Kaw ay ismay ta chijaqꞌ aykꞌayo hunu mak yinh istxꞌojal
17
Yalni Komam Jesús tet ebꞌyaꞌ iskuywom:
«Aynhetikꞌa istxꞌojal bꞌay chꞌaykꞌay anma yul sat yibꞌanhqꞌinal tiꞌ,
¡yajaꞌ kꞌanchꞌan mak chꞌaqꞌni aykꞌayo hunu maka!
2 Haꞌ huneꞌ mak tuꞌ,
kꞌulojabꞌ iskꞌal-laxiko hunu niman ischꞌenal chꞌen molino yinh isnuqꞌ,
kat istirlaxto xol haꞌ mar sata ta chaqꞌ aykꞌayo yinh istxꞌojal hunu mak uninto winhan,»
xhi Komam.
3 Yalnipaxo Komam:
«¡Nannhehojabꞌ heyu hex tiꞌ!
Ta ay hunu heyuxhta maka hunu heyanabꞌ chiyako ismul teyet,
kachwanhwe yinh.
Yaj ta chisnah isbꞌa,
aqꞌwe nimankꞌulal yinh,
4 waxanhka hujel chako ismul teyet yinh huneꞌ tzꞌayik,
yaj ta hujel chꞌapni isqꞌanaꞌ nimankꞌulal teyet,
yilal heyaqꞌni nimankꞌulal yinh,»
xhi Komam.
Desdicha Hacia Aquellos que Hagan Pecar a Otros
Ay tzet chisje kowatxꞌeni tato chijako janma yinh Komam Dios
5 Isqꞌanni ebꞌyaꞌ ischejabꞌ Komam Jesús tet hakaꞌ tiꞌ:
—Aqꞌ yip janmahanh yinh Komam Dios,
xhi ebꞌyaꞌ.
6 Istaqꞌwi Komam tet ebꞌyaꞌ:
—Ta kaw cheyako heyanma yinh Komam Dios,
waxanhka chiꞌichiko hakaꞌ hunu teꞌ nichꞌan hinhat mostaza,
wal tuꞌ chu heyalni tet hunu teꞌ qꞌebꞌtaj sicómoro hakaꞌ tiꞌ:
“Hokꞌati habꞌa bꞌey tiꞌ,
kat hato hatzꞌunnayto habꞌa xol haꞌ mar,”
ta kexchi,
chisyije teꞌ tzet cheyala,
xhi Komam.
Haꞌ tzet chiswatxꞌe hunu naj chejabꞌ
7 Yalni Komam:
—Ta ay hunu hechejabꞌ ispeto tꞌoko txꞌotxꞌ,
maka ilo meꞌ,
mataxka cheyal tet naj:
“Okanh,
ayanh tzꞌonhnoj kat hawaꞌi,”
¿Tom kexchi xin?
8 ¡Machoj!
To haꞌ cheyal tet naj:
“Watxꞌe tzet chinlohan,
chilahwi tuꞌ,
kat hawok habꞌatxnikꞌo tzet chiwochehan,
chilahwo inwaꞌkanojan xin,
kat hawaꞌo hach tiꞌ,”
kexchi.
9 ¿Tom xin cheyaqꞌ yuchꞌandiosal tet naj yu chisyijen naj tzet cheyala?
¡Machoj!
10 Hakaꞌ huneꞌ naj chejabꞌ tuꞌ,
hakex tuꞌ hex tiꞌ.
Lahwi hewatxꞌen sunil bꞌaytet chejbꞌil hewatxꞌe yu Komam Dios,
kat heyalni hakaꞌ tiꞌ:
“Hanhonhtiꞌanh chejabꞌ machi yelapno jehanh,
yuto haꞌ tzet chejbꞌil kowatxꞌenanh,
haꞌ kowatxꞌehanh,”
kexchihojabꞌi,
xhi Komam.
Yaqꞌ kawxo Komam Jesús lahonhwanh ebꞌnaj ayko lepra yinh
11 Yet lanhan isto Komam Jesús yul isbꞌelal Jerusalén,
yekꞌto Komam xolbꞌal ismajul Samaria yebꞌ ismajul Galilea.
12 Hayet yapni Komam bꞌey huneꞌ aldea,
yelilo 10 (lahonhwanh) ebꞌnaj winaj ischahno Komam.
Ayko yabꞌil lepraa yinh ebꞌnaj,
yuxin nahat kankano linhno ebꞌnaj.
13 Istzabꞌniko ebꞌnaj yahwi tet Komam:
—Mam Jesús,
Mam Kuywawom,
¡kaw tzꞌayojabꞌ hakꞌul jinhanh!
xhi ebꞌnaj.
14 Hayet yilni Komam Jesús ebꞌnaj,
yalni Komam tet ebꞌnaj:
—As yewe hebꞌa sata ebꞌnaj sacerdote Israel,
xhi Komam tet ebꞌnaj.
Hayet lanhan isbꞌelwi ebꞌnaj tuꞌ,
yelkano huneꞌ yabꞌil tuꞌ yinh ebꞌnaj.
15 Huneꞌ naj xol ebꞌnaj tuꞌ,
hayet yilni naj ta kaw kꞌulxa ye isnimanil,
ismeltzoti naj yinh kaw tzalahilal yalni kꞌul-la tzotiꞌ yinh Komam Dios yinh kaw ip.
16 Hayet yapni naj iskꞌatanh Komam Jesús,
yay jahno naj sata Komam yu yaqꞌni naj yuchꞌandiosal tet Komam.
Huneꞌ naj tuꞌ,
ah Samaria naj.
17 Lahwi tuꞌ,
yalni Komam Jesús:
—Yaj 10 (lahonhwanh) ebꞌnaj maꞌel huneꞌ yabꞌil tiꞌ yinh,
¿bꞌaytuꞌwal ayko 9 (bꞌalonhwanhxa) ebꞌnaj?
18 ¿Tom hanhkꞌanhe huneꞌ naj nan konhobꞌal tiꞌ mahul aqꞌno yuchꞌandios tet Komam Dios?
xhi Komam.
19 Yalni Komam tet naj:
—Ahanhlinhnoj,
kat hapaxtoj.
Yu maxawako hawanma yinh Komam Dios,
yuxin makaxhanhchahi,
xhi Komam tet naj.
Yet chiꞌok Komam Dios Jahawiloj yinh sunilbꞌal tiempo
20 Ay hunteqꞌan ebꞌnaj fariseo qꞌambꞌen tet Komam Jesús bꞌaqꞌinh chihul istiempohal yet chꞌok Komam Dios Yahawiloj.
Istaqꞌwi Komam:
—Hayet chꞌok Komam Dios yahawiloj,
mach chu jilni yu kosat.
21 Yuxin machi mak chu yalni:
“Haꞌ bꞌey tiꞌ aya,”
makato “Haꞌ bꞌey tuꞌ aya,”
mach xhihoj.
Yuto haxa yul yanma anma chꞌok Komam Dios Yahawoj,
xhi Komam.
22 Lahwi tuꞌ xin,
yalni Komam tet ebꞌyaꞌ iskuywom:
—Chiꞌayilo huneꞌ tiempohal bꞌay cheyala:
Ayxikꞌa chul Komam Aqꞌbꞌilti koxol yu Komam Dios hunelxa,
waxanhka huneꞌnhe tzꞌayik,
kexchi,
yaj maxhtikꞌa chinheyilaꞌan.
23 Yuxin,
waxanhka ay anma chihalni teyet:
“Ay Komam bꞌey tiꞌ lah,”
makato aypaxo anma chihalni:
“Haꞌ tuꞌ ay Komam bꞌey tuꞌ lah,”
waxanhka xhi,
kaw mach chexoktzujno yinta ebꞌnaj.
24 Yuxin chiwalkanojan teyet,
hakaꞌ chu yah jepla kꞌuh yinh sunil satkanh,
hak tuꞌ chu wulan,
Hanin Aqꞌbꞌilintijan texol yu Komam Dios.
25 Yajaꞌ yinh bꞌabꞌel kaw chiꞌaqꞌlax ekꞌoyaꞌ wanmahan yu anma kat kinyintanhenkaniltojan yinh huneꞌ tiempohal tiꞌ.
26 »Hakaꞌ yu anma yinh istiempohal yaꞌ Noé,
hak tuꞌ chiyupaxo anma yet chinhulan yinh iskayelal,
Hanin Aqꞌbꞌilintijan texol yu Komam Dios.
27 Yinh istiempohal yaꞌ Noé tuꞌ,
ay ebꞌnaj waꞌo chu,
aypaxo ebꞌnaj ukꞌu teꞌ,
ay mak lanhan ismohyi.
Haꞌ hunteqꞌan tuꞌ lanhan iswatxꞌen anma yet yokto yaꞌ Noé yul teꞌ niman barco.
Lahwi yokto yaꞌ Noé tuꞌ,
istit huneꞌ niman yaxnhabꞌ,
iskamilo sunil anma yu haꞌ.
28 »Hak tuꞌ yupaxo anma yinh istiempohal yaꞌ Lot.
Kaw matzet chal iskꞌul anma,
saqꞌal iswaꞌi yebꞌ chiꞌukꞌipaxoj.
Chiloqꞌwi kat istxonhwi.
Chistzꞌunni istzꞌunubꞌ,
chahnipaxokanh yatut.
29 Yajaꞌ yet yelti yaꞌ Lot yul konhobꞌ Sodoma tuꞌ,
hakaꞌxanhe yay nhabꞌ,
hakxanhe tuꞌ yayilo qꞌaꞌ yebꞌ azufreb satkanh.
Iskamilo anma sunil yu huneꞌ qꞌaꞌ tuꞌ.
30 Hakaꞌ yu anma yet huneꞌ tiempohal tuꞌ,
hak tuꞌ chu anma yinh huneꞌ tzꞌayikal bꞌay chinhulan,
Hanin Aqꞌbꞌilintijan texol yu Inmaman.
31 »Yet huneꞌ tzꞌayikal tuꞌ,
haꞌ mak ayahto yibꞌanh yakꞌalil yatut mach chu yayti yinolti isqꞌuybꞌe yul yatut,
yebꞌ mak ayto xol ismunil,
matxa chu ispaxti yatut.
32 Tijabꞌ yul hekꞌul yinh yixal yaꞌ Lot.
33 Haꞌ mak chꞌoqꞌ yanma yinh tzet aya,
mach chischah isqꞌinal yinh hunelnhe.
Haxa mak hinan iskꞌul isbꞌejnikano tzet ye tuꞌ winhan,
chischah isqꞌinal mach istanhbꞌal.
34 »Chiwalan teyet,
ta ay kawanh anma chiway sat istxꞌat yet huneꞌ aqꞌbꞌal tuꞌ,
huneꞌ chiꞌilaxtoj,
huneꞌ chikankanoj.
35 Kawanh ebꞌix ix huneꞌnhe lanhan iskawni,
huneꞌ ix chiꞌilaxtoj,
huneꞌxa ix chikani.
36 Kawanh ebꞌnaj huneꞌnhe chimunlahi,
huneꞌ naj chiꞌilaxtoj,
huneꞌxa naj chikani,
xhi Komam.
37 Isqꞌambꞌen ebꞌyaꞌ iskuywom Komam:
—Mamin ¿bꞌaytuꞌwal chubꞌ huneꞌ tuꞌ?
xhi ebꞌyaꞌ.
Istaqꞌwi Komam tet ebꞌyaꞌ:
—Kaw habꞌan huneꞌ tuꞌ,
haꞌ bꞌaytikꞌa pakꞌanayo hunu kamom,
haꞌ tuꞌ chiskutxbꞌa isbꞌa noꞌ usmij,
xhi Komam Jesús.