—Mamin,

¡ilkꞌanabꞌ hunteqꞌan chꞌen chꞌen yebꞌ hunteqꞌan nimeta nha tiꞌ lah!

xhi yaꞌ.

2 Istaqꞌwi Komam:

—Hunteqꞌan nimeta nha tiꞌ chiꞌuchkꞌalaxtoj,

matxa hunu chꞌen chꞌen latzꞌbꞌil tiꞌ chikan yibꞌanh yet chꞌenal,

xhi Komam.

3 Lahwi tuꞌ xin,

isto Komam Jesús yebꞌ ebꞌyaꞌ iskuywom yinh istzalanil wonhan Olivo ayko yetkꞌulal satakꞌti Yatut Komam Dios;

yay tzꞌonhno Komam bꞌey tuꞌ.

Isqꞌambꞌen yaꞌ Pedro,

yaꞌ Jacobo,

yaꞌ Juan yebꞌ yaꞌ Andrés tet Komam yet ischukilxanhe:

4 —Mamin,

hal jetanh bꞌaqꞌinh chihul hunteqꞌan chawal tiꞌ,

¿tzettaxka yechel chiyu yet chijni isbꞌa?

xhi ebꞌyaꞌ.

5 Istaqꞌwi Komam:

—Kaw cheyil hebꞌa,

machojabꞌ mak chexaqꞌni subꞌchahoj.

6 Yuto kaw txꞌiꞌal ebꞌnaj chuli kat isbꞌalniko ebꞌnaj inbꞌihan yinh,

kat yalni ebꞌnaj hakaꞌ tiꞌ:

“Hanintiꞌan Cristo hinan,”

xhi ebꞌnaj.

Kaw xin txꞌiꞌal mak chisubꞌcha yu ebꞌnaj.

7 »Hayet cheyabꞌeni ta ay howal hekawilal maka nahata,

mach chexxiwi yuto yilal yuni hunteqꞌan tiꞌ,

yajaꞌ maxhto istanhbꞌalo huneꞌ yul sat yibꞌanhqꞌinal tiꞌ.

8 Chaqꞌlekanh howal ej txꞌotxꞌ nimeta konhobꞌ yebꞌ hunteqꞌanxa txꞌotxꞌ nimeta konhobꞌ,

kat yanipaxiko howal huneꞌ konhobꞌ yinh huneꞌxa konhobꞌ.

Kaw xin txꞌiꞌal bꞌay chiꞌekꞌ txixkabꞌ yebꞌ wahil,

yajaꞌ hunteqꞌan tuꞌ yichebꞌanilnhe isyaꞌtajil.

9 »Kaw cheyil hebꞌa yuto chexalaxiko sata ebꞌnaj yahaw konhobꞌ,

kat hemaqꞌlax yulaj capilla.

Chexalaxpaxiko sata ebꞌnaj gobernador yebꞌ sata ebꞌnaj rey,

yu ayexxako yul inqꞌabꞌan.

Hak tuꞌ xin chu kinheyalnilojan tet ebꞌnaj.

10 Yet maxhto chitanhilo yul yibꞌanhqꞌinal tiꞌ,

yilal ispujbꞌalaxikꞌo Tzotiꞌ Kꞌul yet Kolbꞌanile yulajla txꞌotxꞌ nimeta konhobꞌ.

11 Hayet chexalaxiko sata ebꞌnaj yahaw konhobꞌ tuꞌ,

mach cheyako yinh hekꞌul yinh tzet cheyala;

wal xin haꞌ tzet chihal-lax teyet yu Komam Dios haꞌ cheyala,

yuto maxhtaj hex chextzoteli,

to haꞌ Komam Espíritu Santo.

12 »Haꞌ yinh huneꞌ tiempohal tuꞌ,

ay ebꞌnaj chako yuxhta yul isqꞌabꞌ kamikal,

ay mame miꞌe chako yuninal yul isqꞌabꞌ kamikal,

aypaxo ebꞌnaj uninale chiyako howal yinh ismam yebꞌ ismiꞌ kat yaqꞌni kamoj.

13 Kaw sunil anma chiꞌok ishowal teyinh yuto ayexiko yul inqꞌabꞌan;

yajaꞌ mak chitecha yu masanto yet islahobꞌal,

chikolchahi.

14 »Tzꞌibꞌnhebꞌilkano yu huneꞌ ischejabꞌ Komam Dios chiyij Daniel,^a

tato yilal yul naj chiꞌetanto Yatut Komam Dios yu istxꞌojal chiswatxꞌe.

Haꞌ mak chiꞌilni huneꞌ tiꞌ txumchahojabꞌilo yu.

Yinh huneꞌ tzꞌayik tuꞌ,

makex ay hex bꞌey Judea tiꞌ,

chexelkanh kat heto iswiꞌla witz.

15 Mak ayahto yibꞌanh yakꞌalil yatut xin matxahojabꞌ chiꞌayti yiqꞌalti hunu tzet ye tuꞌ.

16 Wal mak ayto xol ismunil,

matxahojabꞌ chimeltzo yiqꞌalti xil isqꞌap yul yatut.

17 ¡Kaw kꞌanchꞌan ebꞌix ix ayxa tzet yehi,

yebꞌ ebꞌix chitotxutxwi nixhte yunin yinh huneꞌ tiempohal tuꞌ!

18 Qꞌanwe tet Komam Dios haxinwal maxhtaj yinh nhabꞌil chihul huneꞌ tuꞌ.

19 Yuto kaw chiꞌekꞌyaꞌ yanma anma yinh huneꞌ tiempohal tuꞌ.

Hunteqꞌan isyaꞌtajil tuꞌ maxhto hunelo chuhi yichitax iswatxꞌen Komam Dios huneꞌ yul sat yibꞌanhqꞌinal tiꞌ,

matxa xin bꞌaqꞌinhal chuhi yet chilahwi yunikanoj.

20 Ta mach chiskꞌotzbꞌa Komam Dios Jahawil yoj huneꞌ tiempohal tuꞌ,

machi hunu mak chikolchahi;

wal xin chiskꞌotzbꞌa Komam yuto xahan ay yuninal Komam yu,

hunteqꞌan sikꞌbꞌilxaloj.

21 »Yuxin ta ay mak chihalni teyet:

“Haꞌ bꞌey tiꞌ ay yaꞌ Cristo lah,”

maka ta “Haꞌ bꞌey tuꞌ ay yaꞌ lah,”

ta xhi,

mach cheyayto yul heyanma.

22 Yuto kaw txꞌiꞌal ebꞌnaj leqꞌtiꞌwom chisbꞌaliko isbꞌa Cristohal.

Aypaxo ebꞌnaj chisbꞌaliko isbꞌa ischejabꞌo Komam Dios kat isyeni ebꞌnaj kꞌaybꞌalkꞌule yebꞌ yechel yip naj matzwalil yunhe issubꞌcha anma yu ebꞌnaj.

Etza xin chisubꞌchapaxo ebꞌnaj sikꞌbꞌilxa yu Komam Dios yu ebꞌnaj.

23 ¡Kaw cheyil hebꞌa xin!

Yalanhto chiwalnikanojan hunteqꞌan tiꞌ teyet,

xhi Komam.^b

24 »Hayet chilahwi yekꞌkano hunteqꞌan isyaꞌtajil tuꞌ,

chiqꞌejholilo yoj tzꞌayik,

matxa chimujlipaxo ixahaw,

25 kat istitkꞌay ej txꞌumel ay satkanh,

kat xin isbꞌilipaxo sunil tzet ay yip ay yul satkanh.

26 Lahwi tuꞌ kat yil-lax wulan xol moyan,

Hanin Aqꞌbꞌilintijan texol yu Komam Dios.

Chinhulan yebꞌ sunil isqꞌaqꞌal wipan,

27 kat inchejni wángelan iskutxbꞌanoko sunil mak sikꞌbꞌilxalo wuhan yul sat yibꞌanhqꞌinal tiꞌ,

sunil bꞌaytajtuꞌwal ay anma bꞌay chiꞌekꞌ ebꞌnaj.

28 »Txumwekꞌanabꞌ yinh teꞌ higuera:

Yet chiꞌelilo ischon isqꞌabꞌ teꞌ kat yul xaj teꞌ,

cheyohtanheloj ta toxa chiꞌok haꞌ nhabꞌ.

29 Hak tuꞌ ye hunteqꞌan chiwaltiꞌan.

Hayet cheyilni yijni isbꞌa hunteqꞌan tuꞌ,

yilal heyohtanheni tato kawilxa yeti bꞌay chinhulan.

30 Yinh kaw yeli chiwalan teyet;

sunil hunteqꞌan tuꞌ chiyu yalanhto maxhto chikam hunteqꞌan anma tiꞌ.

31 Haꞌ satkanh yebꞌ txꞌo txꞌotxꞌ tiꞌ chitanhiloj,

wal Intzotiꞌan xin mach chiꞌekꞌto yet yijni isbꞌa tzet chala.

32 »Yajaꞌ wal yinh tzet tzꞌayikal yebꞌ tzet orahil chinhulan machi hunu mak ohtanhe nitam ebꞌnaj ángel ay yul satkanh.

Mach wohtapaxojan,

Hanin Iskꞌahol Komam Dios intiꞌan;

wal xin hanhkꞌanhe Inmaman ohtanhe.

33 »Yuxin kaw nannhe heyu,

majwanhwej yuto mach heyohtajo tzet orahil chinhulan.

34 Lahan hakaꞌ yet chito hunu naj yahaw nha yinh hunu isbꞌel kaw nahat.

Yalanhto maxhto chito naj chalnikano naj tzettaj munilal chu hunun ischejabꞌ,

kat yalnikano naj tet naj tanhem pulta tato kaw chil naj istiꞌ pulta tuꞌ.

35 Ebꞌnaj chejabꞌ tuꞌ,

mach yohtajo ebꞌnaj bꞌaqꞌinh chimeltzo naj yahaw nha,

mach yohtajo ebꞌnaj tato hayet yahbꞌal aqꞌbꞌal chul naj,

maka yinh chuman aqꞌbꞌal,

maka yet chiꞌoqꞌ noꞌ chiyo,

maka yet sahabꞌ sakꞌayal.

Hakexpax tuꞌ mach heyohtajo bꞌaqꞌinh chinhulan,

yuxin majwahanhwej,

36 tajka tona nahul ay hex kat wul lemnahan.

37 Hunteqꞌan tiꞌ,

maxhnhetaj teyet chiwalan,

to chiwalpaxojan tet sunil anma.

¡Kaw majwahanhwej!

xhi Komam.