Yal Komam Jesús yinh mak ekꞌbꞌal yelapno yehi
18
Yinh huneꞌ tiempohal tuꞌ,
isqꞌambꞌe ebꞌyaꞌ iskuywom Komam Jesús tet hakaꞌ tiꞌ:
—¿Mak ekꞌbꞌal yelapno xol anma ayxako yul isqꞌabꞌ Komam Dios?
xhi ebꞌyaꞌ.
—Yinh kaw yeli chiwalan teyet,
ta mach chehel hebꞌeybꞌal,
yebꞌ ta mach cheyiyo hebꞌa hakaꞌ nichꞌan unin tiꞌ,
mach chu heyok yul isqꞌabꞌ Komam Dios.
4 Yuxin mak chiyiyo isbꞌa hakaꞌ nichꞌan unin tiꞌ,
haꞌ ekꞌbꞌal yelapno xol mak ayxako yul isqꞌabꞌ Komam Dios.
5 Yuxin haꞌ mak chichahni hunu nichꞌan unin yuto wetan yehi,
haninan chinischahan,
xhi Komam Jesús.
Kaw ay ismay ta chijaqꞌ aykꞌayo hunu mak yinh istxꞌojal
6 Yalnipaxo Komam Jesús:
—Haꞌ mak chiꞌaqꞌni lektaho hunu mak uninto yaniko isbꞌa yul inqꞌabꞌan,
kꞌul iskꞌal-laxiko hunu niman ischꞌenal chꞌen molinoa yet trigo yinh isnuqꞌ,
kat isqꞌojlaxayto xol haꞌ mar,
sata ta chiꞌok yaqꞌaꞌ aykꞌayo hunu maka.
7 Kaw bꞌiskꞌulal yet anma ay yul sat yibꞌanhqꞌinal tiꞌ yuto hantanhe tzet bꞌay wal yaykꞌayi.
Wal tuꞌ kaw yeli,
yul sat yibꞌanhqꞌinal tiꞌ aynhetikꞌa yinh bꞌay chꞌaykꞌay anma,
yajaꞌ xin kꞌanchꞌan mak chiꞌaqꞌni aykꞌayo hunu maka.
8 »Yuxin tato heqꞌabꞌ maka heyoj chexaqꞌni aykꞌayo yinh istxꞌojal,
kꞌulmi hetzokꞌniltoj kat heqꞌojnito nahat.
Waxanhka matxa tzꞌajano henimanil yet chechahni heqꞌinal mach istanhbꞌal,
ekꞌbꞌalto kꞌul,
sata ta tzꞌajan henimanil yet chexalaxto xol qꞌa qꞌaꞌ mach istanhbꞌal.
9 Ta isbꞌaqꞌ hesat chexaqꞌni aykꞌayo xin,
kꞌulmi heyiniltij kat heqꞌojnito nahat,
wal xin waxanhka hunxanhe isbꞌaqꞌ hesat ayikto yet chechahni heqꞌinal mach istanhbꞌal saqꞌalmi heyet,
sata ta chexalaxto xol qꞌa qꞌaꞌ yebꞌ iskabꞌil isbꞌaqꞌ hesat,
xhi Komam.
Yechel yinh noꞌ meꞌ kꞌaynatoj
10 Yalnipaxo Komam Jesús:
—Nannhe heyu,
tajka chehinkꞌulnhe hunu mak uninto yaniko isbꞌa yul inqꞌabꞌan,
chiwalan teyet,
haꞌ ebꞌnaj ángel chitanheni,
ayko ebꞌnaj yinh sat Inmaman yul satkanh,
11 yuto Hanin Aqꞌbꞌilintijan texol yu Komam Dios,
hulnajinan insayaꞌan mak kꞌaynatoj.
12 »Qꞌinalo ta ay hunu naj ay 100 (hokꞌal) ismeꞌ kat xin iskꞌayto hunu noꞌ,
¿mataxka xin mach chákano naj noꞌ 99 (bꞌalonhlahonhebꞌ ishokꞌal),
kat isto naj issayno noꞌ kꞌaynato tuꞌ?
13 Yajaꞌ ta chiꞌilcha noꞌ yu naj xin,
yinh kaw yeli chiwalan teyet tato ekꞌbꞌalto chitzala naj yinh noꞌ kꞌaynatikꞌato tuꞌ sata yinh noꞌ 99 (bꞌalonhlahonhebꞌ ishokꞌal) mach kꞌaynahotoj.
14 Hak tuꞌ Komam ay yul satkanh,
mach chisje iskꞌul tato ay hunu mak uninto yul inqꞌabꞌan chikꞌaytoj,
xhi Komam.
Yinh tzet chu jaqꞌni nimankꞌulal jinh hununonh
(Lc. 17:3)
Yalnipaxo Komam Jesús:
15 —Ta ay hunu hawuxhta chiwatxꞌen hunu istxꞌojal tawinh,
as tzotelanh tet naj hachukil,
kat xin hakachni naj.
Ta chabꞌeto naj tzet chawala,
yokxa aqꞌankꞌulal texol chal tuꞌ.
16 Yajaꞌ ta mach chabꞌeto naj tzet chawala,
awteti hunuj maka kawanho mak chito tawintaj,
haxinwal chiwatxꞌikanayo tzet cheyal tuꞌ yinh sat kawanh maka oxwanh testigo.
17 Yajaꞌ ta mach chabꞌeto naj yinh hakaꞌ tuꞌ,
hal tet ebꞌnaj juxhtaj.
Taka mach chabꞌeto naj tzet chal ebꞌnaj juxhta tuꞌ xin,
hakaꞌ hunu mak mach ohtanheho Komam Dios,
hak tuꞌ chukano naj yul hesat,
maka hakaꞌ hunu ebꞌnaj chiꞌinilo chꞌen tohlabꞌal.
18 »Yinh kaw yeli chiwalan teyet,
sunil tzet chekꞌalbꞌa yul sat yibꞌanhqꞌinal tiꞌ chikꞌalbꞌalaxpaxo yul satkanh,
yebꞌpaxo tzet chepuhilo yul sat yibꞌanhqꞌinal tiꞌ,
chipuhlaxpaxo yul satkanh.
19 »Chiwalpaxojan teyet:
Tato ay kawanhoj hex hun chu heqꞌanni hunu tzet ye tuꞌ yinh hetxah tet Komam Dios yul sat yibꞌanhqꞌinal tiꞌ,
chiꞌaqꞌlax teyet yu Inmaman ay yul satkanh.
20 Yuxin haꞌ bꞌay chiskutxbꞌa isbꞌa kawanh maka oxwanh mak yu yinayo isbꞌa wetan,
ayinikojan xolbꞌal,
xhi Komam.
21 Lahwi tuꞌ,
ishitziko yaꞌ Pedro iskꞌatanh Komam,
isqꞌambꞌen yaꞌ:
—Mamin,
ta ay hunu wuxhtajan chiyako ismul wetan,
¿hayelmi chiwaqꞌ nimankꞌulalan yinh,
tom hujel mato hantaj?
xhi yaꞌ.
22 Istaqꞌwi Komam:
—Mach chiwalan tawet tato hujelnhe,
wal xin to hujel el chiꞌelto 70 (lahonhebꞌ iskanhwinaj) chawaqꞌ nimankꞌulal yinh hawuxhtaj,
xhi Komam.
Yechel yinh huneꞌ naj machi aqꞌni nimankꞌulal
23 Yalnipaxo Komam Jesús:
—Chiwalpaxojan teyet yinh anma ayxako yul isqꞌabꞌ Komam Dios,
lahan hakaꞌ huneꞌ naj rey ilni hanta iskꞌas ebꞌnaj ismunlawom.
24 Hayet lanhan yichiko naj yilni hanta iskꞌas ebꞌnaj tuꞌ,
yilaxti huneꞌ naj kaw ismilalxa iskꞌas tet naj.
25 Yajaꞌ huneꞌ naj tuꞌ,
mach chiqꞌoji naj istohlan sunil iskꞌas tuꞌ.
Yuxin ischej naj rey tuꞌ txonhlaxoto naj yebꞌ yixal,
yebꞌ yuninal,
yebꞌ sunil tzet aya.
26 Wal naj ay iskꞌas tuꞌ xin ay jahno naj sata naj rey,
yok naj yalno tet naj hakaꞌ tiꞌ:
“Mamin,
kaw niman chawute hakꞌul winhan hayebꞌoxa tzꞌayik,
chinqꞌuyayojan chꞌen kat waqꞌnihan sunil inkꞌas tuꞌan tawet,”
xhi naj.
27 Wal naj rey tuꞌ,
kaw tzꞌaykanh iskꞌul naj yinh naj,
yaqꞌni tanho naj iskꞌas naj tuꞌ sunil,
isbꞌejtzolax naj.
28 »Haxa yet yelti naj sata naj rey tuꞌ,
yilnayo naj huneꞌ naj yet munlawomal,
ay xin hanikꞌ iskꞌas naj tet naj.
Yok yachno naj yinh isnuqꞌ naj,
etzaxanhe xin majayto ishaqꞌo naj yu naj,
yalni naj tet naj:
“Tinanh xin chawakanayo hakꞌas wetan,”
xhi naj.
29 Wal naj ay iskꞌas tuꞌ ay jahno naj yinh sat naj,
yalni naj tet naj:
“Mamin,
niman chawute hakꞌul,
hawechman hayebꞌoxa tzꞌayik,
chinqꞌuyayojan chꞌen kat waqꞌni inkꞌas tuꞌan tawet,”
xhi naj.
30 Yajaꞌ naj bꞌay ay iskꞌas naj tuꞌ,
mach yabꞌeto naj tzet yal naj,
wal xin to yito naj naj tet naj alkal,
yalaxikto naj yul preso masanto yaqꞌkano naj sunil iskꞌas tuꞌ.
31 Kꞌuxan xin ay hunteqꞌan ebꞌnaj yet munlawomal naj ilni huneꞌ tuꞌ,
kaw xin tak iskꞌul ebꞌnaj,
yuxin to ebꞌnaj yalaꞌ tet naj rey yinh tzet yu tuꞌ.
32 Hayet yabꞌen naj rey huneꞌ tuꞌ,
yanito naj yawtemal naj.
Yalni naj tet naj:
“Hach tiꞌ kaw mach hawalil,
waqꞌ nimankꞌulalan yinh hakꞌas yuto haqꞌan nimankꞌulal wetan.
33 Estam xin matzꞌay hakꞌul yinh hawet munlawomal tuꞌ hakaꞌ mayu istzꞌay inkꞌulan tawinh,”
xhi naj.
34 Kaw xin tit ishowal naj rey tuꞌ yinh naj,
ischejni naj yalaxokto naj txꞌoj tuꞌ yul preso masanto istohlakano naj sunil iskꞌas tuꞌ,
xhi Komam.
35 Yalnipaxo Komam hakaꞌ tiꞌ:
—Hak tuꞌ chute Inmaman ay yul satkanh teyinh tato mach cheyaqꞌ nimankꞌulal yinh sunil heyanma yinh heyuxhta chako ismul teyet,
xhi Komam.