Yaqꞌ kawxo Komam Jesús huneꞌ naj kamnajilo isnimanil
2
Lahwi yekꞌto hayebꞌ tzꞌayik,
ismeltzopaxo Komam Jesús yul konhobꞌ Capernaúm.
Hayet yabꞌenilo anma tato apni Komam yul nha bꞌaytikꞌa chikani,
Marcos 2:1-12
2 kaw txꞌiꞌal anma iskutxbꞌa isbꞌa bꞌey tuꞌ;
kaw nohilo yul nha yebꞌ istinha yu anma.
Yok Komam yalno Istzotiꞌ Komam Dios tet anma.
3 Yapni kanhwanh ebꞌnaj iqꞌnhe huneꞌ naj kamnajilo isnimanil.
4 Yajaꞌ mach yu yokto ebꞌnaj yul nha iskꞌatanh Komam,
yuto kaw witzꞌan yu anma.
Yuxin ahto ebꞌnaj yibꞌanh teꞌ nha tuꞌ,
isholnikanh ebꞌnaj hanikꞌ yibꞌanh teꞌ yinh yetkꞌulal bꞌay ay Komam;
yanayto ebꞌnaj naj kamnajilo isnimanil tuꞌ sat bꞌatxteꞌ tet Komam.
5 Hayet yilni Komam tato kaw ayko yanma ebꞌnaj iqꞌnhe naj tuꞌ yinh Komam,
yalni Komam tet naj yaꞌay tuꞌ:
—Hach wet anmahil,
wal tinanh maꞌokkano nimankꞌulal yinh hamul,
xhi Komam tet naj.
6 Ay xin hunteqꞌan ebꞌnaj kuywawom yinh isley yaꞌ Moisés ayikto bꞌey tuꞌ,
hayet yabꞌen ebꞌnaj yinh tzet yal Komam,
yok ebꞌnaj istxumni hakaꞌ tiꞌ:
7 «¿Tzet yinh xin hak tuꞌ yalni naj?
Kaw txꞌoj chal naj yinh Komam Dios,
wal xin to hanhkꞌanhe Komam chu yaqꞌni tanho mule,»
xhi ebꞌnaj yinh isnabꞌal.
8 Yajaꞌ xin istxumilo Komam yinh tzet chiꞌekꞌ yinh isnabꞌal ebꞌnaj,
yuxin yal Komam:
—¿Tzet yinh hak tuꞌ hetxumni?
9 Txumweloj,
¿bꞌaytet subꞌuta walnihan tet naj tiꞌ:
“Chiꞌaqꞌlax tanho hamul,”
mato,
“ahanhwanoj,
ikanh habꞌatxteꞌ tiꞌ kat hapaxtoj?”
10 Wal tinanh xin chinyelojan Hanin Aqꞌbꞌilintijan texol yu Komam Dios tato ay wipan waqꞌni nimankꞌulalan yinh ismul anma ay yul sat yibꞌanhqꞌinal tiꞌ,
xhi Komam.
Lahwi tuꞌ yalni Komam tet naj yaꞌay tuꞌ:
11 —Haninan chiwalan tawet,
ahanhwanoj,
ikanh habꞌatxteꞌ tiꞌ kat hapaxto hawatut,
xhi Komam tet naj.
12 Yinhnhena tuꞌ yahwano naj,
yinikanh naj isbꞌatxteꞌ,
yelti naj yul nha yinh sat sunil anma,
ispaxto naj.
Hayet yilni anma huneꞌ tuꞌ kaw kꞌayilo iskꞌul,
yichiko anma yalni kꞌul-la tzotiꞌ yinh Komam Dios.
Yalni anma hakaꞌ tiꞌ:
—Maxhto hunelo chijil huneꞌ hakaꞌ mayu tiꞌ,
xhi anma.
Yet yawten Komam Jesús yaꞌ Leví iskuywomoj
13 Lahwi tuꞌ istopaxo Komam Jesús istiꞌ haꞌ lago Galilea,
kaw hantanhe anma apni iskꞌatanh Komam.
Yok Komam iskuyno anma apni iskꞌatanh tuꞌ.
Marcos 2:13-28
14 Lahwi tuꞌ istopaxo Komam.
Yilnito Komam yaꞌ Leví,
iskꞌahol icham Alfeo,
tzꞌonhanayo yaꞌ bꞌay chiꞌel chꞌen tohlabꞌal yinh anma,
chꞌen chito bꞌey Roma.
Yalni Komam tet yaꞌ:
—Okanh tzujno wintajan,
xhi Komam.
Yet yabꞌen yaꞌ huneꞌ tuꞌ yah linhno yaꞌ,
yok tzujno yaꞌ yinta Komam.
15 Yaꞌ Leví tuꞌ,
yawte yaꞌ Komam waꞌo yatut.
Yok Komam waꞌo sat mexha yebꞌ ebꞌyaꞌ iskuywom,
yebꞌ ebꞌnaj iqꞌomilo tohlabꞌal,
yebꞌ hunteqꞌanxa mak mach kꞌulo isbꞌeybꞌal.
Kaw xin hantanhe anma tzujan yinta Komam.
16 Hayet yilni ebꞌnaj kuywawom yinh isley yaꞌ Moisés yebꞌ ebꞌnaj fariseo ta chiwaꞌ Komam yebꞌ anma tuꞌ,
isqꞌambꞌen ebꞌnaj tet ebꞌyaꞌ iskuywom Komam:
—¿Tzet yinh xin chiwaꞌ naj hekuywawom tiꞌ xol ebꞌnaj iqꞌomilo tohlabꞌal yebꞌ ebꞌnaj txꞌoj isbꞌeybꞌal?
xhi ebꞌnaj.
17 Hayet yabꞌen Komam huneꞌ tuꞌ,
yalni Komam tet ebꞌnaj:
—Haꞌ anma mach yaꞌo ay matzet chiꞌokniko naj anhlom yu,
wal xin to haꞌ anma yaꞌay haꞌ chiꞌokniko naj anhlom yu.
Mach kinhulan wawteꞌan anma chalni tato kꞌul yekoj,
wal xin to haꞌ anma mulum,
xhi Komam.
Mach chischah isbꞌa payat bꞌeybꞌale yebꞌ akꞌ bꞌeybꞌale
18 Yet hunel ayko ebꞌyaꞌ iskuywom yaꞌ Juan anikanh haꞌ iswiꞌ anma yebꞌ ebꞌnaj fariseo isyijen yet mach chiwaꞌ ebꞌnaj yu istxahli tet Komam Dios,
yuxin apni hunteqꞌan ebꞌnaj isqꞌambꞌeꞌ tet Komam Jesús:
—¿Tzet yinh xin mach chisyije ebꞌnaj hakuywom tiꞌ yinh yet mach chonhwaꞌi yu kotxahli tet Komam Dios?
xhi ebꞌnaj.
19 Istaqꞌwi Komam tet ebꞌnaj:
—Qꞌinaloj hunu mohyilal tinanh,
¿tom chaqꞌle anma awtebꞌil tuꞌ wahil yet aykꞌo naj mohyom xol anma tuꞌ?
¡Machoj!
Wal xin mach chu yijlen anma tuꞌ wahil ta aykꞌo naj mohyom tuꞌ.
20 Yajaꞌ chiꞌapni istiempohal bꞌay chiꞌilaxilo naj mohyom tuꞌ katto yok anma isyijen huneꞌ yet mach chonhwaꞌi yu kotxahli tet Komam Dios.
21 »Mach chu yalaxiko hunu qꞌap qꞌap akꞌto isbꞌujilo hunu xilqꞌape kaw xilxa,
yuto hayet chimokꞌi qꞌap akꞌto tuꞌ,
kat kam yahkanh istzilmokanto huneꞌ qꞌap xilxa tuꞌ.
22 Hakpax tuꞌ xin,
mach chu yalaxayto akꞌ vino yul noꞌ tzꞌum xilxa yuto yet chihowbꞌikanh teꞌ vino tuꞌ,
chitzilmoto noꞌ tzꞌum tuꞌ,
kat ismalkanto teꞌ vino.
Yuxin yul noꞌ akꞌ tzꞌum chiꞌalaxayto teꞌ vino akꞌto,
xhi Komam.
Yet yinilo iskuywom Komam Jesús iswiꞌ ixim trigo
23 Yinh huneꞌ tzꞌayik xewilal xin,
yekꞌto Komam Jesús yul huneꞌ nichꞌan bꞌeh xolbꞌal ixim trigo yebꞌ ebꞌyaꞌ iskuywom;
yinilo ebꞌyaꞌ iswiꞌ ixim iskꞌuxuꞌ.
24 Yuxin yal ebꞌnaj fariseo tet Komam:
—¿Tzet yinh chilo ebꞌnaj hakuywom tiꞌ iswiꞌ ixim trigo iskꞌuxuꞌ?
¿Tom mach heyohtajoj tato txahul komunla yinh tzꞌayik xewilal?
xhi ebꞌnaj.
25 Yajaꞌ xin taqꞌwi Komam tet ebꞌnaj:
—¿Tom maxhto bꞌay cheyil yul Yum Komam Dios yinh yaꞌ rey David yet isnhohchakanh yaꞌ yebꞌ ebꞌnaj tzujan yintaj?
26 Yokto yaꞌ yul Yatut Komam Dios,
iswahni yaꞌ David tuꞌ ixim pan haltebꞌilxa tet Komam,
yaqꞌnipaxo yaꞌ ixim iswabꞌ ebꞌnaj yetbꞌi tuꞌ,
yajaꞌ xin hanhe ebꞌyaꞌ sacerdote chu iswahni ixim.
Yet yuni huneꞌ tuꞌ yaꞌ Abiatar ayko yahawilo ebꞌyaꞌ sacerdote.