Yechel yinh huneꞌ qꞌinh yet mohyilal
22
Yichipaxiko Komam Jesús yalni hunteqꞌan yechel yet iskuywahi,
yalni Komam hakaꞌ tiꞌ:
2 «Haꞌ anma awtebꞌil yok yul isqꞌabꞌ Komam Dios,
lahan hakaꞌ yaqꞌle anma yinh huneꞌ qꞌinh yekꞌtze huneꞌ naj rey yet ismohyi iskꞌahol.
3 Hayet kꞌulxa ye sunil,
yanito naj ischejabꞌ yiqꞌati ebꞌnaj awtebꞌil yinh huneꞌ mohyilal tuꞌ.
Yajaꞌ machi hunu ebꞌnaj isjetij.
4 Lahwi tuꞌ yanipaxto naj hunteqꞌanxa ischejabꞌ,
yalni naj tet ebꞌnaj hakaꞌ tiꞌ:
“Halwe tet anma awtebꞌil tato watxꞌebꞌilxa itah.
Manchejan potxꞌlaxo haykꞌonh inwakaxan,
yebꞌ hunmajanxa no noqꞌ kaw bꞌaqꞌich,
watxꞌebꞌilxa sunil.
‘Asiꞌwe yinh huneꞌ qꞌinh,’
kexchi,”
xhi naj rey.
5 »Yajaꞌ ebꞌnaj awtebꞌil tuꞌ,
maxhtikꞌa kam iskꞌul ebꞌnaj istita.
Huneꞌ naj to ilno ismunil,
hunxa naj xin to ilno istxonh.
6 Haxa hunteqꞌanxa ebꞌnaj xin,
ok ebꞌnaj howal yinh ebꞌnaj chejabꞌ tuꞌ,
ispotxꞌlax ebꞌnaj yu ebꞌnaj.
7 Hayet yabꞌen naj rey huneꞌ tuꞌ kaw tit ishowal naj.
Ischejni naj issoldado ispotxꞌno ebꞌnaj potxꞌwawom tuꞌ,
isnhuslaxpaxilo iskonhobꞌ ebꞌnaj.
8 Lahwi tuꞌ yalni naj rey tuꞌ tet hunteqꞌanxa ebꞌnaj ischejabꞌ:
“Sunil tzet chiꞌokniko yinh huneꞌ qꞌinh tiꞌ watxꞌebꞌilxa,
yajaꞌ ebꞌnaj awtebꞌil wuhan mach chisjeti ebꞌnaj,
yuxin mach istzano ebꞌnaj yul yinh huneꞌ qꞌinh tiꞌ.
9 Wal tinanh asiꞌwe yulaj bꞌeh kat hechejniti sunil mak chiꞌilcha heyu yinh huneꞌ qꞌinh tiꞌ,”
xhi naj.
10 Yet yabꞌen ebꞌnaj chejabꞌ huneꞌ tuꞌ,
isto ebꞌnaj yulaj bꞌeh,
yiniti ebꞌnaj sunil anma chiꞌekꞌ bꞌey tuꞌ.
Ay anma kꞌul isbꞌeybꞌal,
ay anma txꞌoj isbꞌeybꞌal.
Kaw xin nohilo teꞌ nha yu anma yinh huneꞌ qꞌinh tuꞌ.
11 »Hayet yokto naj rey yilno anma kutxanxako tuꞌ,
yilni naj huneꞌ naj mach ayoko xil isqꞌap yet mohyilal.
12 »Yalni naj rey tet naj:
“¿Tzet mayu hawokti bꞌey tiꞌ,
machi xin xil haqꞌap yet mohyilal aykoj?”
xhi naj.
Yajaꞌ xin maxhtikꞌa taqꞌwi naj.
13 Yalni naj rey tuꞌ tet ebꞌnaj ischejabꞌ:
“Kꞌalbꞌawe yoj huneꞌ naj tiꞌ yebꞌ isqꞌabꞌ naj kat heyanilto naj xol qꞌejholo,
haꞌ bꞌey tuꞌ xin chiꞌoqꞌo naj yinh,
kat isnhetxꞌlaho yeh naj,”
xhi naj.
14 Wal xin chiwalan teyet,
kaw txꞌiꞌal mak awtebꞌil yu Komam Dios yajaꞌ haywanhnhe mak chissikꞌilo Komam,»
xhi Komam Jesús.
Chꞌen tohlabꞌal chiꞌaqꞌlax tet naj yahaw Roma
15 Lahwi tuꞌ ishekꞌnilo isbꞌa ebꞌnaj fariseo,
islahtiꞌnhen isbꞌa ebꞌnaj yinh tzet chu yaqꞌni aykꞌayo ebꞌnaj Komam yinh hunu tzotiꞌ,
kat yok ebꞌnaj aqꞌokꞌule yinh Komam yalni.
16 Yuxin yato ebꞌnaj haywanh ebꞌnaj ayko yinh ispartido,
yebꞌ haywanh ebꞌnaj ayko yinh ispartido naj Herodes iskꞌatanh Komam,
yunhe yilwen ebꞌnaj Komam.
Yalni ebꞌnaj tet Komam:
—Mam kuywawom,
kaw johtajanh tato hach tiꞌ isyelalnhetikꞌa chawala,
chakuynipaxo anma iswatxꞌen hakaꞌ choche iskꞌul Komam Dios.
Machi xin komono chawabꞌeto yinh tzet chal anma,
yuto lahan yelapno anma yul hasat.
17 Yuxin,
¿tzet chawute hawalni yinh huneꞌ tiꞌ:
Chꞌen tohlabꞌal chiꞌel jinh yu naj jahaw ay Roma,
kꞌulmi jaqꞌni chꞌen mato machoj?
xhi ebꞌnaj.
18 Yajaꞌ wal Komam Jesús pet istxumnalo Komam tzet nabꞌil yu ebꞌnaj.
Yuxin yal Komam:
—Hex cheyal hebꞌa kꞌulal tiꞌ,
¿tzet yinh xin chesay yinh tzet chu waykꞌayan yul heqꞌabꞌ?
19 Yewe hunu chꞌen melyu cheyaqꞌ yinh hetohlabꞌal tuꞌ wilaꞌan nanh,
xhi Komam.
—¿Mak najil ayko yechel sat yebꞌ isbꞌi yinh chꞌen?
xhi Komam.
21 Istaqꞌwi ebꞌnaj:
—Yechel sat naj jahaw ay bꞌey Roma,
yebꞌ xin isbꞌi naj ayko yinh chꞌen,
xhi ebꞌnaj.
Yalni Komam xin:
—Aqꞌwe tet naj yahaw Roma bꞌaytet yet naj yehi,
kat heyaqꞌni tet Komam Dios bꞌaytet yet Komam yehi,
xhi Komam.
22 Yet yabꞌen ebꞌnaj yalni Komam huneꞌ tuꞌ,
kaw kꞌayilo iskꞌul ebꞌnaj,
isbꞌejnikano ebꞌnaj Komam.
Isqꞌambꞌe ebꞌnaj saduceo yinh yet chiꞌitzitzbꞌikanh kamom
23 Yinhtikꞌa huneꞌ tzꞌayik tuꞌ,
ay hunteqꞌan ebꞌnaj saduceo bꞌey ilno Komam Jesús.
Ebꞌnaj saduceo tuꞌ mach chayto ebꞌnaj yul yanma tato chiꞌitzitzbꞌikanh anma kamnaxa,
yuxin isqꞌambꞌe ebꞌnaj tet Komam:
24 —Mam kuywawom,
halbꞌilkano yinh isley yaꞌ Moisés hakaꞌ tiꞌ:
“Ta chikam yichamil hunu ix ix,
machi xin yuninal naj yebꞌ ix,
yilal yiqꞌni ix yuxhta naj kamna tuꞌ,
yunhe ay yuninal naj yebꞌ ix kat yok yuninalo naj kamna tuꞌ,”
xhihayoj.
25 Yajaꞌ yet hunel,
koxol tiꞌanh ay hujwanh ebꞌnaj yuxhtanhe isbꞌa.
Naj bꞌabꞌel mohyi yebꞌ huneꞌ ix yajaꞌ kam naj,
machi xin yuninal naj yebꞌ yixal tuꞌ,
yuxin mohyi naj iskabꞌ yebꞌ ix.
26 Yajaꞌ kampaxo naj,
haktikꞌapax tuꞌ yu naj isyox,
masanta apni yinh naj ishuj,
sunil ebꞌnaj iqꞌlen ix.
27 Lahwi tuꞌ iskampaxo ix.
28 Yuxin hayet chiꞌitzitzbꞌikanh kamom,
¿mak ebꞌnaj hujwanh tuꞌ chiꞌok yichamilo ix yuto ishujwanhil ebꞌnaj mohyi yebꞌ ix?
xhi ebꞌnaj.
29 Istaqꞌwi Komam Jesús tet ebꞌnaj saduceo tuꞌ:
—Hex tiꞌ,
maxhtaj haꞌ ye heyu,
yuto mach heyohtajo tzet chal yul Yum Komam Dios,
yebꞌ mach heyohtajo yip Komam.
30 Wal xin hayet chiꞌitzitzbꞌikanh anma kamom matxa chimohyi,
yuto lahanxa chiꞌeliko hakaꞌ ebꞌnaj ángel ay satkanh.
31 Yinh yet chiꞌitzitzbꞌikanh anma kamom tuꞌ,
¿tom maxhto cheyil yul Yum Komam Dios bꞌay chal hakaꞌ tiꞌ?:
32 “Hanintiꞌan isDiosal yaꞌ Abraham,
yaꞌ Isaac yebꞌ yaꞌ Jacob,”
xhihayoj.
Yuxin waxanhka kam ebꞌyaꞌ yajaꞌ mach kam ebꞌyaꞌ yinh hunelnhe.
Yuto mach isDiosalo kamom ye Komam Dios to isDiosal anma itzitz,
xhi Komam.
33 Yet yabꞌen anma hunteqꞌan kuybꞌanile yal Komam tuꞌ kaw kꞌayilo iskꞌul.
Chejbꞌanile kaw ekꞌbꞌal yelapno yehi
34 Yet yabꞌen ebꞌnaj fariseo tato matxa yu istaqꞌwi ebꞌnaj saduceo tet Komam Jesús,
iskutxbꞌaniko isbꞌa ebꞌnaj.
35 Xol ebꞌnaj tuꞌ xin ayko huneꞌ naj kuywawom yinh ley,
haꞌ naj ok ilweno Komam,
yalni naj:
36 —Mam kuywawom,
¿bꞌaytet chejbꞌanile kaw ekꞌbꞌal yelapno xol chejbꞌanile aykano yu yaꞌ Moisés?
xhi naj.
37 Istaqꞌwi Komam tet naj:
—Ochewe Komam Dios yinh sunil hekꞌul,
heyanma yebꞌ henabꞌal.
38 Haꞌ xin huneꞌ chejbꞌanile tuꞌ haꞌ bꞌabꞌel yebꞌ ekꞌbꞌal yelapno xol hunteqꞌanxa.
39 Haꞌ huneꞌxa iskabꞌ xin,
lahan hakaꞌ huneꞌ bꞌabꞌel,
chal hakaꞌ tiꞌ:
“Xahan cheyil heyet anmahil hakaꞌ hexahannhen hebꞌa,”
xhihayoj.
40 Hayet chikoyijen kabꞌebꞌ chejbꞌanile tiꞌ,
lanhan koyijen hunteqꞌanxa kuybꞌanile aqꞌbꞌilkano yu yaꞌ Moisés,
yebꞌ tzet tzꞌibꞌnhebꞌilkano yu ebꞌyaꞌ ischejabꞌ Komam Dios,
xhi Komam tet naj.
Komam Cristo Iskꞌahol Komam Dios yehi
—¿Tzet cheyute hetxumni yinh yaꞌ Cristo?
¿Mak yinh chitit yaꞌ heyalni?
xhi Komam.
Istaqꞌwi ebꞌnaj:
—Yinh yaꞌ rey David chitit yaꞌ,
xhi ebꞌnaj.
43 Yalnipaxo Komam:
—Yajaꞌ yaꞌ David tuꞌ,
yal yaꞌ,
Yaꞌ Cristo Yahawoj yet yaqꞌlax yalaꞌ yaꞌ yu Komam Espíritu Santo yet yalni yaꞌ hakaꞌ tiꞌ:
44 Yal Komam Dios tet Wahawilan:
“Ayanh tzꞌonhno yinh inwatxꞌqꞌabꞌan
masanto chiwakojan mak ayko ishowal tawinh yalanh hawoj,”
xhi Komam,a
xhi yaꞌ David.
45 ¿Tzet yinh xin yal yaꞌ David tuꞌ Yaꞌ Cristo Yahawiloj tato yinh yaꞌ titna yaꞌ?b
xhi Komam.
46 Machi hunu ebꞌnaj yu istaqꞌwi yinh tzet yal Komam.
Haꞌtikꞌa yinh huneꞌ tzꞌayik tuꞌ xin matxatikꞌa hunu ebꞌnaj hitziko isqꞌambꞌen hunu tzet ye tuꞌ tet Komam.