Ischejto Komam Jesús 70 (lahonhebꞌ iskanhwinaj) ebꞌyaꞌ iskuywom
10
Lahwi tuꞌ xin,
issikꞌlenilo Komam Jesús 70 (lahonhebꞌ iskanhwinaj)a ebꞌyaꞌ iskuywom.
Katawanh xin yu yanito Komam ebꞌyaꞌ yul hunun konhobꞌ yebꞌ yul aldea bꞌayejtuꞌwal bꞌay chikawyekꞌpaxo Komam.
2 Hayet maxhto chito ebꞌyaꞌ,
yalni Komam tet ebꞌyaꞌ:
«Lahan anma yebꞌ ixim trigo xaqꞌanbꞌiloj.
Yeli kaw txꞌiꞌal anma tuꞌ,
yajaꞌ haywanhnhe mak chalni Istzotiꞌ Komam Dios xol anma.
Yuxin txahlanhwe tet Komam Yahaw munil tiꞌ,
hak tuꞌ xin chischejti Komam ismunlawom chul inokanh anma,
kat yaniko isbꞌa yul inqꞌabꞌan.
3 ¡Asiꞌwe xin!
Hakaꞌ noꞌ meꞌ chito xol noꞌ oj,
hak tuꞌ chexwute wanitojan xol anma.
4 Machika xin cheyito hetzꞌispa yebꞌ xin hetxꞌuy bꞌay ayayto hemelyu,
yebꞌpaxo hehelbꞌal xanhabꞌ.
Mach chexokpaxo linhno heqꞌambꞌeꞌ hanikꞌ ye iskꞌul hunu mak anmahil yulaj bꞌeh.
5 »Hayet chexapni bꞌey hunu nha,
halwe yinh bꞌabꞌelal hakaꞌ tiꞌ:
“Yaqꞌabꞌayo Komam Dios aqꞌankꞌulal tet huneꞌ nhahil anma tiꞌ,”
kexchi.
6 Ta ay anma chiꞌochen huneꞌ aqꞌankꞌulal tuꞌ,
chꞌaqꞌlax tet hakaꞌ cheyute heqꞌanni tet Komam Dios.
Ta ay mak mach chiꞌochenpaxo xin,
mach chu ischahni.
7 Haꞌtikꞌa bꞌey huneꞌ nha bꞌay chꞌochelax aqꞌankꞌulal tuꞌ,
haꞌ tuꞌ chexkankanoj.
Mach chehekꞌ bꞌay chexwayi.
Sunil tzet chꞌaqꞌlax helobꞌ,
cheloh kat heyukꞌnipaxo tzet chꞌaqꞌlax yibꞌanh heyoch,
yuto haꞌ naj munlawom chꞌaqꞌlax tzet chislo naj.
8 Hayet chexapni yul hunun konhobꞌ bꞌay chexchahlaxi,
cheloh tzet chꞌaqꞌlax teyet.
9 Cheyaqꞌnipaxo kawxo anma yaꞌay,
kat heyalni tet sunil anma hakaꞌ tiꞌ:
“Istiempohalxa heyaniko hebꞌa yalanh yip Komam Dios tinanh,”
kexchi.
10 »Ta ay hunu konhobꞌ bꞌay mach chexchahlaxi hayet chexpaxtij cheyalnikano yulaj iscallehal konhobꞌ tuꞌ hakaꞌ tiꞌ:
11 “¡Wal ispojojal hekonhobꞌ maꞌok yinh jojanh chikomaqꞌilojanh yinh hesat!
Haꞌ xin chalniloj tato matxa jokanh teyinh tanhe xin chijalkanojanh teyet,
ta ayxako yip Komam Dios hekawilal,”
kexchi.
12 Chiwalpaxojan teyet tato hayet chꞌapni istzꞌayikal yet chilni Komam Dios yinh tzet chiꞌeliko anma,
haꞌ huneꞌ konhobꞌ tuꞌ ekꞌbꞌal isyaꞌtajil chischah sata konhobꞌ Sodoma,»
xhi Komam Jesús tet ebꞌyaꞌ iskuywom tuꞌ.
Hunteqꞌan konhobꞌ mach yijemo yinh tzet chal Komam Jesús
13 Yalnipaxo Komam Jesús:
«Hex ay bꞌey konhobꞌ Corazín,
¡kꞌanchꞌan hex!
¡Kꞌanchꞌan hexpaxo ay bꞌey konhobꞌ Betsaida!
Ta haꞌ yul konhobꞌ Tiro yebꞌ konhobꞌ Sidón yelax hunteqꞌan kꞌaybꞌalkꞌule hakaꞌ chu texol tiꞌ,
kaw yinh anhemi isbꞌejkano anma istxꞌojal,
yamahto anma tanh yinh iswiꞌ,
yamipaxiko xil isqꞌap chiyenilo bꞌiskꞌulal tet Komam Dios.
14 Hayet chiꞌayilo istzꞌayikal bꞌay chil Komam Dios yinh tzet chiꞌeliko anma,
kaw ekꞌnaxa niman isyaꞌtajil chechah sata konhobꞌ Tiro yebꞌpaxo konhobꞌ Sidón.
15 Haxa hex ah Capernaúm,
¿ham heyalni ta chexilaxkanh satkanh?
¡Machoj!
Wal xin chexqꞌojlaxto xol kamom,»
xhi Komam.
16 Yalni Komam tet ebꞌyaꞌ iskuywom tuꞌ:
«Haꞌ mak chꞌabꞌen tzet cheyala,
chabꞌepaxo tzet chiwalan.
Yajaꞌ haꞌ mak chiyahni tzet cheyala chinisyahpaxojan.
Haꞌ mak chinyahni tuꞌan,
haꞌ yinh Komam Dios chiyahwahi yuto Komam Anheintijan,»
xhi Komam Jesús.
Yet ismeltzo ebꞌyaꞌ 70 (lahonhebꞌ iskanhwinaj) iskuywom Komam Jesús
17 Kaw yinh tzalahilal meltzo ebꞌyaꞌ 70 (lahonhebꞌ iskanhwinaj) iskuywom Komam Jesús,
yalni ebꞌyaꞌ tet Komam:
—Mamin,
sunil ischejabꞌ naj matzwalil yijen tzet jalanh yet jaqꞌni bꞌinahojanh habꞌi,
xhi ebꞌyaꞌ.
18 Istaqꞌwi Komam tet ebꞌyaꞌ:
—Kaw yel cheyala,
wilan istitkꞌay naj matzwalil satkanh hakaꞌ isjepla hunu kꞌuh.
19 Yajaꞌ Haninan waqꞌan heyip hebꞌelwikꞌo yibꞌanh noꞌ labꞌa yebꞌ xin yibꞌanh noꞌ kꞌolotx.
Waqꞌnipaxojan heyip heqꞌoji yinh naj matzwalil,
naj chichiwako iskꞌul jinh;
hak tuꞌ xin mach chu kexyetan naj.
20 Chiwalan teyet mach chextzalahi yuto chiꞌel ischejabꞌ naj matzwalil yinh anma heyu,
tzalahanhwej yuto tzꞌibꞌnhebꞌilxa hebꞌi yul satkanh iskꞌatanh Komam Dios,
xhi Komam tet ebꞌyaꞌ.
Kaw tzala yanma Komam Jesús
21 Kaw tzala yanma Komam Jesús yu yip Komam Espíritu Santo,
yalni Komam:
«Mam,
Yahaw hach satkanh,
Yahaw hachpaxo yinh huneꞌ sat yibꞌanhqꞌinal tiꞌ,
chiwalan kꞌul-la tzotiꞌ tawinh yuto chayelo tet ebꞌnaj mach iskuyu hunteqꞌan ewan ye hawu tet ebꞌnaj kaw ay iskuyu yebꞌ kaw ay tzet yohtaj.
Hawute hak tuꞌ Mamin,
yuto hak tuꞌ el yinh hakꞌul,»
xhi Komam.
22 Lahwi tuꞌ xin,
yalni Komam tet anma:
«Sunil aqꞌbꞌilxa yul inqꞌabꞌan yu Inmaman.
Machi mak ohtanhe hanin Kꞌahole intiꞌan,
kachannhe Komam Dios ohtanhe hinan.
Machi mak ohtanhe Inmaman,
haninnhehan Iskꞌahol intiꞌan wohtajan.
Chiwaqꞌpaxojan ohtanhelaxo Inmaman tet mak chiwochehan,»
xhi Komam.
23 Lahwi tuꞌ xin yalni Komam tet ebꞌyaꞌ iskuywom ischukil:
—Saqꞌal yet mak chiꞌilni hunteqꞌan cheyil tiꞌ,
24 yuto kaw txꞌiꞌal ebꞌyaꞌ ischejabꞌ Komam yet payat yebꞌ ebꞌnaj rey ekꞌlena payxa tuꞌ,
yoche yilaꞌ hunteqꞌan cheyil tiꞌ,
yaj mach yil ebꞌnaj.
Yoche yabꞌeꞌpaxo ebꞌnaj hakaꞌ hex tiꞌ,
yaj machi yabꞌe ebꞌnaj,
xhi Komam.
Yechel yinh huneꞌ naj ah Samaria kaw kꞌul iskꞌul
25 Ay huneꞌ naj kuywawom yinh isley yaꞌ Moisés apni tzotelo tet Komam Jesús,
yaj yunhe yilwen naj Komam,
yuxin yal naj hakaꞌ tiꞌ:
—Mam Kuywawom,
¿tzet wal inwatxꞌenan yunhe inchahnihan huneꞌ qꞌinal mach istanhbꞌal?
xhi naj.
26 Istaqꞌwikanh Komam tet naj:
—¿Hawohtami tzet tzꞌibꞌnhebꞌilkano yinh isley yaꞌ Moisés?
¿Tzet kuybꞌanilehal chawiqꞌa yet chawilni?
xhi Komam.
27 Istaqꞌwi naj:
—Oche Komam Dios Jahawil yebꞌ sunil hawanma yebꞌ sunil hakꞌul yebꞌ sunil hanabꞌal,
yebꞌpaxo sunil hawip.
Xahan chawil hawet anmahil hakaꞌ chu hayaꞌilnhen habꞌa,
xhihayoj,
xhi naj.
28 Yalni Komam tet naj:
—Kaw kꞌul mayu hawalni.
Ta chayije tzet chala,
ay haqꞌinal mach istanhbꞌal,
xhi Komam tet naj.
29 Yajaꞌ huneꞌ naj kuywawom tuꞌ,
yoche naj chal-lax naj kꞌulal yinh sat anma,
yuxin yal naj tet Komam Jesús:
—¿Mak xin wet anmahilan hawalni?
xhi naj.
30 Yalni Komam tet naj:
—Yet hunel ay huneꞌ naj winaj lanhan isto yul bꞌeh chitit bꞌey Jerusalén chiꞌapni bꞌey konhobꞌ Jericó,
ay hunteqꞌan ebꞌnaj elqꞌom elilo yinh naj yul bꞌeh tuꞌ.
Yinilo ebꞌnaj sunil tzet iqꞌbꞌil yu naj,
yinipaxilo ebꞌnaj xil isqꞌap naj.
Ismaqꞌni taho ebꞌnaj naj,
etza kam naj yu ebꞌnaj,
lahwi tuꞌ yelkanh ebꞌnaj.
31 Kꞌuxan xin yekꞌto huneꞌ naj sacerdote Israel yul huneꞌ bꞌeh tuꞌ,
hayet yilniko naj naj,
ishekꞌnilo isbꞌa naj tet naj,
isto naj yinh isbꞌel.
32 Yekꞌpaxto huneꞌ naj levita yul huneꞌ bꞌeh tuꞌ,
tonhe yilpaxiko naj yinh naj,
ishekꞌnipaxo isbꞌa naj,
isto naj xin.
33 Yaj ay huneꞌ naj ah Samaria ekꞌpaxo yul huneꞌ bꞌeh tuꞌ.
Hayet yilniko naj yinh naj etza kam tuꞌ,
kaw tzꞌaykanh iskꞌul naj yinh naj.
34 Ishitziko naj iskꞌatanh naj,
yanhten naj islahwilal naj tuꞌ yu aceite yebꞌ vino.
Ispichniko naj qꞌap yinh islahwilal naj tuꞌ.
Yanahto naj naj yibꞌanh ischeh.
Yinito naj naj bꞌey huneꞌ waybꞌal,
yok naj yilno naj.
35 Haxa yinh hunxa tzꞌayik yet ispaxto naj,
yaqꞌni naj kabꞌebꞌ chꞌen melyu denario tet naj yahaw waybꞌal tuꞌ,
yalni naj xin:
“Chawilkano huneꞌ naj tiꞌ inqꞌanaꞌan.
Ta ayto tzet chakꞌay yinh naj,
chintohlahan yet chinhulan hunelxa,”
xhi naj,
xhi Komam.
36 Isqꞌambꞌen Komam Jesús tet naj kuywawom yinh isley yaꞌ Moisés hakaꞌ tiꞌ:
—Xol ebꞌnaj oxwanh tuꞌ,
¿mak kaw yet anmahil naj etza kam yu ebꞌnaj elqꞌom tuꞌ chute hawalni?
xhi Komam tet naj.
37 Istaqꞌwikanh naj kuywawom tuꞌ:
—Haꞌ naj tzꞌay iskꞌul yok kolwal yinh naj,
xhi naj.
Yalni Komam Jesús:
—Wal tinanh xin,
haꞌ tzet iswatxꞌe naj tuꞌ,
hakojabꞌ tuꞌ chawute,
xhi Komam tet naj.
Parábola del Buen Samaritano
Apni Komam Jesús yatut ix Marta yebꞌ ix María
38 Isto Komam Jesús yinh isbꞌel,
yapni Komam bꞌey huneꞌ aldea.
Haꞌ bꞌey tuꞌ xin ay huneꞌ ix,
Marta isbꞌi.
Ischahni ix Komam yul yatut.
39 Aypaxo huneꞌ isnoh ix,
María isbꞌi.
Ix María tuꞌ,
ay tzꞌonhno ix yich yoj Komam Jesús yu yabꞌen ix tzet chal Komam.
40 Walpaxo ix Marta,
kaw haꞌ iswatxꞌen ix ismunil ayko yinh iskꞌul.
Yuxin hitziko ix iskꞌatanh Komam Jesús,
yalni ix:
—Mamin,
¿tzet yinh tonhe chawila chinisbꞌejnikanojan ix innohtiꞌan munil inchukilan?
Hal tet ix kolwahojabꞌ nino ix winhan,
xhi ix Marta tet Komam.
41 Istaqꞌwikanh Komam xin: