Yet yalni yaꞌ Juan anikanh haꞌ iswiꞌ anma Istzotiꞌ Komam Dios
3
Yet huneꞌ tiempohal tuꞌ xin apni yaꞌ Juan anikanh haꞌ iswiꞌ anma bꞌey txꞌotxꞌ desierto,
yul ismajul Judea.
2 Yalni yaꞌ hakaꞌ tiꞌ:
«Bꞌejwekano hewatxꞌen istxꞌojal,
yuto yokxa Komam Dios ay yul satkanh yahawo teyinh,»
xhi yaꞌ.
3 Haꞌ ton yinh yaꞌ Juan tiꞌ bꞌay yal yaꞌ Isaías,
huneꞌ ischejabꞌ Komam Dios yet payat,
yet istzꞌibꞌnhenkano hakaꞌ tiꞌ:
«Ay huneꞌ yaꞌ chiꞌawi yinh kaw ip bꞌey txꞌotxꞌ desierto,
chalni yaꞌ:
“¡Watxꞌeweko heyanma yuto chihul Komam Dios Jahawil.
Hakaꞌ chu istoholbꞌanhelax hunu bꞌeh yet chihul hunu naj jahaw,
hak tuꞌ cheyute heyanma!”
xhi yaꞌ,»a
xhi yul Yum Komam Dios.
4 Wal yaꞌ Juan tuꞌ,
xil noꞌ camello watxꞌebꞌilayo xilo isqꞌap yaꞌ,
tzꞌum noꞌ xin ayko istxꞌambꞌalo yaꞌ.
Haꞌ tzet chislo yaꞌ haꞌ ton noꞌ nixhte noqꞌ hakaꞌ noꞌ litꞌ,
yebꞌ iskabꞌil noꞌ txꞌilabꞌ.
5 Hantanhe xin anma yul konhobꞌ Jerusalén yebꞌ yul ismajul Judea,
yebꞌpaxo anma ayayo istiꞌla haꞌ niman Jordán apni abꞌeno tzet yal yaꞌ.
6 Yet chalnati anma ismul xin,
kat yahkano haꞌ iswiꞌ yu yaꞌ Juan yul haꞌ niman Jordán.
7 Hayet yilni yaꞌ Juan tato txꞌiꞌal ebꞌnaj fariseob yebꞌ ebꞌnaj saduceo apni iskꞌatanh yu yah haꞌ iswiꞌ,
yalni yaꞌ tet ebꞌnaj:
«¡Hex tiꞌ kaw hakaꞌtanhe heyikꞌal hebꞌa yebꞌ noꞌ labꞌa,
kaw helan hex hekolni hebꞌa!
¿Mak halni teyet ta yunhe chꞌah haꞌ hewiꞌ yuxin chexkolcha tet huneꞌ isyaꞌtajil chati Komam Dios?
8 Tato kaw yeli xaheyakano sunilal istxꞌojal,
yilal heyenilo yu iskꞌulal chewatxꞌe.
9 Tajka chetxum hakaꞌ tiꞌ:
“Hanhonhtiꞌanh jichmamanh ye yaꞌ Abraham,”
yuxin xakonhkolchahanh yalanh isyaꞌtajil chati Komam Dios,
tajka kexchi.
Wal xin chiwalan teyet,
tato choche Komam Dios chu yaniko Komam hunteqꞌan chꞌen chꞌen tiꞌ yuninalo yaꞌ Abraham heseleloj.
10 Kawilxa yeti huneꞌ isyaꞌtajil chati Komam Dios,
lahan hakaꞌ yet yokxa chꞌen eche yich xeꞌ hunu te teꞌ yu istzokꞌlaxayo teꞌ.
Yuxin sunil te teꞌ mach kꞌulo issatni chitzokꞌlaxayo teꞌ kat isqꞌojlaxto teꞌ yul qꞌaꞌ.
11 Yinh kaw yeli hanintiꞌan hanhe ha haꞌ chiwaqꞌan yahbꞌalo haꞌ hewiꞌ yunhe isyenikanilo isbꞌa tato kaw yeli xahebꞌejkano istxꞌojal.
Yaj ay huneꞌ yaꞌ tzujan yul wintajan,
yaꞌ tuꞌ chiyakanh yaꞌ haꞌ hewiꞌ,
yaj yu isqꞌaqꞌal yip Komam Espíritu Santo.
Haꞌ yaꞌ tuꞌ kaw ekꞌbꞌalkano yelapno ye yaꞌ insatajan,
wal hinan xin kaw matzet welapnojan chiwabꞌehan,
nitam intꞌunhnihan isxanhabꞌ yaꞌ.
12 Yaꞌ chul tuꞌ,
hakaꞌta chisxulo yaꞌ isqꞌal ixim trigo,
nan chaqꞌ yaꞌ ixim sat,
nan chaqꞌpaxo yaꞌ ixim yoj,
wal ixim sat tuꞌ chiskꞌubꞌato yaꞌ ixim yul iskꞌunha,
haxa ixim yoj xin chisqꞌojto yaꞌ ixim xol qꞌa qꞌaꞌ mach istanhbꞌal,»
xhi yaꞌ Juan tuꞌ.
Yet yah haꞌ iswiꞌ Komam Jesús
13 Yet huneꞌ tiempo tuꞌ el Komam Jesús bꞌey Galilea,
isto Komam istiꞌ haꞌ niman Jordán iskꞌatanh yaꞌ Juan,
yu yah haꞌ iswiꞌ Komam yu yaꞌ.
14 Wal yaꞌ Juan tuꞌ mach chisje yaꞌ yaqꞌaꞌkanh haꞌ iswiꞌ Komam.
Yalni yaꞌ tet Komam:
—Machoj,
wal xin haꞌ hawet hach yilal hawanikanh haꞌ inwiꞌan,
maxhtaj hach chaxhhul inkꞌatanhan yu wanikanhan haꞌ hawiꞌ,
xhi yaꞌ.
15 Yajaꞌ taqꞌwi Komam tet yaꞌ:
—Mach chu hamanhkꞌon huneꞌ tiꞌ,
wal xin yilal koyijen tzet chal Komam Dios,
xhi Komam.
Hak tuꞌ xin yu isyijen yaꞌ Juan yanikanh haꞌ iswiꞌ Komam Jesús.
16 Yet lahwi yah haꞌ iswiꞌ Komam tuꞌ,
yahti Komam xol haꞌ,
yinhnhena tuꞌ ishajni isbꞌa satkanh.
Yilni Komam yayilo Komam Espíritu Santo yibꞌanh hakaꞌ hunu noꞌ kuwis.
17 Yabꞌelax huneꞌ yul nuqꞌe satkanh,
halni hakaꞌ tiꞌ:
«Haꞌ yaꞌ tiꞌ Inkꞌaholan,
kaw xahan ay wuhan,
kaw chintzalahan yinh yaꞌ,»
xhihaytij.