Yet yalnikꞌo yaꞌ Juan, anikanh haꞌ iswiꞌ anma Istzotiꞌ Komam Dios
3
Ayxako yinh 15 (isholanhebꞌ) habꞌil yok naj Tiberio yahawilo Roma,
walpaxo naj Poncio Pilato,
haꞌ naj ayko gobernadoral yinh txꞌotxꞌ Judea,
haxapaxo xin naj Herodes ayko gobernadoral yinh txꞌotxꞌ Galilea.
Haxa yuxhta naj chiyij Felipe,
haꞌ naj ayko gobernadoral yinh txꞌotxꞌ Iturea yebꞌ txꞌotxꞌ Traconite.
Haxa naj Lisanias,
ayko naj gobernadoral yinh txꞌotxꞌ Abilinia.
2 Wal naj Anás yebꞌ naj Caifás,
haꞌ ebꞌnaj ayko yahawilo yinh sacerdote Israel.
Hayet huneꞌ tiempohal tuꞌ xin,
yaꞌ Juan iskꞌahol icham Zacarías,
ay yaꞌ bꞌey huneꞌ txꞌotxꞌ desierto.
Haꞌ tuꞌ xin tzotel Komam Dios tet yaꞌ.
3 Yu tzet yal Komam Dios tet yaꞌ,
yuxin to yaꞌ bꞌey sunil ej txꞌotxꞌ ayko istiꞌla haꞌ niman Jordán.
Yalni yaꞌ tet anma tato kaw yilal isbꞌejnikano sunil ismachiswalilal,
kat yahkano haꞌ iswiꞌ;
hak tuꞌ xin chu yaqꞌnikano nimankꞌulal Komam Dios yinh ismul anma tuꞌ.
4 Hak tuꞌ yu yijnikano isbꞌa tzet tzꞌibꞌnhebꞌil yu yaꞌ Isaías,
ischejabꞌ Komam Dios yet payat,
bꞌay chala:
«Ay huneꞌ naj chiꞌawi yinh kaw ip bꞌey txꞌotxꞌ desierto,
chihalni hakaꞌ tiꞌ:
“Watxꞌeweko heyanma,
yuto chihul Komam Dios Jahawil.
Hakaꞌ chu istoholbꞌanhelax hunu bꞌeh yet chul hunu naj jahaw,
hak tuꞌ cheyute heyanma.
5 Hakaꞌ isnohtzelax nimeta hokan,
hakaꞌ isqꞌajlaxayo nimeta witz yunhe yakꞌalbꞌiloj,
yebꞌ xin iswonhkixhtajil.
Hakaꞌ istoholbꞌanhelaxiko hunteqꞌan bꞌeh kotxkiltanhe yekꞌi,
hakaꞌ chu yakꞌalnhelax hunteqꞌan bꞌeh hopkixhtanhe,
6 hak tuꞌ cheyute heyanma haxinwal chiꞌil-lax yu sunil anma ta ay huneꞌ heKolomal chejbꞌilti yu Komam Dios,”
xhikano yaꞌ.»
7 Kaw niman anma apni iskꞌatanh yaꞌ Juan tuꞌ yu yah haꞌ iswiꞌ,
yalni yaꞌ tet anma:
—Wal hex hex tiꞌ,
kaw hakaꞌtanhe heyikꞌal hebꞌa yebꞌ noꞌ labꞌa.
¿Mak chihalni teyet ta yu chꞌah haꞌ hewiꞌ chexkolcha yalanh huneꞌ niman isyaꞌtajil chihul teyibꞌanh yu ishowal Komam Dios?
8 Wal xin bꞌejwekano istxꞌojal,
yebꞌ xin kaw yilal kꞌul cheyute hebꞌa,
hak tuꞌ chu heyeniloj ta xahelcha henabꞌal.
Tajka chetxum hakaꞌ tiꞌ:
“Yinh yaꞌ Abraham titnajonhanh,
yuxin xakonhkolchahanh yalanh isyaꞌtajil chati Komam Dios,”
tajka kexchi.
Wal xin chisje yaniko Komam hunteqꞌan chꞌen chꞌen tiꞌ anmahil,
kat xin yok yuninalo yaꞌ Abraham heseleloj,
xhi yaꞌ.
9 Yalnipaxo yaꞌ Juan:
—Ay huneꞌ niman isyaꞌtajil lanhan yul teyibꞌanh,
lahan hakaꞌ yet ayxako chꞌen eche yich hunu te teꞌ yu isqꞌajlaxayoj.
Yuto sunil te teꞌ mach kꞌulo sat chiyaqꞌa,
chitzokꞌlaxkanh teꞌ,
kat yokto teꞌ yul qꞌaꞌ,
xhi yaꞌ Juan tet anma tuꞌ.
10 Isqꞌambꞌen anma:
—¿Tzet wal juten kobꞌahanh,
chal tuꞌ?
xhi anma tet yaꞌ Juan.
11 Yalni yaꞌ xin:
—Ta ay hex ay kabꞌebꞌo hekamixh,
aqꞌwe hunu tet hunu mak machi yet,
yebꞌpaxo xin hakaꞌ hex ay tzet cheloh,
aqꞌwe nichꞌano tet mak machi yet,
xhi yaꞌ tet anma.
12 Aypaxo xin haywanh ebꞌnaj iqꞌomilo tohlabꞌala apni iskꞌatanh yaꞌ Juan tuꞌ yu yah haꞌ iswiꞌ.
Yok ebꞌnaj isqꞌambꞌeno hakaꞌ tiꞌ:
—Mam Kuywawom,
¿tzet wal juten kobꞌahanh yunhe kowatxꞌikojanh yul sat Komam Dios?
xhi ebꞌnaj.
13 Istaqꞌwi yaꞌ Juan tuꞌ:
—Hayet chexekꞌ heyiqꞌalo chꞌen tohlabꞌal yinh anma,
hakaꞌtikꞌa yalni ley,
hak tuꞌ cheyiloj,
xhi yaꞌ tet ebꞌnaj.
14 Yapnipaxo hunteqꞌan ebꞌnaj soldado isqꞌambꞌen ebꞌnaj:
—Haxapaxo hanhonhtiꞌanh,
¿tzet wal juten kobꞌahanh?
xhi ebꞌnaj.
Istaqꞌwi yaꞌ Juan tuꞌ xin:
—Mach chebꞌalkanh tzotiꞌ yibꞌanh anma,
mach cheyelqꞌalo tzettaj ay yul isqꞌabꞌ anma.
Tzalahojabꞌ hekꞌul yinh hetohol chꞌaqꞌlaxi,
xhi yaꞌ Juan tuꞌ.
15 Haꞌ anma apni abꞌeno tuꞌ xin,
ichiko isnahnoniko iskꞌul yinh yaꞌ Juan,
kꞌuxanta haꞌ yaꞌ chiyij Cristo echmabꞌil yuli.
16 Yalni yaꞌ tet sunil anma:
—Wal intiꞌan,
yinh kaw yeli kachannhe chiwakanhan haꞌ hewiꞌ,
yajaꞌ wintajan chihul huneꞌ yaꞌ chiyakanh haꞌ hewiꞌ yaj yu isqꞌaqꞌal yip Komam Espíritu Santo.
Kaw xin ekꞌbꞌalkano yip yaꞌ insatajan,
yuxin kaw mach chu wokan inpuhnolojan istxꞌanhal isxanhabꞌ yaꞌ chiwabꞌehan,
xhi yaꞌ Juan.
17 Yalnipaxo yaꞌ:
—Yaꞌ chihul tuꞌ,
lahan hakaꞌta chisxulo yaꞌ isqꞌal ixim trigo,
nan chaqꞌkano yaꞌ yoj ixim,
haxa ixim sat xin chiskꞌubꞌato yaꞌ ixim yul iskꞌunha.
Wal ixim yoj trigo tuꞌ xin,
chisqꞌojto yaꞌ ixim xol qꞌa qꞌaꞌ mach istanhbꞌal,
xhi yaꞌ tet sunil anma tuꞌ.
18 Kaw txꞌiꞌal kuybꞌanil yaqꞌkano yaꞌ Juan tet anma,
hak tuꞌ yu yalnikꞌo yaꞌ Tzotiꞌ Kꞌul yet Kolbꞌanile.
19 Kaw kachwa yaꞌ Juan yinh naj Herodes,
ayko gobernadoral bꞌey tuꞌ yuto yiqꞌkanh naj ix Herodías,
yixal yuxhtaj,
haꞌ ton naj Felipe,
yebꞌpaxo xin yu sunil istxꞌojal chiswatxꞌe naj.
20 Yajaꞌ maxhnhetaj hunteqꞌan istxꞌojal iswatxꞌe naj Herodes tiꞌ,
to yapaxikto naj yaꞌ Juan yul preso.
Yet yah haꞌ iswiꞌ Komam Jesús
21 Hayet maxhto chꞌokto yaꞌ Juan yul preso,
yet yah haꞌ iswiꞌ anma yu yaꞌ,
ahpaxo haꞌ iswiꞌ Komam Jesús yu yaꞌ.
Hayet lanhan istxahli Komam tuꞌ,
ishajni isbꞌa satkanh,
22 yayilo Komam Espíritu Santo yibꞌanh Komam hakaꞌ hunu noꞌ palamuch.
Lanhantotikꞌa xin yabꞌelax huneꞌ yul nuqꞌe satkanh,
yalni hakaꞌ tiꞌ:
«Hach tiꞌ hach Inkꞌaholan,
kaw xahan ayach wuhan.
Kaw chintzalahan tawinh,»
xhihaytij.
Bautizo de Jesús por Juan
Isbꞌi ebꞌnaj yichmam Komam Jesucristo
23 30 (Lahonhebꞌxa iskawinaj) habꞌil Komam Jesús yet yichiko ismunla yinh Istzotiꞌ Komam Dios.
Iskꞌahol yaꞌ José ye Komam chute yalni anma.
Hak tiꞌ kaw ye istxolal yichmam Komam hakaꞌ tiꞌ:
yaꞌ José,
naj Elí,
24 naj Matat,
naj Leví,
naj Melqui,
naj Jana,
naj José,
25 naj Matatías,
yaꞌ Amós,
naj Nahúm,
naj Esli,
naj Nagai,
26 naj Maat,
naj Matatías,
naj Semei,
naj José,
naj Judá,
27 naj Joana,
naj Resa,
yaꞌ Zorobabel,
yaꞌ Salatiel,
naj Neri,
28 naj Melqui,
naj Adí,
naj Cosam,
naj Elmodam,
naj Er,
29 naj Josué,
naj Eliezer,
naj Jorim,
naj Matat,
30 naj Leví,
naj Simeón,
naj Judá,
naj José,
naj Jonán,
naj Eliaquim,
31 naj Melea,
naj Mainán,
naj Matata,
naj Natán,
32 yaꞌ David,
yaꞌ Isaí,
yaꞌ Obed,
yaꞌ Booz,
yaꞌ Salmón,
naj Naasón,
33 naj Aminadab,
naj Aram,
naj Esrom,
naj Fares,
yaꞌ Judá,
34 yaꞌ Jacob,
yaꞌ Isaac,
yaꞌ Abraham,
yaꞌ Taré,
naj Nacor,
35 naj Serug,
naj Ragau,
naj Peleg,
naj Heber,
naj Sala,
36 naj Cainán,
naj Arfaxad,
naj Sem,
yaꞌ Noé,
naj Lamec,
37 naj Matusalén,
yaꞌ Enoc,
naj Jared,
naj Mahalaleel,
naj Cainán,
38 naj Enós,
naj Set,
naj Adán.
Haꞌ naj Adán tuꞌ xin,
Komam Dios watxꞌenhe naj.