Hunteqꞌan tzet chonhetanto yul sat Komam Dios
7
Ay xin hunteqꞌan ebꞌnaj fariseo yebꞌ ebꞌnaj kuywawom yinh isley yaꞌ Moisés apni iskꞌatanh Komam Jesús,
ispeto ebꞌnaj bꞌey Jerusalén.
Marcos 7:1-23
2 Hayet yilni ebꞌnaj tato ay ebꞌyaꞌ iskuywom Komam mach chistxꞌah isqꞌabꞌ yet chiꞌok waꞌoj hakaꞌ yalni iskuybꞌanil yichmam ebꞌnaj;
yichiko ebꞌnaj isbꞌuchwa yinh ebꞌyaꞌ.
3 Haꞌ ebꞌnaj fariseo yebꞌ sunil anma Israel kaw chisyije ischejbꞌanil yichmam,
yuto ta mach kamo chistxꞌah isqꞌabꞌ ebꞌnaj mach chiwaꞌ ebꞌnaj.
4 Hakpax tuꞌ yet chimeltzo ebꞌnaj yul txonhbꞌal,
mach chiwaꞌ ebꞌnaj ta mach chistxꞌah ebꞌnaj isqꞌabꞌ bꞌabꞌel.
Kaw txꞌiꞌalto tzet chisyije ebꞌnaj,
hakaꞌ istxꞌahni ebꞌnaj isvaso,
isxhalu,
yebꞌ hunteqꞌan chꞌen xi,
kat istxꞌahnipaxo ebꞌnaj istxꞌat.
5 Yuxin isqꞌambꞌe ebꞌnaj fariseo yebꞌ ebꞌnaj kuywawom yinh isley yaꞌ Moisés tet Komam:
—¿Tzet yinh xin mach chisyije ebꞌnaj hakuywom tiꞌ ischejbꞌanil ebꞌnaj jichmam,
yuto mach chissajnhe ebꞌnaj isqꞌabꞌ yet chiꞌok waꞌoj?a
xhi ebꞌnaj.
6 Istaqꞌwi Komam tet ebꞌnaj:
—Kaw kꞌul hexmi heyalni,
teyinh halbꞌilkano yu yaꞌ Isaías,
yet yalnikano yaꞌ:
“Hunteqꞌan anma tiꞌ istiꞌnhe chinaqꞌni bꞌinahojan,
wal yanma xin nahat yehilo winhan.
7 Nabꞌnhe chala ta chiyiyo isbꞌa wetan,
wal xin hanhkꞌanhe ischejbꞌanil ebꞌnaj winaj chaqꞌ ebꞌnaj iskuyuꞌ yet anmahil,”b
xhihayoj.
8 Hex tiꞌ xaheyahkano chejbꞌanile aqꞌbꞌil teyet yu Komam Dios yu heyijento chejbꞌanile yet ebꞌnaj payat ichmame.
9 Kaw saqꞌal heyijen chejbꞌanile yet ebꞌnaj payat ichmame tuꞌ,
wal chejbꞌanile aqꞌbꞌil teyet yu Komam Dios xin,
xahenahulnhekantoj.
10 Tzꞌibꞌnhebꞌilkano yu yaꞌ Moisés hakaꞌ tiꞌ:
“Xahan chawil hamam,
hamiꞌ,
yuto haꞌ mak chalni tzotiꞌ txꞌoj yinh ismam ismiꞌ,
maqꞌbꞌil iskami,”
xhihayoj.
11 Yajaꞌ hex tiꞌ cheyala ta chu yalni hunu mak tet ismam yebꞌ tet ismiꞌ hakaꞌ tiꞌ:
“Mach chu inkolwahan teyinh yuto haꞌ tzet ay intiꞌan,
yetxa Komam Dios ye wuhan,”
ta xhi,
12 cheyala ta matxa yilalo chikolwa yinh ismam yebꞌ ismiꞌ.
13 Hak tuꞌ chu heyintanhenkanilto ischejbꞌanil Komam Dios kat heyijen ischejbꞌanil ebꞌnaj jichmam tuꞌ,
yajaꞌ maxhnhetaj tuꞌ,
wal xin ayto hunteqꞌanxa tzet hakaꞌ tuꞌ cheyijepaxoj,
xhi Komam.
14 Lahwi tuꞌ yawtenti Komam anma tenanto iskawilal tuꞌ,
yalni Komam xin:
—Kam txumwelo yinh tzet chiwaltiꞌan.
15 Maxhtaj haꞌ tzet cheloh chexetanto yul sat Komam Dios,
wal xin haꞌ istxꞌojal chitit yul heyanma haꞌ chexetanto yul sat Komam.
16 Makex cheyabꞌe huneꞌ tiꞌ,
aqꞌwe heyanma hetxumniloj,
xhi Komam.
17 Lahwi tuꞌ xin,
yel Komam Jesús xol anma,
isto Komam yul nha bꞌaytikꞌa aya.
Haxa yet ay Komam bꞌey tuꞌ,
isqꞌambꞌen ebꞌyaꞌ iskuywom Komam tet:
—Mamin,
¿tzet chal yelapno huneꞌ yechel maxawal tuꞌ?
xhi ebꞌyaꞌ.
18 Istaqꞌwi Komam:
—¿Tom haꞌ hunex mach maxetxum yinh tzet mawal tuꞌan?
¿Tom mach chetxumu tato sunil tzet chikolo mach chonhyetato yul sat Komam Dios,
19 yuto mach yulo janma chiꞌapni,
to yul kokꞌul chiꞌapni,
lahwi tuꞌ xin kat yel jinh?
xhi Komam.
Haꞌ chal yelapno tuꞌ tato sunil tzet ye tuꞌ kꞌul koloni machi xin chonhyetato yul sat Komam Dios.
20 Yalnipaxo Komam tet ebꞌyaꞌ iskuywom tuꞌ:
—Wal xin haꞌ istxꞌojal chitit yul yanma anma haꞌ chiꞌetanto yul sat Komam Dios.
21 Yuto yinh yanma anma chipitzkꞌati isnahni iswatxꞌen istxꞌojal,
hakaꞌ yixli,
iswinajli,
maka maxhto chimohyi kat iswatxꞌen mule,
yebꞌ ispotxꞌwahi,
22 yinh yanma tuꞌ chipitzkꞌati yelqꞌawi,
yocheniko hunu tzet ye tuꞌ yebꞌ sunil istxꞌojal,
yebꞌ leqꞌtiꞌal,
yebꞌ isqꞌaykaniko yinh istxꞌojal,
yebꞌ ischiwa iskꞌul yinh yet anmahil,
yebꞌ ishobꞌnikanh tzotiꞌ,
yebꞌ loloꞌal,
yebꞌ mach kꞌulo istxumni.
23 Sunil hunteqꞌan tuꞌ yul yanma anma chipitzkꞌatij,
haꞌ xin chiꞌetanto yanma anma yul sat Komam Dios,
xhi Komam.
Huneꞌ ix mach Israelo yayto yul yanma yinh Komam Dios
24 Lahwi tuꞌ,
isto Komam Jesús yul ismajul konhobꞌ Tiro.
Hayet yapni Komam bꞌey tuꞌ,
yokto Komam yul huneꞌ nha,
machi xin yoche Komam tato chiꞌabꞌelaxiloj,
yajaꞌ hunepnhechꞌan abꞌchalo yu anma tato apni Komam bꞌey tuꞌ.
Marcos 7:24-37
25 Ay xin huneꞌ ix ayko ischejabꞌ naj matzwalil yinh huneꞌ nichꞌan yunin.
Hayet yabꞌen ix ta apni Komam,
isto ix iskꞌatanh Komam,
yay jahno ix sata Komam.
26 Huneꞌ ix ix tuꞌ mach Israelo ix,
wal xin ah Sirofenicia ix.
Isqꞌanni ix tet Komam ta chilo Komam ischejabꞌ naj matzwalil yinh nichꞌan yunin ix.
27 Yajaꞌ taqꞌwi Komam tet ix,
yalni Komam:
—Waꞌojabꞌkano ebꞌnaj uninale bꞌabꞌel,
yuto mach kꞌuloj ta chiꞌilaxilo tzet chislo ebꞌnaj uninale kat yaqꞌlax tet metx txꞌiꞌ,
xhi Komam.
28 Yalni ix tet Komam:
—Yel Mamin,
yajaꞌ metx txꞌiꞌ tuꞌ masantikꞌa chissikꞌkanh metx isqꞌal istiꞌ ebꞌnaj uninale chiꞌaykꞌay yalanh mexha,
xhi ix.
29 Hayet yabꞌen Komam yalni ix hakaꞌ tuꞌ,
yalni Komam tet ix:
—Kaw haꞌ ye tzet maxawala,
chisje hapaxtoj,
maꞌelna ischejabꞌ naj matzwalil tuꞌ yinh hawunin,
xhi Komam.
30 Haxa yet yapni ix yatut,
hilanto ix nichꞌan tuꞌ sat txꞌat;
xaꞌelna ischejabꞌ naj matzwalil yinh ix.
Yaqꞌ kawxo Komam Jesús huneꞌ naj mach chu yabꞌeni yebꞌ mach chu istzoteli
31 Lahwi tuꞌ,
yel Komam Jesús yul ismajul konhobꞌ Tiro,
isto Komam yul ismajul konhobꞌ Sidón yebꞌ yulaj konhobꞌ ayko yul ismajul Decápolis.
Lahwi tuꞌ yapnikano Komam istiꞌ haꞌ lago Galilea.
32 Yilaxti huneꞌ naj mach chu yabꞌeni yebꞌ mach chu istzoteli iskꞌatanh Komam.
Isqꞌanni anma tet Komam tato chayo Komam isqꞌabꞌ yibꞌanh iswiꞌ naj.
33 Yinilo Komam naj xol anma,
yanikto Komam yiximal isqꞌabꞌ yul istxikin naj,
lahwi tuꞌ istzubꞌliko Komam yinh yiximal isqꞌabꞌ,
yanayo Komam yibꞌanh yaqꞌ naj.
34 Istꞌanhxikanh Komam satkanh,
yah iskꞌul,
yalni Komam hakaꞌ tiꞌ:
—¡Efata!
xhi Komam.
Haꞌ chalilo huneꞌ tuꞌ ¡Hajlojabꞌi!
35 Yalnhena Komam huneꞌ tuꞌ xin,
ishajlo istxikin naj.
Iswatxꞌipaxilo yaqꞌ naj,
istzotelkanh naj.
36 Yalnikano Komam tet anma tato machi bꞌay chihal-laxikꞌo huneꞌ tuꞌ,
yajaꞌ yet iskachni Komam anma tuꞌ kaw ekꞌbꞌalto ispujbꞌakꞌoj.
37 Hayet yabꞌen anma huneꞌ tuꞌ kaw kꞌayilo iskꞌul,
yalni hakaꞌ tiꞌ:
—Sunil tzet chiswatxꞌe Komam kꞌul chiꞌelikoj,
chaqꞌ hajlo Komam istxikin ebꞌnaj mach chabꞌe,
kat yaqꞌni tzotelo Komam mak maxhtikꞌa chu istzoteli,
xhi anma.