Yet yitzitzbꞌikanh Komam Jesús xol kamom
24
Yet bꞌabꞌel tzꞌayik yinh semana kaw sahabꞌ to ebꞌix bꞌay alaxikto isnimanil Komam,
iqꞌbꞌil hunteqꞌan anh kaw xuqꞌ sam watxꞌebꞌil yu ebꞌix.
2 Hayet yapni ebꞌix bꞌey tuꞌ,
yilni ebꞌix ta elnaxa chꞌen chꞌen ayko ismajilo bꞌay alaxikto isnimanil Komam.
3 Yokto ebꞌix yul chꞌen,
yilni ebꞌix ta matxa isnimanil Komam ayiktoj.
4 Kaw kꞌayilo iskꞌul ebꞌix yu huneꞌ tuꞌ.
Haxa yet yilniti ebꞌix xin linhanxakanh kawanh yángel Komam Dios,
toxanhe chitzejtzon xil isqꞌap ebꞌnaj ayko yinh.
5 Kaw xiwkanh ebꞌix,
yay xulno ebꞌix sat txꞌotxꞌ,
yalni ebꞌnaj tet ebꞌix:
—¿Tzet yinh yuxin haꞌ bꞌay chimujlax kamom chesayikꞌo huneꞌ mak itzitzxa?
6 Matxa Komam ayikti bꞌey tiꞌ,
to xaꞌitzitzbꞌikanh.
Naweti tzet yal teyet yet aykꞌo bꞌey Galilea,
7 yet yalni hakaꞌ tiꞌ:
“Hanin Aqꞌbꞌilintijan texol yu Komam Dios,
kaw yilal walaxikojan yul isqꞌabꞌ ebꞌnaj txꞌoj,
kat walaxkanhan yinh kulus,
yajaꞌ yinh yox tzꞌayik kat witzitzbꞌikanhan,”
xhi Komam,
xhi ebꞌnaj.
8 Hak tuꞌ xin yu isnahniti ebꞌix tzet yal Komam.
Ángeles en la Tumba
9 Isto ebꞌix yalno tzet yabꞌe tuꞌ tet ebꞌyaꞌ 11 (hunlahonhwanh) ischejabꞌ Komam,
yebꞌ tet hunteqꞌanxa ebꞌyaꞌ.
10 Haꞌ hunteqꞌan ebꞌix bꞌey halno tuꞌ,
haꞌ ton ix María ah Magdala,
ix Juana,
yebꞌ ix María,
ismiꞌ yaꞌ Jacobo,
yebꞌ hunteqꞌanxa ebꞌix.
11 Wal ebꞌyaꞌ ischejabꞌ Komam tuꞌ,
tonhem chal ebꞌix,
yalni ebꞌyaꞌ;
yuxin maxhtikꞌa yayto ebꞌyaꞌ yul yanma yinh tzet chal ebꞌix.
12 Wal yaꞌ Pedro xin,
to yaꞌ yinh anhe yilaꞌ bꞌay alaxikto isnimanil Komam tuꞌ.
Hayet yay kꞌonhno yaꞌ yilnikto yaꞌ,
haxanhe qꞌap sábana aykanayoj.
Kaw kꞌaykanh iskꞌul yaꞌ,
ispaxto yaꞌ bꞌay aya.
La Tumba Está Vacía
Isye isbꞌa Komam Jesús yul isbꞌelal Emaús tet kawanh iskuywom
13 Haꞌtikꞌa yinh huneꞌ tzꞌayikal tuꞌ,
ay kawanh ebꞌyaꞌ iskuywom Komam Jesús,
to bꞌey huneꞌ aldea Emaús.
Aymi oxebꞌo legua yelo yinh konhobꞌ Jerusalén.
14 Yet ayko ebꞌyaꞌ yinh isbꞌel tuꞌ,
chitzotel ebꞌyaꞌ yinh tzet yaqꞌle Komam Jesús.
15 Hayet lanhan istzotel ebꞌyaꞌ yinh huneꞌ tuꞌ,
yapni Komam iskꞌatanh ebꞌyaꞌ,
hunxa xin yu isto Komam yebꞌ ebꞌyaꞌ.
16 Waxanhka yil ebꞌyaꞌ yinh Komam,
yaj ay huneꞌ tzet machi chahni yohtanhelo ebꞌyaꞌ Komam.
17 Isqꞌambꞌen Komam tet ebꞌyaꞌ:
—¿Tzet tzotiꞌal ayko heyu yul bꞌeh tiꞌ?
xhi Komam.
Kaw xin bꞌiskꞌulal jilni sat ebꞌyaꞌ,
18 istaqꞌwi huneꞌ yaꞌ chiyij Cleofas:
—Sunil anma ohtanhe tzet yu yul konhobꞌ Jerusalén yinh hunteqꞌan tzꞌayik tiꞌ.
¿Tom hachxanhe yul konhobꞌ tiꞌ mach hawohtajoj?
xhi yaꞌ.
19 Isqꞌambꞌen Komam tet ebꞌyaꞌ:
—¿Tzet huneꞌ yu tuꞌ?
xhi Komam.
Yalni ebꞌyaꞌ:
—Ay huneꞌ yaꞌ Jesús,
ah Nazaret,
ischejabꞌ Komam Dios,
haꞌ tzet iswatxꞌe yebꞌ tzet yala kaw niman yelapno yul sat Komam Dios yebꞌ yul sat anma.
20 Yaj haꞌ ebꞌnaj yahaw yinh ebꞌnaj sacerdote,
yebꞌ ebꞌnaj iswiꞌehal konhobꞌ,
haꞌ ebꞌnaj aniko yaꞌ yul isqꞌabꞌ kamikal,
yalaxkanh yinh kulus.
21 Haꞌ yaꞌ ayko yipo janmahanh yok kolnolo konhobꞌ Israel tiꞌ yul isqꞌabꞌ ebꞌnaj romano.
Yaj tinanh oxebꞌxa tzꞌayik yuni huneꞌ tuꞌ.
22 Ay xin hunteqꞌan ebꞌix jetbꞌi kobꞌahanh yebꞌi kaw sahabꞌ mabꞌeykꞌo bꞌay alaxikto isnimanil yaꞌ.
Kaw makꞌayilo kokꞌulanh yu tzet mayal ebꞌix.
23 Yuto hayet maꞌapni ebꞌix,
matxa isnimanil yaꞌ ayiktoj.
Yuxin hayet mameltzo ebꞌix,
mayalni ebꞌix jetanh ta mayil ebꞌix hunteqꞌan ebꞌnaj ángel,
mayalni ebꞌnaj ta itzitz yaꞌ.
24 Ay xin hunteqꞌan ebꞌyaꞌ jetbꞌihanh mabꞌey ilno bꞌay alaxikto isnimanil yaꞌ.
Kaw xin matxa isnimanil yaꞌ ayikto hakaꞌtikꞌa mayu yalni ebꞌix jetanh,
xhi ebꞌyaꞌ.
25 Yalni Komam Jesús tet ebꞌyaꞌ:
—Kaw yaꞌta istxumchalo heyu yebꞌ kaw lanho cheyayto yul heyanma yinh tzet halbꞌilkano yu ebꞌyaꞌ ischejabꞌ Komam Dios yet payat.
26 ¿Tom mach heyohtajo ta yaꞌ Cristo yilal yekꞌyaꞌ yanma hakaꞌ mayu tuꞌ,
lahwi tuꞌ kat yok yaꞌ Yahawil?
xhi Komam.
27 Yok Komam yalno yinh kaw habꞌan yinh sunil tzet tzꞌibꞌnhebꞌilkanayo yinh Komam Cristo yul Yum Komam Dios.
Ichiko bꞌay tzꞌibꞌnhebꞌilkano yu yaꞌ Moisés,
masanta apni yinh sunil tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat.
28 Hayet lanhan yapni ebꞌyaꞌ yul aldea tuꞌ,
isyenilo Komam ta palan istohi.
29 Yajaꞌ mach ischato ebꞌyaꞌ Komam.
Yalni ebꞌyaꞌ:
—Kananhkano kokꞌatanhanh,
yuto kaw qꞌejbꞌixa lah,
xhi ebꞌyaꞌ.
Hak tuꞌ xin yu iskan Komam iskꞌatanh ebꞌyaꞌ.
30 Hayet ayxako Komam sat mexha yebꞌ ebꞌyaꞌ,
yinikanh Komam ixim pan.
Lahwi yaqꞌni Komam yuchꞌandios tet Komam Dios,
isqꞌaxponayo ixim,
yaqꞌni Komam ixim tet ebꞌyaꞌ.
31 Yinh haꞌmataj tuꞌ xin,
hakaꞌtanhe hajcha sat ebꞌyaꞌ,
isnachalo Komam Jesús yu ebꞌyaꞌ.
Wal Komam xin,
kꞌaykanh Komam yinh sat ebꞌyaꞌ.
32 Yalni ebꞌyaꞌ tet hunun:
—¡Toꞌan yuxin kaw matzalakanh janma yet makonhiskuyni Komam yinh Istzotiꞌ Komam Dios yul bꞌeh!
xhi ebꞌyaꞌ.
33 Lahwinhena tuꞌ xin,
ismeltzoto ebꞌyaꞌ bꞌey Jerusalén,
isto ebꞌyaꞌ bꞌay kutxaniko ebꞌyaꞌ 11 (hunlahonhwanh) yebꞌ hunteqꞌanxa iskuywom Komam.
34 Yalni ebꞌyaꞌ tet ebꞌyaꞌ kawanh tuꞌ:
—Yinh kaw yeli,
maꞌitzitzbꞌikanh Komam,
masye isbꞌa tet yaꞌ Simón Pedro,
xhi ebꞌyaꞌ.
35 Yalnipaxo ebꞌyaꞌ kawanh tuꞌ yinh tzet yu isyenikanh isbꞌa Komam yul bꞌeh tet ebꞌyaꞌ,
yebꞌ tzet yu yohtanhenilo ebꞌyaꞌ Komam yet isqꞌaxpon ixim pan.
Yet isyeni isbꞌa Komam Jesús tet iskuywom
36 Hayet lanhan istzotel ebꞌyaꞌ yinh huneꞌ tuꞌ,
yilniti ebꞌyaꞌ xin linhanxayo Komam Jesús yiktabꞌal ebꞌyaꞌ,
yalni Komam tet ebꞌyaꞌ:
—Ayojabꞌ aqꞌankꞌulal texol,
xhi Komam.
37 Kaw xiw ebꞌyaꞌ,
iskꞌaykanh iskꞌul ebꞌyaꞌ yuto ispixan kamommi chil ebꞌyaꞌ yalni.
38 Yajaꞌ yal Komam tet ebꞌyaꞌ:
—¿Tzet yinh yuxin chexxiwi yebꞌ chikabꞌkon heyanma?
39 Ilwekꞌanabꞌ inqꞌabꞌan yebꞌ wojan bꞌay to chꞌen lawuxh.
¡Kaw hanintonan!
Tzabꞌinwekꞌanabꞌan kat heyohtanheniloj ta haninan.
Wal hakaꞌ hunu ispixan kamom,
machi ischibꞌehal,
machipaxo isbꞌajil hakaꞌ chu kinheyilnitiꞌan,
xhi Komam.
40 Hayet yalni Komam huneꞌ tuꞌ isyeni Komam isqꞌabꞌ yebꞌ yoj tet ebꞌyaꞌ.
41 Yajaꞌ yu xatzalahilal yebꞌ yu chikꞌay iskꞌul ebꞌyaꞌ yilni,
yuxin machi kaw yayto ebꞌyaꞌ yul yanma ta haꞌ Komam.
Yuxin isqꞌambꞌe Komam tet ebꞌyaꞌ:
—¿Aymi nichꞌano tzet chikolo aykꞌo heyu?
xhi Komam.
42 Yaqꞌni ebꞌyaꞌ qꞌaxep noꞌ txobꞌil kay tet Komam,
yebꞌ nichꞌan noꞌ kabꞌ.
43 Ischahnilo Komam noꞌ,
iswaꞌ Komam yinh sat ebꞌyaꞌ.
44 Yalni Komam tet ebꞌyaꞌ:
—Haꞌ hunteqꞌan isyaꞌtajil mawaqꞌletiꞌan,
haꞌ ton walan teyet yet ayintokꞌojan texol,
ta yilal yijni isbꞌa hakaꞌ tzet tzꞌibꞌnhebꞌilkano winhan yu yaꞌ Moisés,
yebꞌpaxo yu ebꞌyaꞌ ischejabꞌ Komam Dios yet payat,
yebꞌpaxo xin yinh Salmos,
xhi Komam.
45 Hak tuꞌ yu yaqꞌni Komam Jesús yohtanhelo ebꞌyaꞌ yinh tzet tzꞌibꞌnhebꞌilkanayo yul Yum Komam Dios.
46 Yalnipaxo Komam:
—Tzꞌibꞌnhebꞌilkanayoj ta yilal yekꞌyaꞌ wanmahan,
kat inkaman,
Hanin Cristo intiꞌan.
Lahwi tuꞌ xin,
kat witzitzbꞌikanhan yinh yox tzꞌayik.
47 Kaw xin,
yilal yal-laxikꞌo Intzotiꞌan bꞌabꞌel yul Jerusalén tiꞌ,
yebꞌpaxo sunil yul sat yibꞌanhqꞌinal tiꞌ,
ta yilal yaniko isbꞌa anma yul isqꞌabꞌ Komam Dios kat isbꞌejnikano istxꞌojal,
haxinwal chꞌaqꞌlax nimankꞌulal yinh ismul.
48 Hex tiꞌ,
cheyaqꞌako hebꞌa heyalnolo hunteqꞌan tiꞌ,
yuto hex kaw hex heyilaꞌ.
49 Tinanh xin,
wal heye bꞌey Jerusalén tiꞌ masanto chechah yip Espíritu Santo chinchejtijan bꞌey satkanh;
huneꞌ halbꞌilkano yu Inmaman,
xhi Komam tet ebꞌyaꞌ ischejabꞌ tuꞌ.
Aparece Jesús Resucitado
Yet yilaxto Komam Jesús satkanh
50 Lahwi tuꞌ yinito Komam Jesús ebꞌyaꞌ ischejabꞌ yul ismajul Betania.
Yinikanh Komam isqꞌabꞌ,
isqꞌanni Komam iskꞌulal Komam Dios yibꞌanh ebꞌyaꞌ ischejabꞌ tuꞌ.
51 Lanhantotikꞌa tuꞌ xin,
yilaxto Komam satkanh.
52 Yok ebꞌyaꞌ yalno kꞌul-la tzotiꞌ yinh Komam,
ispaxto ebꞌyaꞌ bꞌey Jerusalén yinh kaw tzalahilal.
53 Hunun tzꞌayik xin iskutxbꞌan isbꞌa ebꞌyaꞌ yul Yatut Komam Dios,
chaniko ebꞌyaꞌ ismay Komam Dios,
chalni ebꞌyaꞌ kꞌul-la tzotiꞌ yinh Komam.
¡Hakojabꞌ tuꞌ!
La Gran Comisión y Ascensión
Invitación para Conocer Personalmente a Jesús