Yofrenda huneꞌ ix mebꞌaꞌ
21
Yet hunel ayikto Komam Jesús yul Yatut Komam Dios,
yilni yanayto ebꞌnaj qꞌalom yofrenda yul kaxha bꞌay chꞌalaxayto ofrenda.
2 Yilnipaxo Komam yanayto huneꞌ ix hunix kaw mebꞌaꞌ kabꞌebꞌ chꞌen melyu.
3 Yalni Komam hakaꞌ tiꞌ:
—Yinh kaw isyelal chiwalan teyet,
haꞌ huneꞌ ix hunix tiꞌ,
kaw mebꞌaꞌ ix,
yajaꞌ kaw ekꞌbꞌal mayaqꞌ ix sata sunil mak mayayto yofrenda tiꞌ.
4 Yuto haꞌ ebꞌnaj tiꞌ,
isqꞌalxanhe chaqꞌ ebꞌnaj tet Komam.
Wal huneꞌ ix tiꞌ,
kaw mebꞌaꞌ ix,
yajaꞌ kaw kꞌuxan mayayto ix ismelyu chiloqꞌni tzet chiꞌokniko yu,
xhi Komam.
Ofrenda de una Viuda
Yal Komam Jesús ta chiꞌuchkꞌalaxto Yatut Komam Dios
5 Ay hunteqꞌan ebꞌyaꞌ kuywawom tiꞌ lanhan yalni ta kaw kꞌulchꞌan jilni Yatut Komam Dios yu hunteqꞌan chꞌen chꞌen kaw kꞌulchꞌan ayko yinh,
yebꞌpaxo yu issabꞌehal anma ayko yelawiloj.
Yuxinto yal Komam Jesús:
6 —Sunil hunteqꞌan cheyil tiꞌ,
chul istiempohal bꞌay chiꞌuchkꞌalaxayoj.
Matxa hunu chꞌen chꞌen latzꞌbꞌil tiꞌ chikan yibꞌanh yet chꞌenal,
xhi Komam.
Hunteqꞌan yechel chu yet chihul islahobꞌal tzꞌayik
7 Isqꞌambꞌen ebꞌyaꞌ iskuywom Komam:
—Mamin,
¿bꞌaqꞌinh chu huneꞌ chawal tiꞌ?
¿Tzet chiyenilo yet chul huneꞌ tiempohal tuꞌ?
xhi ebꞌyaꞌ.
8 Yalni Komam:
—Kaw cheyil hebꞌa haxinwal machi mak chexaqꞌni subꞌchahoj yuto kaw ay mak chuli,
kat yalni hakaꞌ tiꞌ:
“Hanintiꞌan Cristo hinan,
maꞌayilo huneꞌ istiempohal tiꞌ,”
xhi ebꞌnaj.
Yaj mach chexoktzujno yinta tzet chal ebꞌnaj tuꞌ.
9 Hayet cheyabꞌeni ta ay howal,
yebꞌpaxo yet chꞌah wejna anma howal yinh ebꞌnaj yahawil yinh ej txꞌotxꞌ nime konhobꞌ,
mach chexxiwkanh yuto yilal yul hunteqꞌan tuꞌ bꞌabꞌel,
yaj maxhto istanhbꞌalo yibꞌanhqꞌinal tiꞌ,
xhi Komam.
10 Yalnipaxo Komam:
—Chaqꞌle howal huneꞌ txꞌotxꞌ nime konhobꞌ yebꞌ hunxa txꞌotxꞌ nime konhobꞌ,
yebꞌpaxo hunteqꞌanxa konhobꞌ chaqꞌlekanh howal yebꞌ hunteqꞌanxa.
11 Chulpaxo nimeta txixkabꞌ,
kat yul wahil,
yebꞌpaxo yabꞌil kaw how yulajla konhobꞌ yul sat yibꞌanhqꞌinal tiꞌ.
Ay hunteqꞌan xiwbꞌalkꞌule yebꞌ nimeta kꞌaybꞌalkꞌule chu satkanh,
kaw chixiw anma yilni.
12 »Yajaꞌ yet maxhto chul hunteqꞌan tuꞌ,
chextzabꞌlaxayoj,
kat hetzumbꞌelaxikꞌoj.
Chexilaxto yulajla iscapilla ebꞌnaj Israel kat heyilwelaxi,
kat heyalaxiko preso,
kat heyilaxto sata ebꞌnaj rey yebꞌ sata hunteqꞌanxa ebꞌnaj yahawil,
sunil hunteqꞌan isyaꞌtajil tiꞌ chechah yu ayexxako yul inqꞌabꞌan.
13 Hak tuꞌ xin chu kinheyalnilojan tet ebꞌnaj.
14 Yaj mach cheyako yinh hekꞌul yinh tzet chu hepajtzen sata ebꞌnaj yu hekolni hebꞌa yinh tzet chal ebꞌnaj.
15 Hanintiꞌan chiwaqꞌan hehelanil hetzoteli,
haxinwal haꞌ ebꞌnaj ayko ishowal teyinh,
mach chiqꞌoji ebꞌnaj yinh ispaj hetzotiꞌ,
yebꞌ matxa tzet tzꞌaj yalaꞌ ebꞌnaj.
16 Ay hex chexalaxiko yul isqꞌabꞌ ebꞌnaj yahaw yu hemam,
hemiꞌ,
yu heyuxhtaj,
yu heyikꞌal yebꞌpaxo yu heyamigo.
Ay hex chexaqꞌlaxkamoj.
17 Sunil anma chꞌok ishowal teyinh yuto ayko heyanma winhan.
18 Wal xin mach chexxiwi yuto Komam Dios chexkolni.
Machi hunu xil hewiꞌ chikꞌaytoj.
19 Aqꞌwe techahoj haxinwal chexkolchahi.
20 »Hayet hoyanxako ebꞌnaj soldado yinhla Jerusalén tiꞌ,
cheyohtanheweloj ta lanhanxa yuchkꞌalaxayoj.
21 Haꞌ mak ay yul sunil ismajul Judea tiꞌ tojabꞌ yebꞌaꞌ isbꞌa iswiꞌla witz.
Haxa mak ay yul konhobꞌ Jerusalén tiꞌ,
elojabꞌkanh.
Yebꞌpaxo haꞌ mak ayto xol ismunil,
matxahojabꞌ chimeltzo yul konhobꞌ tiꞌ.
22 Yuto hayet huneꞌ tiempohal tuꞌ,
chul isyaꞌtajil yibꞌanh anma ay yul huneꞌ konhobꞌ tiꞌ,
haꞌ ton ispaj sunil istxꞌojal tzet xaꞌiswatxꞌe,
kat yijnikano isbꞌa tzet tzꞌibꞌnhebꞌilkano yul Yum Komam Dios.a
23 »Yaj kꞌanchꞌan ebꞌix ix ayxa tzet ye yinh huneꞌ tiempohal tuꞌ,
yebꞌ ebꞌix chitotxutxwi yunin yinh.
Yuto chitit ishowal Komam Dios yibꞌanh anma tiꞌ,
kat yul isyaꞌtajil yibꞌanh huneꞌ txꞌotxꞌ konhobꞌ tiꞌ.
24 Kaw txꞌiꞌal anma chikam xol howal,
kat yilaxto anma yulajla nan konhobꞌal,
kat yokkano konhobꞌ Jerusalén yalanh yoj anma mach Israeloj masanto chꞌapni istzꞌayikal bꞌay halbꞌil yu Komam Dios.
Yinh tzet chu yul Komam Jesucristo
25 »Ay hunteqꞌan yechel chisyekanh isbꞌa yinh tzꞌayik yebꞌ yinh ixahaw,
yebꞌ yinh txꞌumel.
Wal anma ay sat yibꞌanhqꞌinal tiꞌ,
chisomchahokanh iskꞌul yu xiwkilal yabꞌen ishukcha haꞌ mar yet chismaqꞌnikanh isbꞌa haꞌ,
yuto kaw ayxa ismay chute haꞌ.
26 Chipáxilo yip anma yu xiwkilal yu isnahni tzet chu yul sat yibꞌanhqꞌinal tiꞌ.
Yebꞌpaxo sunil tzet kaw ay yip satkanh chitzikobꞌtanhelaxi.
27 Chilahwi tuꞌ xin,
kat yilni anma wayilojan xol moyan Hanin Aqꞌbꞌilintijan texol yu Komam Dios.
Chinhulan yebꞌ sunil isqꞌaqꞌal wipan.
28 Hayet lanhan istzabꞌniko yuni hunteqꞌan chiwaltiꞌan,
cheyaweko yip heyanma,
kat hetꞌanhxiwekanh satkanh yuto toxa chexkolchahi,
xhi Komam Jesús.
Kuybꞌanile yinh teꞌ higuera
29 Yanipaxiko Komam hunxa yechel tiꞌ:
«Chisje hetxumnilo yinh teꞌ higuera yebꞌ hunuxa teꞌ komon qꞌebꞌtaj.
30 Hayet cheyilni yelilo xaj teꞌ,
chinachalo heyu ta toxa chꞌok nhabꞌ.
31 Hakpax tuꞌ,
yet chiyuni hunteqꞌan tiꞌ cheyohtanheweloj tato toxa chꞌok Komam Dios Yahawiloj.
32 »Yinh kaw yeli chiwalan teyet,
chul hunteqꞌan chiwaltiꞌan yet maxhto chilahwilo iskam hunteqꞌan anma Israel tiꞌ.
33 Haꞌ satkanh yebꞌ txꞌo txꞌotxꞌ tiꞌ chitanhiloj,
yaj wal Intzotiꞌan xin mach chꞌekꞌto yet yijni isbꞌa tzet chala.
34 »Kaw nannhe heyu,
machojabꞌ cheyaqꞌ kawbꞌolo henabꞌal yu peqꞌal,
yu ukꞌu teꞌ,
yebꞌ yinh tzettaj ye tuꞌ bꞌay cheyako heyanma yul yibꞌanhqꞌinal tiꞌ,
haxinwal yet chul huneꞌ tzꞌayik tuꞌ,
mach tona nahul ay hex.
35 Yuto hakaꞌ hunu latzꞌabꞌ,
hak tuꞌ chu yul huneꞌ tzꞌayik tuꞌ yibꞌanh anma ay yul sat yibꞌanhqꞌinal tiꞌ.
36 Yuxin kaw majwanhwej,
txahlanhwe yinh sunilbꞌal tiempo,
haxinwal chu hekolni hebꞌa yalanh hunteqꞌan tzet chihul tuꞌ,
haxinwal mach chexxiw yet chexok linhno insatajan,
Hanin Aqꞌbꞌilintijan texol yu Komam Dios,»
xhi Komam Jesús.