Mach komono chonhok jilaꞌ tzet ye hunu jet anmahil
(Lc. 6:37-38, 41-42)
7
Yalnipaxo Komam Jesús:
«Mach komono chexok heyilaꞌ tzet ye hunu heyet anmahil,
haxinwal mach chiꞌokpaxo Komam Dios yilaꞌ tzet heyehi.
2 Yuto hakaꞌtikꞌa chu heyilni tzet ye heyet anmahil,
hak tuꞌ chu kexyilnipaxo Komam.
Wal xin hakaꞌtikꞌa hemalbꞌal cheyakoj yet cheyilni tzet yeko hunu heyet anmahil,
haꞌtikꞌa xin chexmalenpaxo yu Komam.
3 Qꞌinalo tato ay hunu heyuxhtaj ayikto isqꞌal teꞌ chꞌim yul isbꞌaqꞌ sat,
wal hexpaxo xin patzabꞌ teꞌ aypaxikto yul isbꞌaqꞌ hesat.
Ta mach cheyilti teꞌ patzabꞌ ayikto yul isbꞌaqꞌ hesat tuꞌ,
¿hatokꞌanabꞌ nichꞌan isqꞌalemal teꞌ chꞌim ayikto yul isbꞌaqꞌ sat heyuxhta tuꞌ chu heyiniltij?
4 ¿Mataxka xin chu heyalni tet heyuxhta tuꞌ hakaꞌ tiꞌ:
“Wuxhtaj,
wiqꞌaltijan huneꞌ isqꞌal teꞌ chꞌim ayikto yul isbꞌaqꞌ hasat,”
ta kexchi?
Wal hexpaxo xin qꞌatanikto huneꞌ teꞌ patzabꞌ yul isbꞌaqꞌ hesat.
5 Tato hak tuꞌ heyalni,
¡leqꞌtiꞌ hex!
Wal xin iwekanilti teꞌ patzabꞌ ayikto yul isbꞌaqꞌ hesat bꞌabꞌel,
lahwi tuꞌ kat heyinilti isqꞌal teꞌ chꞌim ayikto yul isbꞌaqꞌ sat heyuxhtaj.
6 »Istzotiꞌ Komam Dios lahan yebꞌ hunteqꞌan chꞌen chꞌen perla isbꞌi,
kaw ay istohol.
Yuxin mach chu jaqꞌni Istzotiꞌ Komam tet hunu mak machi yelapno Komam yul sat,
yuto lahan yebꞌ metx txꞌiꞌ kaw how,
chitit lemna jinh.
Aypaxo mak hakaꞌ noꞌ txitam,
tonhe chiꞌok isxanhaꞌto tzet chꞌaqꞌlax tet,»
xhi Komam.
Qꞌanwej kat yaqꞌlax teyet
(Lc. 11:9-13; 6:31)
7 Yalnipaxo Komam Jesús:
«Qꞌanwe tet Komam Dios kat yaqꞌni Komam teyet,
saywej kat yilcha heyu,
elojabꞌiko heyaw sat pulta kat ishajlax teyet.
8 Yuto haꞌ mak chiqꞌanni chischah,
haꞌ mak chisayni chiꞌilcha yu.
Haꞌ mak chiꞌeliko yaw sat pulta chihajlax tet.
9 »Qꞌinalo tato chisqꞌan heyuninal tzet chislo teyet,
¿tom cheyaqꞌ hunu chꞌen chꞌen tet?
10 Maka tato chisqꞌan hunu noꞌ kay iskꞌuxuꞌ,
¿tom cheyaqꞌ hunu noꞌ labꞌa tet?
11 Yajaꞌ waxanhka kaw txꞌoj hex,
heyohta heyaqꞌni iskꞌulal tet heyuninal,
hajxam xin Komam Dios ay yul satkanh,
¿tom mach chaqꞌ iskꞌulal teyet,
ta cheqꞌana?
12 »Ta cheyoche kꞌul chute iskꞌul anma teyinh,
hex bꞌabꞌel kꞌul cheyute hekꞌul yinh anma tuꞌ,
yuto hak tuꞌ yalni yinh ley yebꞌ yinh tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat,»
xhi Komam.
Yechel teꞌ pulta txannhe sat
13 Yalnipaxo Komam Jesús:
«Okanhweto yul huneꞌ pulta nichꞌanchꞌan sat;
yuto huneꞌ pulta yebꞌ huneꞌ bꞌeh kaw nimajal sat,
yul kambꞌal chitohi.
Kaw xin niman anma chito yul huneꞌ pulta yebꞌ huneꞌ bꞌeh tuꞌ.
14 Wal huneꞌ pulta yebꞌ huneꞌ bꞌeh nichꞌanchꞌan sat xin chonhyito bꞌay ay qꞌinale mach istanhbꞌal,
yajaꞌ haywanhnhe mak chiꞌokto yul huneꞌ pulta tuꞌ,»
xhi Komam.
Haꞌ sat te teꞌ chihalniloj tzet teꞌal teꞌ
15 Yalnipaxo Komam Jesús:
«Kaw cheyil hebꞌa tet ebꞌnaj leqꞌtiꞌwom chisbꞌaliko isbꞌa ischejabꞌo Komam Dios,
yuto hayet chitzotel ebꞌnaj teyet,
kaw kꞌulchꞌan chute iskꞌul ebꞌnaj hakaꞌ noꞌ meꞌ,
yajaꞌ wal yanma ebꞌnaj xin lahan hakaꞌ noꞌ oj chonhkꞌuxnitoj.
16 Ixtanh hetxumnilo tzet nabꞌil yu ebꞌnaj yuto haꞌ tzet chiswatxꞌe ebꞌnaj chihalniloj.
Qꞌinalo teꞌ uva tinanh,
¿tom chaqꞌ teꞌ sat teꞌ txꞌix?
Maka teꞌ higo,
¿tom satpaxo teꞌ txꞌix chaqꞌ teꞌ?
¡Machoj!
17 Wal xin teꞌ satnom teꞌ kꞌul,
kꞌul sat teꞌ chaqꞌa.
Yajaꞌ wal teꞌ mach kꞌuloj xin machiswalil sat teꞌ chaqꞌa.
18 Teꞌ satnom teꞌ kꞌul,
¿tom machiswalil sat teꞌ chaqꞌa?
¡Machoj!
Yebꞌ te teꞌ machiswalil,
¿tom kꞌul sat teꞌ chaqꞌa?
¡Machoj!
19-20 Yuxin ebꞌnaj chal isbꞌa ischejabꞌo Komam Dios,
yinh tzet chiswatxꞌe ebꞌnaj haꞌ yinh chetxumiloj tzet nabꞌil yu ebꞌnaj.
Hakaꞌ chu istzokꞌlaxkanh te teꞌ mach kꞌulo sat chaqꞌa,
chilahwi tuꞌ xin kat isnhuslaxto teꞌ xol qꞌa qꞌaꞌ,
hak tuꞌ chiꞌutelax hunteqꞌan ebꞌnaj tuꞌ,»
xhi Komam.
Mach sunilo mak chiꞌapni yul satkanh
21 Yalnipaxo Komam Jesús:
«Mach sunilo mak chihalni:
“Mamin,
Mamin,”
winhan,
chiꞌok yul isqꞌabꞌ Komam Dios,
wal xin hanhe mak chiyijen tzet chal Inmaman ay yul satkanh.
22 Hayet chiꞌapni islahobꞌal tzꞌayik hantanhe mak chihalni hakaꞌ tiꞌ:
“Mamin,
Mamin,
hanhonhtiꞌanh konhekꞌanh jalaꞌanh hatzotiꞌ tet anma.
Jinipaxilojanh ischejabꞌ naj matzwalil yinh anma yinh habꞌi,
yebꞌ xin txꞌiꞌal kꞌaybꞌalkꞌule koyehanh tet anma,”
xhi anma yinh huneꞌ tzꞌayik tuꞌ.
23 Yajaꞌ chintaqꞌwihan tet hakaꞌ tiꞌ:
“Mach kexwohtajojan,
hitzanhwelo yinh insatan.
Hex tiꞌ istxꞌojalnhetikꞌa hewatxꞌe,”
kinchinhetikꞌahan,»
xhi Komam.
Yechel xeꞌ kabꞌebꞌ teꞌ nha
24 Yalnipaxo Komam Jesús:
«Mak chiꞌabꞌen Intzotiꞌan kat isyijeni,
lahan yebꞌ huneꞌ naj kaw ay yitzꞌatil iswiꞌ,
yuto hayet yanikanh naj yatut,
yibꞌanh chꞌen chꞌen yayto naj isxeꞌal teꞌ.
25 Lahwi tuꞌ xin istit huneꞌ niman jaqꞌeqꞌ nhabꞌ,
isnohkanh ha haꞌ,
ismaqꞌniko isbꞌa haꞌ yinh teꞌ nha tuꞌ,
yajaꞌ xin mach aykꞌay teꞌ,
yuto kaw kꞌul yehayto xeꞌ teꞌ yibꞌanh chꞌen chꞌen.
26 Yajaꞌ wal mak chiꞌabꞌen Intzotiꞌan,
machi xin chisyije tzet chala,
lahan yebꞌ huneꞌ naj mach isnabꞌal,
yibꞌanh arena yayo xeꞌ yatut.
27 Lahwi tuꞌ,
yaqꞌni huneꞌ niman jaqꞌeqꞌ nhabꞌ,
ischꞌibꞌkanh ha haꞌ,
ismaqꞌniko isbꞌa haꞌ yinh teꞌ yaykꞌay teꞌ,
yuchkꞌakanto teꞌ,»
xhi Komam.