanma ta hak tuꞌ chexutelaxi yuto chꞌaqꞌlax ispaj selel teyet bꞌey satkanh.
Yuto hakaꞌ heyilni isyaꞌtajil tiꞌ,
hak tuꞌ yu yekꞌyaꞌ yanma ebꞌyaꞌ ischejabꞌ Komam Dios ekꞌlena yet payat,»
xhi Komam.
Hakaꞌ atzꞌam atzꞌam yebꞌ sajilqꞌinal je yul sat yibꞌanhqꞌinal
13 Yalnipaxo Komam Jesús:
«Hex tiꞌ,
hakaꞌ atzꞌam atzꞌam,
hak tuꞌ heye yul sat yibꞌanhqꞌinal tiꞌ.
Qꞌinalo ta chiꞌel iskꞌachiꞌal atzꞌam matxa chu yok iskꞌachiꞌal hunelxa,
hak tuꞌ xin matxa tzet chꞌokniko atzꞌam,
to chitirlaxtoj kat isxanhlaxikꞌo yu anma,»
xhi Komam.
14 Yalnipaxo Komam Jesús:
«Hex tiꞌ hakaꞌpaxo sajilqꞌinal heye yul sat yibꞌanhqꞌinal tiꞌ.
Qꞌinalo ta ay hunu konhobꞌ yinh iswiꞌ hunu witz,
kaw habꞌan jilnilto nahat.
15 Yet chikotzujbꞌaniko qꞌaꞌ yinh hunu cantil,
mach chikonhohbꞌako hunu almuh yibꞌanh,
wal xin chikotꞌunhbꞌakanh yunhe ismujli yinh anma ayikto yul nha tuꞌ.
16 Hakojabꞌ tuꞌ xin istzejla huneꞌ sajilqꞌinal ayxako teyinh yinh sat anma,
haxinwal chil anma iskꞌulal chewatxꞌe.
Hak tuꞌ xin kꞌul istzotel anma yinh Komam ay yul satkanh,»
xhi Komam.
Kuywa Komam Jesús yinh isley yaꞌ Moisés
17 Yalnipaxo Komam Jesús hakaꞌ tiꞌ:
«Tajka chetxumu ta yu intanhtzenilojan isley yaꞌ Moisés yebꞌ kuybꞌanile aykano yu ebꞌyaꞌ ischejabꞌ Komam Dios yuxin kinhulan,
machoj,
wal xin to yunhe waqꞌnihan ohtanhelaxilo yinh tzet chaliloj yuxin kinhulan.
18 Yinh kaw yeli chiwalan teyet ta kaw yilal yijni isbꞌa sunil tzet tzꞌibꞌnhebꞌilkano yul Yum Komam Dios.
Yulbꞌal yul sat yibꞌanhqꞌinal tiꞌ yebꞌ satkanh,
machi hun txꞌinano ayayo yinh ley mach chꞌekꞌto yet yijni isbꞌa.
19 Yuxin haꞌ mak mach chiyijen hunu chejbꞌanile ayko yinh ley,
waxanhka machi bꞌin tzet chaliloj,
machi xin chiskuypaxo yet anmahil isyijeni,
haꞌ huneꞌ mak tuꞌ machi yelapno chuko xol mak chiꞌok yul isqꞌabꞌ Komam Dios.
Wal mak chiyijen xin kat iskuynipaxo yet anmahil isyijeni,
haꞌ huneꞌ mak tuꞌ kaw ay yelapno chuko xol anma chꞌok yul isqꞌabꞌ Komam Dios.
20 Yuxin chiwalan teyet,
tato mach ekꞌbꞌalto kꞌul cheyute heyijen yinh tzet halbꞌilkano yu Komam Dios tuꞌ,
sata ebꞌnaj chikuywa yinh ley yebꞌ ebꞌnaj fariseo,
mach chexok yul isqꞌabꞌ Komam Dios,»
xhi Komam Jesús.
Kuywa Komam Jesús yibꞌanhilo mak chichiwa iskꞌul
21 Yalnipaxo Komam Jesús:
«Hex tiꞌ heyohtaj tato hal-lax tet ebꞌyaꞌ jichmam hakaꞌ tiꞌ:
“Mach chepotxꞌkamo heyet anmahil,
yuto haꞌ mak chipotxꞌni hunu yet anmahil yilal yilaxto sata naj juez kat yok yinh isyaꞌtajil yu naj,”
xhi.
22 Yajaꞌ haninan chiwalan teyet,
haꞌ mak chichiwa iskꞌul yinh yet anmahil chiꞌay isyaꞌtajil yibꞌanh yu Komam Dios.
Haꞌ mak chibꞌuchwa yinh yet anmahil xin,
haꞌ ebꞌnaj iswiꞌehal yinh lahtiꞌ yul konhobꞌb chiꞌilni tzet chiꞌelikoj.
Haxa mak chibꞌahni yet anmahil,
kat yaqꞌni tako iskꞌul,
haꞌ huneꞌ mak tuꞌ ay ismay isto xol qꞌa qꞌaꞌ mach istanhbꞌal.
23 »Qꞌinalo tato yet lanhan heyinito heyofrenda tet Komam Dios sat altarc kat henanitij tato ay hemul tet hunu maka,
24 awekano heyofrenda tuꞌ yich ismexhahil bꞌay chiꞌaqꞌlax xahanbꞌal tuꞌ,
kat heto heyanoko hebꞌa yinh aqꞌankꞌulal yebꞌ huneꞌ mak tuꞌ,
tzujan tuꞌ xin xaꞌisje heyaqꞌni heyofrenda tuꞌ tet Komam Dios.
25 »Tato ay hunu mak chiqꞌanni teyinh yu hunu istxꞌojal chewatxꞌe,
watxꞌeweyo huneꞌ tuꞌ yinh aqꞌankꞌulal yebꞌ huneꞌ mak tuꞌ yet yalanhto maxhto chexto sata naj alkal.
Yuto ta chexapni sata naj,
chexyako naj yul isqꞌabꞌ ebꞌnaj mayor,
haxa ebꞌnaj mayor tuꞌ xin chexanikto yul preso.
26 Yinh kaw yeli chiwalan teyet,
mach chexelti yul preso tuꞌ ta mach tzꞌajano cheyaqꞌ hemulta,»
xhi Komam.
Kuywa Komam Jesús tato mach chu jocheniko hunuxa ix ix
27 Yalnipaxo Komam Jesús:
«Hex tiꞌ heyohtaj tato hal-lax hakaꞌ tiꞌ:
“Mach chexixli,”
xhi.
28 Yajaꞌ hanintiꞌan chiwalan teyet,
makxanhetikꞌa chiꞌilni hunu ix ix,
kat yocheniko ix,
haꞌ huneꞌ mak tuꞌ xayanako ismul yul sat Komam Dios.
29 »Qꞌinalo tato isbꞌaqꞌ hesat yinh hewatxꞌqꞌabꞌ chexaqꞌni aykꞌayoj yinh hunu istxꞌojal,
kꞌulmi tato cheyilti huneꞌ isbꞌaqꞌ hesat tuꞌ kat heqꞌojnito nahat.
Wal xin ekꞌbꞌal kꞌul tato ayto hunu tzet mach tzꞌajano yinh henimanil sata ta tzꞌajan sunil henimanil kat heyalaxto xol qꞌa qꞌaꞌ mach istanhbꞌal.
30 Qꞌinalo tato hewatxꞌqꞌabꞌ chexaqꞌni aykꞌayo yinh hunu istxꞌojal,
kꞌulmi ta chetzokꞌilto huneꞌ heqꞌabꞌ tuꞌ,
kat heqꞌojnito nahat.
Wal xin ekꞌbꞌal kꞌul tato matxa huneꞌ heqꞌabꞌ satato tzꞌajan henimanil kat heyalaxto xol qꞌa qꞌaꞌ mach istanhbꞌal,»
xhi Komam.
Kuywa Komam Jesús yinh pohlebꞌahil
31 Yalnipaxo Komam:
«Hal-laxpaxo yet payat hakaꞌ tiꞌ:
“Ta ay hunu naj chispoh isbꞌa yebꞌ yixal,
yilal iswatxꞌikano yumal kat yaqꞌnikano naj huneꞌ hum tuꞌ tet ix,”
xhihayoj.
32 Yajaꞌ wal intiꞌan chiwalan,
tato ay hunu naj chispoh isbꞌa yebꞌ yixal,
yajaꞌ ta mach yuho issayni ix ismul yebꞌ hunuxa winaj,
huneꞌ naj tuꞌ lanhan istubꞌtento naj ix issayaꞌ ismul yiqꞌni hunuxa yichamil.
Haꞌ xin naj chiꞌiqꞌni ix chispoh isbꞌa yebꞌ yichamil tuꞌ,
haꞌ hun naj chahpaxiko ismul,»
xhi Komam.
Mach chu jaqꞌni bꞌinaho isbꞌi Komam Dios yinh tzet chijala
33 Yalnipaxo Komam Jesús:
«Hex tiꞌ,
heyohtapaxoj tato hal-lax tet ebꞌyaꞌ jichmam hakaꞌ tiꞌ:
“Ta cheyaqꞌ bꞌinaho isbꞌi Komam Dios yinh hunu tzet cheyawte,
yilal heyijen huneꞌ tuꞌ,”
xhihayoj.
34 Yajaꞌ wal intiꞌan chiwalan teyet,
mach cheyaqꞌ bꞌinaho isbꞌi Komam Dios yinh tzet chetaqꞌweko teyibꞌanh.
Mach cheyaqꞌ bꞌinaho satkanhd yet chetaqꞌweniko hunu tzet ye tuꞌ teyibꞌanh,
yuto haꞌ bꞌey tuꞌ tzꞌonhan Komam Dios Jahawil.
35 Mach cheyaqꞌpaxo bꞌinaho txꞌo txꞌotxꞌ yet chetaqꞌweniko hunu tzet ye tuꞌ teyibꞌanh,
yuto txꞌo txꞌotxꞌ isbꞌatxobꞌal yoj Komam ye txꞌotxꞌ.
Mach cheyaqꞌ bꞌinaho isbꞌi konhobꞌ Jerusalén yet chetaqꞌweniko hunu tzet ye tuꞌ teyibꞌanh,
yuto iskonhobꞌ Komam Dios Jahawil kaw ay yelapno yehi.e
36 »Mach cheyaqꞌ bꞌinaho hewiꞌ yinh tzet chetaqꞌweko teyibꞌanh,
yuto mach chu hesajnhen maka heqꞌejnhen hunu xil hewiꞌ.
37 Wal xin tato cheyal hoꞌ,
yelojabꞌ cheyala,
taka machoj ta kexchi,
machojabꞌi;
yuto ta chelokti hunuxa tzet ye tuꞌ,
yaqꞌni isbꞌa yinh tzet cheyala,
yinhxa naj matzwalil chitit huneꞌ tuꞌ,»
xhi Komam.
Mach chu jaqꞌni istxꞌojal ispaj selelo tet mak chiwatxꞌen istxꞌojal jinh
38 Yalnipaxo Komam Jesús hakaꞌ tiꞌ:
«Hex tiꞌ heyohtaj tato hal-laxpaxo hakaꞌ tiꞌ:
“Tato ay hunu mak chimaqꞌnipoho isbꞌaqꞌ sat hunu maka,
maqꞌlaxojabꞌpaxo poho isbꞌaqꞌ sat huneꞌ mak tuꞌ.
Tato ay hunu mak chimaqꞌnilti yeh hunu maka,
maqꞌlaxojabꞌpaxilti yeh huneꞌ mak tuꞌ,”
xhihayoj.
39 Yajaꞌ wal intiꞌan chiwalan,
mach chu hepajtzen istxꞌojal chiswatxꞌe hunu mak teyinh.
Wal xin tato ay mak chipaqꞌnilto heqꞌotx,
meltzowepaxto qꞌaxepxa tet.
40 Ta ay hunu mak chiqꞌanni teyinh tet naj alkal,
kat yinito hekamixh yalni,
matzet cheyala ta chipaxto hechumpa.
41 Yebꞌ xin ta ay hunu mak chalni teyet tato cheyijto yijatz yiktajo legua,
kolwahanhwe yinh,
iweto yijatz tuꞌ hunu legua.
42 Ta ay mak chiqꞌanni hunu tzet ye tuꞌ teyet,
aqꞌwe tet.
Tato ay hunu mak chiqꞌanni hunu tzet ye tuꞌ kꞌamil teyet,
kolwahanhwe yinh huneꞌ mak tuꞌ,»
xhi Komam.
Xahan chijil mak ayko ishowal jinh
(Lc. 6:27-28, 32-36)
43 Yalnipaxo Komam Jesús:
«Hex tiꞌ heyohtaj tato hal-lax hakaꞌ tiꞌ:
“Xahan cheyil mak xahan chexilni.
Mak ayko ishowal teyinh xin,
okojabꞌpaxo hehowal yinh,”
xhihayoj.
44 Yajaꞌ wal intiꞌan chiwalan teyet,
xahan cheyil mak ayko ishowal teyinh.
Qꞌanwe iskꞌulal Komam Dios yibꞌanh makta chexetani.
45 Ta cheyije hakaꞌ tuꞌ,
hak tuꞌ chu heyeniloj tato kexyuninal Komam Dios ay yul satkanh,
yuto haꞌ Komam Dios chiꞌaqꞌni aholo tzꞌayik yibꞌanh anma kꞌul yebꞌ yibꞌanh anma txꞌoj.
Lahan chapaxayo Komam haꞌ nhabꞌ yibꞌanh mak kꞌul yebꞌ yibꞌanh mak txꞌoj.
46 Wal xin tato hanhkꞌanhe anma xahan chexilni,
haꞌnhe xin xahan cheyilpaxoj,
¿mataxka chechah ispaj huneꞌ tuꞌ tet Komam Dios?
Machoj,
yuto hak tuꞌ chute isbꞌeybꞌalnhe ebꞌnaj iqꞌomilo tohlabꞌal chito bꞌey Roma.
47 Yebꞌ xin tato hanhkꞌanhe tet heyuxhtaj chextioxhli,
¿kꞌulmi huneꞌ tuꞌ?
Machoj.
Wal xin haꞌ anma mach ohtanheho Komam Dios hak tuꞌ chisbꞌeybꞌalnhe.
48 Tzꞌajanojabꞌ chu hebꞌeybꞌalnhe sunil iskꞌulal,
yuto Komam Dios ay yul satkanh tzꞌajan lahan yehi,»
xhi Komam.