TZOTIꞌ KꞌUL YET KOLBꞌANILE TZꞌIBꞌNHEBꞌILKANO YU YAꞌ SAN MARCOS
Yet iskuywa yaꞌ Juan anikanh haꞌ iswiꞌ anma
1
Hak tiꞌ chu yichiko Tzotiꞌ Kꞌul yet Kolbꞌanile yinh Komam Jesucristo,
Iskꞌahol Komam Dios.
Marcos 1:1-13
2 Ay huneꞌ ischejabꞌ Komam Dios Isaías isbꞌi,
tzꞌibꞌnhenkano yinh tzet yal Komam Dios tet Iskꞌahol,
bꞌay chala:
«Chiwatojan inchejabꞌan tasataj yunhe iswatxꞌen yaꞌ habꞌeh yet yalanhto maxhto chaxhapni.
3 Chꞌawi yaꞌ yinh kaw ip bꞌey txꞌotxꞌ desierto,
chalni yaꞌ:
“Watxꞌeweko heyanma yuto chihul Komam Dios Jahawil,
hakaꞌ chu istoholbꞌanhelax hunu bꞌeh yet chihul hunu naj jahaw,”
xhi yaꞌ,»a
xhihayoj.
4 Huneꞌ tiꞌ yij isbꞌa yet yapni yaꞌ Juan chꞌanikanh haꞌ iswiꞌ anma bꞌey txꞌotxꞌ desierto.
Yichiko yaꞌ yalni ta yilal yahkano haꞌ iswiꞌ anma,
yunhe isyenilo isbꞌa tato chisbꞌej anma iswatxꞌen istxꞌojal,
kat yaqꞌlaxkano tanho ismul yu Komam Dios.
5 Sunil anma ay yul ismajul Judea yebꞌ anma ay yul konhobꞌ Jerusalén apni abꞌeno tzet chal yaꞌ Juan.
Hayet chalnati anma ismul,
kat yahkano haꞌ iswiꞌ yu yaꞌ yul haꞌ niman Jordán.
6 Wal yaꞌ Juan tuꞌ,
xil noꞌ camello watxꞌebꞌilayo xilo isqꞌap yaꞌ,
tzꞌum noꞌ xin ayiko istxꞌambꞌalo yaꞌ.
Haꞌ xin tzet chislo yaꞌ,
haꞌ ton noꞌ litꞌ yebꞌ iskabꞌil noꞌ txꞌilabꞌ.
7 Chalni yaꞌ Juan tuꞌ tet anma:
«Ay huneꞌ yaꞌ tzujan yul wintajan,
kaw ekꞌbꞌal yelapno ye yaꞌ insatajan,
wal hinan xin machi welapnojan chiwabꞌehan nitam way kꞌonhnojan inpuhnilojan istxꞌanhal isxanhabꞌ yaꞌ.
8 Hanintiꞌan yinh kaw yeli,
hanhe ha haꞌ chiwaqꞌan yahbꞌalo haꞌ hewiꞌ,
wal yaꞌ chiwal tuꞌan xin chiyakanh yaꞌ haꞌ hewiꞌ yaj yu isqꞌaqꞌal yip Komam Espíritu Santo,»
xhi yaꞌ Juan.
Yet yah haꞌ iswiꞌ Komam Jesús
9 Yet huneꞌ tiempohal tuꞌ,
el Komam Jesús yul konhobꞌ Nazaret ayko yul ismajul Galilea,
yapni bꞌey haꞌ niman Jordán,
yah haꞌ iswiꞌ Komam yu yaꞌ Juan yul haꞌ Jordán tuꞌ.
10 Hayet lanhan yahti Komam xol haꞌ tuꞌ,
yilni Komam ishajni isbꞌa satkanh,
yayilo Komam Espíritu Santo yibꞌanh,
isyeni isbꞌa hakaꞌ yayti hunu noꞌ palamuch.
11 Yabꞌelax huneꞌ yul nuqꞌe yul satkanh,
halni hakaꞌ tiꞌ:
«Hach tiꞌ,
hach Inkꞌaholan kaw xahan ay wuhan,
kaw chintzalahan tawinh,»
xhihaytij.
Yet yilwelax Komam Jesús yu naj matzwalil
12 Lahwinhe tuꞌ yilaxto Komam Jesús yu Komam Espíritu Santo bꞌey huneꞌ txꞌotxꞌ desierto.
13 40 (Kawinaj) tzꞌayik ehayo Komam bꞌey tuꞌ xol ej noꞌ xoltelajil noqꞌ.
Yok naj matzwalil yilweno Komam,
yajaꞌ ayko ebꞌnaj ángel yilno Komam.
Ichiko Komam Jesús yalni Istzotiꞌ Komam Dios bꞌey Galilea
14 Yet majanxa yaꞌ Juan yul preso,
isto Komam Jesús bꞌey Galilea,
yok Komam yalnokꞌo Tzotiꞌ Kꞌul yinh tzet chu yok anma yul isqꞌabꞌ Komam Dios.
Marcos 1:14-45
15 Chalni Komam tet anma:
«Wal tinanh mayij isbꞌa huneꞌ tiempo halbꞌilkanoj yokxa Komam Dios Heyahawoj.
Bꞌejwekano hetxꞌojal,
chahwe Tzotiꞌ Kꞌul yet Kolbꞌanile yul heyanma,»
xhi Komam.
Yet yawten Komam Jesús kanhwanh ebꞌyaꞌ iqꞌomati kay
16 Hayet lanhan isbꞌelwi Komam Jesús istiꞌ haꞌ lago Galilea,
yilnito Komam kawanh ebꞌyaꞌ iqꞌomati kay yet lanhan yanayto ishakꞌ chiꞌinahti noꞌ xol haꞌ;
ebꞌyaꞌ kawanh tiꞌ yuxhta isbꞌa ebꞌyaꞌ,
haꞌ ton yaꞌ Simón yebꞌ yaꞌ Andrés.
17 Yalni Komam tet ebꞌyaꞌ:
—Okanhwe tzujno wintajan,
wal tinanh haxa anma chexok heyiqꞌahti yul inqꞌabꞌan,b
xhi Komam tet ebꞌyaꞌ.
18 Yabꞌenhe ebꞌyaꞌ yalni Komam hakaꞌ tuꞌ,
isbꞌejnikano ebꞌyaꞌ ishakꞌ yok tzujno ebꞌyaꞌ yinta Komam.
19 Hanikꞌixto chito Komam Jesús xin,
yilnipaxo Komam kawanhxa ebꞌyaꞌ yuxhta isbꞌa,
haꞌ ton yaꞌ Jacobo yebꞌ yaꞌ Juan,
iskꞌahol icham Zebedeo.
Ayahto ebꞌyaꞌ yul isbarco,
lanhan isbꞌujni ishakꞌ.
20 Yalni Komam tet ebꞌyaꞌ tato chiꞌoktzujno ebꞌyaꞌ yinta Komam.
Hayet yabꞌen ebꞌyaꞌ yalni Komam hakaꞌ tuꞌ,
yanikano ebꞌyaꞌ ismam yebꞌ ebꞌnaj kꞌamteꞌ yul teꞌ barco,
yokkano tzujno ebꞌyaꞌ yinta Komam.
Yaqꞌ kawxo Komam Jesús huneꞌ naj ayko ischejabꞌ naj matzwalil yinh
21 Lahwi tuꞌ xin,
yapni Komam Jesús yebꞌ ebꞌyaꞌ iskuywom yul konhobꞌ Capernaúm.
Haxa yinh huneꞌ tzꞌayik xewilal yokto Komam yul iscapilla ebꞌnaj Israel,
yichiko Komam iskuyni anma ayikto bꞌey tuꞌ.
22 Kaw xin chikꞌay iskꞌul anma yabꞌen iskuywa Komam yuto kaw habꞌan isyenilo isbꞌa ta kaw aqꞌbꞌil yip yu Komam Dios,
mach hakaꞌo chu iskuywa ebꞌnaj kuywawom yinh isley yaꞌ Moisés.
23 Yul capilla tuꞌ ayikto huneꞌ naj ayko ischejabꞌ naj matzwalil yinh,
yah yaw naj yinh kaw ip,
yalni naj:
24 —¿Tzet hawok jinhanh hach Jesús ah Nazaret?
¿Tom chaxhhul konhhatanhtzelojanh hawalni?
Wohtajan mak anmahilach.
Hach tiꞌ mach nino istxꞌojal ayko tawinh,
yet Dios hawehi,
xhi naj.
25 Iskachwa Komam yinh ischejabꞌ naj matzwalil tuꞌ,
yalni Komam:
—¡Kach hatiꞌ,
elanh yinh naj!
xhi Komam.
26 Istit huneꞌ yaxkamik yinh naj yu ischejabꞌ naj matzwalil.
Yichiko ischejabꞌ naj matzwalil tuꞌ yel yaw,
yelkano naj yinh naj.
27 Hayet yilni anma ayikto yul capilla huneꞌ tuꞌ kaw xiwkanh,
isqꞌambꞌen anma tet hunun:
—¿Tzettaxka chalilo huneꞌ tiꞌ?
Hunteqꞌan kuybꞌanile chal huneꞌ naj tiꞌ kaw akꞌto,
maxhto bꞌay chijabꞌe,
yebꞌ kaw ay yip naj iskuywahi.
Hayet chalni naj tato chiꞌel ischejabꞌ naj matzwalil yinh anma,
kat isyijen ebꞌnaj tzet chal naj,
xhi anma yinh Komam.
28 Kaw xin yinh anhe pujnato isqꞌumal Komam yul sunil ismajul Galilea.
Yaqꞌ kawxo Komam Jesús ismiꞌ yixal yaꞌ Pedro
29 Lahwi yelti Komam Jesús yul capilla,
isto Komam yebꞌ yaꞌ Jacobo,
yebꞌ yaꞌ Juan bꞌey yatut yaꞌ Simón yebꞌ yaꞌ Andrés.
30 Yajaꞌ xin hilanto ismiꞌ yixal yaꞌ Simón sat txꞌat yu qꞌaꞌ.
Yal-lax tet Komam tato hilanto ixnam.
31 Ishitziko Komam istiꞌ istxꞌat ixnam,
yok tzabꞌno Komam yinh isqꞌabꞌ ixnam tuꞌ,
isxeknikanh Komam ixnam.
Yinhnhena tuꞌ xin yel huneꞌ qꞌaꞌ yinh ixnam,
yok ixnam iswatxꞌeno tzet chislo Komam Jesús yebꞌ ebꞌyaꞌ iskuywom.
Txꞌiꞌal anma yaꞌay kawxikanh yu Komam Jesús
32 Haxa yinh qꞌejbꞌiyalil yinh huneꞌ tzꞌayik tuꞌ,
yilaxto sunil ej anma yaꞌay tet Komam yebꞌ anma ayko ischejabꞌ naj matzwalil yinh.
33 Etza sunil anma ay yul konhobꞌ tuꞌ apni istiꞌ ispultahil teꞌ nha bꞌay ayikto Komam.
34 Kaw txꞌiꞌal anma nananta yabꞌil ayko yinh kawxikanokanh yu Komam,
txꞌiꞌalpaxo xin anma el ischejabꞌ naj matzwalil yinh.
Machi xin ischah Komam tzotelo ebꞌnaj ischejabꞌ naj matzwalil tuꞌ,
yunhe mach chalilo ebꞌnaj mak anmahil Komam.
Ekꞌ Komam Jesús yalaꞌ Istzotiꞌ Komam Dios yul ismajul Galilea
35 Haxa yinh hunxa tzꞌayik kaw sahabꞌ ahwano Komam Jesús,
isto Komam bꞌay machi anma chiꞌekꞌi,
haꞌ bꞌey tuꞌ xin txahli Komam.
36 Tzujan tuꞌ isto yaꞌ Simón yebꞌ ebꞌyaꞌ yetbꞌi saywal yinh Komam.
37 Hayet yilcha Komam yu ebꞌyaꞌ,
yalni ebꞌyaꞌ tet Komam:
—Tonhwe yulaj konhobꞌ ayko yinh ishoyanil konhobꞌ tiꞌ,
yuto yilal walnipaxojan Istzotiꞌ Komam Dios tet anma,
yuton huneꞌ tuꞌ yuxin kinhulan,
xhi Komam.
39 Kaw xin sunil yul ismajul Galilea ekꞌ Komam yalaꞌ Istzotiꞌ Komam Dios yulaj hunun iscapilla ebꞌnaj Israel.
Yinipaxilo Komam ischejabꞌ naj matzwalil yinh anma.
Yaqꞌ kawxo Komam Jesús huneꞌ naj ayko lepra yinh
40 Ay huneꞌ naj ayko lepra yinh apni iskꞌatanh Komam Jesús,
yay jahno naj sata Komam,
yok naj isqꞌanno tet Komam:
—Mamin,
ta chawoche chu hawinilo huneꞌ yabꞌil tiꞌ winhan,
xhi naj.
41 Istzꞌaykanh iskꞌul Komam yinh naj,
yanayo Komam isqꞌabꞌ yibꞌanh naj,
yalni Komam tet naj:
—Hoꞌ,
chiwochehan ta chiꞌel huneꞌ yabꞌil tiꞌ tawinh,
xhi Komam.
42 Yinhnhena tuꞌ xin yel huneꞌ yabꞌil yinh naj,
iskawxikanh naj.
43 Yalni Komam tet naj ta chipaxto naj,
istaqꞌenkano Komam tet naj hakaꞌ tiꞌ:
44 —Machi bꞌay chawalikꞌo huneꞌ tiꞌ,
bꞌeh hato hayeno habꞌa tet naj sacerdote kat hawaqꞌni haxahanbꞌal tet Komam Dios hakaꞌ yalni isley yaꞌ Moisés yinh anma chiꞌelkano lepra yinh.
Hak tuꞌ chu yohtanhenkanilo anma tato maꞌelkano huneꞌ yabꞌil tiꞌ tawinh,c
xhi Komam.
45 Yajaꞌ yet ispaxto naj,
yichiko naj yalni tet anma yinh tzet yu iskawxilo naj,
yuxin matxa chu isyeni isbꞌa Komam yinh kaw habꞌan yulaj konhobꞌ.
Wal xin istxamlaxanhe konhobꞌ chiꞌekꞌ Komam bꞌay machi anma chiꞌekꞌi.
Yajaꞌ sunil anma ay yulaj konhobꞌ apni iskꞌatanh Komam.