Yaqꞌ kawxo Komam Jesús huneꞌ naj ayko lepra yinh
8
Yet ispaxayti Komam Jesús iswiꞌ huneꞌ wonhan tuꞌ,
kaw hantanhe anma ok tzujno yinta Komam.
2 Yelilo huneꞌ naj yul bꞌeh,
ayko yabꞌil lepra yinh.
Ishitziko naj iskꞌatanh Komam,
yay jahno naj sata Komam,
yalni naj:
—Mamin,
ta chawoche chu hawinilo huneꞌ yabꞌil tiꞌ winhan,
xhi naj tet Komam.
3 Yanayo Komam isqꞌabꞌ yibꞌanh naj,
yalni Komam:
—Hoꞌ,
chiwochehan ta chiꞌel huneꞌ yabꞌil tiꞌ tawinh,
xhi Komam.
Yinhnhena xin yel huneꞌ yabꞌil tuꞌ yinh naj.
4 Lahwi tuꞌ,
yalni Komam tet naj:
—Machi mak tet chawalikꞌo huneꞌ tiꞌ,
wal xin as ye habꞌa tet naj sacerdote,
kat hawaqꞌni haxahanbꞌal hakaꞌ yalni isley yaꞌ Moisés,
yunhe yohtanhenkanilo anma tato xaꞌelkano huneꞌ yabꞌil tiꞌ tawinh,
xhi Komam tet naj.
Yaqꞌ kawxo Komam Jesús ischejabꞌ huneꞌ naj capitán romano
5 Hayet yokapno Komam Jesús yul konhobꞌ Capernaúm,
yapni huneꞌ naj capitán romano iskꞌatanh Komam,
isqꞌanni naj ta chaqꞌ kawxo Komam huneꞌ ischejabꞌ naj.
6 Yalni naj tet Komam:
—Mamin,
ay huneꞌ inchejabꞌan kaw yaꞌay,
mach chibꞌili isnimanil,
kaw xin chꞌekꞌyaꞌ yanma naj yu huneꞌ yabꞌil tuꞌ,
xhi naj tet Komam.
7 Yalni Komam tet naj:
—Kꞌultikꞌa,
chintohan waqꞌaꞌ kawxojan naj,
xhi Komam.
8 Istaqꞌwi naj capitán tuꞌ tet Komam:
—Mamin,
kaw mach chu hawapni yul watutan chiwabꞌehan yuto kaw matzet welapnojan.
Wal xin tonhe chaxhtzotelnato yinh haknhetiꞌ kat iskawxikanh inchejabꞌ tuꞌan.
9 Wohtajan huneꞌ tiꞌ,
yuto hanintiꞌan ayiniktojan yalanh ischejbꞌanil ebꞌnaj wahawan,
aypaxo xin ebꞌnaj soldado ayiko yalanh wipan.
Ta chiwalan tet hunu naj:
“Asiꞌ bꞌey tuꞌ,”
ta kinchihan,
kat isto naj.
Taka chiwalan tet hunuxa naj:
“Kata,”
ta kinchihan,
kat istit naj.
Yebꞌpaxo xin ta chiwalan tet hunuxa naj inchejabꞌan:
“Watxꞌe huneꞌ tilah,”
ta kinchihan,
kat yok naj iswatxꞌenoj,
xhi naj.
10 Hayet yabꞌen Komam yalni naj hakaꞌ tuꞌ,
kaw kꞌayilo iskꞌul Komam,
yalni Komam tet anma tzujaniko yinta tuꞌ:
—Yinh kaw yeli chiwalan teyet,
maxhto hunu mak chiwilan yaniko yanma yinh Komam Dios yul konhobꞌ Israel hakaꞌ huneꞌ naj tiꞌ.
11 Wal xin chiwalan teyet,
chitit anma bꞌay chiꞌahilo tzꞌayik,
yebꞌ bꞌay chito tzꞌayik kat iskutxbꞌaniko isbꞌa yebꞌ yaꞌ Abraham,
yaꞌ Isaac yebꞌ yaꞌ Jacob sat ismexha Komam Dios bꞌey satkanh.
12 Haꞌ anma Israel yettikꞌa ay yok sat huneꞌ mexha tuꞌ,
ay ebꞌnaj chikankano yintajilo xol qꞌejholo.
Haꞌ bꞌey tuꞌ xin chꞌok oqꞌoj kat isnhetxꞌla yeh yu isyaꞌtajil,
xhi Komam tet anma.
13 Lahwi tuꞌ xin,
yalni Komam tet naj capitán:
—Paxanhto hawatut,
yubꞌojabꞌ hakaꞌ chawoche yuto maxawayto yul hawanma winhan,
xhi Komam tet naj.
Yinhtikꞌa huneꞌ orahil tuꞌ xin kawxikanh ischejabꞌ naj capitán.
Yaqꞌ kawxo Komam Jesús ismiꞌ yixal yaꞌ Pedro
14 Lahwi tuꞌ xin,
isto Komam Jesús yatut yaꞌ Pedro.
Yet yapni Komam yilni tato hilanto ismiꞌ yixal yaꞌ Pedro tuꞌ sat txꞌat yu huneꞌ niman qꞌaꞌ.
15 Yok tzabꞌno Komam yinh isqꞌabꞌ ixnam,
yelna huneꞌ qꞌaꞌ tuꞌ yinh ixnam.
Lahwi tuꞌ yahwano ixnam,
yok ixnam iswatxꞌeno tzet chislo Komam yebꞌ ebꞌyaꞌ iskuywom.
Kaw txꞌiꞌal anma kawxikanh yu Komam Jesús
16 Hayet lanhanxa yay numnahi kaw hantanhe anma ayko ischejabꞌ naj matzwalil yinh ilaxto iskꞌatanh Komam.
Kaw xin huneꞌnhechꞌan tzotiꞌ chal Komam kat yel ischejabꞌ naj matzwalil yinh anma.
Yaqꞌnipaxo kawxo Komam anma yaꞌay.
17 Yinh hunteqꞌan iswatxꞌe Komam tuꞌ yijkano isbꞌa tzet halbꞌilkano yu yaꞌ Isaías,
huneꞌ ischejabꞌ Komam yet payat,
yet yalni hakaꞌ tiꞌ:
«Yibꞌanh Komam chitokano yabꞌil ayko jinh,
kat xin yabꞌenpaxo isyaꞌil koseleloj,»a
xhi yaꞌ Isaías tuꞌ.
Hunteqꞌan mak yoche oko tzujno yinta Komam Jesús
18 Hayet yilni Komam Jesús tato kaw hantanhe anma hoyaniko yinh,
yalni Komam tet ebꞌyaꞌ iskuywom tato chiꞌekꞌto ebꞌyaꞌ yebꞌ Komam isqꞌaxebꞌikꞌto haꞌ lago.
19 Yajaꞌ yet yalanhto maxhto chito Komam yebꞌ ebꞌyaꞌ,
ishitziko huneꞌ naj chikuywa yinh isley yaꞌ Moisés iskꞌatanh Komam,
yalni naj:
—Mam kuywawom,
chinok tzujnojan tawintaj bꞌajxanhetuꞌwal chaxhtohi,
xhi naj.
20 Yalni Komam tet naj:
—Noꞌ wech ay isnhachꞌen noꞌ bꞌay chiwayi,
yebꞌpaxo noꞌ chꞌik ay yatut noꞌ.
Yajaꞌ Hanin Aqꞌbꞌilintijan texol yu Komam Dios,b
machi watutan bꞌay chinxewninojan,
xhi Komam.
21 Yalnipaxo huneꞌxa naj iskuywom Komam:
—Mamin,
chinok tzujnojan tawintaj,
yaj estam chawaqꞌ inhamanilan chito inmujkano inmaman bꞌabꞌel,
xhi naj.
22 Yalni Komam tet naj:
—Wal xin okanh tzujno wintajan yuto haꞌ mak kamom yul sat Komam Dios,
haꞌ chimujni yet kamomal,
xhi Komam tet naj.
Yet islinhbꞌan Komam Jesús huneꞌ jaqꞌeqꞌ yibꞌanh haꞌ mar
23 Lahwi tuꞌ xin,
yokto Komam Jesús yebꞌ ebꞌyaꞌ iskuywom yul huneꞌ teꞌ barco.
24 Hayet lanhan yekꞌto Komam yebꞌ ebꞌyaꞌ yibꞌanh ha haꞌ tuꞌ xin,
yichiko yekꞌ huneꞌ niman jaqꞌeqꞌ kaw how.
Toxanhe chitixhla yah ha haꞌ tuꞌ yinh teꞌ barco,
wal Komam Jesús xin wayo chu yul teꞌ.
25 Hayet yilni ebꞌyaꞌ iskuywom Komam huneꞌ tuꞌ,
yok ebꞌyaꞌ yinolo iswayanh Komam,
yalni ebꞌyaꞌ:
—¡Mamin kolonhanh,
yuto lanhan kotoh yich haꞌ!
xhi ebꞌyaꞌ tet Komam.
26 Istaqꞌwi Komam:
—¿Tzet yinh xin kaw chexxiwi?
¡Kaw mach cheyako heyanma yinh Komam Dios!
xhi Komam tet ebꞌyaꞌ.
Lahwi tuꞌ xin yahwano Komam,
iskachni Komam jaqꞌeqꞌ yebꞌ ha haꞌ.
Hak tuꞌ yu islinhbꞌan isbꞌili ha haꞌ tuꞌ yebꞌ jaqꞌeqꞌ,
ispaxtzꞌinhnahi.
27 Wal ebꞌyaꞌ iskuywom Komam tuꞌ,
kaw kꞌaykanilo iskꞌul,
yalni ebꞌyaꞌ tet hunun:
—¿Mak anmahil huneꞌ yaꞌ tiꞌ yuxin chisyije jaqꞌeqꞌ yebꞌ ha haꞌ tzet chal yaꞌ?
xhi ebꞌyaꞌ yinh Komam.
Kawanh ebꞌnaj ayko ischejabꞌ naj matzwalil yinh bꞌey Gadara
28 Hayet yapni Komam Jesús yebꞌ ebꞌyaꞌ iskuywom isqꞌaxebꞌikꞌto haꞌ lago bꞌey huneꞌ txꞌotxꞌ chiyij Gadara,
yapni kawanh ebꞌnaj ayko ischejabꞌ naj matzwalil yinh iskꞌatanh Komam;
ispeto ebꞌnaj yul camposanto.
Ebꞌnaj kawanh tuꞌ kaw chixiw anma tet ebꞌnaj yuto kaw aykano yip ebꞌnaj.
Kaw xin machi hunu mak chiꞌekꞌ bꞌay ay ebꞌnaj.
29 Yah yaw ebꞌnaj tet Komam yinh kaw ip:
—¿Tzet hawok jinhanh hach Jesús Iskꞌahol Dios?
¿Tom chaxhhul hawaqꞌaꞌ ekꞌoyaꞌ janmahanh yalanhto maxhto chiꞌapni istiempohal?
xhi ebꞌnaj tet Komam.
30 Iskawilal tuꞌ,
ay hunteqꞌan noꞌ txitam lanhan istanhelaxi,
31 yuxin isqꞌan ebꞌnaj ischejabꞌ naj matzwalil tuꞌ tet Komam hakaꞌ tiꞌ:
—Tato chonhhawilojanh yinh ebꞌnaj tiꞌ,
chikoqꞌananh tawet,
chejonhtojanh yinh noꞌ txitam tuꞌ lah,
xhi ebꞌnaj tet Komam.
32 Istaqꞌwi Komam:
—Kꞌultikꞌa,
asiꞌwej,
xhi Komam.
Hak tuꞌ xin yu yel ebꞌnaj ischejabꞌ naj matzwalil yinh ebꞌnaj kawanh tuꞌ,
istokano ebꞌnaj yinh noꞌ txitam.
Lahwi tuꞌ xin yelkanh noꞌ txitam,
isqꞌojnito isbꞌa noꞌ sat pahaw,
yayapno noꞌ xol ha haꞌ,
ishiqꞌnito noꞌ haꞌ.
33 Wal ebꞌnaj tanhem txitam xin elkanh ebꞌnaj.
Hayet yapni ebꞌnaj yul konhobꞌ yalni ebꞌnaj tet anma yinh tzet yu ebꞌnaj kawanh bꞌay aytikꞌako ebꞌnaj ischejabꞌ naj matzwalil.
34 Yuxin sunil anma yul konhobꞌ tuꞌ tit ilno Komam.
Hayet yul anma iskꞌatanh Komam,
yok anma isqꞌanno tet Komam tato chiꞌel yul ismajul istxꞌotxꞌ ebꞌnaj tuꞌ.