Yet isbꞌey hunteqꞌan ebꞌnaj mago yilaꞌ nichꞌan Jesús
2
Bꞌey yul konhobꞌ Belén ayko yul ismajul txꞌotxꞌ Judea,
haꞌ tuꞌ pitzkꞌa nichꞌan Jesús.
Yet huneꞌ tiempohal tuꞌ haꞌ naj Herodes ayko isreyalo txꞌotxꞌ Judea.
Ay xin hunteqꞌan ebꞌnaj kaw ay ishelanil chikuyni yinh tzettaj ye txꞌumel,a
ispeto ebꞌnaj yinh yetkꞌulal bꞌay chiꞌahilo tzꞌayik.
Yet yapni ebꞌnaj bꞌey konhobꞌ Jerusalén,
2 isqꞌambꞌen ebꞌnaj:
—¿Bꞌaytuꞌwal ay huneꞌ naj nichꞌan xapitzkꞌahi,
naj chiꞌok isreyalo anma Israel?
Jilanh yahilo huneꞌ txꞌumel yinh yetkꞌulal bꞌay chiꞌahilo tzꞌayik,
haꞌ xin aqꞌni kotxumulojanh tato xapitzkꞌa naj.
Yuxin makonhtitanh jiqꞌayo kobꞌahanh tet naj,
xhi ebꞌnaj.
Visita de los magos (Mateo 2.1-23)
3 Yet yabꞌen naj rey Herodes huneꞌ tuꞌ,
kaw somchakanh yul iswiꞌ naj yebꞌ sunil anma ay yul konhobꞌ Jerusalén.
4 Yuxin yawte naj Herodes tuꞌ ebꞌnaj yahawil sacerdoteb Israel,
yebꞌ ebꞌnaj kuywawom yinh isley yaꞌ Moisés;
isqꞌambꞌen naj:
—Yul konhobꞌ Belén yul ismajul Judea chipitzkꞌa naj,
yuto hak tuꞌ yu istzꞌibꞌnhelaxkanayo yul Yum Komam Dios yu huneꞌ ischejabꞌ yet payat,
bꞌay chal hakaꞌ tiꞌ:
6 Konhobꞌ Belén,
haꞌ kaw nichꞌanchꞌan sata hunuxa konhobꞌ ay yul ismajul txꞌotxꞌ Judea,
yajaꞌ kaw ekꞌbꞌalto yelapno ye sata hunteqꞌan konhobꞌ tuꞌ,
yuto haꞌ bꞌey tuꞌ chipitzkꞌa huneꞌ naj yahaw.
Haꞌ naj xin chiꞌok tanheno konhobꞌ Israel,
xhihayoj,
xhi ebꞌnaj sacerdote.
7 Lahwi tuꞌ xin,
yawten naj rey Herodes ebꞌnaj mago yinh ewantajil,
yok naj isqꞌambꞌeno tet ebꞌnaj yinh tzet tiempohal isye isbꞌa huneꞌ txꞌumel tuꞌ tet ebꞌnaj.
8 Lahwi tuꞌ xin ischejnito naj Herodes tuꞌ ebꞌnaj bꞌey konhobꞌ Belén,
yalni naj:
—Asiꞌwe bꞌey Belén tuꞌ,
kaw xin cheqꞌambꞌe yinh tzet kaw ye nichꞌan unin tuꞌ.
Lahwi yilcha naj heyu kat heyul heyalno wetan kat intopaxojan winayo hinbꞌahan tet naj,
xhi naj.
9 Lahwi yabꞌen ebꞌnaj tzet yal naj Herodes tuꞌ,
isto ebꞌnaj.
Wal huneꞌ txꞌumel yil ebꞌnaj yinh yetkꞌulal bꞌay chiꞌahilo tzꞌayik bꞌabꞌel sata ebꞌnaj,
yok linhno bꞌay ay nichꞌan Jesús tuꞌ.
10 Hayet yilni ebꞌnaj huneꞌ txꞌumel tuꞌ kaw tzalakanh ebꞌnaj.
11 Hayet yapni ebꞌnaj xin yokto ebꞌnaj yul nha.
Yilni ebꞌnaj nichꞌan neneꞌ tuꞌ yebꞌ ismiꞌ,
yay jahno ebꞌnaj sata nichꞌan neneꞌ tuꞌ,
yalni ebꞌnaj kꞌul-la tzotiꞌ yinh.
Lahwi tuꞌ ishajni ebꞌnaj iskꞌuwanbꞌal,
yaqꞌni ebꞌnaj chꞌen oro,
yebꞌ teꞌ pom,
yebꞌ hunteqꞌan anh kaw xuqꞌ sam chiyij mirra sabꞌehal tet nichꞌan Jesús tuꞌ.
12 Yajaꞌ xin hal-lax tet ebꞌnaj yul iswayik tato matxa chꞌekꞌ ebꞌnaj yalaꞌ tet naj rey Herodes yinh nichꞌan Jesús tuꞌ,
yuxin nan bꞌehalxa bꞌay to ebꞌnaj yet ispaxto ebꞌnaj bꞌey iskonhobꞌ.
Yet yilaxto nichꞌan Jesús bꞌey konhobꞌ Egipto
13 Haxa yet xapaxto ebꞌnaj mago hulikꞌo ilno nichꞌan Jesús,
isyeni isbꞌa huneꞌ yángel Komam Dios tet yaꞌ José yul iswayik,
yalni naj ángel tuꞌ:
«Ahanhwano yinh anhe,
ito nichꞌan unin tiꞌ yebꞌ ismiꞌ kat hato bꞌey Egipto.
Wal haweh bꞌey tuꞌ masanto haninan chiwalan tawet bꞌaqꞌinh chaxhmeltzohi,
yuto chati naj Herodes issayomal nichꞌan unin tiꞌ kat ispotxꞌni naj yalni,»
xhi naj ángel tet yaꞌ José.
14 Lahwi tuꞌ yahwano yaꞌ José,
yinito yaꞌ nichꞌan Jesús tuꞌ,
isto yaꞌ yinh isbꞌel yebꞌ yaꞌ María bꞌey Egipto yinh aqꞌbꞌalil.
15 Haꞌ bꞌey tuꞌ xin ehayo yaꞌ yebꞌ yaꞌ masanto kam naj rey Herodes.
Hak tuꞌ yu yijnikano isbꞌa tzet halbꞌilkano yu Komam Dios tet huneꞌ ischejabꞌ yet payat yet istzꞌibꞌnhenkano hakaꞌ tiꞌ:
«Bꞌey Egipto chiwawteti Inkꞌaholan,»
c xhihayoj.
Ischej naj Herodes potxꞌlaxo nixhte winaj unin
16 Hayet yilni naj rey Herodes tato matxa ekꞌ ebꞌnaj mago yalaꞌ tet naj yinh nichꞌan Jesús,
kaw tit ishowal naj yuto etli ebꞌnaj yinh naj yabꞌe.
Ischejni naj potxꞌlaxo sunil nixhte winaj unin neneꞌ,
masanta nixhte yinh kabꞌ habꞌil ay yul konhobꞌ Belén yebꞌ hunteqꞌanxa konhobꞌ ayko yinh ishoyanil,
yuto hak tuꞌ chiꞌeliko istiempohal yinh tzet yal ebꞌnaj mago tet naj.
17 Hak tuꞌ yu yijnikano isbꞌa tzet tzꞌibꞌnhebꞌilkano yu yaꞌ Jeremías,
huneꞌ ischejabꞌ Komam Dios yet payat bꞌay chala:
18 Abꞌelax huneꞌ aw yul konhobꞌ Ramá,
kaw ay oqꞌil yebꞌ nimeta bꞌiskꞌulal.
Haꞌ ton ix Raquel chiꞌoqꞌ yinh ej yunin,
machi xin chisje ix chiꞌaqꞌlax isnimanbꞌal iskꞌul ix,
yuto kamnaxa yunin ix,d
xhihayoj.
19 Haxa yet xakam naj rey Herodes,
isyeni isbꞌa huneꞌ yángel Komam Dios tet yaꞌ José yul iswayik bꞌey Egipto,
yalni naj:
20 «Ahanhwanoj kat hameltzo yebꞌ nichꞌan unin tiꞌ yebꞌ ismiꞌ bꞌey hakonhobꞌ Israel,
yuto xakam ebꞌnaj ochen potxꞌno kamo nichꞌan unin tiꞌ,»
xhi naj ángel.
21 Haxa yet yabꞌen yaꞌ José huneꞌ tuꞌ yahwano yaꞌ,
yinito nichꞌan Jesús tuꞌ yebꞌ ismiꞌ,
ispaxti yaꞌ sat txꞌotxꞌ Israel hunelxa.
22 Yajaꞌ yabꞌelo yaꞌ tato naj Arquelao,
iskꞌahol naj rey Herodes tuꞌ ok reyalo selelo bꞌey Judea,
yuxin xiw yaꞌ yapni bꞌey tuꞌ.
Yajaꞌ xin hal-lax tet yaꞌ yul iswayik yu Komam Dios tato chito yaꞌ yul ismajul Galilea.
23 Yet yapni yaꞌ bꞌey tuꞌ yehayo yaꞌ yebꞌ yaꞌ María yebꞌ nichꞌan Jesús yul konhobꞌ Nazaret.
Hak tuꞌ yu yijni isbꞌa tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat bꞌay chala tato nazareno chihal-lax yinh Komam Jesús.