2 Haxa yinh kaw sahabꞌ sakꞌayal yinh bꞌabꞌel tzꞌayik yinh semana xin,

isto ebꞌix bꞌay mujlax Komam;

haꞌ kaw yahilo tzꞌayik yapni ebꞌix bꞌey tuꞌ.

3 Yal-len ebꞌix tet hunun:

—¿Maktaxka chiꞌinilo chꞌen ayko ismajilo istiꞌ bꞌay ayikto Komam?

xhi ebꞌix.

4 Haxa yet yilniti ebꞌix matxa ayoko huneꞌ chꞌen niman chꞌen tuꞌ ismajilo bꞌay alaxikto isnimanil Komam.

5 Hayet yokto ebꞌix yul chꞌen xin,

yilni ebꞌix huneꞌ naj tzeh tzꞌonhanayo yinh kowatxꞌqꞌabꞌ yulikto chꞌen,

kaw sajhoponhe xil isqꞌap naj aykoj,

kaw xin nimajal istel yoj xil isqꞌap naj tuꞌ.

Kaw xiwkanh ebꞌix yet yilni ebꞌix naj.

6 Yalni naj tet ebꞌix:

—Mach chexxiwi,

wohtajan tato Komam Jesús ah Nazaret chesayikꞌoj,

Komam alaxkanh yinh kulus.

Xaꞌitzitzbꞌikanh Komam,

matxa Komam bꞌey tiꞌ.

Ilwekꞌanabꞌ bꞌay alaxikti Komam.

7 As halwe tet ebꞌyaꞌ iskuywom Komam yebꞌ tet yaꞌ Pedro tato chibꞌabꞌi apno Komam bꞌey Galilea tesataj,

haꞌ bꞌey tuꞌ xin cheyil yinh Komam hakaꞌtikꞌa yu yalnikano teyet,

xhi naj.

8 Lahwi tuꞌ xin,

yelti lemna ebꞌix bꞌey tuꞌ,

isto ebꞌix,

toxanhe xin chikꞌuykꞌun ebꞌix yu xiwkilal.

Machi mak tet xin yal ebꞌix,

yuto kaw xiw ebꞌix.

9 Hayet yitzitzbꞌikanh Komam yinh kaw sahabꞌ sakꞌayalil yinh bꞌabꞌel tzꞌayik yinh semana,

haꞌ tet ix María ah Magdala bꞌay isye isbꞌa Komam bꞌabꞌel,

ix bꞌay yilo Komam hujwanh ischejabꞌ naj matzwalil.

10 Lahwi tuꞌ,

isto ix yalno tet ebꞌyaꞌ ekꞌ tzujtzun yinta Komam ta isye isbꞌa Komam tet ix.

Haꞌ ebꞌyaꞌ tuꞌ kaw bꞌiskꞌulal ye ebꞌyaꞌ yebꞌ xin kaw chiꞌoqꞌ ebꞌyaꞌ.

11 Hayet yabꞌen ebꞌyaꞌ ta itzitzbꞌikanh Komam yebꞌ ta isye isbꞌa tet ix,

kaw mach yayto ebꞌyaꞌ yul yanma.

12 Tzujan tuꞌ xin,

isyenipaxo isbꞌa Komam tet kawanh iskuywom yet lanhan isto bꞌey huneꞌ aldea;

nan yu isyenipaxo isbꞌa Komam tet ebꞌyaꞌ

13 Isto ebꞌyaꞌ kawanh tuꞌ yalno tet hunteqꞌanxa ebꞌyaꞌ iskuywom Komam,

yajaꞌ maxhtikꞌa yapaxayto ebꞌyaꞌ yul yanma.

14 Haxa yinh tzujanilxa xin isyeni isbꞌa Komam Jesús tet ebꞌyaꞌ 11 (hunlahonhwanh) iskuywom yet ayko ebꞌyaꞌ waꞌo sat mexha,

iskachlax ebꞌyaꞌ yu Komam yu chikabꞌkon iskꞌul ebꞌyaꞌ;

mach yayto ebꞌyaꞌ yul yanma yinh tzet yal ebꞌyaꞌ xaꞌilni ta xaꞌitzitzbꞌikanh Komam.

15 Yalnikano Komam tet ebꞌyaꞌ:

—Asiꞌwe sunil yul sat yibꞌanhqꞌinal tiꞌ kat heyalnikꞌo Tzotiꞌ Kꞌul yet Kolbꞌanile tet sunil anma.^a

16 Haꞌ mak chiꞌanayto yul yanma kat yahkano haꞌ iswiꞌ,

chikolchahi,

yajaꞌ wal mak mach chiꞌanayto yul yanma,

chiꞌay isyaꞌtajil yibꞌanh.

17 Haꞌ hunteqꞌan kꞌaybꞌalkꞌule tiꞌ chiꞌok yechelo tet mak chiꞌanayto yul yanma,

chiyilo ischejabꞌ naj matzwalil yinh anma yinh inbꞌihan,

kat istzotel yinh nan abꞌxubꞌal.

18 Waxanhka chistzabꞌ noꞌ labꞌa,

waxanhka chiꞌaqꞌlax veneno yukꞌuꞌ,

matzet chuhi.

Hayet chanayo isqꞌabꞌ yibꞌanh anma yaꞌay,

kat iskawxikanokanh,

xhi Komam.

19 Lahwi yalnikano Komam Jesús sunil hunteqꞌan tuꞌ tet ebꞌyaꞌ iskuywom,

yilaxto Komam satkanh,

yok tzꞌonhno Komam yinh iswatxꞌqꞌabꞌ Komam Dios.

20 Lahwi tuꞌ xin,

isto ebꞌyaꞌ iskuywom Komam tuꞌ yalnokꞌo Istzotiꞌ Komam Dios sunil yul sat yibꞌanhqꞌinal.

Kaw xin ayko Komam Dios yetbꞌiho ebꞌyaꞌ,

yebꞌ kaw chiꞌok yip tzotiꞌ chalikꞌo ebꞌyaꞌ tuꞌ yu ej kꞌaybꞌalkꞌule yebꞌ yu yechel yip Komam chisye ebꞌyaꞌ.