Kaw tzetkꞌa noꞌ kay tzabꞌcha yu ebꞌyaꞌ iskuywom Komam Jesús yu huneꞌ kꞌaybꞌalkꞌule isye Komam
5
Hayet hunel,
yet isto Komam Jesús istiꞌ haꞌ lago Genesaret,
tzetkꞌa anma iskutxbꞌa isbꞌa iskꞌatanh Komam bꞌey tuꞌ.
Kaw iswitzꞌayo isbꞌa anma iskꞌatanh Komam yuto yoche anma yabꞌeꞌ isTzotiꞌ Komam Dios.
2 Yilnito Komam kabꞌebꞌ teꞌ barco istiꞌ haꞌ tuꞌ.
Machi mak ayikto yul teꞌ yuto lanhan istxꞌahni ebꞌyaꞌ yahaw teꞌ ishakꞌ chiꞌinahti noꞌ kay.
3 Yahto Komam yul isbarco yaꞌ Simón,
yalni Komam tet yaꞌ tato chishitzto yaꞌ hanikꞌoxa teꞌ yibꞌanh haꞌ.
Lahwi tuꞌ xin,
yay tzꞌonhno Komam yul teꞌ,
yichiko Komam iskuywakꞌti yinh anma ayayo istiꞌ haꞌ tuꞌ.
4 Hayet lahwi iskuywa Komam yinh anma xin,
yalni Komam tet yaꞌ Simón:
—Hitzweto teꞌ bꞌay kaw nahat yehayto yich haꞌ.
Haꞌ bꞌey tuꞌ cheyaqꞌayto hehakꞌ iqꞌomati kay,
xhi Komam tet yaꞌ.
5 Istaqꞌwi yaꞌ xin:
—Mam kuywawom,
sunilbꞌal aqꞌbꞌal makonhmunlahanh,
yaj maxhtikꞌa noꞌ matzabꞌcha juhanh.
Yaj yu hach chawala,
chijaytojanh txꞌanh hak tiꞌ hunelxa,
xhi yaꞌ Simón tet Komam.
6 Haxa yet yanayto ebꞌyaꞌ ishakꞌ tuꞌ xol haꞌ,
kaw tzetkꞌakano noꞌ ok yul txꞌanh.
Etza xin tꞌijmoto iswaꞌ txꞌanh yu yalil noꞌ.
7 Yekꞌ isqꞌabꞌ ebꞌyaꞌ yawtenti hunteqꞌanxa yetbꞌi chimunla yul hunxa teꞌ barco.
Yul ebꞌyaꞌ kolwal isnhikꞌnoti txꞌanh.
Iskolwapaxo ebꞌyaꞌ isnohtzeno teꞌ kabꞌebꞌ barco tuꞌ yu noꞌ.
Etzaxanhe xin to teꞌ yich haꞌ yu yalil noꞌ.
8 Hayet yilni yaꞌ Simón Pedro huneꞌ tuꞌ,
yay jahno yaꞌ sata Komam Jesús,
yalni yaꞌ:
—Mamin,
hanintiꞌan kaw mulum hinan,
yuxin hitzanhilo inkꞌatanhan,
xhi yaꞌ tet Komam.
9 Yal yaꞌ hak tuꞌ yuto kaw xiw yaꞌ sikꞌlebꞌil yebꞌ ebꞌyaꞌ aykꞌo iskꞌatanh tuꞌ,
kaw kꞌaykanh iskꞌul ebꞌyaꞌ yilni noꞌ kay ahti xol haꞌ.
10 Hakpax tuꞌ yaꞌ Jacobo yebꞌ yaꞌ Juan,
iskꞌahol yaꞌ Zebedeo,
ebꞌyaꞌ apni kolwal yinta yaꞌ Simón,
kaw kꞌaypaxokanh iskꞌul ebꞌyaꞌ.
Yalni Komam tet yaꞌ Simón Pedro tuꞌ:
—Mach chaxhxiwi,
yuto tinanh matxa chaxhmunla yinh iqꞌoti kay,
wal xin haxa anma chaxhok hawiqꞌatij kat yok yul inqꞌabꞌan,
xhi Komam tet yaꞌ.
11 Lahwi tuꞌ xin,
yinilo ebꞌyaꞌ isbarco yebꞌ ismunlabꞌal istiꞌ haꞌ,
isbꞌejnikano ebꞌyaꞌ sunil,
yokkano tzujno ebꞌyaꞌ yinta Komam.
Captura Milagrosa de Peces
Yaqꞌ kawxo Komam Jesús huneꞌ naj ayko lepra yinh
12 Yet hunel yet ayikꞌo Komam Jesús yul huneꞌ konhobꞌ,
yapni huneꞌ naj ayko lepra yinh iskꞌatanh Komam,
kaw xin yaꞌay naj yu huneꞌ yabꞌil tuꞌ.
Hayet yilni naj Komam,
yay jahno naj sata Komam,
yay xulno naj sat txꞌotxꞌ,
isqꞌanni naj tet Komam:
—Mamin,
ta chisje hakꞌul chu hawinilo huneꞌ yabꞌil tiꞌ winhan,
xhi naj.
13 Yanayo Komam isqꞌabꞌ yibꞌanh naj,
yalni hakaꞌ tiꞌ:
—Hoꞌ,
chiwochehan ta chiꞌel huneꞌ yabꞌil tiꞌ tawinh,
xhi Komam tet naj.
—Tajka ay bꞌay chawalikꞌo huneꞌ tiꞌ.
As ye habꞌa tet naj sacerdote Israel,
kat hawaqꞌni haxahanbꞌal tet Komam Dios hakaꞌ yalnikano isley yaꞌ Moisés.
Hak tuꞌ xin chu hawilchaloj tato xakaxhsajbꞌikanoj,
xhi Komam Jesús tet naj.
15 Haxa yet yabꞌelaxilo huneꞌ tuꞌ,
ispujnakanh isqꞌumal Komam xol anma,
yuxin kaw tzetkꞌa anma apni abꞌeno tzet chal Komam,
apnipaxo anma yunhe iskawxikanokanh.
16 Wal Komam xin,
chibꞌey Komam txahlo bꞌay machi anma chiꞌekꞌi.
Yaqꞌ kawxo Komam Jesús huneꞌ naj mach chibꞌili isnimanil
17 Yet hunel,
yet lanhan iskuywa Komam Jesús yinh anma,
ay hunteqꞌan ebꞌnaj fariseo yebꞌ hunteqꞌanxa ebꞌnaj chikuyni anma yinh isley yaꞌ Moisés apni tzꞌonhno bꞌay ay Komam.
Sunil hunun konhobꞌ yul ismajul Galilea yebꞌpaxo yul ismajul Judea tit ebꞌnaj,
aypaxo ebꞌnaj tit bꞌey yul konhobꞌ Jerusalén.
Kaw isyelo Komam Dios yip yinh Komam Jesús yet iskawxikanh anma yu Komam.
Jesús sana a un paralítico (Lucas 5.17-26)
18 Yapni xin hunteqꞌan ebꞌnaj iqꞌnhe huneꞌ naj kamnajilo isnimanil sat bꞌatxteꞌ.
Yoche ebꞌnaj okoto iskꞌatanh Komam yul nha yu yanayo ebꞌnaj naj yaꞌay tuꞌ sata Komam.
19 Yajaꞌ machi bꞌay okto ebꞌnaj yuto tenanikto anma iskꞌatanh Komam.
Yuxinto ahto ebꞌnaj yibꞌanh iswiꞌ teꞌ nha tuꞌ,
isholnikanh ebꞌnaj hayebꞌ txꞌotxꞌ texa,
yanayto ebꞌnaj naj mach chibꞌili isnimanil tuꞌ sat teꞌ bꞌatxteꞌ sata Komam.
20 Hayet yilni Komam Jesús tato ayko yinh yanma ebꞌnaj ta chikawxikanh naj yaꞌay tuꞌ,
yalni Komam tet naj yaꞌay:
—Hach wet anmahil,
tinanh maꞌokna nimankꞌulal yinh hamul,
xhi Komam tet naj.
21 Hayet yabꞌen ebꞌnaj kuywawom yinh isley yaꞌ Moisés yebꞌ ebꞌnaj fariseo huneꞌ tuꞌ,
istxum ebꞌnaj hakaꞌ tiꞌ:
«¿Mak anmahil huneꞌ naj tiꞌ yuxinto chal naj yaqꞌaꞌko isbꞌa selelo Komam Dios?
Wal xin kaw txꞌoj istzotel naj yinh Komam.
Machi hunu mak chu yaqꞌni nimankꞌulal yinh mule yuto hanhechꞌan Komam Dios chisje yu,»
xhi ebꞌnaj yul yet ischukil.
22 Istxumnilo Komam tzet chꞌekꞌ yinh isnabꞌal ebꞌnaj,
yalni Komam:
—¿Tzet yinh xin chꞌekꞌ yinh henabꞌal hakaꞌ tuꞌ?
23 ¿Bꞌaytet hunu kaw subꞌuta walnihan:
“Maꞌaqꞌlax nimankꞌulal yinh hamul,”
mato:
“Ahanhwanoj,
kat hapaxtoj?”
xhi Komam tet ebꞌnaj.
24 Yalnipaxo Komam:
—Tinanh xin chinyehan heyilaꞌ Hanin Aqꞌbꞌilintijan texol yu Komam Dios tato ay wipan waqꞌni nimankꞌulalan yinh ismul anma yul sat yibꞌanhqꞌinal tiꞌ,
xhi Komam.
Lahwi tuꞌ xin,
yalni Komam tet naj yaꞌay tuꞌ:
—Hanintiꞌan chiwalan tawet,
¡ahanhwanoj!
Ikanh habꞌatxteꞌ tiꞌ,
paxanhto hawatut,
xhi Komam tet naj.
25 Yinhnhena tuꞌ xin,
yah linhno naj yinh sat anma,
yok naj yalno kꞌul-la tzotiꞌ yinh Komam Dios.
Yinikanh naj isbꞌatxteꞌ,
ispaxto naj yatut.
26 Kaw xin kꞌaykanilo iskꞌul anma yilni huneꞌ tuꞌ,
yalnipaxo anma kꞌul-la tzotiꞌ yinh Komam Dios,
yalni anma hakaꞌ tiꞌ:
—Yinh huneꞌ tzꞌayik tiꞌ,
kaw hanta kꞌaybꞌalkꞌule majila,
xhi anma.
Yet yawten Komam Jesús yaꞌ Leví iskuywomoj
27 Lahwi tuꞌ xin,
isto Komam Jesús,
yilnito Komam huneꞌ yaꞌ iqꞌomilo tohlabꞌal,
Leví isbꞌi.
Tzꞌonhanayo yaꞌ bꞌay chiꞌel chꞌen tohlabꞌal yinh anma.
Yok tꞌanhno Komam yinh yaꞌ,
yalni Komam:
—Okanh tzujno wintajan inkuywomojan,
xhi Komam tet yaꞌ.
28 Yah linhno yaꞌ xin,
isbꞌejnikano yaꞌ ismunil,
yok tzujno yaꞌ yinta Komam.
29 Yaꞌ Leví tuꞌ,
yekꞌtze yaꞌ huneꞌ niman qꞌinh bꞌey yatut yuto kaw chitzala yaꞌ yinh Komam.
Txꞌiꞌal ebꞌnaj iqꞌomilo tohlabꞌal yebꞌ hunteqꞌanxa anma ok waꞌoj sat mexha yebꞌ Komam.
30 Wal ebꞌnaj fariseo yebꞌ ebꞌnaj chikuyni anma yinh isley yaꞌ Moisés ichiko bꞌuchwal yinh ebꞌyaꞌ iskuywom Komam.
Yalni ebꞌnaj:
—¿Tzet yinh yuxin chexwaꞌ xol ebꞌnaj iqꞌomilo tohlabꞌal yebꞌ hunteqꞌanxa ebꞌnaj txꞌoj isbꞌeybꞌal?
xhi ebꞌnaj.
31 Istaqꞌwi Komam Jesús tet ebꞌnaj:
—Haꞌ anma mach yaꞌo ay,
matzet chꞌokniko naj anhlom yu,
to haꞌ anma yaꞌay,
haꞌ ton chꞌokniko naj anhlom yu.
32 Mach hulnajojinan wawteꞌan anma chalni ta kaw kꞌul yekoj,
to haꞌ anma mulum,
haꞌ hulnajinan wawteꞌan yu isbꞌejnikano iswatxꞌen istxꞌojal,
xhi Komam.
Jesús Pasa Tiempo con Pecadores
Mach chischah isbꞌa huneꞌ payat bꞌeybꞌale yebꞌ huneꞌ akꞌ bꞌeybꞌale
33 Lahwi tuꞌ xin,
yalni hunteqꞌan ebꞌnaj tet Komam Jesús:
—Haꞌ ebꞌnaj iskuywom yaꞌ Juan,
anikanh haꞌ iswiꞌ anma,
yebꞌpaxo ebꞌnaj chikuywi yinh ebꞌnaj fariseo,
naunhe chisyijen ebꞌnaj huneꞌ yet mach chonhwaꞌi yu kotxahli tet Komam Dios.
Wal ebꞌnaj chikuywi tawinta tiꞌ,
mach chisyije ebꞌnaj huneꞌ tuꞌ,
xhi ebꞌnaj.
34 Istaqꞌwi Komam tet ebꞌnaj xin:
—Qꞌinaloj ta ay hunu mohyilal,
¿tom chu heyalni tet anma awtebꞌil yinh mohyilal tuꞌ ta chiyijle wahil yet ayko naj mohyom xol anma awtebꞌil?
¡Machoj!
35 Wal xin,
hato yet chiꞌapni istiempohal yilaxilo naj mohyom tuꞌ,
kat yichiko anma yijlen wahil yu istxahli,
xhi Komam.
36 Yalnipaxo Komam huneꞌxa yechel tiꞌ:
—Qꞌinaloj ta chikobꞌuj hunu kamixhe xilxa,
yaj yinh hunu kamixhe akꞌto chijilo isbꞌujil qꞌap xilxa tuꞌ,
mach kꞌulo chꞌelikoj,
yuto mach chischah isbꞌa qꞌap akꞌto yebꞌ qꞌap xilxa,
yebꞌ xin nabꞌnhe chijetato qꞌap akꞌto tuꞌ.
37 Ay hunxa yechel tiꞌ,
mach chu heyanayto vino akꞌto yul hunu noꞌ tzꞌum xilxa,
yuto chilinhmo noꞌ yet chihowbꞌikanh vino,
kat yetaxto iskabꞌ majanil.
38 Yuxin haꞌ yul noꞌ akꞌla tzꞌum chiꞌalaxayto teꞌ vino akꞌto,
hak tuꞌ xin mach chiꞌetaxto iskabꞌ majanil.
39 Yebꞌpaxo xin,
haꞌ mak xaꞌukꞌni vino payxa watxꞌi,
¿tom chito yoche yukꞌuꞌ teꞌ akꞌ vino lanhanto iswatxꞌi?
¡Machoj!
Wal xin chal hakaꞌ tiꞌ:
“Haꞌ teꞌ vino payxa watxꞌi,
ekꞌna kaw kꞌul,”
xhi,
xhi Komam Jesús.