Huneꞌ naj chimal isnimanil kawxikanh yu Komam Jesús
14
Haꞌ yinh huneꞌ tzꞌayikal xewilal,
to Komam Jesús waꞌo bꞌey yatut huneꞌ naj iswiꞌehal yinh ebꞌnaj fariseo.
Aypaxikꞌo xin hunteqꞌanxa ebꞌnaj yet fariseohal naj tuꞌ,
yabꞌen tzet chu yaykꞌay Komam yinh hunu tzotiꞌ.
2 Yapni huneꞌ naj sata Komam,
chimal yoj yebꞌ isnimanil.
3 Isqꞌambꞌen Komam tet ebꞌnaj kuywawom yinh isley yaꞌ Moisés,
yebꞌ tet ebꞌnaj fariseo:
—¿Chimisje janhten hunu anma yaꞌay yinh istzꞌayikal xewilal,
mato mach chuhi?
xhi Komam.
4 Yajaꞌ maxhtikꞌa taqꞌwi ebꞌnaj.
Yok tzabꞌno Komam yinh isqꞌabꞌ naj yaꞌay tuꞌ,
iskawxikanh naj xin.
Lahwi tuꞌ ischejlaxtopaxo naj yu Komam.
5 Yalni Komam tet ebꞌnaj:
—Qꞌinalo ta chitokꞌay hunu heyuninal maka hunu hewakax yul hunu kꞌuh,
¿tom mach cheyihti yinh anhe,
walka istzꞌayikal xewilal?
xhi Komam.
6 Yaj xin maxhtikꞌa yu istaqꞌwi ebꞌnaj yinh tzet yal Komam.
Yal Komam Jesús huneꞌ kuybꞌanil yinh anma chiꞌawtelax yinh mohyilal
7 Hayet yilni Komam Jesús anma awtebꞌil tuꞌ issaynilo anma hunteqꞌan tzꞌonhobꞌal ayko yinh mexha kaw ay yelapno yehi,
yalni Komam huneꞌ kuybꞌanil tiꞌ tet anma:
8 «Hayet chexawtelax yinh hunu mohyilal,
mach chexay tzꞌonhno yul chem kaw ay yelapno yehi.
Yuto ta chꞌapni hunu naj ekꞌbꞌal yelapno ye tesataj,
9 kat yapni naj awtenhe hex tuꞌ,
kat yalni naj teyet:
“Awekano huneꞌ tzꞌonhobꞌal tet naj tiꞌ,”
ta xhi naj,
kat heto yinh txꞌixwilal bꞌey huneꞌ komon chem.
10 Wal xin hayet chexawtelaxi,
saywe hunteqꞌan komon tzꞌonhobꞌal bꞌay chextzꞌonhi,
haxinwal yet chꞌapni naj kexawten tuꞌ,
kat yalni naj teyet:
“Hex wamigo,
ekꞌanhweti yul tzꞌonhobꞌal bꞌay kaw ay yelapno ye tilah,”
xhi naj.
Haxinwal chꞌok hewinajil sata ebꞌnaj ayko tekꞌatanh sat mexha tuꞌ.
11 Yuto haꞌ mak chiyikanh isbꞌa,
chiꞌilaxayoj,
wal mak chiyiyo isbꞌa,
chiꞌilaxkanh,»
xhi Komam.
12 Yalnipaxo Komam tet naj awten tuꞌ:
—Hayet chawawten anma waꞌo takꞌatanh,
mach hanhkꞌanheho hawamigo chawawte yebꞌ hawuxhtaj yebꞌ hawikꞌal yebꞌ anma qꞌalom ay hakawilal,
yuto haꞌ ebꞌnaj tuꞌ,
chaqꞌ ebꞌnaj selel tawet yet chaxhyawtenpaxo ebꞌnaj waꞌo iskꞌatanh.
13 Wal xin ta ay hunu haqꞌinh chawekꞌtze,
kat hawawten anma waꞌoj,
awte anma mebꞌaꞌ,
anma mach tzꞌajano ye isnimanil,
anma mach chu yekꞌi,
yebꞌpaxo anma mach chu yilni.
14 Ta hak tuꞌ chawute,
saqꞌal hawet chal tuꞌ,
yuto hunteqꞌan anma tuꞌ mach chu yaqꞌni ispaj selel tawet,
yajaꞌ chachah ispaj selel yinh huneꞌ tzꞌayikal bꞌay chiꞌitzitzbꞌikanh anma ayxako yul isqꞌabꞌ Komam Dios,
xhi Komam.
Yechel huneꞌ niman qꞌinh
15 Hayet yabꞌelax huneꞌ tuꞌ yu anma ayko sat mexha tuꞌ,
yalni huneꞌ naj tet Komam:
—¡Saqꞌal yet anma chiwaꞌ iskꞌatanh Komam Dios yet huneꞌ tzꞌayikal tuꞌ!
xhi naj.
16 Yuxin yal Komam Jesús hakaꞌ tiꞌ:
«Yet hunel ay huneꞌ naj winaj ekꞌtzen huneꞌ niman qꞌinh.
Kaw xin txꞌiꞌal anma yawte naj waꞌo iskꞌatanh.
17 Hayet lanhanxa yapni yorahil yok wah tuꞌ,
ischejnito naj iskꞌamteꞌ yalno tet ebꞌnaj awtebꞌil tuꞌ hakaꞌ tiꞌ:
“Tonhwej yuto kꞌulxa ye tzet cheloh,”
xhi naj.
18 Hayet yabꞌen ebꞌnaj tzet yal naj kꞌamteꞌ tuꞌ,
yalni naj bꞌabꞌel:
“Lanhanto inloqꞌnihan huneꞌ intxꞌotxꞌan,
haꞌ txꞌotxꞌ chintohan wilaꞌan tinanh,
yuxinto aqꞌ nimankꞌulal winhan,
mach chu wapnojan,”
xhi naj.
19 Haꞌ hunxa naj xin halni hakaꞌ tiꞌ:
“Lanhanto inloqꞌnihan 10 (lahonhkꞌonh) inwakaxan yet munil,
yuxin haꞌ noꞌ chinto wilwehan ismunla tinanh.
Kaw aqꞌ nimankꞌulal winhan,
mach chu intohan,”
xhi naj.
20 Yalnipaxo hunxa naj:
“Kaw tolto kinmohyihan,
kaw mach chu intohan,”
xhi naj.
21 »Hayet ismeltzo naj kꞌamteꞌ tuꞌ,
yalni naj sunil tzet yal ebꞌnaj awtebꞌil tuꞌ tet naj yahaw tuꞌ.
Kaw xin tit ishowal naj,
yalni naj tet iskꞌamteꞌ hunelxa:
“Wal tinanh,
asiꞌ yulaj nime bꞌeh,
yebꞌ yulaj nixhte bꞌeh,
kat hawiniti sunil anma mebꞌaꞌ,
anma kaw yanhyonhe,
anma mach chu yilni yebꞌ xin anma txꞌoj ye yoj,”
xhi naj.
22 Hunepixto xin ismeltzo naj kꞌamteꞌ tuꞌ,
yalni naj:
“Mamin,
manyijehan inbꞌeykꞌojan wawteꞌan anma maxawal wetan,
yaj kaw aytopaxo hamanil lah,”
xhi naj.
23 »Yalnipaxo naj yahaw tuꞌ:
“Asiꞌpaxo yulaj nixhte bꞌeh yebꞌpaxo yulaj nimeta bꞌeh,
kat hachejniti anma bꞌey watuttiꞌan,
haxinwal nohnaxa yul watuttiꞌan,
kat istzabꞌloko huneꞌ qꞌinh tiꞌ.
24 Yuxinto chiwalan tawet:
Sunil ebꞌnaj awtebꞌil bꞌabꞌel tuꞌ,
machi hunu ebꞌnaj chiwaꞌo sat inmexhatiꞌan,”
xhi naj yahaw tuꞌ,»
xhi Komam.
Anma chiꞌoktzujno yinta Komam hinanojabꞌ ischahni isyaꞌtajil
25 Kaw hantanhe anma ok tzujno yinta Komam Jesús.
Hayet hunel tuꞌ,
ismeltzo isbꞌa Komam,
yalni tet anma:
26 «Ta ay mak choche chiꞌok inkuywomojan yaj ta ekꞌbꞌal chako yanma yinh ismam yebꞌ ismiꞌ insatajan,
maka yinh yixal,
yuninal,
yuxhtaj,
yanabꞌ,
maka ekꞌbꞌal chisyaꞌilnhe isbꞌa insatajan,
ta hak tuꞌ mach chu yok inkuywomojan.
27 Haꞌ mak hinan yabꞌen isyaꞌtajil walka chꞌaqꞌlaxkamo yinh kulus,
haꞌ chu yok inkuywomojan.
28 »Qꞌinaloj ta ay hunujex cheyoche heyaqꞌaꞌkanh hunu heyatut kaw nimajal chu,
¿tom mach bꞌabꞌelo chexok tzꞌonhnoj,
kat hetxumni hanta chekꞌay yinh,
yu heyilni ta chexqꞌoji,
mato machoj?
29 Yajaꞌ ta tonhe niman cheyayo xeꞌ matxa chexqꞌoji helahni teꞌ,
chꞌok anma tzebꞌo teyinh yet chilni huneꞌ tuꞌ,
30 kat yalni:
“Huneꞌ naj tiꞌ,
tonhe yicheko naj huneꞌ yatut tiꞌ,
yaj machi maqꞌoji naj islahni,”
xhim anma tuꞌ.
31 »Makato ta ay hunu naj rey lanhan isto aqꞌo howal yinh hunxa naj rey,
yajaꞌ 10 (lahonhebꞌnhe) mil issoldado naj.
¿Mataxka mach bꞌabꞌelo chꞌok tzꞌonhno naj,
kat yilni naj ta chu isqꞌoji naj yinh hunxa naj rey ay 20 (hunkꞌal) mil issoldado?
32 Yajaꞌ ta chistxum naj ta mach chiqꞌoji naj chabꞌe,
yet nahatto ayto hunxa naj rey tuꞌ,
kat yanito naj ischejabꞌ isqꞌanno tzet chu yok yinh aqꞌankꞌulal yebꞌ naj.
33 »Yuxin,
hakexpax tuꞌ hex tiꞌ,
ta cheyoche oko tzujno wintajan,
kaw yilal kinheyanikojan bꞌabꞌel sata sunil tzet ay hex,»
xhi Komam.
Yet chikꞌayto iskꞌachiꞌal atzꞌam
34 Yalnipaxo Komam:
«Kaw kꞌul atzꞌam atzꞌam yokniko ju,
yajaꞌ ta chikꞌayto iskꞌachiꞌal atzꞌam,
¿tzet chu yok iskꞌachiꞌal hunelxa?
35 Matxa tzet chꞌokniko atzꞌam tuꞌ,
nitam kosomnito xol txꞌo txꞌotxꞌ,
maka xol qꞌalem yu yok abonohal.
Wal xin toxanhe chitirlaxtoj.
Txumwelo tzet chalilo huneꞌ chiwaltiꞌan,»
xhi Komam tet anma tuꞌ.