Kuybꞌanile yaqꞌ Komam Jesús yinh txah
(Mt. 6:9-15; 7:7-11)
11
Ay hunel xin txahli Komam Jesús bꞌey huneꞌ txꞌotxꞌ,
yet lahwi istxahli Komam tuꞌ,
yalni huneꞌ iskuywom Komam tet:
—Mamin,
kuyonhanh kotxahlihanh hakaꞌ yu iskuyni yaꞌ Juan ebꞌyaꞌ iskuywom istxahli tet Komam Dios,
xhi yaꞌ.
2 Yalni Komam tet ebꞌyaꞌ:
—Hayet chextxahli,
hak tiꞌ cheyute heyalni:
“Hach Komam,
hach koDios,
ayach yul satkanh,
nimanojabꞌ yelapno habꞌi yul sat anma.
Hulanh kat hawok Yahawilo yul sat yibꞌanhqꞌinal tiꞌ.
Yijabꞌ isbꞌa tzet chawoche sat txꞌo txꞌotxꞌ tiꞌ,
hakaꞌ yijni isbꞌa tzet chawoche yul satkanh.
3 Mamin,
chikoqꞌananh tawet,
aqꞌ tzet chikolohanh hunun tzꞌayik.a
4 Aqꞌ nimankꞌulal yinh sunil kotxꞌojalanh,
hakaꞌ chiyu jaqꞌnihanh nimankꞌulal yinh anma chiwatxꞌen istxꞌojal jinhanh.
Mach chonhhachayojanh xol ilwebꞌal,
kaw kólonhilojanh yul isqꞌabꞌ istxꞌojal,”
kexchi,
xhi Komam.
El Padre Nuestro
5 Yalnipaxo Komam tet ebꞌyaꞌ iskuywom tuꞌ:
—Qꞌinalo ta ay hunujex hex tiꞌ chexto yet chuman aqꞌbꞌal bꞌey yatut hunu heyamigo kat heyalni:
“Hach wamigo,
aqꞌ hanikꞌo tzet chaloh inhelaꞌan.
6 To ay huneꞌ wamigohan lanhanto yapni yinh isbꞌel bꞌey watutan,
yaj matzet wal waqꞌnihan tet naj,”
ta kexchi.
7 Yaj ta chiyal naj yulikto yatut tuꞌ hakaꞌ tiꞌ:
“Ayxako istel inpultahan,
mach chaxhhul hawiqꞌalo inwayanhan tinanh.
Lanhan inwayan yebꞌ nixhte wuninalan sat txꞌat,
yuxin mach chu wahwanojan waqꞌnojan tzet chaqꞌanaꞌ,”
xhi naj.
8 »Wal xin chiwalan teyet,
chiꞌahwano naj yaqꞌaꞌ tzet cheqꞌana,
yaj maxhtaj yu kaw heyamigo ye naj,
wal xin chiꞌahwano naj yuto kaw huneꞌnhe haꞌ yelikto heyaw,
kat yaqꞌni naj tzet cheqꞌanaꞌ.
9 Yuxin chiwalan teyet:
Qꞌanwe tet Komam Dios,
kat yaqꞌni Komam teyet.
Saywej,
kat yilchaho heyu,
elojabꞌiko heyaw yinh sat pulta kat ishajlax teyet.
10 Yuto haꞌ mak chiqꞌanni chischah,
haꞌ mak chisayni chiꞌilcha yu.
Haꞌ mak chiꞌeliko yaw sat pulta,
chihajlax tet.
11 »Hakaꞌ hex mame hex tiꞌ,
ta chisqꞌan heyuninal hunu noꞌ kay teyet,
¿tom cheyaqꞌ hunu noꞌ labꞌa tet?
12 Maka,
ta chisqꞌan hunu noꞌ hos teyet,
¿tom cheyaqꞌ hunu noꞌ kꞌolotx tet?
13 Waxanhka txꞌoj hex,
yaj heyohta heyaqꞌni iskꞌulal tet heyuninal,
hajxam Komam Dios ay yul satkanh,
to chaqꞌ Komam Espíritu Santo tet mak chiqꞌanni,
xhi Komam.
Hal-laxi tato naj matzwalil chiꞌaqꞌni yip Komam Jesús
14 Ay huneꞌ naj ayko ischejabꞌ naj matzwalil yinh,
yuxin mach chu istzotel naj.
Haxa yet yapni Komam Jesús,
yinilo Komam ischejabꞌ naj matzwalil yinh naj,
istzotelkanh naj.
Yuxin kaw kꞌaykanokanh iskꞌul anma yilni.
15 Yajaꞌ ay mak halni:
—Haꞌ naj Beelzebú,
yahawil yinh ebꞌnaj ischejabꞌ naj matzwalil,
haꞌ chiꞌaqꞌni yip naj tiꞌ yinilo ischejabꞌ naj matzwalil yinh anma,
xhi anma tuꞌ.
16 Ay hunteqꞌanxa ebꞌnaj tonhe yoche yilweꞌ ta yip Komam Dios ayko yinh Komam Jesús,
yuxin isqꞌan ebꞌnaj yilaꞌ hunu kꞌaybꞌalkꞌule tet Komam.
17 Yaj yohtanhelo Komam tzet chꞌekꞌ yinh isnabꞌal ebꞌnaj,
yuxin yal Komam hakaꞌ tiꞌ:
—Qꞌinaloj ta ay hunu niman konhobꞌ ay ebꞌnaj yahawil howal chispohle isbꞌa,
kat ispakꞌiko ebꞌnaj yinh hunun,
yinh haꞌmataj chitanhilo huneꞌ niman konhobꞌ tuꞌ.
Haktikꞌapax tuꞌ ta ay hunu nhahil anma chispohle isbꞌa,
kat yok howal yinh hunun,
chitanhpaxilo huneꞌ nhahil anma tuꞌ.
18 Hakmi tuꞌ chꞌeliko naj matzwalil,
ta chispoh isbꞌa naj yebꞌ ischejabꞌ,
kat ispakꞌiko ebꞌnaj yinh hunun.
¿Tzikꞌanabꞌ chu yok yip naj chiyute heyalni?
Chiwalan huneꞌ tiꞌ teyet yuto hex tiꞌ cheyala ta hanintiꞌan chiwilojan ischejabꞌ naj matzwalil yinh anma yu yip naj Beelzebú.
19 Wal xin ¡machoj!
Ta hak tuꞌ,
¿mak xin chꞌaqꞌni yip ebꞌnaj chikuywi teyintaj yinilo ischejabꞌ naj matzwalil heyalni?
Yuxin haꞌ hun ebꞌnaj tuꞌ chiyenilo ta hex tiꞌ kaw kꞌaynajexto yinh tzet cheyal winhan.
20 Wal hanintiꞌan chiwilojan ischejabꞌ naj matzwalil yu yip Komam Dios,
haꞌ hun tiꞌ chihalniloj ta xaꞌapni istiempohal heyok yul isqꞌabꞌ Komam Dios.
21 »Qꞌinalo ta ay hunu naj winaj kaw ay yip ayko chꞌen yet howal yul isqꞌabꞌ,
kat istanhen naj yatut,
machi mak chu yelqꞌanilti tzet ay naj.
22 Yaj ta ay hunuxa mak chuli,
ekꞌnaxapaxo yip sata naj,
chiꞌaykꞌay naj yu naj,
kat yilaxilo chꞌen yet howal tet naj bꞌay ayko yanma naj tuꞌ;
yebꞌ sunil tzet ayko yul isqꞌabꞌ naj chꞌokkano yu naj chiqꞌoji yinh naj tuꞌ.
23 »Haꞌ mak mach ayoko yinh tzet chiwalan,
chichiwa iskꞌul winhan.
Yebꞌ xin,
haꞌ mak mach chikolwa winhan iskutxbꞌanti anma wetan,
haꞌ ton chitzumbꞌenilo anma yul inqꞌabꞌan,
xhi Komam.
Ischejabꞌ naj matzwalil meltzo yul yehobꞌal hunelxa
24 Yalnipaxo Komam:
»Qꞌinalo ta ay hunu ischejabꞌ naj matzwalil chꞌel yinh hunu naj winaj,
lahwi tuꞌ kat isto ischejabꞌ naj matzwalil tuꞌ bꞌey txꞌotxꞌ desierto issayno bꞌay chixewi.
Yaj ta mach chiꞌilcha yu naj bꞌay chixew tuꞌ,
kat yalni naj hakaꞌ tiꞌ:
»“Kaw kꞌulmi inmeltzohan bꞌaytikꞌa titnaj hinan,”
xhi naj.
25 Haxa yet ismeltzo ischejabꞌ naj matzwalil tuꞌ xin,
yilni naj ta hakaꞌ hunu nha kaw tzꞌisbꞌilxalto qꞌalem yul yebꞌ watxꞌebꞌil,
hak tuꞌ ye yanma naj tuꞌ.
26 Yuxin yinh anhe chito naj ischejabꞌ naj matzwalil tuꞌ yawteti hujwanhoxa yetbꞌi kaw ekꞌnaxa istxꞌojal sata naj,
kat yokto ebꞌnaj yul yanma huneꞌ naj winaj tuꞌ.
Kaw xin ekꞌbꞌalxa istxꞌojal chiꞌeliko naj sata yet yalanhtokanoj,
xhi Komam.
Anma kaw saqꞌal yet
27 Hayet lanhan yalni Komam Jesús hunteqꞌan tuꞌ,
yah yaw huneꞌ ix xol anma,
yalni ix tet Komam:
—Ekꞌbꞌalto saqꞌal yet anma chiꞌabꞌen Istzotiꞌ Komam Dios kat isyijeni,
xhi Komam.
Bendecidos Son Aquellos que Escuchan y Obedecen
Anma txꞌoj chisqꞌan kꞌaybꞌalkꞌule yilaꞌ
29 Yet iskutxbꞌan isbꞌa anma iskꞌatanh Komam Jesús,
yalni Komam xin:
«Haꞌ anma yinh huneꞌ tiempohal tiꞌ machiswalil isnabꞌal yuto chisqꞌan yilaꞌ kꞌaybꞌalkꞌule chiyeni yip Komam Dios,
yajaꞌ huneꞌchꞌannhe chꞌaqꞌlax yilaꞌ;
huneꞌ hakaꞌ isye Komam Dios yinh yaꞌ Jonás,
ischejabꞌ Komam yet payat.
30 Huneꞌ isye Komam Dios yinh yaꞌ Jonás tuꞌ,
yechel yip Komam isye tet anma yul konhobꞌ Nínive yet payat.
Hak tuꞌ wehan,
Hanin Aqꞌbꞌilintijan texol yu Komam Dios,
yechel yip Komam Dios wehan xol anma yinh huneꞌ tiempohal tiꞌ.
31 »Hayet chꞌapni istzꞌayikal yilni Komam Dios yinh tzet chꞌeliko sunil anma,
chitaqꞌwikanh ix reina ay bꞌey Sabá,
kat yalni ix istxꞌojal anma yinh huneꞌ tiempohal tiꞌ yuto kaw nahat txꞌotxꞌ bꞌay tit ix yabꞌeno hanta yitzꞌatil iswiꞌ yaꞌ rey Salomón.
Yaj xin hanintiꞌan,
ekꞌbꞌal welapnojan sata yaꞌ rey Salomón tuꞌ,
yajaꞌ mach chabꞌeto anma tiꞌ tzet chiwalan.
32 »Yinh huneꞌ tzꞌayikal tuꞌ,
chitaqꞌwipaxokanh anma ah Nínive,
kat yalnipaxo istxꞌojal anma yinh huneꞌ tiempo tiꞌ,
yuto hayet yekꞌ yaꞌ Jonás yalno Istzotiꞌ Komam Dios tet anma tuꞌ,
isbꞌejnikano anma istxꞌojal,
iswatxꞌeniko isbꞌa sata Komam.
Yaj wal hanintiꞌan ekꞌbꞌal welapnojan sata yaꞌ Jonás tuꞌ,
yaj machi mak tiꞌ chꞌabꞌen tzet chiwalan,»
xhi Komam.
Isbꞌaqꞌ kosat hakaꞌ cantil yeko yinh konimanil
33 Yalnipaxo Komam:
«Machi hunu mak chako qꞌaꞌ yinh iscantil lahwi tuꞌ kat yebꞌantoj,
maka chakto yalanh hunu teꞌ almuh,
machoj,
to chꞌalaxahto yibꞌanh isbꞌatxobꞌal cantil,
haxinwal kꞌul yilni anma chꞌokapno yul nha.
34 Isbꞌaqꞌ kosat,
cantil yeko yinh konimanil.
Yuxin ta hanhkꞌanhe iskꞌulal choche yilaꞌ kosat tiꞌ,
sunil konimanil ayko yinh issajilqꞌinal.
Yajaꞌ ta yinhnhe istxꞌojal bꞌay ayko kosat xin,
sunil konimanil ayko yinh qꞌejholo.
35 Yuxin nannhehojabꞌ heyu,
haxinwal haꞌ huneꞌ issajilqꞌinal ayko teyinh,
machojabꞌ chꞌok qꞌejholohal.
36 Yuxin tato ayko issajilqꞌinal yul heyanma,
yebꞌpaxo machi nichꞌano qꞌejholo ayko teyinh,
hakaꞌ xol issajilqꞌinal ayexxakoj.
Yuxin lahan hex hakaꞌ hunu cantil nahat chiꞌapni ismujli isqꞌaqꞌal,»
xhi Komam.
Yaliko Komam Jesús istxꞌojal ebꞌnaj fariseo yinh sat
37 Hayet lahwi istzotel Komam Jesús yebꞌ anma tuꞌ,
yawtento huneꞌ naj fariseo Komam waꞌo bꞌey yatut.
Yapni Komam yul yatut naj,
yok tzꞌonhno Komam yinh mexha.
38 Yet lanhan yok Komam waꞌoj,
kꞌayilo iskꞌul naj fariseo yet yilni naj ta mach istxꞌah isqꞌabꞌ Komam hakaꞌ iskuybꞌanil ebꞌnaj fariseo yet chꞌok ebꞌnaj waꞌoj.
39 Yuxin yal Komam tet naj:
—Hex fariseo hex tiꞌ,
kaw kꞌul chu hetxꞌahni yinta hevaso yebꞌ hesekꞌ hakaꞌ yalni hekuybꞌanil,
wal yul henabꞌal hanhkꞌanhe eleqꞌ nabꞌil yu,
haxapaxo yul heyanma xin,
nohna yu sunil istxꞌojal chewatxꞌe.
40 ¡Kaw wiꞌe hexkanoj!
¿Tom mach heyohtajoj tato haꞌ Komam watxꞌenhe sunil tzettaj chijiliko yinh,
yebꞌpaxo sunil mach chijiliko yinh?
41 Yuxin haꞌ wal heyuten hebꞌa,
aweko heyanma yul isqꞌabꞌ Komam,
ta hak tuꞌ chisajbꞌikano heyanma,
haxinwal cheyaqꞌ tet mak matzet aya yinh tzalahilal.
42 »¡Kꞌanchꞌan hex fariseo hex tiꞌ!
Cheyaqꞌ isdiezmohal teꞌ alawena yebꞌ teꞌ ruda yebꞌ sunil teꞌ nixhte itah tet Komam Dios,
yajaꞌ mach chewatxꞌe istoholal yinh heyet anmahil,
yebꞌpaxo xin machi iskꞌulchꞌanil iskꞌul Komam Dios yul heyanma.
Haꞌ hunteqꞌan tuꞌ kaw yilal heyijeni,
machi xin chebꞌej heyaqꞌni hediezmo tet Komam Dios.
43 »¡Kꞌanchꞌanex hex fariseo,
hex tiꞌ!
Hexnhe cheyoche hemajaꞌlo hunteqꞌan chem kaw ay yelapno yul capilla.
Ay heyalaꞌ ta nanxa yok chute istioxhli anma teyet yet chexekꞌ yulaj bꞌeh.
44 »¡Kꞌanchꞌanex hex fariseo,
hex tiꞌ!
Kaw txꞌoj heyanma,
lahan hex hakaꞌ bꞌay mujan kamom matxa ixtanho jilni yekꞌlenal;
chꞌekꞌ xanhxon anma yibꞌanh,
mach xin yohtajo tzet ayayto yalanh txꞌotxꞌ,
xhi Komam.
45 Yalni huneꞌ naj kuywawom yinh isley yaꞌ Moisés tet Komam:
—Mamin,
hayet chawalni hunteqꞌan tiꞌ,
hanhhun honhanh chawaqꞌpaxo tako kokꞌulanh,
xhi naj.
46 Istaqꞌwi Komam tet naj:
—¡Kꞌanchꞌan hexpaxo,
hex kuywawom yinh isley yaꞌ Moisés!
Yuto kaw ay hunteqꞌan chejbꞌanile kaw yaꞌta cheyaqꞌ tet anma hakaꞌ hunu ijatz kaw al,
machi mak chiqꞌoji yinikanh.
Wal hexpaxo xin,
maxhtikꞌa nichꞌano yiximal heqꞌabꞌ chehitziko yinh.
47 »Kꞌanchꞌan hex yuto chekayenhe hewatxꞌenkanh bꞌay mujan ebꞌyaꞌ ischejabꞌ Komam Dios potxꞌbꞌil yu heyichmam yet payat.
48 Hak tuꞌ xin chu heyenilo yinh tzet chewatxꞌe tiꞌ tato chextzala yinh tzet iswatxꞌe heyichmam tuꞌ.
Haꞌ ebꞌnaj potxꞌni ebꞌyaꞌ ischejabꞌ Komam Dios,
wal hexpaxo xin,
chewatxꞌekanh bꞌay mujan ebꞌyaꞌ.
49 »Yuxin halbꞌilkano yu Komam Dios yu ishelanil:
“Chiwaqꞌaꞌtojan ebꞌyaꞌ chihalni Intzotiꞌan texol,
yebꞌ hunteqꞌanxa ebꞌyaꞌ inchejabꞌan.
Ay ebꞌyaꞌ chemaqꞌkamoj,
ay ebꞌyaꞌ chetzumbꞌelo yul konhobꞌ,”
xhi Komam.
50 Yalnipaxo Komam Jesús:
—Hunteqꞌan anma tiꞌ chitohlano sunil isyaꞌtajil iswatxꞌekano yichmam yinh ebꞌyaꞌ ischejabꞌ Komam Dios maqꞌbꞌilkamo yettax yichiko yul yibꞌanhqꞌinal tiꞌ.
51 Kaw tzetkꞌa ebꞌyaꞌ ischejabꞌ Komam maqꞌbꞌil kamoj,
chiꞌichikanti yinh iskamikal naj Abel masanta yinh iskamikal yaꞌ Zacarías,
yet ismaqꞌlaxkamo yaꞌ xolbꞌal bꞌay chinhuslax xahanbꞌal yebꞌ Yatut Komam Dios.
Yaj haninan chiwalan teyet ta Komam Dios chiꞌaniti isyaꞌtajil yibꞌanh anma tiꞌ yu iskamikal ebꞌyaꞌ tuꞌ,
xhi Komam Jesús tet ebꞌnaj.
52 Yalnipaxo Komam Jesús:
—¡Kꞌanchꞌan hex,
hex chekuy isley yaꞌ Moisés!
Kaw yahaw hex heyaqꞌni isnabꞌal anma yinh Istzotiꞌ Komam Dios,
yajaꞌ mach cheyako henabꞌal yinh,
yebꞌpaxo ta ay mak choche chako isnabꞌal yinh,
mach chechakto anma yul ispultahil,
xhi Komam tet ebꞌnaj.