Hunteqꞌan tzet chiꞌetanto anma yul sat Komam Dios
15
Yet hunel apni hunteqꞌan ebꞌnaj fariseo yebꞌ ebꞌnaj kuywawom yinh isley yaꞌ Moisés ilwal yinh Komam Jesús,
ispeto ebꞌnaj bꞌey Jerusalén.
Isqꞌambꞌen ebꞌnaj tet Komam:
2 —¿Tzet yinh xin mach chisyije hakuywom tiꞌ hunteqꞌan chejbꞌanile yet ebꞌnaj jichmam?
Yuto ebꞌnaj hakuywom tiꞌ mach chistxꞌah ebꞌnaj isqꞌabꞌ yet chiwaꞌ ebꞌnaj,a
xhi ebꞌnaj.
3 Istaqꞌwi Komam tet ebꞌnaj:
—Hakexpax tuꞌ,
¿tzet yinh xin chemanhkꞌo ischejbꞌanil Komam Dios cheyijento ischejbꞌanil anma?
4 Yuto chal yul Yum Komam hakaꞌ tiꞌ:
“Ayojabꞌ yelapno hamam,
hamiꞌ yul hasat.
Mak chitzꞌaktiꞌnhen ismam maka ismiꞌ yilal iskami,”b
xhihayoj.
5 Yajaꞌ hex tiꞌ cheyala tato mach yilalo iskolwa anma yinh ismam maka ismiꞌ ta chiyal hakaꞌ tiꞌ:
“Mam,
mach chu inkolwahan tawinh yuto haꞌ tzet ay intiꞌan yetxa Komam Dios ye wuhan,”
ta xhi.
6 Haꞌ mak chihalni hakaꞌ tuꞌ matxa yilalo iskolwa yinh ismam maka ismiꞌ,
heyalni.
Yajaꞌ yinh hakaꞌ tuꞌ chemanhkꞌo ischejbꞌanil Komam Dios yu heyijento ischejbꞌanil anma.
7 Wal xin nabꞌnhe cheyal hebꞌa kꞌulal.
Teyinh bꞌay yalkano yaꞌ Isaías,
ischejabꞌ Komam Dios yet payat,
yet yalnikano hakaꞌ tiꞌ:
8 Hunteqꞌan anma tiꞌ,
istiꞌnhe chinaqꞌni bꞌinahojan,
yajaꞌ wal yanma nahat yehilo winhan.
9 Nabꞌnhe chala ta chiyo isbꞌa wetan,
wal xin hanhkꞌanhe ischejbꞌanil ebꞌnaj winaj
chaqꞌ ebꞌnaj iskuyuꞌ yet anmahil,c
xhihayoj,
xhi Komam Jesús.
10 Lahwi tuꞌ yawtenti Komam anma iskꞌatanh,
yalni Komam tet anma tuꞌ:
—Abꞌewej kat hetxumni yinh tzet chiwaltiꞌan.
11 Maxhtaj tzet chiꞌokto yul istiꞌ anma,
haꞌ chiꞌetanto yul sat Komam Dios,
wal xin to haꞌ istxꞌojal chiꞌahti yul istiꞌ,
haꞌ chiꞌetanto yul sat Komam,d
xhi Komam.
12 Ishitziko ebꞌyaꞌ iskuywom Komam iskꞌatanh,
yalni ebꞌyaꞌ:
—Mamin,
¿mamxatxumu tato yet maxawalni huneꞌ tiꞌ machíwakanh iskꞌul ebꞌnaj fariseo?
xhi ebꞌyaꞌ.
13 Istaqꞌwi Komam:
—Sunil te teꞌ maxhtaj Inmaman ay yul satkanh tzꞌunnhe chihokꞌlaxkanh.
14 Wal xin yilaꞌxam ebꞌnaj,
lahan ebꞌnaj hakaꞌ anma mach chu yilni kat yokpaxo ebꞌnaj yijbꞌanpaxikꞌo anma mach chu yilni.
Qꞌinalo ta ay hunu naj mach chu yilni chixeknito hunuxa naj mach chu yilni,
chisxekleto isbꞌa ebꞌnaj iskawanhil yul xabꞌ,
xhi Komam.
15 Yalni yaꞌ Pedro tet Komam:
—Mamin,
hal jetanh tzet chalilo huneꞌ maxawal tet ebꞌnaj fariseo tuꞌ,
xhi yaꞌ.
16 Istaqꞌwi Komam:
—¿Tom haꞌ hunex machi maxetxumpaxo yinh tzet mawal tuꞌan?
17 ¿Tom mach heyohtajoj ta sunil tzet chiꞌokto yul istiꞌ anma yul iskꞌul chiꞌapni,
chilahwi tuꞌ xin kat yel yinh?
18 Yajaꞌ haꞌ tzotiꞌ chiꞌahti yul istiꞌ anma,
yinh yanma chitita,
haꞌ xin hunteqꞌan tuꞌ chiꞌetanto yul sat Komam Dios.
19 Yuto yul yanma anma chipitzkꞌati sunil istxꞌojal hakaꞌ potxꞌwal,
ixloj,
winajloj,
eleqꞌ,
leqꞌtiꞌal,
yebꞌ bꞌuchwal.
20 Haꞌ ton hunteqꞌan tuꞌ chiꞌetanto anma yul sat Komam Dios,
yaj wal huneꞌ yet mach chikotxꞌah koqꞌabꞌ yet chonhok waꞌoj,
ischejbꞌanil ebꞌnaj winaj yehi,
mach chetato janma yul sat Komam Dios,
xhi Komam Jesús.
Huneꞌ ix ix mach Israelo yayto yul yanma yinh Komam Jesús
21 Lahwi tuꞌ xin isto Komam Jesús yul ismajul txꞌotxꞌ Tiro yebꞌ txꞌotxꞌ Sidón.
22 Bꞌey tuꞌ ay huneꞌ ix ix Cananea,
mach Israeloj.
Apni ix yilaꞌ Komam Jesús,
yalni ix yinh kaw ip:
—Mamin,
hach yuninal iskꞌahol yaꞌ David,
tzꞌayojabꞌ hakꞌul winhan.
Ay huneꞌ nichꞌan wuninan kaw chiꞌetalax yu ischejabꞌ naj matzwalil,
kaw xin chiꞌekꞌyaꞌ yanma ix yu naj,
xhi ix tet Komam.
23 Yajaꞌ xin machi taqꞌwi Komam tet ix,
yuxin hitziko ebꞌyaꞌ iskuywom Komam tuꞌ iskꞌatanh,
yalni ebꞌyaꞌ:
—Mamin,
hal tet ix paxojabꞌto ix haxinwal chisbꞌej ix yel yaw jinh,
xhi ebꞌyaꞌ.
24 Istaqꞌwi Komam:
—Tetnhe anma Israel chejbꞌilintijan yu Komam Dios,
yuto lahan anma tuꞌ hakaꞌ noꞌ meꞌ kꞌaynatoj,
xhi Komam tet ebꞌyaꞌ.
25 Yajaꞌ hitziko ix,
yay jahno ix sata Komam,
yalni ix:
—Mamin,
kolwahanh nino winhan,
xhi ix.
26 Yalni Komam tet ix:
—Mach kꞌulo ta chꞌilaxilo tzet chislo ebꞌnaj uninale kat yaqꞌlax tet metx txꞌiꞌ,
xhi Komam.
27 Yalnipaxo ix:
—Hoꞌ Mamin yeli;
yajaꞌ metx txꞌiꞌ tuꞌ chitikꞌa yikanh metx isqꞌal istiꞌ ebꞌnaj uninale chiꞌaykꞌay yalanh mexha yet chiwaꞌ ebꞌnaj,
xhi ix tet Komam.
28 Lahwi tuꞌ xin,
yalni Komam tet ix:
—¡Miyay,
kaw ayko hawanma yinh Komam Dios,
yuxin yubꞌojabꞌ hakaꞌ choche hakꞌul!
xhi Komam.
Yinhnhena tuꞌ xin iskawxikanh nichꞌan yunin ix tuꞌ.
Kaw txꞌiꞌal anma yaꞌay kawxikanokanh yu Komam Jesús
29 Yel Komam Jesús bꞌey tuꞌ,
isto Komam istiꞌ haꞌ lago Galilea,
haꞌ tuꞌ xin ahto Komam yinh huneꞌ wonhan,
yay tzꞌonhno Komam bꞌey tuꞌ.
30 Kaw xin hantanhe anma apni iskꞌatanh Komam.
Ay mak iqꞌnhe anma yaꞌay yebꞌ ay mak iqꞌnhe anma mach chu yekꞌi,
yebꞌ anma mach chu yilni,
yebꞌ anma txꞌoj ye isqꞌabꞌ,
yebꞌ anma mach chu istzoteli;
yalaxayo sunil anma tuꞌ yich yoj Komam.
Sunil anma tuꞌ xin kawxikanokanh yu Komam.
31 Hayet yilni anma huneꞌ tuꞌ kaw kꞌaykanilo iskꞌul yuto yaqꞌ tzotelo Komam anma maxhtikꞌa chu istzoteli,
yebꞌpaxo anma txꞌoj ye isqꞌabꞌ watxꞌikaniloj.
Isbꞌelwipaxokanh anma maxhtikꞌa chu yekꞌi,
yebꞌ anma maxhtikꞌa chu yilni hajlokanokanh issat yu Komam.
Yu huneꞌ tuꞌ kaw sunil anma yaqꞌ tzalaho iskꞌul yinh Komam Dios,
isDiosal Israel.
Kanhebꞌ mil ebꞌnaj winaj waꞌ yu Komam Jesús
32 Lahwi tuꞌ,
yawtenti Komam ebꞌyaꞌ iskuywom iskꞌatanh,
yalni Komam tet ebꞌyaꞌ:
—Kaw chitzꞌay inkꞌulan yinh hunteqꞌan anma tiꞌ yuto yoxebꞌxa tzꞌayik yehikꞌo inkꞌatanhan,
matxa xin tzet chislo.
Mach chisje inkꞌulan inchejaꞌtojan yatut yuto tato mach chiwaꞌi,
chalotaxka ispaxilo yip yulaj bꞌeh,
xhi Komam.
33 Yalni ebꞌyaꞌ iskuywom Komam tet:
—Mamin,
kaw txꞌiꞌal anma lah,
¿bꞌaytuꞌwal xin chonhtohanh jiqꞌatijanh tzet chislo anma tiꞌ?
Yuto bꞌay ayonh tiꞌ machi teꞌ nha,
xhi ebꞌyaꞌ.
34 Isqꞌambꞌen Komam tet ebꞌyaꞌ:
—¿Hayebꞌ ixim pan koxol tiꞌ?
xhi Komam.
Istaqꞌwi ebꞌyaꞌ:
—Hujebꞌchꞌan ixim yebꞌ haykꞌonh noꞌ nixhte kay,
xhi ebꞌyaꞌ.
35 Yalni Komam tet anma tato chiꞌay tzꞌonhno sat txꞌotxꞌ.
36 Lahwi tuꞌ xin yinikanh Komam ixim hujebꞌ pan yebꞌ haykꞌonh noꞌ kay tuꞌ,
yaqꞌni Komam yuchꞌandiosal tet Komam Dios.
Lahwi tuꞌ isqꞌaxponayo Komam ixim,
yaqꞌni Komam ixim yebꞌ noꞌ kay tuꞌ tet ebꞌyaꞌ iskuywom,
yok ebꞌyaꞌ yitxqꞌanto yinh anma.
37 Kaw sunil anma waꞌi hantatikꞌa yoche iskꞌul,
kaw xin hujebꞌto motx nohkanh yinh ixim matxa lahwi yu anma.
38 Xol sunil anma waꞌ tuꞌ kanhebꞌ mil isbꞌisil ebꞌnaj winaj,
machi xin ok ebꞌix ix yebꞌ nixhte unin istzꞌajo yinh huneꞌ isbꞌisil tiꞌ.
39 Lahwi istaqꞌlikano Komam Jesús tet anma,
yahto Komam yul huneꞌ teꞌ barco,
isto Komam yul ismajul txꞌotxꞌ Magdala.