Yal Komam Jesús tato chiꞌuchkꞌalaxayo Yatut Komam Dios
24
Lahwi tuꞌ,
yelti Komam Jesús yul Yatut Komam Dios.
Hayet lanhan yelti Komam tuꞌ xin ishitziko ebꞌyaꞌ iskuywom Komam iskꞌatanh,
yichiko ebꞌyaꞌ isyeni hunteqꞌan teꞌ nha yetbꞌi isbꞌa yebꞌ Yatut Komam tuꞌ.
2 Yalni Komam tet ebꞌyaꞌ:
—Yinh kaw yeli chiwalan teyet,
hunteqꞌan cheyil tiꞌ chiꞌapni istzꞌayikal bꞌay chiꞌuchkꞌalaxtoj.
Machi hunu chꞌen chꞌen latzꞌbꞌil tiꞌ chikan yibꞌanh yet chꞌenal,a
xhi Komam tet ebꞌyaꞌ.
Hunteqꞌan yechel chu yet chihul islahobꞌal tzꞌayik
3 Lahwi tuꞌ isto Komam Jesús yinh istzalanil wonhan Olivo,
yay tzꞌonhno Komam bꞌey tuꞌ,
ishitziko ebꞌyaꞌ iskuywom Komam iskꞌatanh.
Hayet ischukil ebꞌyaꞌ yebꞌ Komam tuꞌ isqꞌambꞌen ebꞌyaꞌ tet Komam:
—Mamin,
hal jetanh,
¿bꞌaqꞌinh chu hunteqꞌan maxawal tuꞌ,
yebꞌ bꞌaytet hunteqꞌan yechel chisye isbꞌa yet toxa chaxhhuli yebꞌ yinh yet chilahwi yul sat yibꞌanhqꞌinal tiꞌ?
xhi ebꞌyaꞌ.
4 Yichiko Komam yalni tet ebꞌyaꞌ:
—Kaw cheyil hebꞌa,
machojabꞌ mak chexaqꞌni subꞌchahoj.
5 Yuto txꞌiꞌal ebꞌnaj chuli kat isbꞌalniko ebꞌnaj inbꞌihan yinh,
kat yalni:
“Hanintiꞌan Cristo hinan,”
xhi ebꞌnaj.
Kaw xin txꞌiꞌal mak chisubꞌcha yu ebꞌnaj.
6 Cheyabꞌen yichikanh howal bꞌey tiꞌ,
yebꞌ yul hunteqꞌanxa konhobꞌ.
Yajaꞌ mach chexxiwi yuto yilal yul hunteqꞌan tuꞌ,
yaj maxhto istanhbꞌalo yul sat yibꞌanhqꞌinal tiꞌ.
7 Chaqꞌlekanh howal ej txꞌotxꞌ nimeta konhobꞌ yebꞌ hunteqꞌanxa txꞌotxꞌ nimeta konhobꞌ,
kat yanipaxiko howal huneꞌ konhobꞌ yinh huneꞌxa konhobꞌ.
Kaw txꞌiꞌal howal yebꞌ yabꞌil chuli,
chulpaxo wahil yebꞌ txixkabꞌ yul hunun konhobꞌ.
8 Yajaꞌ yichebꞌanilnhe isyaꞌilal ye hunteqꞌan tuꞌ.
9 »Hex tiꞌ,
chexilaxto sata ebꞌnaj yahaw konhobꞌ yu yaqꞌlax ekꞌoyaꞌ heyanma,
kat xin kexispotxꞌnikamo ebꞌnaj.
Sunil anma yul sat yibꞌanhqꞌinal tiꞌ chexkajni yuto tzujan hex wintajan.
10 Yinh huneꞌ tiempohal tuꞌ,
txꞌiꞌal mak chiyilo yanma yinh Komam Dios.
Chiꞌok ishowal anma yinh hunun,
kat ishobꞌnikanh anma leqꞌtiꞌal yinh hunun.
11 Txꞌiꞌal ebꞌnaj chaliko isbꞌa ischejabꞌo Komam Dios,
kaw xin txꞌiꞌal mak chisubꞌcha yu ebꞌnaj.
12 Kaw chiꞌahkanh anma iswatxꞌen istxꞌojal,
yuxin matxa xahano chil anma yet anmahil.
13 Haꞌ mak chitecha yu masanto yinh islahobꞌal,
haꞌ chikolchahi.
14 Yajaꞌ wal Tzotiꞌ kꞌul yinh tzet chu yok anma yul isqꞌabꞌ Komam Dios,
yilal ispujbꞌalaxikꞌo yul hunun konhobꞌ yunhe yohtanhenkanilo anma,
lahwi tuꞌ kat yul islahobꞌal tzꞌayik.
15 »Tzꞌibꞌnhebꞌilkano yu huneꞌ ischejabꞌ Komam Dios Daniel isbꞌi yinh huneꞌ naj chihul etanoto Yatut Komam Dios yu istxꞌojal chiswatxꞌe naj.
Mak chiꞌilni huneꞌ tiꞌ istxumabꞌiloj.b
16 Yuxin makex ayexikꞌo yul konhobꞌ Judea tiꞌ yet chiyuni huneꞌ tuꞌ yilal heyelkanh kat heto iswiꞌla witz.
17 Haꞌ mak ayahto yibꞌanh yakꞌalil yatut,
matxa chiꞌayti yiqꞌalti hunu tzet ye tuꞌ yul yatut,
to bꞌeh yelkanh.
18 Wal mak ayto xol ismunil xin,
matxa chimeltzo yiqꞌalti xil isqꞌap yul yatut.
19 ¡Kꞌanchꞌan ebꞌix ix ayxa tzet yehi,
yebꞌ ebꞌix chitotxutxwi nixhte yunin yet chiyuni huneꞌ tuꞌ!
20 Yuxin qꞌanwe tet Komam Dios,
haxinwal machojabꞌ yinh nhabꞌil chu huneꞌ tuꞌ,
machojabꞌpaxo yinh istzꞌayikal xewilal chiyuhi.
21 Yuto huneꞌ isyaꞌtajil chul yinh huneꞌ tiempohal tuꞌ,
kaw nanxa islowi,
maxhto hunelo chu yichitax iswatxꞌi yul sat yibꞌanhqꞌinal tiꞌ,
matxa bꞌaqꞌinhal chupaxoj yet chilahwi yekꞌkanoj.
22 Yajaꞌ tato mach chiskꞌotzbꞌa Komam Dios yoj huneꞌ tiempo tuꞌ,
machim hunu mak chikolchahi.
Wal xin chiskꞌotzbꞌa Komam yu iskolni makta sikꞌbꞌilxa yu.
23 »Yuxin ta ay mak chihalni teyet:
“Ay yaꞌ Cristo bꞌey tiꞌ,
lah,”
maka “ay yaꞌ Cristo bꞌey tuꞌ,
lah,”
ta xhi,
mach cheyayto yul heyanma.
24 Yuto ay ebꞌnaj chisbꞌaliko isbꞌa Cristohal,
yebꞌ ay ebꞌnaj chaliko isbꞌa ischejabꞌo Komam Dios.
Chisye ebꞌnaj hunteqꞌan yechel yebꞌ kꞌaybꞌalkꞌule yunhe issubꞌcha anma yu ebꞌnaj.
Etza xin chisubꞌchapaxo mak sikꞌbꞌilxa yu Komam Dios yu ebꞌnaj.
25 Wal xin,
ayto chiwalnikanojan hunteqꞌan tiꞌ teyet.
26 Yuxin ta ay mak chihalni teyet:
“As ilwej,
ay yaꞌ Cristo bꞌey txꞌotxꞌ desierto,”
ta xhi,
mach chextohi.
Maka ta chihal-lax teyet:
“Ewan ye yaꞌ bꞌey tiꞌ,
lah,”
ta xhi,
mach cheyayto yul heyanma.
27 Yuto hakaꞌ jilni isjepla kꞌuh bꞌay chiꞌahilo tzꞌayik,
kat isjeplapaxo bꞌay chito tzꞌayik,
hak tuꞌ chu wulan Hanin Aqꞌbꞌilintijan texol yu Komam Dios.
28 Haꞌtikꞌa bꞌay ayayo isnimanil hunu kamom,
haꞌ tuꞌ chiskutxbꞌa isbꞌa noꞌ usmij,
xhi Komam.
Yinh tzet chu yul Komam Jesucristo
29 Yalnipaxo Komam Jesús:
—Chinhelahwi yekꞌto hunteqꞌan nimeta isyaꞌtajil tuꞌ,
kat isqꞌejholilo yoj tzꞌayik,
wal ixahaw matxa chimujli,
kat istitkꞌay txꞌumel ay satkanh,
kat xin istzikobꞌtanhelax sunil tzet ay yip yul satkanh.
30 Lahwi tuꞌ kat isyenikanh isbꞌa yechel wulbꞌalan yul satkanh,
Hanin Aqꞌbꞌilintijan texol yu Komam Dios.
Wal anma ay yul hunun konhobꞌ yul sat yibꞌanhqꞌinal tiꞌ,
chixiwkanh kat yok oqꞌoj yet chiyilni wulan xol moyan.
Chinhulan yebꞌ isqꞌaqꞌal wipan.
31 Hayet chiꞌoqꞌ chꞌen trompeta yinh kaw ip,
chinchejnikojan ebꞌnaj ángel iskutxbꞌako sunil makta sikꞌbꞌilxa wuhan yul yibꞌanhqꞌinal.
Kaw xin sunil yul sat yibꞌanhqꞌinal chiꞌekꞌ ebꞌnaj iskutxbꞌakanh anma sikꞌbꞌilxa tuꞌ.
32 »Txumwekꞌanabꞌ yinh teꞌ higuera:
hayet chiyaxbꞌilo ischon isqꞌabꞌ teꞌ kat yelilo nixhte xaj teꞌ,
cheyohtanheloj ta toxa chiꞌok haꞌ nhabꞌ.
33 Hakpax tuꞌ xin yet cheyilni yijni isbꞌa sunil tzet chiwaltiꞌan,
cheyohtanheloj tato kawilxa wetijan,
hakaꞌ hunu mak linhanxako sat pulta.
34 Yinh kaw yeli chiwalan teyet,
sunil hunteqꞌan tiꞌ chij isbꞌa yalanhto maxhto chikam hunteqꞌan anma ayikꞌo yinh huneꞌ tiempohal tiꞌ.
35 Haꞌ satkanh yebꞌ txꞌo txꞌotxꞌ chitanhiloj,
yajaꞌ wal intzotiꞌan xin machi ekꞌto yet yijni isbꞌa tzet chala.
36 »Yajaꞌ wal yinh tzet tzꞌayikal yebꞌ tzet orahil chinhul tuꞌan,
machi mak ohtanhe,
nitam ebꞌnaj ángel ay satkanh.
Mach wohtapaxojan hanin Iskꞌahol Komam Dios intiꞌan,
wal xin to hanhkꞌanhe Inmaman ohtanhe.
37 »Hakaꞌ yu anma yinh istiempohal yaꞌ Noé,
hak tuꞌ chu anma yinh huneꞌ tiempohal yet chinhulan,
Hanin Aqꞌbꞌilintijan texol yu Komam Dios.
38 Yuto yet yalanhto maxhto chihul haꞌ niman yaxnhabꞌ,
kaw matzet chal iskꞌul anma yinh tzet yal yaꞌ Noé,
kaw xin hanhe waꞌoj yebꞌ ismohyi ayko yinh iskꞌul masanto yet yokto yaꞌ Noé yul teꞌ barco.
39 Hayet tona nahul ay anma tuꞌ,
yul huneꞌ niman yaxnhabꞌ yibꞌanh,
istanhilo anma sunil.
Hakaꞌ yu anma yinh huneꞌ tiempohal tuꞌ,
hak tuꞌ chu anma yet chinhul-lemnahan,
Hanin Aqꞌbꞌilintijan texol yu Komam Dios.
40 Qꞌinalo ta ay kawanho ebꞌnaj winaj huneꞌnhe chimunlahi yet chiyuni huneꞌ tuꞌ,
huneꞌ naj chiꞌilaxtoj,
huneꞌxa naj xin chikankanoj.
41 Yebꞌ xin ta ay kawanh ebꞌix huneꞌnhe lanhan iskawni,
huneꞌ ix chiꞌilaxtoj huneꞌxa ix chikankanoj.
42 »Kaw majwahanhwej,
yuto mach heyohtajo tzet tzꞌayikal chinhulan,
hanin Heyahaw intiꞌan.
43 Qꞌinalo ta yohta hunu naj yahaw nha tzet orahil chul hunu naj elqꞌom yinh aqꞌbꞌalil,
chimyilo naj iswayanh.
Hak tuꞌ xin mach chiꞌokto naj elqꞌom tuꞌ yelqꞌalti tzet ay naj.
44 Hakexpax tuꞌ hex tiꞌ,
helan cheyute hebꞌa,
yuto yet matxa nano heyu kat wul lemnahan,
Hanin Aqꞌbꞌilintijan texol yu Komam Dios,
xhi Komam Jesús.
Naj chejabꞌ yijem yebꞌ naj mach yijemoj
45 Yalnipaxo Komam Jesús:
—Qꞌinalo ta ay hunu naj yahaw munil ay haywanho ischejabꞌ,
ham naj yijem yebꞌ kaw helan chákano naj seleloj yu yaqꞌni tzet chislo ebꞌnaj ismunlawom yet chikꞌayayoj.
46 Saqꞌal yet naj chejabꞌ ta lanhan isyijen naj tzet halbꞌilkano tet yet chiꞌapni naj yahaw tuꞌ.
47 Yinh kaw yeli chiwalan teyet,
naj yahaw munil tuꞌ chako naj naj yijem tuꞌ yahawo yinh sunil tzet aya.
48 Yajaꞌ ta mach kꞌuloj chute isbꞌa naj,
kat yok naj yalni hakaꞌ tiꞌ:
“Yaꞌ wahaw tuꞌan,
¿bꞌaqꞌinhtam chul yaꞌ?”
ta xhi naj.
49 Kat yok naj ismaqꞌni ebꞌnaj chejabꞌ tuꞌ,
kat yok naj waꞌoj yebꞌ xin ukꞌu xol ebꞌnaj ukꞌum teꞌ.
50 Haxa yet istzꞌayikal mach echmabꞌilo yahaw naj tuꞌ yu,
hayet tona nahul ay naj kat yul lemna yahaw naj tuꞌ.
51 Hak tuꞌ xin chiꞌaqꞌlax ekꞌoyaꞌ yanma naj yu naj yahaw tuꞌ,
hakaꞌ yaqꞌlax ekꞌoyaꞌ yanma hunteqꞌan ebꞌnaj chal isbꞌa kꞌulal.
Haꞌ tuꞌ xin chiꞌoqꞌ naj kat isnhetxꞌla yeh naj yu isyaꞌtajil,
xhi Komam.