Yechel yinh huneꞌ naj ilom munil
16
Yalnipaxo Komam Jesús huneꞌxa yechel tiꞌ tet ebꞌyaꞌ iskuywom:
«Ay huneꞌ naj qꞌalom,
ay xin huneꞌ naj ayko yilomalo ismunil naj.
Yajaꞌ yabꞌelo naj patrón tuꞌ ta lanhan iskꞌaynilo naj ilom munil tuꞌ tzet ay naj.
2 Yuxinto yawte naj patrón naj ilom munil tuꞌ,
yalni naj tet naj:
“Mahul hal-laxo wetan tato hach tiꞌ lanhan hakꞌaynilo tzet ayinan.
Wal tinanh xin,
kaw yilal tzꞌajan chawaqꞌkano sunil tzet ayko yul haqꞌabꞌ wuhan,
yuto chaxhwilojan yinh inmuniltiꞌan,”
xhi naj.
3 »Yalni naj ilom munil tuꞌ yinh isnabꞌal:
“¿Tzet chiwute hinbꞌahan,
yuto chiyiqꞌalo inpatronhan inmuniltiꞌan?
Yaj matxa qꞌaynajo innimaniltiꞌan yinh munil kaw yaꞌtaj.
Chintxꞌixwipaxojan wekꞌan qꞌano tzet ye tuꞌ matanil tet anma.
4 Wal tinanh wohtaxahan tzet chiwute hinbꞌahan,
waxanhka machi inmunilan ay mak chinchahnihan bꞌey yatut,”
xhi naj.
5 »Lahwi tuꞌ xin,
yichiko naj yawten ebꞌnaj ay iskꞌas tet ispatrón tuꞌ yinh hununtajil.
Isqꞌambꞌen naj tet naj bꞌabꞌel:
“¿Hanta hakꞌas tet inpatronhan?”
xhi naj.
6 Yalni naj xin:
“100 (hokꞌal) barril aceite inkꞌasan,”
xhi naj.
Yalni naj ilom munil tuꞌ:
“Tinanh xin,
ay yumal hakꞌas lah.
Ayanh tzꞌonhnoj,
50 (lahonh yoxkꞌalxanhe) chawuteko hakꞌas yinh huneꞌ hum tiꞌ yinh anhe,”
xhi naj.
7 »Lahwi tuꞌ xin,
isqꞌambꞌen naj tet hunxa naj:
“¿Hanta hakꞌas tet inpatronhan?”
xhi naj.
Istaqꞌwi naj:
“100 (hokꞌal) mal ixim trigo,”
xhi naj.
Yalni naj ilom munil tuꞌ:
“Ay yumal hakꞌas lah,
80 (kanhwinajxanhe) chawuteko hakꞌas yinh teꞌ,”
xhi naj.
8 »Kꞌayilo iskꞌul naj patrón tuꞌ yinh naj ilom munil tuꞌ,
waxanhka txꞌoj isnabꞌal naj,
yaj kaw helan naj iskolni isbꞌa.
Yuxin chiwalan teyet,
kaw bꞌiskꞌulal,
yuto haꞌ anma mach ohtanhe Komam Dios,
kaw helan iswatxꞌen istxꞌojal.
Wal ebꞌnaj yet Komam yehi,
kaw mach helano ebꞌnaj iswatxꞌen tzet choche Komam Dios.
9 »Chiwalan teyet,
haꞌ chꞌen melyu chu iswatxꞌen chꞌen istxꞌojal;
wal hex hex tiꞌ xin,
yinhnhehojabꞌ iskꞌulal cheyako hemelyu,
haxinwal ay mak chako isbꞌa yul isqꞌabꞌ Komam Dios.
Ta hak tuꞌ,
hayet matxa tzet chꞌokniko chꞌen melyu heyu,
Komam Dios chexchahni bꞌey huneꞌ heyatut satkanh yinh hunelnhe.
10 »Haꞌ mak kꞌul chute isbꞌa yinh nichꞌan chꞌaqꞌlax yul isqꞌabꞌ,
kaw kꞌulpaxo chute isbꞌa yinh niman chꞌaqꞌlax tet.
Hak tuꞌ xin,
haꞌ mak machiswalil chute isbꞌa yinh nichꞌan chꞌaqꞌlax tet,
kaw machiswalil chutepaxo isbꞌa yinh niman chꞌaqꞌlax yul isqꞌabꞌ.
11 Yuxin ta mach kꞌulo cheyute hebꞌa yinh heqꞌalomal yul sat yibꞌanhqꞌinal tiꞌ,
¿haꞌ tom xin huneꞌ isqꞌalomal satkanh chiꞌaqꞌlax teyet?
¡Machoj!
12 Hak tuꞌ xin ta mach kꞌulo cheyute hebꞌa yinh tzet ye tuꞌ mach heyeto yehi,
¿hatokꞌanabꞌ huneꞌ heyettikꞌa yehi chiꞌaqꞌlax teyet?
¡Machoj!
13 »Machi hunu naj munlawom chu ismunla yinta kawanh patrón,
yuto ta choche naj naj bꞌabꞌel,
chisyah naj naj iskabꞌ.
Yebꞌpaxo ta yijem chute isbꞌa naj tet naj bꞌabꞌel,
chismanhkꞌo naj tzet chal naj iskabꞌ.
Hak tuꞌ xin mach chu koyijen tzet chal Komam Dios ta ayko janma yinh qꞌalomal,»
xhi Komam Jesús tet ebꞌyaꞌ iskuywom tuꞌ.
14 Haxa yet yabꞌen ebꞌnaj fariseo tzet yal Komam Jesús,
yok ebꞌnaj bꞌuchwal yinh Komam,
yuto kaw ayko yanma ebꞌnaj yinh ismelyu.
15 Yalni Komam tet ebꞌnaj:
«Hex tiꞌ,
satanhe anma kaw kꞌul cheyute hebꞌa,
yaj Komam Dios yohta tzet ayayto yul heyanma.
Haꞌ tzet ye tuꞌ kaw niman yelapno ye yul sat anma,
machi yelapno yul sat Komam Dios,»
xhi Komam Jesús.
Tzotiꞌ kꞌul hul selelo isley yaꞌ Moisés
16 Yalnipaxo Komam Jesús:
«Yalanhto maxhto chul yaꞌ Juan,
anikanh haꞌ iswiꞌ anma,
kuylax isley yaꞌ Moisés yebꞌ tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat.
Yinhxa istiempohal yaꞌ Juan tuꞌ xin,
ichiko ispujbꞌalaxikꞌo Tzotiꞌ kꞌul yinh tzet chu yok anma yul isqꞌabꞌ Komam Dios,
haꞌ anma tuꞌ chaqꞌ yip yanma yok yul isqꞌabꞌ Komam.
17 »Haꞌ satkanh yebꞌ txꞌo txꞌotxꞌ tiꞌ chitanhiloj,
wal isley Komam Dios,
machi hunu kuybꞌanil chꞌekꞌto yet yijni isbꞌa,»
xhi Komam.
Kuybꞌanile yinh mak chispohle isbꞌa yebꞌ yixal
18 Yalnipaxo Komam Jesús:
«Ta ay hunu naj winaj chispohle isbꞌa yebꞌ yixal,
kat ismohyi yebꞌ hunuxa ix,
chako naj ismul yul sat Komam Dios.
Yebꞌpaxo naj chiꞌiqꞌni ix pohlebꞌil isbꞌa yebꞌ yichamil tuꞌ,
chapaxiko ismul naj yul sat Komam Dios,»a
xhi Komam.
Naj qꞌalom yebꞌ naj mebꞌaꞌ Lázaro
19 Yalnipaxo Komam Jesús huneꞌxa kuybꞌanile hakaꞌ tiꞌ:
«Yet hunel ay huneꞌ naj winaj kaw qꞌalom,
hanhkꞌanhe qꞌap xilqꞌape kaw kꞌul,
kaw ay istohol chako naj yinh.
Chekꞌtzen naj nimeta qꞌinh yul yatut hunun tzꞌayik.
20-21 Aypaxo huneꞌ naj kaw mebꞌaꞌ,
Lázaro isbꞌi;
chiꞌay tzꞌonhno istiꞌ ispultahil yatut naj qꞌalom tuꞌ,
kaw choche naj yaqꞌaꞌ noho iskꞌul yu isqꞌal istiꞌ naj qꞌalom chiꞌaykꞌayti sat mexha.
Kaw xin yaꞌay naj yu txꞌak,
chꞌapni xin metx txꞌiꞌ isleqꞌaꞌ istxꞌak naj tuꞌ.
22 Yaj hul huneꞌ tzꞌayik bꞌay kam naj Lázaro tuꞌ,
yilaxto yanma naj yu ebꞌnaj yángel Komam Dios bꞌey huneꞌ ehobꞌal iskꞌatanh yaꞌ Abraham.
Iskampaxo naj qꞌalom tuꞌ,
ismujlax naj.
23 Haxa yet ayxa naj qꞌalom yul kambꞌal,
lanhan xin yekꞌyaꞌ yanma naj bꞌey tuꞌ,
istꞌanhxito naj yilnito naj naj Lázaro iskꞌatanh yaꞌ Abraham.
24 »Yah yaw naj qꞌalom tuꞌ,
yalni naj hakaꞌ tiꞌ:
“Mam Abraham,
tzꞌayojabꞌ hakꞌul winhan.
Chejti naj Lázaro inkꞌatanhan inqꞌanaꞌan,
islabꞌaꞌabꞌ naj iswiꞌ yiximal isqꞌabꞌ xol ha haꞌ,
kat yul yaqꞌno chewbꞌo naj waqꞌan,
yuto kaw chꞌekꞌyaꞌ wanmahan xol huneꞌ qꞌa qꞌaꞌ tiꞌ,”
xhi naj qꞌalom tuꞌ.
25 »Istaqꞌwi yaꞌ Abraham tuꞌ:
“Hach wet anmahil tijabꞌ yul hakꞌul yet ayach yul sat yibꞌanhqꞌinal,
kaw kꞌulchꞌannhe ekꞌ hawilaꞌ,
wal naj Lázaro tiꞌ,
kaw isyaꞌtajilnhe bꞌey naj yilaꞌ.
Yajaꞌ tinanh,
lanhan yaqꞌni tzalaho iskꞌul naj,
wal hach xin,
lanhan hawabꞌen isyaꞌtajil.
26 Yebꞌpaxoj,
ay huneꞌ niman xabꞌ koxol,
walka ta ay mak choche chꞌekꞌto bꞌay ay hex tuꞌ,
mach chuhi,
yebꞌpaxo ta ay mak bꞌay ay hex tuꞌ choche chꞌekꞌti bꞌey tiꞌ,
mach chupaxoj,”
xhi yaꞌ Abraham tuꞌ tet naj.
27 »Yalnipaxo naj qꞌalom tuꞌ:
“Ta hak tuꞌ xin,
Mam Abraham,
kaw chinqꞌanan tawet ta chachejto naj Lázaro tuꞌ bꞌey yatut inmaman,
28 kat yalni naj yabꞌeꞌ howanh wuxhtajan ay bꞌey tuꞌ,
haxinwal mach chul ebꞌnaj yetaꞌ yanma bꞌay ay intiꞌan,”
xhi naj.
29 »Yalnipaxo yaꞌ Abraham tuꞌ:
“Wal ebꞌnaj hawuxhta tuꞌ,
ayko tzet tzꞌibꞌnhebꞌil yu yaꞌ Moisés yebꞌ tzet tzꞌibꞌnhebꞌil yu ebꞌyaꞌ ischejabꞌ Komam Dios tet ebꞌnaj.
¡Isyijehojabꞌ ebꞌnaj tzet chala!”
xhi yaꞌ.
30 »Istaqꞌwikanh naj qꞌalom tuꞌ:
“Hoꞌ,
yeli Mam Abraham,
yajaꞌ ta ay hunu naj kamnaxa chiꞌitzitzibꞌikanh,
kat isto yalno tet ebꞌnaj wuxhta tuꞌan chimisbꞌejaꞌkano ebꞌnaj istxꞌojal,”
xhi naj.
31 »Yalnipaxo yaꞌ Abraham:
“Tato mach choche ebꞌnaj yabꞌe tzet yalkano yaꞌ Moisés yebꞌ tzet halbꞌilkano yu ebꞌyaꞌ ischejabꞌ Komam Dios,
waxanhka ay hunu naj kamnaxa chiꞌitzitzbꞌikanh xol kamom,
kat isto yalno tet ebꞌnaj,
maxhtikꞌam chahpaxiko ebꞌnaj yinh iskꞌul,”
xhi yaꞌ Abraham tet naj,»
xhi Komam Jesús.