Yechel yinh noꞌ meꞌ kꞌaynatoj
15
Haꞌ ebꞌnaj chiꞌinilo chꞌen tohlabꞌal chito bꞌey Roma,
yebꞌ ebꞌnaj mach kꞌulo tzet chiswatxꞌe,
haꞌ ebꞌnaj hitziko yabꞌen tzet chal Komam Jesús.
2 Yu huneꞌ tuꞌ xin ok ebꞌnaj fariseo yebꞌ ebꞌnaj kuywawom yinh isley yaꞌ Moisés bꞌuchwal yinh Komam,
yalni ebꞌnaj:
—Wal naj Jesús tiꞌ,
kaw chischah naj ebꞌnaj mulum,
kat iswaꞌpaxo naj yebꞌ ebꞌnaj,
xhi ebꞌnaj yinh Komam.
3 Yuxin yal Komam huneꞌ yechel tiꞌ tet ebꞌnaj:
4 «Qꞌinaloj ta ay hunu naj ay 100 (hokꞌal) ismeꞌ,
yajaꞌ ta chikꞌayikꞌo hunu noꞌ,
¿mataxka mach chákano naj noꞌ 99 (bꞌalonhlahonhebꞌ ishokꞌal) bꞌay chilowi,
kat isto naj issayno noꞌ kꞌaynato tuꞌ masanto chiꞌilcha noꞌ yu naj?
5 Hayet chiꞌilcha noꞌ yu naj,
kaw chitzalakanh iskꞌul naj,
kat yanahto naj noꞌ yibꞌanh iswixikꞌ,
kat istit naj.
6 Haxa yet chꞌapni naj yatut,
kat iskutxbꞌaniko naj yamigo yebꞌ anma ayayo iskawilal naj,
kat yalni naj:
“Tzalahanhwe wintajan yuto maꞌilcha huneꞌ inmeꞌan kꞌaynatoj,”
xhi naj.
7 »Yuxin chiwalpaxojan teyet,
hayet chꞌok huneꞌ anma mulum yul isqꞌabꞌ Komam Dios,
ay tzalahilal yul satkanh satapaxo yinh 99 (bꞌalonhlahonhebꞌ ishokꞌal) anma chisnah ta machi ismul,»
xhi Komam.
Yechel chꞌen melyu kꞌaynatoj
8 Yalnipaxo Komam Jesús:
«Qꞌinaloj ta ay hunu ix ix ay 10 (lahonhebꞌ) ismelyu,
yajaꞌ ta chiskꞌayto ix hunu chꞌen,
¿mataxka mach chistzujbꞌa ix qꞌaꞌ yinh iscantil,
kat istzꞌisni ix yul yatut,
kat issayni ix yinh nanhkꞌulal masanto chiꞌilcha chꞌen yu ix?
9 Lahwi yilcha chꞌen yu ix xin,
kat iskutxbꞌanayo ix iswalix yebꞌ anma ayayo iskawilal,
kat yalni ix:
“Tzalahanhwe wintajan,
yuto maꞌilcha inmelyuhan kꞌaynatoj,”
xhi ix.
10 Yuxin chiwalan teyet,
hak tuꞌ yul satkanh,
kaw ay tzalahilal xol ebꞌnaj yángel Komam Dios yu huneꞌ naj mulum chisnah isbꞌa kat yok yul isqꞌabꞌ Komam Dios,»
xhi Komam.
Yechel huneꞌ naj kꞌahole kꞌaynatoj
11 Yalnipaxo Komam Jesús:
«Ay huneꞌ naj mame kawanh iskꞌahol.
El Hijo Perdido (Lucas 15.11-32)
12 Yajaꞌ naj tzujan winaj tuꞌ yal naj tet ismam:
“Mam,
aqꞌkano inmajulan tinanh,”
xhi naj.
Yuxin ispohto naj mame tuꞌ tzet ay yinh ebꞌnaj iskawanhil.
13 Hayebꞌixto tzꞌayik xin iskutxbꞌanayo naj istohol ismajul aqꞌlax tet,
isto naj bꞌey huneꞌ konhobꞌ nahat,
yok naj iskꞌaytzenolo ismelyu yinh istxꞌojal.
14 Hayet xaꞌistanhtzelo naj sunil ismelyu tuꞌ,
yichiko huneꞌ niman wahilal bꞌey huneꞌ konhobꞌ tuꞌ.
Nixhtejal xin yok naj yijlen wahil yu manhtzetal.
15 Yuxin to naj isqꞌanaꞌ yet munil tet huneꞌ naj ay yul konhobꞌ tuꞌ.
Ischejlaxto naj tanhe txitam sat istxꞌotxꞌ naj yahaw noꞌ.
16 Yu nhohchahilal xin yoche naj islobꞌ sat teꞌ txꞌalibꞌ chiꞌaqꞌlax islobꞌ noꞌ txitam,
yuto machi mak chꞌaqꞌni tzet chislo naj.
17 »Lahwi tuꞌ xin,
istit yinh isnabꞌal naj,
yalni naj ischukil:
“¡Sunil iskꞌamteꞌ inmaman kaw ay tzet chislo,
wal inpaxojan xin,
lanhan inkaman yu wahil bꞌey tiꞌ!
18 Wal tinanh meltzohoj intohan bꞌey yatut inmamtuꞌan,
kat walnihan tet yaꞌ:
‘Mam,
kaw mawako inmulan yul sat Komam Dios yebꞌpaxo yul hasat.
19 Matxa chu wokan hakꞌaholoj,
to hakꞌamteꞌxa chiwukojan,’
kinchinhetikꞌahan,”
xhi naj ischukil.
20 Lahwi tuꞌ xin,
ispaxto naj bꞌey yatut ismam.
»Ayto yapni naj xin,
yil-laxto naj yu ismam;
kaw tzꞌaykanh iskꞌul ismam naj yilni.
Isto lemna naj mame tuꞌ ischahno naj.
Yok laqꞌno naj yinh iskꞌahol tuꞌ,
istzꞌohnipaxo naj isqꞌotx naj yu tzalahilal.
21 »Yalni naj tet ismam:
“Mam,
kaw mawako inmulan yul sat Komam Dios,
yebꞌpaxo tawet.
Matxa chu wokan hakꞌaholoj,”
xhi naj.
22 Yalni naj mame tuꞌ tet ebꞌnaj ischejabꞌ:
“As iwelti yinh anhe hunu xilqꞌape kaw kꞌul,
kat yok yinh inkꞌaholtiꞌan,
kat heyaniko isjolqꞌabꞌ naj yebꞌ isxanhabꞌ naj,
23 kat hetopaxo heyinoti hunu noꞌ wakax kaw bꞌaqꞌich,
kat hepotxꞌnikamo noꞌ,
yuto chijekꞌtze hunu qꞌinh,
kat kowaꞌwej.
24 Yuto haꞌ huneꞌ inkꞌaholtiꞌan hakaꞌtanhe kamnaxa,
yajaꞌ hakaꞌtanhe mahulkanh iskꞌul naj.
Kꞌaynaxato naj,
yaj tinanh maꞌilcha naj,”
xhi naj mame tuꞌ.
Lahwi tuꞌ xin yekꞌtzelax huneꞌ qꞌinh tuꞌ.
25 »Yet ayko ebꞌnaj yinh huneꞌ qꞌinh tuꞌ,
yul naj bꞌabꞌel kꞌahole yinh ismunil.
Yajaꞌ ayto yapni naj bꞌey yatut yabꞌen naj huneꞌ qꞌinh tuꞌ.
26 Yawten naj huneꞌ ischejabꞌ ismam,
isqꞌambꞌen naj:
“¿Tzet yinh yuxin ayko huneꞌ qꞌinh tuꞌ?”
xhi naj.
27 »Yalni naj chejabꞌ tuꞌ tet naj:
“To hawuxhta mahuli,
yuxin mayal hamam ta chipotxꞌlaxkamo hunu noꞌ wakax kaw bꞌaqꞌich yuto kawnhe mayu yul naj,”
xhi naj.
28 »Yajaꞌ kaw tit ishowal naj,
yuxin mach isjekto naj yul yatut ismam.
Haxa yet yabꞌen naj mame tuꞌ,
yelti naj,
yay sat naj tet iskꞌahol tuꞌ ta chꞌokto naj yul nha.
29 Yalni naj tet ismam tuꞌ:
“Mam,
kaw hawohtaj hantaxa tiempo wichikojan inmunlahan tawintaj.
Machi hunelo chinmanhkꞌohan tzet chawala,
yaj nitam hunu noꞌ nichꞌan chiw chawaqꞌ wetan kat wekꞌtzenan hunu qꞌinh yebꞌ ej wamigohan,”
xhi naj.
30 “¿Tom yu mahul huneꞌ hakꞌahol tiꞌ yuxin maxapotxꞌ kamo noꞌ wakax kaw bꞌaqꞌich?
Naj tonhe etanto hamelyu yinh ebꞌix ix txꞌoj ye iswiꞌ,”
xhi naj tet ismam tuꞌ.
31 »Istaqꞌwi naj mame tuꞌ:
“Kꞌahol,
hach tiꞌ,
ayachnhetikꞌako inkꞌatanhan,
yebꞌ sunil tzet ayinan hawetpaxo yehi.
32 Yajaꞌ tinanh kaw yilal yok huneꞌ qꞌinh tiꞌ kat jaqꞌni tzala kokꞌul,
yuto huneꞌ hawuxhta tiꞌ hakaꞌtanhe kamnaxa,
yaj mahulkanh iskꞌul hunelxa.
Hakaꞌta kꞌaynaxato naj,
yaj tinanh xin maꞌilcha naj,”
xhi naj mame tuꞌ,»
xhi Komam.