Yaqꞌ kawxo Komam Jesús ischejabꞌ naj capitán romano
7
Hayet lahwi istzotel Komam Jesús tet anma tuꞌ isto Komam bꞌey konhobꞌ Capernaúm.
2 Haꞌ bꞌey tuꞌ,
ay huneꞌ naj capitán,
ah konhobꞌ Roma.
Ay huneꞌ ischejabꞌ naj kaw xahan ay yu,
kaw txꞌoj ye iskꞌul,
lanhanxa iskami.
3 Yabꞌe naj capitán tuꞌ isqꞌumal Komam,
yuxin yato naj hunteqꞌan ebꞌnaj iswiꞌehal yinh ebꞌnaj Israel isqꞌanno tet Komam ta chitit Komam yaqꞌaꞌ kawxo ischejabꞌ naj capitán tuꞌ.
4 Hayet yapni ebꞌnaj iskꞌatanh Komam tuꞌ,
yalni ebꞌnaj tet Komam:
—Ay huneꞌ naj capitán kaw kꞌul iskꞌul,
yilal hato nino kolwal yinh naj.
5 Wal xin kaw xahan ayonh hanhonh Israel honh tiꞌ yu naj.
Yakanh naj huneꞌ kokapillahanh,
xhi ebꞌnaj tet Komam.
6 Yuxin to Komam Jesús yinta ebꞌnaj.
Yajaꞌ haxa yet hanikꞌxanhe yapni ebꞌnaj yebꞌ Komam bꞌey yatut naj,
ischejnipaxti naj capitán haywanhxa yamigo yalno tet Komam:
—Chal naj capitán tawet hakaꞌ tiꞌ:
“Mamin,
mach chaweta hakꞌul hatit watuttiꞌan,
yuto mach intzanojan hawokto yul watutan chiwabꞌehan.
7 Yebꞌ xin mach intzanojan intohan kaxhwilnojan.
Wal xin tzotelanhtij,
kat iskawxikanh naj inchejabꞌtiꞌan hawu.
8 Wohtajan huneꞌ tiꞌ yuto ay ebꞌnaj wahawan chinchejnihan,
aypaxo ebꞌnaj insoldadohan chinchejpaxojan.
Ta chiwalan tet hunu naj:
‘Asiꞌ,’
ta kinchihan,
kat isto naj.
‘Kata bꞌey tiꞌ,’
ta kinchihan,
kat istit naj.
Chiwalnipaxojan tet hunxa naj:
‘Okanh hawatxꞌe huneꞌ tiꞌ,’
ta kinchihan,
kat yok naj iswatxꞌeni,”
xhi naj capitán,
xhi ebꞌnaj tet Komam.
9 Hayet yabꞌen Komam hakaꞌ tuꞌ,
kaw kꞌaykanh iskꞌul yabꞌeni.
Istꞌanhxito Komam yinh anma tzujan yinta tuꞌ,
yalni Komam:
—Kaw chiwalan yinh isyelal teyet,
maxhto hunu mak ay bꞌey Israel xawilan yaniko yanma yinh Komam Dios hakaꞌ huneꞌ naj tiꞌ,
xhi Komam.
10 Ispaxto ebꞌnaj yamigo naj capitán bꞌey yatut naj.
Hayet yapni ebꞌnaj yilni ebꞌnaj tato xakawxinakanh ischejabꞌ naj yu Komam.
Yaqꞌ itzitzbꞌokanh Komam Jesús yunin huneꞌ ix hunix
11 Lahwi tuꞌ xin,
isto Komam Jesús bꞌey huneꞌ konhobꞌ chiyij Naín yebꞌ ebꞌyaꞌ chikuywi yinta Komam tuꞌ.
Kaw tzetkꞌa anma ok tzujno yinta Komam.
12 Hayet yapni Komam istiꞌ ispultahil konhobꞌ tuꞌ,
yilnito Komam lanhan yilaxto huneꞌ kamom mujlaxoj,
yunin huneꞌ ix hunix;
kaw xin hanhkꞌanhe huneꞌ yunin ix tuꞌ.
Kaw hanta anma tzujan yinta ix yebꞌ iskamom tuꞌ.
13 Hayet yilnito Komam ix hunix tuꞌ,
istzꞌaykanh iskꞌul Komam yinh ix,
yalni Komam:
—Mach chaxhoqꞌi,
xhi Komam.
14 Ishitziko Komam yinh naj kamom tuꞌ,
yaniko Komam isqꞌabꞌ yinh teꞌ bꞌatxteꞌ,
islinhbꞌan isbꞌa ebꞌnaj iqꞌnhe naj.
Yalni Komam tet naj kamom tuꞌ:
—Hach nichꞌan tzeh,
chiwalan tawet,
ahanhwanoj,
xhi Komam.
15 Lahwi tuꞌ xin,
yah tzꞌonhno naj kamom tuꞌ,
yichiko naj istzotelkanh,
yaniko Komam naj tet ismiꞌ.
16 Hayet yilni anma huneꞌ tuꞌ,
kaw xiwkanh anma sunil.
Yalni anma kꞌul-la tzotiꞌ yinh Komam Dios hakaꞌ tiꞌ:
«Haꞌ huneꞌ ischejabꞌ Komam Dios ischejti koxol tiꞌ,
kaw niman yelapno yehi.
Kaw mahul Komam Dios kolwal jinh,
hanhonh iskonhobꞌonh tiꞌ,»
xhi anma.
17 Huneꞌ iswatxꞌe Komam Jesús bꞌey tuꞌ,
kaw ekꞌ isbꞌi sunil yul ismajul Judea yebꞌpaxo hunteqꞌanxa konhobꞌ hoyaniko yinh iskawilal tuꞌ.
Juan el Bautista en Prisión
Yato yaꞌ Juan, anikanh haꞌ iswiꞌ anma, iskuywom yaqꞌaꞌ isqꞌambꞌebꞌal tet Komam Jesús
18 Yapni isqꞌumal hunteqꞌan tiꞌ tet yaꞌ Juan anikanh haꞌ iswiꞌ anma,
yebꞌ ebꞌyaꞌ kuywina yinta yaꞌ Juan tuꞌ.
Yawtenti yaꞌ kawanh ebꞌyaꞌ iskuywom tuꞌ iskꞌatanh.
19 Yalni yaꞌ tet ebꞌyaꞌ ta chito ebꞌyaꞌ isqꞌambꞌe tet Komam Jesús hakaꞌ tiꞌ:
«¿Tom hach tiꞌ bꞌay tzꞌibꞌnhebꞌilkanoj ta chaxhhuli,
mato ayto hunuxa yaꞌ chijechmahanh yuli?
kexchi,»
xhi yaꞌ Juan tet ebꞌyaꞌ.
20 Yapni ebꞌyaꞌ ischejabꞌ yaꞌ Juan tuꞌ,
ishitziko ebꞌyaꞌ iskꞌatanh Komam,
yalni ebꞌyaꞌ:
—Makonhischejtijanh yaꞌ Juan koqꞌambꞌehanh tawet,
¿ham hach tiꞌ Cristo tzꞌibꞌnhebꞌilkanoj tato chihuli,
mato chijechmahanh yul hunuxa maka?
xhi ebꞌyaꞌ tet Komam.
21 Hayet yapni ebꞌyaꞌ,
kꞌuxan lanhan yaqꞌni kawxo Komam anma chꞌekꞌyaꞌ yanma yu yabꞌil,
yebꞌ xin makta ayko ischejabꞌ naj matzwalil yinh.
Ishajnipaxo Komam isbꞌaqꞌ sat makta mach chu yilni.
22 Istaqꞌwi Komam tet ebꞌyaꞌ xin:
—As halwe tet yaꞌ Juan tzet makexhul heyilaꞌ,
yebꞌ tzet maxeyabꞌe.
Cheyal tet yaꞌ tato mahajlokano sat mak mach chu yilni,
mabꞌelwikanh mak maxhtikꞌa chu yekꞌi.
Haꞌ mak ayko lepra yinh,
maꞌanhchakanoj.
Mak majantikꞌa istxikin,
mahajlohi,
ay kamom anma mahulkanokanh iskꞌul,
kat yal-laxpaxo Tzotiꞌ Kꞌul yet Kolbꞌanile tet anma matzet ayko yipo yanma.
23 Saqꞌal yet mak mach chikabꞌkon yanma winhan,
kexchi tet yaꞌ Juan tuꞌ,
xhi Komam tet ebꞌyaꞌ.
24 Lahwi ismeltzoto ebꞌyaꞌ ischejabꞌ yaꞌ Juan tuꞌ,
yichiko Komam istzotel tet anma yinh yaꞌ Juan,
yalni Komam hakaꞌ tiꞌ:
—¿Tzet kexbꞌey heyilaꞌ bꞌey txꞌotxꞌ desierto,
tom huneꞌ teꞌ ah machi yip chiꞌekꞌ qꞌehla yu jaqꞌeqꞌ?
25 ¿Mato haꞌ huneꞌ naj nime winaj kaw nanxa islow yeko xil isqꞌap?
Hex tiꞌ heyohtaj makta kaw chisqꞌaptze isbꞌa,
yebꞌ chaqꞌ tzet choche iskꞌul,
yulnhe yatut ebꞌnaj rey chijil hunteqꞌan anma tuꞌ.
26 Wal xin ¿mak kexbꞌey heyilaꞌ?
¿Ham huneꞌ ischejabꞌ Komam Dios kexbꞌey heyilaꞌ?
Yinh kaw isyelal chiwalan teyet,
huneꞌ yaꞌ kexbꞌey heyilaꞌ tuꞌ,
kaw ekꞌbꞌalto ismunil yaꞌ sata sunil ischejabꞌ Komam Dios ekꞌlena yet payat.
27 Yinh yaꞌ Juan tuꞌ tzꞌibꞌnhebꞌilkano yul Yum Komam Dios bꞌay chal hakaꞌ tiꞌ:
Chinchejtojan huneꞌ inchejabꞌan bꞌabꞌel tasataj
yunhe iswatxꞌen habꞌeh yalanhto maxhto chaxhapni,
xhihayoj.
28 Chiwalan teyet tato xol anma yul sat yibꞌanhqꞌinal tiꞌ maxhto hunu mak ekꞌbꞌal yelapno yibꞌanh yaꞌ Juan tuꞌ,
yaj wal xol anma ayxako yul isqꞌabꞌ Komam Dios tinanh,
waxanhka machi yelapno yehi,
ekꞌbꞌalto iskꞌulal chil sata yaꞌ Juan,a
xhi Komam.
29 Haꞌ komon anma,
yebꞌpaxo ebꞌnaj iqꞌomilo tohlabꞌal,
yet yalanhtokanoj yabꞌe ebꞌnaj tzet yal yaꞌ Juan,
yahkano haꞌ iswiꞌ,
haꞌ ebꞌnaj tuꞌ txumcha yu ta kaw kꞌul Komam Dios.
30 Yaj wal ebꞌnaj fariseo yebꞌ ebꞌnaj chikuyni anma yinh isley yaꞌ Moisés,
mach chisje ebꞌnaj yah haꞌ iswiꞌ yu yaꞌ Juan,
haꞌ xin halniloj tato isyah ebꞌnaj huneꞌ iskꞌulal Komam Dios yoche yaqꞌaꞌ tet ebꞌnaj.
31 Yalnipaxo Komam Jesús tet anma:
—¿Mak yebꞌ lahan anma yinh huneꞌ tiempohal tiꞌ?
32 Wal xin lahan anma hakaꞌ nixhte unin chiꞌay tzꞌonhno yul txonhbꞌal,
kat issajchi.
Chawtenti yetbꞌi iskꞌatanh hakaꞌ tiꞌ:
“Nabꞌanhe majeta kobꞌahanh joqꞌtzenanh teꞌ suꞌ,
machi xin makex kanhalwi.
Yebꞌpaxo xin,
nabꞌanhe makobꞌitnhehanh hunteqꞌan bꞌit tzꞌabꞌalkꞌule tanhe yoki,
maxhtikꞌa xin makexoqꞌpaxoj,”
xhi nixhte unin tuꞌ.
33 Yet yulikꞌo yaꞌ Juan,
Anikanh haꞌ iswiꞌ Anma,
mach waꞌ yaꞌ yebꞌ anma,
yuxin yal anma tato ayko huneꞌ ischejabꞌ naj matzwalil yinh yaꞌ.
34 Lahwi tuꞌ xin,
wulan Hanin Aqꞌbꞌilintijan texol yu Komam Dios,
yaj hanintiꞌan chinwaꞌan xol anma yuxin cheyalpaxo hakaꞌ tiꞌ winhan:
“Wal naj Jesús tuꞌ,
waꞌonhetikꞌa chu naj,
yebꞌ ukꞌu vinonhetikꞌa chu naj.
Yamigopaxo isbꞌa naj yebꞌ ebꞌnaj iqꞌomilo tohlabꞌal,
yebꞌpaxo ebꞌnaj txꞌoj chiswatxꞌe,”
kexchi winhan.
35 Yaj wal anma ayko ishelanil Komam Dios yinh,
habꞌan isyenilo isbꞌa yinh tzettaj kꞌul chilaiswatxꞌe,
xhi Komam.
Bꞌeykꞌo Komam Jesús bꞌey yatut huneꞌ naj fariseo Simón isbꞌi
36 Hayet hunel,
apni huneꞌ naj fariseo,
Simón isbꞌi,
awtelo yinh Komam Jesús ta chito Komam waꞌo yatut naj.
Hayet yapni Komam xin,
yok tzꞌonhno Komam waꞌo sat mexha.
37 Haꞌtikꞌa yul huneꞌ konhobꞌ tuꞌ xin,
ay huneꞌ ix kaw mulum.
Hayet yabꞌen ix tato apni Komam waꞌo bꞌey yatut naj fariseo tuꞌ,
yapni ix yebꞌ huneꞌ islimeta,
alabastro isbꞌi,
kaw nohna yu aceite kaw xuqꞌ sam sikꞌlebꞌil.
38 Yet yapni ix iskꞌatanh Komam Jesús yichi yoqꞌ ix.
Yay jahno ix yich yoj Komam,
istxꞌahni ix yoj Komam yu yal sat.
Lahwi tuꞌ xin,
issuni tajo ix yoj Komam yu xil iswiꞌ,
istzꞌohnipaxo ix yoj Komam.
Tzujan tuꞌ xin,
istobꞌniko ix huneꞌ anh kaw xuqꞌ sam tuꞌ yinh yoj Komam.
39 Hayet yilni naj fariseo huneꞌ tuꞌ,
istxumni naj hakaꞌ tiꞌ:
«Ta yeltikꞌa ischejabꞌ Komam Dios ye huneꞌ naj tiꞌ,
chimtxumchalo yu naj tzet ixal huneꞌ ix chitzabꞌni yoj naj tiꞌ.
Chimtxumcha yu naj ta kaw mulum ix,»
xhi naj ischukil.
40 Yalni Komam tet naj:
—Simón,
ay hanikꞌ tzet chiwoche walaꞌan tawet,
xhi Komam.
Istaqꞌwi naj:
—Hal mam kuywawom tzet chawoche chawal wetan,
xhi naj.
41 Yalni Komam tet naj:
—Qꞌinalo ta ay hunu naj chꞌanilto chꞌen melyu kꞌamil tet kawanho ebꞌnaj.
Ta 500 denariob chiskꞌamnhe huneꞌ naj,
haxa hunxa naj xin,
50 (lahonhebꞌ yoxkꞌal) denarionhe chiskꞌamnhe.
42 Yajaꞌ ta machi bꞌay chito ebꞌnaj yiqꞌati selel chꞌen,
chisbꞌutni tanho naj iskꞌas ebꞌnaj,
¿tzet xin chawute hawalni yinh ebꞌnaj kawanh tuꞌ?
¿Mak xin ekꞌna chitzala yinh naj chibꞌutnitanho iskꞌas ebꞌnaj?
xhi Komam.
43 Istaqꞌwikanh naj Simón:
—Haꞌ yul wetan,
ham naj tzetkꞌa iskꞌas tanhtzelax yibꞌanh,
xhi naj.
Istaqꞌwi Komam xin:
—Hoꞌ,
kaw yel chawala,
xhi Komam.
44 Lahwi tuꞌ xin istꞌanhxito Komam yinh ix,
yalni Komam tet naj Simón tuꞌ:
—¿Mamxawil huneꞌ maswatxꞌe ix tiꞌ?
Hayet makinoktijan yul hawatut tiꞌ,
machi maxatxꞌah wojan,
yaj wal ix tiꞌ xin,
mastxꞌahilo ix wojan yu yal sat.
Malahwi tuꞌ xin,
masuni tajo ix wojan yu xil iswiꞌ.
45 Machi maxatzꞌoh inqꞌotxan,
yajaꞌ huneꞌ ix tiꞌ,
hataxtikꞌa yet manokilojan yul hawatut tiꞌ maꞌichiko ix istzꞌohni wojan.
46 Machi nichꞌan yanhal xil inwiꞌan maxawahtoj,
yaj wal ix tiꞌ,
mastobꞌayo ix huneꞌ anh kaw xuqꞌ sam yibꞌanh wojtiꞌan.
47 Yuxin chiwalan tawet,
huneꞌ ix tiꞌ kaw chitzala ix winhan yuto kaw maꞌaqꞌlaxkano tanho sunil ismul ix.
Walpaxo mak hanikꞌchꞌan nimankꞌulal chꞌaqꞌlax yinh,
kaw hanikꞌchꞌanpaxo tzalahilal chisye,
xhi Komam tet naj Simón tuꞌ.
48 Lahwi tuꞌ,
yalni Komam tet ix:
—Tinanh xin chitanhkano hamul tawibꞌanh,
xhi Komam tet ix.
49 Ebꞌnaj awtebꞌilpaxo waꞌo bꞌey tuꞌ xin,
yal-le ebꞌnaj tet hunun hakaꞌ tiꞌ:
—¿Mak anmahil huneꞌ naj tiꞌ yuxin chisje isbꞌutni tanho naj mule?
xhi ebꞌnaj.
50 Yalnipaxo Komam tet ix:
—Makaxhkolcha tinanh yuto makinhawaytojan yul hawanma,
paxanhto yinh aqꞌankꞌulal,
xhi Komam tet ix.
Mujer Pecaminosa Perdonada