3 Ay xin hunteqꞌan ebꞌnaj fariseo apni iskꞌatanh Komam,

yok ebꞌnaj yilweno Komam yunhe yaykꞌay yinh hunu ismul,

isqꞌambꞌen ebꞌnaj tet Komam:

—Mamin,

¿chimyu ispohni isbꞌa hunu naj yebꞌ yixal waxanhka yu hunu komon tzet ye tuꞌ?

xhi ebꞌnaj.

4 Istaqꞌwi Komam tet ebꞌnaj:

—¿Tom maxhto cheyil yul Yum Komam Dios bꞌay chala tato hayet iswatxꞌenkano Komam Dios anma,

iswatxꞌe Komam naj winaj,

iswatxꞌenpaxo Komam ix ix?

5 Yalni Komam Dios hakaꞌ tiꞌ:

“Yuxin chákano naj winaj ismam yebꞌ ismiꞌ kat ishunbꞌankano isbꞌa naj yebꞌ yixal,

hak tuꞌ xin hunxanhe anmahil chiꞌelkaniko iskawanhil,”

xhikano Komam.

6 Yuxin matxa kawanho anmahil yehi,

to hunxanhe chiꞌelkanikoj.

Yuxin haꞌ mak chishunbꞌa Komam Dios machi hunu mak chu ispohni,

xhi Komam Jesús.

7 Isqꞌambꞌenpaxo ebꞌnaj fariseo tuꞌ tet Komam:

—¿Tzet yinh xin yalkano yaꞌ Moisés tato chu yaqꞌlax teꞌ hum yet pohlebꞌahil tet ix ixale kat yalaxkano ix yu yichamil?

xhi ebꞌnaj.

8 Yalni Komam tet ebꞌnaj:

—Yu hetxꞌojal yuxin yal yaꞌ Moisés huneꞌ tuꞌ ta chu hepohlenkano hebꞌa yebꞌ heyixal.

Wal yet yichebꞌanil yul sat yibꞌanhqꞌinal tiꞌ,

mach hako tuꞌ ye yu Komam Dios.

9 Yuxin chiwalan teyet,

haꞌ mak chibꞌejnikano yixal,

kat ismohyipaxo naj yebꞌ hunuxa ix,

yinh hakaꞌ tuꞌ chako naj ismul yul sat Komam Dios,

kachannhe tato ay ismul ix chissay yebꞌ hunuxa winaj,

xhi Komam.

10 Yalni ebꞌyaꞌ iskuywom Komam hakaꞌ tiꞌ:

—Tato matxa chu kopohni kobꞌa yebꞌ jixal,

kꞌulmi mach chijiqꞌ jixal chal tuꞌ,

xhi ebꞌyaꞌ.

11 Istaqꞌwi Komam tet ebꞌyaꞌ:

—Yajaꞌ mach sunilo mak chiꞌijcha yu yinh huneꞌ cheyal tiꞌ,

wal xin hanhkꞌanhe mak yettikꞌa yehi.

12 Ay ebꞌnaj maxhtikꞌa tzꞌajano isnimanil yettikꞌa ispitzkꞌahi,

yuxin mach chu yiqꞌni ebꞌnaj yixal.

Aypaxo ebꞌnaj yet anmahil chiꞌuteni,

yuxin mach chu yiqꞌnipaxo ebꞌnaj yixal.

Aypaxo ebꞌnaj xin yu ismunla yinh ismunil Komam Dios yuxin machi yixal.

Yuxin haꞌ mak chitecha yu,

machojabꞌ chiqꞌ yixal,

xhi Komam.

13 Lahwi tuꞌ xin,

yilaxti haywanh nixhte unin iskꞌatanh Komam Jesús yu yanayo Komam isqꞌabꞌ yibꞌanh,

yebꞌpaxo yu istxahli Komam yinh.

Wal ebꞌyaꞌ iskuywom Komam xin,

ok ebꞌyaꞌ iskachaꞌ anma iqꞌnhe nixhte unin tuꞌ.

14 Yuxin yal Komam tet ebꞌyaꞌ:

«Mach chekach istit nixhte unin tiꞌ inkꞌatanhan,

yuto haꞌ mak chako yanma yinh Komam Dios hakaꞌ yeko yanma nixhte unin tiꞌ yinh ismam ismiꞌ,

haꞌ chu yok yul isqꞌabꞌ Komam ay yul satkanh,»

xhi Komam.

15 Yanayo Komam Jesús isqꞌabꞌ yibꞌanh iswiꞌ nixhte unin tuꞌ,

lahwi tuꞌ xin isto Komam.

16 Ay huneꞌ naj tzeh apni iskꞌatanh Komam Jesús,

isqꞌambꞌen naj tet Komam:

—Mam kuywawom,

¿tzet hunu kꞌul inwatxꞌenan yunhe inchahnihan qꞌinale mach istanhbꞌal?

xhi naj.

17 Yalni Komam Jesús tet naj:

—¿Tzet yinh xin chaqꞌambꞌe wetan yinh tzet ye tuꞌ kꞌul?

Wal xin huneꞌnhe mak kꞌul.

Yaj ta chawoche hachabꞌ haqꞌinal mach istanhbꞌal,

yije chejbꞌanile aqꞌbꞌilkano yu yaꞌ Moisés,

xhi Komam.

18 Isqꞌambꞌen naj hakaꞌ tiꞌ:

—¿Bꞌaytet xin hunteqꞌan chejbꞌanile chawal tiꞌ?

xhi naj.

Yalni Komam:

—Mach chaxhpotxꞌwahi,

mach chaxhixli yebꞌpaxo mach chaxhelqꞌawi,

yebꞌ mach chahobꞌkanh leqꞌtiꞌal yinh hawet anmahil.

19 Yije tzet chal hamam,

hamiꞌ,

yebꞌpaxo xin xahan chawil hawet anmahil hakaꞌ hayaꞌilnhen habꞌa,

xhi Komam tet naj.

20 Istaqꞌwi naj tet Komam:

—Sunil hunteqꞌan chawal tiꞌ yijebꞌiltikꞌa wuhan yichitaxtikꞌa inchꞌibꞌkanhan.

¿Tzet hunuxa wal inyijenan?

xhi naj.

21 Yalni Komam tet naj:

—Yajaꞌ ta chawoche chaxhokkano kꞌulal,

as txonhto sunil tzet ayach,

kat hapohnikanh istohol yinh anma mebꞌaꞌ,

haxinwal ay haqꞌalomal yul satkanh.

Lahwi tuꞌ kat hawokkano tzujno wintajan,

xhi Komam.

22 Hayet yabꞌen naj tzeh tuꞌ yalni Komam hakaꞌ tuꞌ,

ispaxto naj yinh bꞌiskꞌulal yuto kaw qꞌalomkano naj sikꞌlebꞌil.

23 Yalni Komam Jesús tet ebꞌyaꞌ iskuywom:

—Yinh kaw yeli chiwalan teyet,

kaw yaꞌta yok anma qꞌalom yul isqꞌabꞌ Komam Dios.

24 Chiwalpaxojan teyet,

hakaꞌ hunu noꞌ camello tinanh,

¿tom subꞌutaj yekꞌto noꞌ yul isholanil hunu chꞌen akuxha?

Hak tuꞌ ye anma qꞌalom,

kaw yaꞌta yok yul isqꞌabꞌ Komam Dios,^a

xhi Komam.

25 Hayet yabꞌen ebꞌyaꞌ iskuywom Komam huneꞌ tuꞌ,

kaw kꞌayilo iskꞌul ebꞌyaꞌ,

yalni ebꞌyaꞌ tet hunun:

—Ta hak tuꞌ,

¿maktaxka chikolchahi?

xhi ebꞌyaꞌ.

26 Yok tꞌanhno Komam yinh ebꞌyaꞌ,

yalni Komam:

—Huneꞌ tiꞌ mach chiqꞌoji anma iswatxꞌeni,

wal Komam Dios sunil tzet chu iswatxꞌen Komam,

xhi Komam Jesús.

27 Yalni yaꞌ Pedro tet Komam:

—Mamin,

hanhonhtiꞌanh bꞌejbꞌilkano sunil tzet ayonhanh yu jok tzujnojanh tawintaj,

¿yuxin tzet chikochahanh ispajoj?

xhi yaꞌ.

28 Yalni Komam:

—Yinh kaw yeli chiwalan teyet,

yet chiꞌapni istiempohal yet chiꞌakꞌbꞌilo sunil tzet ye tuꞌ,

Hanin Aqꞌbꞌilintijan texol yu Komam Dios chinok tzꞌonhnojan yul inkapilan kaw kꞌulchꞌankanoj.

Haxa hex chexekꞌ tzujtzun wintatiꞌan,

chexok tzꞌonhno yul hunun hekapil,

kat heyok heyilni yinh tzet chiꞌeliko kabꞌlahonhebꞌ majan ebꞌnaj Israel.

29 Yuxin mak chisbꞌejkano yatut wuhan,

maka yuxhtaj,

yanabꞌ,

maka ismam,

maka ismiꞌ,

maka yuninal,

maka istxꞌotxꞌ;

hunteqꞌan mak tuꞌ kaw ekꞌbꞌalto txꞌiꞌal ispaj selel chiꞌaqꞌlax tet,

yebꞌ chischah isqꞌinal mach istanhbꞌal.

30 Haꞌ mak kaw ay yelapno ye tinanh,

yet chiꞌapni huneꞌ tiempohal tuꞌ,

kaw matxa yelapno chiꞌelikoj.

Haxa mak machi yelapno ye tinanh chijute jilni,

yet chiꞌapni huneꞌ tiempohal tuꞌ kaw aykano yelapno chiꞌelkanikoj,

xhi Komam.