Yet yitzitzbꞌikanh Komam Jesús xol kamom
28
Lahwi yekꞌkanto istzꞌayikal xewilal,
haxa yet issajbꞌilo yinh bꞌabꞌel tzꞌayik yinh semana,
kaw sahabꞌ to ix María ah Magdala yebꞌ huneꞌxa ix chiyij María tuꞌ yilaꞌ bꞌay mujan Komam.
2 Hayet lanhan isto ebꞌix tuꞌ yekꞌ huneꞌ niman txixkabꞌ yuto ayilo huneꞌ yángel Komam Dios bꞌay mujan Komam tuꞌ.
Yinilo naj huneꞌ chꞌen chꞌen ayko ismajilo istiꞌ bꞌay mujan Komam,
yay tzꞌonhno naj yibꞌanh chꞌen.
3 Kaw chijepla yinh naj hakaꞌ isjepla kꞌuh.
Wal xil isqꞌap naj xin kaw sajhoponhe.
4 Hayet yilni ebꞌnaj soldado huneꞌ tuꞌ isluylunkanh ebꞌnaj yu xiwkilal,
yah pakꞌna ebꞌnaj hakaꞌ kamom.
5 Yalni naj ángel tet ebꞌix kawanh tuꞌ:
«Mach chexxiwi,
wohtajan tato haꞌ Komam Jesús alaxkanh yinh kulus,
haꞌ lanhan hesayni.
6 Wal xin matxa Komam ayikti bꞌey tiꞌ,
to xaꞌitzitzbꞌikanh hakaꞌ yu yalni teyet.
Ilwekꞌanabꞌ bꞌay ekꞌle Komam.
7 Tinanh xin as halwe tet ebꞌyaꞌ iskuywom tato maꞌitzitzbꞌikanh Komam xol kamom.
Chibꞌabꞌito Komam tesata bꞌey Galilea,
haꞌ bꞌey tuꞌ cheyilaꞌ Komam.
Haꞌ hunteqꞌan tiꞌ manhul walaꞌan teyet,»
xhi naj ángel tuꞌ tet ebꞌix.
8 Hayet yabꞌen ebꞌix hunteqꞌan tuꞌ,
isto ebꞌix yalno yinh anhe tet ebꞌyaꞌ iskuywom Komam;
kaw xiw ebꞌix,
yajaꞌ xin kaw tzalapaxo ebꞌix yabꞌen huneꞌ tuꞌ.
9 Hayet ayko ebꞌix yinh isbꞌel tuꞌ xin,
isyeni isbꞌa Komam tet ebꞌix,
istioxhli Komam tet ebꞌix.
Ishitziko ebꞌix iskꞌatanh Komam,
yay jahno ebꞌix sata Komam,
yok laqꞌno ebꞌix yinh yoj Komam.
10 Yalni Komam tet ebꞌix:
—Mach chexxiwi,
as halwe tet ebꞌyaꞌ wuxhtajan tato chito bꞌey Galilea,
haꞌ bꞌey tuꞌ chinyilaꞌan ebꞌyaꞌ,
xhi Komam.
Yal ebꞌnaj soldado yinh tzet yuhi
11 Yet lahwi isto ebꞌix tuꞌ,
isto haywanh ebꞌnaj soldado ayko istanheno Komam tuꞌ yul konhobꞌ.
Yalni ebꞌnaj tet ebꞌnaj iswiꞌehal sacerdote yinh tzet yuhi.
12 Yet yabꞌen ebꞌnaj huneꞌ tuꞌ isto ebꞌnaj islahtiꞌnheno isbꞌa yebꞌ ebꞌnaj ichamta winaj iswiꞌehal konhobꞌ Israel.
Yaqꞌni ebꞌnaj niman melyu tet ebꞌnaj soldado tuꞌ,
13 yalni ebꞌnaj tet ebꞌnaj:
«Hak tiꞌ cheyute heyalni hakaꞌ tiꞌ:
“Yet lanhan kowayanh yet aqꞌbꞌalil yul ebꞌnaj iskuywom naj yelqꞌanoto isnimanil naj,”
kexchi.
14 Yajaꞌ ta chabꞌelo naj gobernador huneꞌ tuꞌ matzet chal hekꞌul,
chonhokanh tzotelo teyinh tet naj haxinwal matzet chitit teyibꞌanh,»
xhi ebꞌnaj.
15 Lahwi tuꞌ ischahnilo ebꞌnaj chꞌen melyu tet ebꞌnaj yahawil sacerdote yebꞌ ebꞌnaj kuywawom yinh ley.
Yalni ebꞌnaj soldado tet anma hakaꞌtikꞌa yute yalni ebꞌnaj tet ebꞌnaj.
Huneꞌ leqꞌtiꞌal isnakanh ebꞌnaj tuꞌ,
yexnheto yal-lax xol anma Israel tinanh.
Yaqꞌkano Komam Jesús ischejbꞌanil ebꞌyaꞌ iskuywom
16 Lahwi tuꞌ,
isto ebꞌyaꞌ 11 (hunlahonhwanh) iskuywom Komam Jesús bꞌey Galilea yinh istzalanil huneꞌ wonhan bꞌay yal Komam ta chiꞌapni ebꞌyaꞌ.
17 Haꞌ bꞌey tuꞌ xin yil ebꞌyaꞌ Komam,
yok ebꞌyaꞌ yanoko ismay Komam,
yajaꞌ xin ay hun kawanh ebꞌyaꞌ kabꞌkon iskꞌul.
18 Ishitziko Komam iskꞌatanh ebꞌyaꞌ iskuywom tuꞌ,
yalni Komam:
«Kinyakojan Komam Dios Yahawo yinh tzet ay yul satkanh yebꞌ yinh tzet ay yul sat yibꞌanhqꞌinal tiꞌ.
19 Tinanh xin as kuywe anma yul hunun konhobꞌ yul sat yibꞌanhqꞌinal tiꞌ kat yok yul inqꞌabꞌan.
Cheyakanokanh haꞌ iswiꞌ yinh isbꞌi Komam Dios Mame,
yebꞌ yinh inbꞌihan,
hanin Iskꞌahol Komam Dios intiꞌan,
yebꞌ yinh isbꞌi Komam Espíritu Santo.
20 Chekuyni anma isyijen sunil kuybꞌanile xawaqꞌan teyet.
Wal hinan xin ayinnhetikꞌakojan heyetbꞌiho yinh sunilbꞌal tiempo masanto yet chilahwi huneꞌ yul sat yibꞌanhqꞌinal tiꞌ,»
xhikano Komam Jesús tet ebꞌyaꞌ iskuywom.