Yet yitzitzbꞌikanh Komam Jesús xol kamom
20
Haxa yet bꞌabꞌel tzꞌayik yinh semana,
kaw ayto issajbꞌiloj isto ix María ah Magdala bꞌay alaxikto isnimanil Komam.
Yilni ix ta matxa chꞌen chꞌen ayko ismajilo istiꞌ bꞌay alaxikto Komam tuꞌ.
2 Hak tuꞌ xin yu ispaxti ix yinh anhe yalno tet yaꞌ Simón Pedro yebꞌ xin tet huneꞌxa yaꞌ iskuywom Komam,
yaꞌ kaw xahan ay yu Komam.
Yalni ix María ah Magdala tuꞌ tet ebꞌyaꞌ:
—Kaw maꞌilaxilti isnimanil Komam Jesús bꞌaytikꞌa ayiktoj;
bꞌaymituꞌwal maꞌilaxto isnimanil Komam,
kaw mach johtajoj,
xhi ix tet ebꞌyaꞌ.
3 Yet yabꞌen yaꞌ Pedro yebꞌ huneꞌxa yaꞌ kaw xahan ay yu Komam tuꞌ,
isto ebꞌyaꞌ bꞌay alaxikto Komam tuꞌ.
4 Kaw xin anhe yaqꞌ ebꞌyaꞌ iskawanhil,
yaj xin bꞌabꞌikꞌo huneꞌxa yaꞌ tuꞌ sata yaꞌ Pedro,
yuxin bꞌabꞌel apni yaꞌ.
5 Apninhe yaꞌ xin yay kꞌonhno yaꞌ,
istꞌanhxikto yaꞌ bꞌay alaxikto isnimanil Komam.
Yilni yaꞌ xin tato haxanhkꞌanhe qꞌap qꞌap pichlaxiko yinh Komam wojanayoj,
yajaꞌ xin machi okto yaꞌ.
6 Lahwi tuꞌ xin,
yapni yaꞌ Simón Pedro,
bꞌeh xin yokto yaꞌ yilnoj,
yilni yaꞌ xin tato kaw haxanhkꞌanhe qꞌap qꞌap wojankanayoj.
7 Wal qꞌap payuꞌe kꞌalnhe iswiꞌ Komam,
chulbꞌilayo qꞌap.
Mach hunu yehayo qꞌap yebꞌ qꞌap pichlaxiko yinh Komam.
8-9 Lahwi tuꞌ xin,
yokto huneꞌxa iskuywom Komam tuꞌ,
yaꞌ bꞌabꞌel apni,
yilni yaꞌ xin tato matxa Komam ayikto yul chꞌen,
yanayto yaꞌ yul yanma.
Yajaꞌ wal xin kaw maxhto chitxumchalo yu ebꞌyaꞌ tzet tzꞌibꞌnhebꞌilkano yul Yum Komam Dios bꞌay chala tato kaw yilal ispitzkꞌakanh Komam Jesús xol kamom.a
10 Lahwi tuꞌ xin,
ispaxti ebꞌyaꞌ bꞌay aya.
Yet isyeni isbꞌa Komam Jesús tet ix María ah Magdala
11 Wal ix María ah Magdala,
kankano linhno ix oqꞌo istiꞌ bꞌay alaxikto Komam,
yay nhohno ix istꞌanhxikto ix.
12 Yilnikto ix kawanh ebꞌnaj ángel,
kaw saj jilni xil isqꞌap ayko yinh,
tzꞌonhanayo ebꞌnaj bꞌay ekꞌlena isnimanil Komam tuꞌ,
huneꞌ naj yinh iswiꞌtaj huneꞌxa naj yinh yojtaj.
13 Lahwi tuꞌ xin,
isqꞌambꞌen ebꞌnaj tet ix:
—¿Tzet chawoqꞌte?
xhi ebꞌnaj.
Istaqꞌwi ix:
—Chinoqꞌan yuto maꞌilaxto isnimanil Wahawilan,
kaw mach wohtajojan bꞌaytuꞌwal mabꞌey alaxokanoj,
xhi ix tet ebꞌnaj.
14 Hunepixto tuꞌ xin,
istꞌanhxito ix yintaj,
yilni ix xin linhanxakanh Komam Jesús iskꞌatanh ix,
yaj mach istxumilo ix tato haꞌ Komam.
15 Isqꞌambꞌen Komam tet ix:
—¿Tzet yinh yuxinto chaxhoqꞌi?
¿Mak chasaya?
xhi Komam.
Haꞌ yute isnahni ix tato haꞌ naj chitanhen huneꞌ tzꞌunubꞌ tuꞌ chitzotel tet ix,
yuxinto yal ix:
—Mamin,
tato hach maxawitoj,
halilo wetan bꞌaytuꞌwal makaxhbꞌey hawaqꞌaꞌkanoj,
kat winitojan,
xhi ix.
16 Yalni Komam tet ix:
—¡María!
xhi Komam.
Hak tuꞌ xin yu ismeltzoto ix yintaj,
istꞌanhxiko ix yinh Komam,
yalni ix yinh abꞌxubꞌal hebreo:
—Raboni,
xhi ix.
Maestro,
haꞌ chaliloj huneꞌ tuꞌ.
17 Yalni Komam tet ix:
—Bꞌejtzo hinan,
mach chinhatzabꞌan yuto maxhto chinapnihan iskꞌatanh Inmaman.
Wal tinanh xin,
as hal tet ebꞌyaꞌ wuxhtajan tato chinpaxtojan iskꞌatanh Inmaman,
haꞌ Hemampaxoj,
inDiosalan,
heDiosalpaxoj,
xhi Komam tet ix.
18 Yuxin to ix María ah Magdala tuꞌ yalaꞌ tet ebꞌyaꞌ iskuywom Komam,
yalni ix hakaꞌ tiꞌ:
—Kaw mawilan yinh Komam Jesús,
xhi ix.
Lahwi tuꞌ yalni ix tet ebꞌyaꞌ yinh tzet yal Komam.
Yet isyeni isbꞌa Komam Jesús tet ebꞌyaꞌ iskuywom
19 Yet bꞌabꞌel tzꞌayik yinh semana tuꞌ yet lanhan yah aqꞌbꞌal kutxaniko ebꞌyaꞌ iskuywom Komam.
Kaw kaw yekano ispulta ebꞌyaꞌ yu,
yuto kaw chixiw ebꞌyaꞌ tet ebꞌnaj yahawil yinh ebꞌnaj Israel.
Yokapno Komam bꞌey tuꞌ,
yok linhno Komam yiktabꞌal ebꞌyaꞌ,
yalni Komam:
—Ayojabꞌ aqꞌankꞌulal texol,
xhi Komam.
Jesús se aparece a los discípulos (Juan 20.19-31)
20 Yet lahwi yalni Komam huneꞌ tuꞌ,
isyeni Komam isqꞌabꞌ tet ebꞌyaꞌ yebꞌ ismotx bꞌay to chꞌen lanza.
Hayet yilni ebꞌyaꞌ Komam tuꞌ xin,
kaw okkano huneꞌ niman tzalahilal yinh yanma ebꞌyaꞌ.
21 Yalni Komam tet ebꞌyaꞌ hunelxa:
—Ayojabꞌ aqꞌankꞌulal texol.
Hakaꞌ yu walaxtijan yu Inmaman,
hak tuꞌ xin chiyu kexwanitojan,
xhi Komam tet ebꞌyaꞌ.
22 Lahwi tuꞌ xin,
yanilto Komam xobꞌ istiꞌ,
yalni Komam:
—Chahwekano Espíritu Santo.
23 Haꞌ mak chitanhkano ismul yibꞌanh heyu,
chitanhkano ismul yibꞌanh yu Komam Dios.
Wal mak mach chitanhkano ismul yibꞌanh heyu xin,
kaw mach chitanhpaxo ismul yibꞌanh yu Komam Dios,
xhi Komam tet ebꞌyaꞌ.
Yet yilni yaꞌ Tomás Komam Jesús yet xapitzkꞌakanh
24 Ay xin huneꞌ yaꞌ xol ebꞌyaꞌ 12 (kabꞌlahonhwanh) iskuywom Komam Jesús tuꞌ,
Tomás isbꞌi,
yaꞌ chihal-lax Tioxh uninal.
Machi yaꞌ ayko xol ebꞌyaꞌ iskuywom Komam tuꞌ yet isyeni isbꞌa Komam.
25 Yuxinto yal ebꞌyaꞌ tet yaꞌ Tomás tuꞌ:
—Kaw majilanh yinh Komam,
xhi ebꞌyaꞌ.
—Istaqꞌwi yaꞌ:
—Tato mach chiwilan bꞌay tona chꞌen lawuxh yul isqꞌabꞌ Komam kat wanikto yiximal inqꞌabꞌan yul,
yebꞌ ta mach chintzabꞌan bꞌay tona chꞌen lanza yul ismotx Komam,
kaw mach chiwaytojan yul wanmahan,
xhi yaꞌ.
26 Semanahilxa tuꞌ xin,
iskutxbꞌanpaxo isbꞌa ebꞌyaꞌ hunelxa yul nha,
ayikto xin yaꞌ Tomás tuꞌ xol ebꞌyaꞌ,
kaw xin kꞌul yekaniko ispultahil teꞌ nha bꞌay ayikto ebꞌyaꞌ tuꞌ.
Yokapno Komam Jesús bꞌey tuꞌ,
yok linhno yiktabꞌal ebꞌyaꞌ,
yalni Komam:
—Ayojabꞌ aqꞌankꞌulal texol,
xhi Komam.
27 Lahwi tuꞌ xin yalni Komam tet yaꞌ Tomás:
—Tomás,
akto yiximal haqꞌabꞌ yul isholanil inqꞌabꞌtiꞌan lah,
kat hawanipaxikto yul isholanil inmotxan.
Mach chikabꞌkon hakꞌul,
ayto yul hawanma winhan,
xhi Komam.
28 Lahwi tuꞌ xin,
yalni yaꞌ Tomás tuꞌ tet Komam:
—¡Hach Wahawil,
hach inDiosalan!
xhi yaꞌ tet Komam.
29 Yalni Komam Jesús tet yaꞌ xin:
—Kaw mato hawiliko winhan maxawanayto yul hawanma.
Wal xin,
aytam saqꞌal yet anma mach yechto chinyilan kat xin kinyanaytojan yul yanma,
xhi Komam tet yaꞌ.
Tzet yinh yuxin tzꞌibꞌnhelaxkano kuybꞌanile tiꞌ
30 Kaw xin txꞌiꞌalto kꞌaybꞌalkꞌule isye Komam Jesús yilaꞌ ebꞌyaꞌ iskuywom mach tzꞌibꞌnhebꞌilayo yul huneꞌ hum tiꞌ.
31 Yajaꞌ tzꞌibꞌnhebꞌilkano hunteqꞌan tiꞌ yunhe heyanayto yul heyanma tato haꞌ Komam Jesús,
haꞌ ton Cristo,
Iskꞌahol Komam Dios.
Haxinwal yet cheyanayto yul heyanma,
chechah heqꞌinal mach istanhbꞌal yinh isbꞌi Komam.