Kuywa Komam Jesús yinh tzet chu kokolwa yinh jet anmahil
6
Yalni Komam Jesús:
«Kaw nannhe heyu yinh tzet chewatxꞌe,
machnhehojabꞌ yinh sat anma kꞌul cheyute hebꞌa,
yuto ta yunhe heyil-laxi yuxin chewatxꞌe iskꞌulal,
mach chechah ispaj selel tet Komam Dios ay yul satkanh.
2 »Yuxin yet chexkolwa yinh hunu mebꞌaꞌ,
mach chepujbꞌakꞌo hakaꞌ chute ebꞌnaj chal isbꞌa kꞌulal.
Ebꞌnaj tuꞌ chaqꞌ ebꞌnaj issabꞌehal yulaj capilla yebꞌ yulaj calla,
yunhe yal-lax ebꞌnaj kꞌulal.
Yinh kaw yeli chiwalan teyet,
yet chihal-lax kꞌul-la tzotiꞌ yinh ebꞌnaj tuꞌ lanhan ischahnina ebꞌnaj ispaj selel.
3 Wal hex tiꞌ xin,
hayet chexkolwa yinh anma mebꞌaꞌ machi mak tet cheyala,
nitam tet hunu heyamigo.
4 Wal xin yinh ewantajil cheyaqꞌ tet,
haxinwal Komam Dios chiꞌilni tzet chewatxꞌe yinh ewantajil,
kat yaqꞌni Komam ispaj selel teyet,»
xhi Komam.
Kuywa Komam Jesús yinh tzet chu kotxahli
5 Yalnipaxo Komam Jesús:
«Hayet chextxahli tet Komam Dios,
mach cheyute hakaꞌ chute ebꞌnaj chal isbꞌa kꞌulal.
Haꞌ ebꞌnaj tuꞌ yunhe yil-lax ebꞌnaj yu anma,
yuxin tonhetikꞌa choche islinhbꞌa isbꞌa istxahli yulaj iscapilla ebꞌnaj Israel,
yebꞌpaxo yinhla istxikin txonhbꞌal.
Yinh kaw yeli chiwalan teyet,
yet chitxahli ebꞌnaj hakaꞌ tuꞌ chischahnina ebꞌnaj ispaj selel tet anma.
6 Wal hex hex tiꞌ,
mach cheyute hakaꞌ tuꞌ.
Wal xin hayet chextxahli,
chexokto yul heyatut kat hepebꞌan ispultahil teꞌ,
kat hetxahli tet Komam Dios,
Komam chiꞌabꞌen tzet cheyala.
Chil Komam sunil tzet cheyu yinh ewantajil kat yaqꞌni Komam ispaj selel teyet.
7 »Hayet chextxahli,
machojabꞌ chexok hekayeꞌnhe tzotiꞌ matzet chaliloj hakaꞌ chute anma maxhto ohtanheho Komam Dios.
Yuto chistxum ebꞌnaj ta yu kaw nimej chute ebꞌnaj yoj istxah,
kaw chabꞌe Komam Dios tzet chal ebꞌnaj yalni.
8 Wal xin mach cheyute hakaꞌ tuꞌ,
yuto Komam Dios yohtaxa tzet chiꞌokniko heyu yalanhto yet maxhto cheqꞌan tet Komam.
9 »Hayet chextxahli,
hak tiꞌ cheyute heyalni hakaꞌ tiꞌ:
“Hach Komam,
hach koDios,
ayach yul satkanh,
nimanojabꞌ yelapno habꞌi yul sat anma.
10 Hulanh kat hawok Jahawilojanh.
Yijabꞌ isbꞌa tzet chawoche sat txꞌo txꞌotxꞌ tiꞌ hakaꞌ chu yijni isbꞌa yul satkanh.
11 Mamin,
chikoqꞌananh tawet,
aqꞌ tzet chikolohanh hunun tzꞌayik.a
12 Aqꞌ nimankꞌulal yinh istxꞌojal chikowatxꞌehanh,
hakaꞌ chu jaqꞌni nimankꞌulalanh yinh anma chiwatxꞌen istxꞌojal jinhanh.
13 Mach chonhhachayojanh xol ilwebꞌal,
kaw kólonhilojanh yul isqꞌabꞌ naj matzwalil,”
kexchi yinh hetxah.
14 »Ta cheyaqꞌ nimankꞌulal yinh anma chiwatxꞌen istxꞌojal teyinh,
haꞌ Komam Dios ay yul satkanh chꞌaqꞌnipaxo nimankꞌulal teyinh.
15 Yaj ta mach cheyaqꞌ nimankꞌulal yinh heyet anmahil chiwatxꞌen istxꞌojal teyinh,
mach chaqꞌpaxo nimankꞌulal Komam Dios teyinh,»
xhi Komam.
Kuywa Komam Jesús yinh yet mach chonhwaꞌ yu kotxahli tet Komam Dios
16 Lahwi tuꞌ yalnipaxo Komam Jesús:
«Hayet mach chexwaꞌ yu hetxahli tet Komam Dios,b
mach bꞌiskꞌulalo cheyute hesat hakaꞌ chute ebꞌnaj chal isbꞌa kꞌulal,
yuto ebꞌnaj tuꞌ kaw bꞌiskꞌulal chute ebꞌnaj sat yunhe yil-lax ebꞌnaj yu anma tato ayko ebꞌnaj yinh yet mach chonhwaꞌi yu kotxahli tet Komam Dios.
Yinh kaw yeli chiwalan teyet chischahna ebꞌnaj ispaj selel yet chiꞌil-lax ebꞌnaj yu anma tuꞌ.
17 Wal hex tiꞌ xin,
yet mach chexwaꞌ yu hetxahli tet Komam Dios,
chetxꞌahwe hesat kat hexínito xil hewiꞌ,
18 yunhe mach chalilo isbꞌa tato ayexiko yinh yet mach chexwaꞌ yu hetxahli tet Komam Dios.
Wal xin hanhkꞌanhe Komam ewanyehi,
haꞌ chiꞌilni tzet cheyu kat yaqꞌni Komam ispaj selel teyet,»
xhi Komam.
Jaqꞌaweto koqꞌalomal satkanh
19 Yalnipaxo Komam Jesús hakaꞌ tiꞌ:
«Mach chetenbꞌa heqꞌalomal sat txꞌo txꞌotxꞌ tiꞌ,
yuto chiꞌok noꞌ ih yetaꞌtoj,
kat xin yokpaxo isqꞌuxewal.
Makato chul ebꞌnaj elqꞌom yinh kat yinito ebꞌnaj.
20 Wal xin haꞌ huneꞌ cheyute,
tenbꞌawe heqꞌalomal yul satkanh bꞌay machi noꞌ ih chiꞌetantoj,
bꞌay mach chiꞌokpaxo isqꞌuxewal,
yebꞌ bꞌay mach chiꞌapni ebꞌnaj elqꞌom yinh.
21 Yuxin haꞌ bꞌay ay heqꞌalomal haꞌ tuꞌ cheyapaxiko heyanma,»
xhi Komam.
Isbꞌaqꞌ kosat hakaꞌ cantil yehiko yinh konimanil
22 Yalnipaxo Komam:
«Isbꞌaqꞌ hesat cantil yehiko yinh henimanil,
yuxin ta hanhkꞌanhe iskꞌulal choche yilaꞌ hesat tuꞌ,
sunil henimanil ayko yinh sajilqꞌinal.
23 Yajaꞌ ta yinhnhe istxꞌojal ayko hemujlubꞌal;
sunil henimanil ayko yinh qꞌejholo.
Ta huneꞌ issajilqꞌinal ayko teyinh tuꞌ chimeltzoko yinh qꞌejholohal,
chexkankano xol qꞌejholo,»
xhi Komam.
Mach chu koyijen tzet chal Komam Dios ta ayko janma yinh qꞌalomal
24 Yalnipaxo Komam Jesús hakaꞌ tiꞌ:
«Machi hunu mak chu yok chejabꞌo tet kawanh patrón,
yuto ta chisyije naj tzet chal naj bꞌabꞌel,
chismanhkꞌo naj tzet chal naj iskabꞌ.
Yebꞌ xin tato xahan chil naj naj bꞌabꞌel,
chisyah naj naj iskabꞌ.
Hak tuꞌ heye hex tiꞌ,
mach chu heyijen tzet chal Komam Dios tato ekꞌbꞌal cheyako heyanma yinh qꞌalomal,»
xhi Komam.
Yilal iskawxi kokꞌul yinh Komam Dios
25 Yalnipaxo Komam Jesús:
«Yuxin chiwalan teyet,
mach cheyako yinh hekꞌul yinh tzet cheloh,
yebꞌ yinh tzet chu yok xil heqꞌap yul sat yibꞌanhqꞌinal tiꞌ.
Ta chaqꞌ Komam Dios kokawil,
¿haꞌ tom xin tzet chikolo mach chaqꞌ Komam,
heyalni?
Ta haꞌ Komam aqꞌnhe konimanil,
¿haꞌ tom xil koqꞌap mach chaqꞌ Komam?
26 Ilwekꞌanabꞌ noꞌ chꞌik chiꞌekꞌ satkanh,
machi yawal noꞌ chakoj,
mach chihatxꞌwi noꞌ,
machipaxo iskꞌunha noꞌ,
yajaꞌ xin chiꞌaqꞌlax tzet chislo noꞌ yu Komam ay yul satkanh.
¡Hajxam hex,
to kaw ekꞌbꞌal heyelapno sata noꞌ!
27 ¿Aymi hunujex tiꞌ yu kaw cheyako yinh hekꞌul yuxin chu heyaniko hanikꞌoxa yaqꞌbꞌil heqꞌinal yul sat yibꞌanhqꞌinal tiꞌ?
28 »¿Tzet yinh xin kaw cheyako yinh hekꞌul yinh tzet chu yok xil heqꞌap?
Ilwekꞌanabꞌ teꞌ kaj chichꞌibꞌ xol qꞌebꞌtaj,
mach chimunla teꞌ,
mach chichemlipaxo teꞌ,
29 yajaꞌ chiwalan teyet,
yaꞌ rey Salomón yet payat mach apni isqꞌaptzen isbꞌa yaꞌ hakaꞌ iskꞌulchꞌanil teꞌ.
30 Walka kaw kꞌulchꞌan jilni isxumakil teꞌ tinanh,
yajaꞌ yet hekal kabꞌe chinhuslaxto teꞌ yul horno.
Ta chaqꞌ Komam iskꞌulchꞌanil teꞌ kaj tuꞌ,
¿haꞌ tom xin xil heqꞌap mach chaqꞌ Komam?
Hex tiꞌ kaw mach cheyako heyanma yinh Komam Dios.
31 Yuxin mach cheyako yinh hekꞌul cheyalni hakaꞌ tiꞌ:
¿Bꞌaytaxka chitit tzet chikolo yebꞌ xil koqꞌap?
32 Yuto haꞌ anma mach ohtanhe Komam Dios chiꞌaniko hunteqꞌan tuꞌ yinh iskꞌul.
Yajaꞌ wal Komam Dios ay yul satkanh,
yohtaxa Komam tato chiꞌokniko hunteqꞌan tuꞌ heyu.
33 Wal xin aweko yinh hekꞌul hesaynilo Komam Dios bꞌabꞌel kat heyijen tzet chala,
walpaxo tzet chiꞌokniko heyu yul sat yibꞌanhqꞌinal tiꞌ xatikꞌa yaqꞌaꞌ Komam Dios teyet.
34 Mach cheyako yinh hekꞌul yinh tzet chu yekꞌ heyu yet hekal,
yuto yet hekal tuꞌ nanto tzet cheyako yinh hekꞌul yinh tzet cheyu,
yuto masan ay isyaꞌtajil yetbꞌi hunun tzꞌayik,»
xhi Komam.