2 —Kaw chitzꞌay inkꞌulan yinh anma tiꞌ,

yuto oxebꞌxa tzꞌayik aykꞌo inkꞌatanhan,

matxa xin tzet chislo.

3 Yaj ta chinchejtojan anma tiꞌ yatut,

machi xin chiwaꞌi,

ay ismay ispax yip yulaj bꞌeh yu nhohchahilal,

yuto ay anma kaw nahat aya,

xhi Komam.

4 Istaqꞌwi ebꞌyaꞌ iskuywom Komam tuꞌ hakaꞌ tiꞌ:

—¿Tzet xin chu jaqꞌni waꞌo anma tiꞌ hawalni,

yuto bꞌay ayonh tiꞌ machi teꞌ nha?

xhi ebꞌyaꞌ.

5 Isqꞌambꞌen Komam:

—¿Hayebꞌ ixim pan ay texol?

xhi Komam.

Istaqꞌwi ebꞌyaꞌ:

—Hujebꞌ,

xhi ebꞌyaꞌ.

6 Ischejni Komam tato chiꞌay tzꞌonhno anma sat txꞌotxꞌ.

Yinikanh Komam ixim hujebꞌ pan tuꞌ,

yaqꞌni Komam yuchꞌandiosal tet Komam Dios yinh ixim.

Lahwi tuꞌ xin isqꞌaxponayo Komam ixim,

yaqꞌni Komam ixim tet ebꞌyaꞌ iskuywom,

yok ebꞌyaꞌ yitxqꞌanoto ixim yinh anma.

7 Aypaxo xin haykꞌonh noꞌ nixhte kay iqꞌbꞌil yu ebꞌyaꞌ.

Yaqꞌnipaxo Komam Jesús yuchꞌandiosal yinh noꞌ tet Komam Dios,

lahwi tuꞌ yalni Komam tet ebꞌyaꞌ iskuywom tuꞌ tato chiyitxqꞌapaxto ebꞌyaꞌ noꞌ yinh anma.

8 Sunil anma waꞌi,

kaw nohkano iskꞌul.

Kaw xin hujebꞌto motx nohkanokanh yu ixim pan yebꞌ noꞌ kay matxa lahwi yu anma tuꞌ.

9 Anma waꞌ tuꞌ aymi kanhebꞌo mil.

Istaqꞌlikano Komam tet anma,

10 lahwi tuꞌ xin yahto Komam yul huneꞌ teꞌ barco yebꞌ ebꞌyaꞌ iskuywom,

isto Komam yul ismajul Dalmanuta.

11 Ay xin hunteqꞌan ebꞌnaj fariseo apni iskꞌatanh Komam Jesús,

yok ebꞌnaj bꞌuchwal yinh Komam.

Yajaꞌ yunhe yilwen ebꞌnaj Komam yuxin ok ebꞌnaj isqꞌanaꞌ ta chisye Komam hunu kꞌaybꞌalkꞌule chiyeniloj tato yeli Komam Dios anheti Komam.

12 Yah iskꞌul Komam Jesús,

yalni hakaꞌ tiꞌ:

—¿Tzet yinh xin chisqꞌan hunteqꞌan anma tiꞌ yechel yip Komam Dios yilaꞌ?

Yinh kaw isyelal chiwalan tato machi hunu tzet chiyelax tet,

xhi Komam.

13 Yel Komam iskꞌatanh ebꞌnaj fariseo tuꞌ,

yahto Komam yul teꞌ barco hunelxa yebꞌ ebꞌyaꞌ iskuywom,

isto Komam isqꞌaxebꞌikꞌto haꞌ lago.

14 Wal ebꞌyaꞌ iskuywom Komam tuꞌ to nahul yu ebꞌyaꞌ yinito tzet chislo yul teꞌ barco,

huneꞌnhe ixim pan iqꞌbꞌil yu ebꞌyaꞌ.

15 Yalni Komam tet ebꞌyaꞌ:

—Abꞌewe tzet chiwalan,

kaw cheyilwe hebꞌa tet yanhal ispan ebꞌnaj fariseo yebꞌ naj Herodes,

tajka chexetaxto yu,^a

xhi Komam.

16 Yok ebꞌyaꞌ tzotelo yibꞌanhilo huneꞌ tuꞌ,

chalni ebꞌyaꞌ:

—Yumi machi ixim pan iqꞌbꞌil ju,

yuxin chal Komam hakaꞌ tuꞌ,

xhi ebꞌyaꞌ.

17 Yohtanhenilo Komam yinh tzet chal ebꞌyaꞌ,

yalni Komam:

—¿Tzet yinh xin cheyala tato machi hepan iqꞌbꞌil heyu?

¿Tom maxhto chexqꞌoji hetxumniloj yebꞌ maxhto cheyohtanheloj?

Kaw kawto henabꞌal.

18 Ay isbꞌaqꞌ hesat yaj mach cheyila,

ay hetxikin yaj mach cheyabꞌe.

¿Tom xin mach chitit yul hekꞌul?

19 Yet witxqꞌantojan ixim howebꞌ pan yinh howebꞌ mil anma,

¿hayebꞌto motx ixim matxa lahwi yu anma hekutxbꞌakanh?

xhi Komam.

Istaqꞌwi ebꞌyaꞌ:

—12 (Kabꞌlahonhebꞌ) motx ixim,

xhi ebꞌyaꞌ.

20 Yalnipaxo Komam:

—Haxapaxo yet witxqꞌantojan ixim hujebꞌ pan yinh kanhebꞌ mil anma,

¿hantato ixim matxa lahwi yu anma?

xhi Komam.

—Hujebꞌ motx ixim,

xhi ebꞌyaꞌ.

21 Yalnipaxo Komam tet ebꞌyaꞌ:

—¿Tom maxhtotikꞌa chitxumcha nichꞌano heyu?

xhi Komam.

22 Lahwi tuꞌ xin yapni Komam yebꞌ ebꞌyaꞌ iskuywom yul konhobꞌ Betsaida.

Yilaxti huneꞌ naj mutzꞌan sat tet Komam,

isqꞌanni anma tet Komam ta chayo isqꞌabꞌ yibꞌanh naj.

23 Yok tzabꞌno Komam yinh isqꞌabꞌ naj,

isxeknito Komam naj istxam konhobꞌ,

yaniko Komam istzubꞌ yinh isbꞌaqꞌ sat naj,

yanayo Komam isqꞌabꞌ yibꞌanh naj,

lahwi tuꞌ xin isqꞌambꞌen Komam tet naj ta xayu yilni naj.

24 Yichiko naj yilni,

yalni naj tet Komam:

—Chiwilan yekꞌ anma,

hakaꞌ te teꞌ chu wilnihan,

xhi naj.

25 Yaniko Komam isqꞌabꞌ yinh sat naj hunelxa,

kaw iswatxꞌilo yilni naj,

xin habꞌanxa yilni naj sunil tzet ye tuꞌ kawil yebꞌ nahat.

26 Ischejnitopaxo Komam naj yatut,

yalni Komam:

—Matxa chaxhekꞌ yul konhobꞌ tiꞌ,

wal xin bꞌeh hatohi,

xhi Komam tet naj.

27 Lahwi tuꞌ xin,

isto Komam yebꞌ ebꞌyaꞌ iskuywom yulaj aldea ayko yul ismajul txꞌotxꞌ Cesarea Filipos.

Hayet ayko Komam yinh isbꞌel yebꞌ ebꞌyaꞌ iskuywom tuꞌ,

isqꞌambꞌen Komam tet ebꞌyaꞌ:

—¿Mak anmahil hinan yalni anma?

xhi Komam.

28 Istaqꞌwi ebꞌyaꞌ tet Komam:

—Ay mak chalni tato hach tiꞌ yaꞌ Juan anikanh haꞌ iswiꞌ anma,

aypaxo mak chalni tato Elías hach,

maka hunu ischejabꞌ Komam Dios ekꞌlena yet payat,

xhi ebꞌyaꞌ.

29 Isqꞌambꞌenpaxo Komam tet ebꞌyaꞌ:

—Haxaka hex tiꞌ,

¿mak anmahil hinan heyalni?

xhi Komam.

Istaqꞌwi yaꞌ Pedro tet Komam hakaꞌ tiꞌ:

—Hachton tiꞌ Cristo,

echmabꞌil yuli,

xhi yaꞌ.

30 Yalni Komam tato machi bꞌay chalikꞌo ebꞌyaꞌ huneꞌ tuꞌ.

31 Lahwi tuꞌ xin yichiko Komam yalni tet ebꞌyaꞌ iskuywom:

—Wal Hanin Aqꞌbꞌilintijan texol yu Komam Dios kaw yilal yekꞌyaꞌ wanmahan,

kat kinyintanhenkaniltojan ebꞌnaj ichamta winaj iswiꞌehal konhobꞌ Israel,

yebꞌ ebꞌnaj yahawil yinh ebꞌnaj sacerdote,

yebꞌ ebꞌnaj kuywawom yinh isley yaꞌ Moisés.

Chinyaqꞌ kamojan ebꞌnaj,

yajaꞌ yinh yox tzꞌayik xin kat witzitzbꞌikanhan hunelxa,

xhi Komam.

32 Kaw yalkano Komam yinh kaw habꞌan tet ebꞌyaꞌ.

Hayet yabꞌen yaꞌ Pedro huneꞌ tuꞌ,

yinilo yaꞌ Komam ischukil,

yok yaꞌ iskachno Komam yinh huneꞌ yal tuꞌ.

33 Ismeltzo Komam,

yok tꞌanhno yinh ebꞌyaꞌ iskuywom,

yok Komam iskachno yaꞌ Pedro,

yalni Komam:

—¡Hach matzwalil,

elanh yinh insatan!

Yuto hach tiꞌ maxhtaj tzet nabꞌil yu Komam Dios chꞌekꞌ yinh hanabꞌal,

wal xin to haꞌ tzet chisnah anma,

haꞌ chiꞌekꞌ yinh hanabꞌal,

xhi Komam tet yaꞌ Pedro tuꞌ.

34 Lahwi tuꞌ xin,

yawtenti Komam ebꞌyaꞌ iskuywom yebꞌ anma wejanto tuꞌ,

yalni Komam:

—Tato ay hunu mak choche chiꞌok inkuywomojan,

kaw yilal matxa yeto isbꞌa ischukil,

kaw hinanojabꞌ yabꞌen isyaꞌtajil,

waxanhka chiꞌalaxkanh yinh kulus.

Haꞌ mak chishin isbꞌa tuꞌ haꞌ chꞌok inkuywomojan.

35 Yuto haꞌ mak ay yalaꞌ mach chiskꞌayto iskawil winhan yul sat yibꞌanhqꞌinal tiꞌ chiskꞌayto isqꞌinal mach istanhbꞌal.

Wal mak hinan yaqꞌnikamo isbꞌa winhan yebꞌ yu Tzotiꞌ Kꞌul yet Kolbꞌanile,

chischah isqꞌinal mach istanhbꞌal.

36 »Qꞌinaloj ta ay hunu mak chiqꞌoji ismajnikꞌo sunil tzet ay yul sat yibꞌanhqꞌinal tiꞌ,

yajaꞌ ta chiskꞌayto isqꞌinal mach istanhbꞌal,

37 ¿tzettaxka chischah selelo isqꞌinal chiskꞌayto tuꞌ?

38 Yuxin ta ay mak chitxꞌixwi winhan,

yebꞌ yalni intzotiꞌan yinh sat hunteqꞌan anma txꞌoj tiꞌ yebꞌ mach ohtanhe Komam Dios,

hakinpax tuꞌan Hanin Aqꞌbꞌilintijan texol yu Komam Dios,

chintxꞌixwipaxilojan yinh yet chinhulan yebꞌ isqꞌaqꞌal yip Inmaman,

yebꞌ ebꞌnaj yángel Komam Dios,

xhi Komam.