3 Lahwi tuꞌ xin,

ishitziko ebꞌnaj iskꞌatanh Komam,

yalni ebꞌnaj hakaꞌ tiꞌ:

—Jaqꞌaꞌko iswinajil naj yahawil konhobꞌ Israel,

xhi ebꞌnaj,

chetan ebꞌnaj Komam.

Chilaispaqꞌnilto ebꞌnaj sat Komam.

4 Lahwi tuꞌ xin,

yelpaxti naj Pilato tuꞌ istiꞌ iskapil,

yalni naj tet ebꞌnaj Israel tuꞌ:

—Ilwekꞌanabꞌi lah,

chiwiltijan naj heyilaꞌ yunhe kaw heyabꞌenkanoj tato kaw machi nichꞌano ismul naj chiꞌilchalo yinh wuhan,

xhi naj tet ebꞌnaj.

5 Lahwi tuꞌ xin,

yelilo Komam istiꞌ kapil,

ayahto huneꞌ corona txꞌix tuꞌ yinh iswiꞌ Komam,

hukanpaxiko huneꞌ qꞌap yinh Komam kajmutzꞌmunhe.

Yalni naj Pilato tuꞌ tet ebꞌnaj:

—Ilwekꞌanabꞌi,

ay naj lah,

xhi naj.

6 Hayet yilni ebꞌnaj yahawil sacerdote yebꞌ ebꞌnaj chitanhen Yatut Komam Dios,

yah yaw ebꞌnaj,

yalni ebꞌnaj yinh kaw ip:

—Haꞌojabꞌ naj yinh kulus,

haꞌojabꞌ naj yinh kulus,

xhixanhe ebꞌnaj sunil.

—Yuxinto yal naj Pilato tuꞌ tet ebꞌnaj:

—Ta hak tuꞌ chal tuꞌ,

iweto naj kat heyanikanh naj yinh kulus tuꞌ hechukil,

yuto kaw machi nino ismul naj chiꞌilchalo yinh wuhan,

xhi naj tet ebꞌnaj.

7 Yalni xin ebꞌnaj Israel tuꞌ tet naj:

—Wal koleyanh,

chala tato kaw yilal iskam naj,

yuto kaw chaliko isbꞌa naj Iskꞌaholo Komam Dios,

xhi ebꞌnaj.

8 Yet yabꞌen naj Pilato huneꞌ tiꞌ xin,

ekꞌna kaw xiwkanh naj.

9 Yuxinto meltzopaxikto naj yul kapil tuꞌ hunelxa,

isqꞌambꞌen naj tet Komam:

—¿Bꞌaytuꞌwal titnaj hachikoj?

xhi naj.

Kaw xin maxhtikꞌa taqꞌwi Komam tet naj.

10 Yuxinto yal naj tet Komam:

—¿Tzet yinh yuxinto mach chaxhtaqꞌwi wetan?

¿Tom mach hawohtajoj tato ay wipan kaxhinbꞌejtzonan,

maka xin kaxhwanikanhan yinh kulus?

xhi naj tet Komam.

11 Istaqꞌwi Komam tet naj:

—Kaw machim hawip winhan tato maxhtaj Komam Dios aqꞌnhe huneꞌ hawip tiꞌ yul haqꞌabꞌ.

Wal xin,

haꞌ naj kinanikojan yul haqꞌabꞌ tiꞌ,

haꞌ naj kaw ekꞌna ay ismul tasataj,

xhi Komam tet naj.

12 Yet yabꞌen naj yalni Komam huneꞌ tuꞌ,

issayni naj tzet kaw chiyu iskolcha Komam,

yaj kaw ip yahkanh yel yaw ebꞌnaj Israel tuꞌ,

chalni ebꞌnaj:

—¡Tato chabꞌejtzo naj,

kaw chakaj naj jahaw ay bꞌey Roma chal tuꞌ,

yuto maknhetikꞌa chal isbꞌa jahawil,

kaw chiskaj naj jahaw ay bꞌey Roma!

xhi ebꞌnaj.

13 Yet yabꞌen naj Pilato huneꞌ tuꞌ,

yalni naj tato chiꞌilaxilti Komam Jesús.

Lahwi tuꞌ xin,

yay tzꞌonhno naj yul ischem bꞌay chiꞌil-laxi tzet chiꞌeliko anma ay ismul.

Huneꞌ lugar tuꞌ,

Gábata isbꞌi yul abꞌxubꞌal hebreo.

Gábata tuꞌ chal yelapnoj latzꞌbꞌilayo chꞌen chꞌen.

14 Chumanil xin yet hekalxanhe chiꞌichiko qꞌinh Pascua,

yalni naj tet ebꞌnaj Israel tuꞌ:

—Ay heYahawil tiꞌ lah,

xhi naj.

15 Yahpaxo wejna ebꞌnaj yalni yinh kaw ip:

—¡Kamojabꞌ naj,

kamojabꞌ naj,

akanh naj yinh kulus!

xhi ebꞌnaj yinh Komam.

Istaqꞌwipaxo naj:

—¿Tom chiwakanhan naj heYahawil tiꞌ yinh kulus,

chal tuꞌ?

xhi naj.

Istaqꞌwi ebꞌnaj yahawil yinh ebꞌnaj sacerdote:

—Wal hanhonhtiꞌanh,

mach hunuxa jahawilanh kachannhe naj jahawil ay bꞌey Roma,

xhi ebꞌnaj tet naj.

16 Hak tuꞌ xin yu yaniko naj Pilato Komam yul isqꞌabꞌ ebꞌnaj yunhe yanikanh ebꞌnaj yinh kulus.

Hak tuꞌ xin yu yinito ebꞌnaj Komam.

17 Yet yelto Komam Jesús yul konhobꞌ Jerusalén tuꞌ,

yinito Komam iskulus yibꞌanh iswixikꞌ.

Yilaxto Komam bꞌey huneꞌ txꞌotxꞌ chiyij Gólgota.

Huneꞌ tzotiꞌ Gólgota tuꞌ,

chal yelapnoj Isbꞌajil Wiꞌe yinh abꞌxubꞌal hebreo.

18 Haꞌ tuꞌ xin alaxkanh Komam yinh kulus.

Aypaxo xin kawanhxa ebꞌnaj alaxkanh yinh kulus yinta Komam.

Huneꞌ naj ah yinh iswatxꞌqꞌabꞌ Komam,

huneꞌxa naj ah yinh ismekqꞌabꞌ.

19 Istzꞌibꞌnhen naj Pilato hayebꞌ tzꞌibꞌ,

ischejni naj yalaxoko yibꞌanh iswiꞌ Komam yinh kulus,

chalni hakaꞌ tiꞌ:

«Naj Jesús ah Nazaret,

Yahawil anma Israel,»

xhi hayebꞌ tzꞌibꞌ tuꞌ.

20 Kaw hantanhe ebꞌnaj Israel ilni hunteqꞌan tzꞌibꞌ tuꞌ,

yuto kaw istxam konhobꞌ Jerusalén alaxkanh Komam yinh kulus.

Haꞌ hunteqꞌan tzꞌibꞌ tuꞌ xin,

ayiko yinh abꞌxubꞌal hebreo yebꞌ xin yinh abꞌxubꞌal griego,

yebꞌ xin yinh huneꞌxa abꞌxubꞌal chiyij latín.

21 Yuxinto yal ebꞌnaj yahawil sacerdote tet naj Pilato tuꞌ:

—Majaltam tiꞌ,

mach yahawilo ebꞌnaj Israel maxawutekoj,

hakoj tiꞌ maxawutekoj lah,

naj chiyal isbꞌa yahawil ebꞌnaj Israel,

xhi ebꞌnaj.

22 Istaqꞌwi naj Pilato tet ebꞌnaj:

—Bꞌaytettikꞌa toxa mantzꞌibꞌnhekojan hak tuꞌ chiyukanoj,

xhi naj.

23 Yet lahwi yanikanh ebꞌnaj soldado Komam Jesús yinh kulus tuꞌ,

yinikanh ebꞌnaj xil isqꞌap Komam,

ispohnikanto ebꞌnaj yinh.

Kaw kanhebꞌ eliko qꞌap,

hunun litxꞌan yet hunun ebꞌnaj.

Wal huneꞌ qꞌap chishukbꞌako Komam yibꞌanh xil isqꞌap xin,

machi istzilbꞌanil qꞌap,

yuto huneꞌnhe ye ischembꞌanil qꞌap sunil masanta chiꞌayilo yinh yojtabꞌanil.

24 Yuxinto yal ebꞌnaj soldado tuꞌ tet hunun:

—Mach chikotzilto huneꞌ tiꞌ,

wal xin jilweꞌ kobꞌa yinh mak chiꞌinitoj,

xhi ebꞌnaj tet hunun.

Hak tuꞌ xin yu yijnikano isbꞌa yinh tzet tzꞌibꞌnhebꞌilkano yul Yum Komam Dios bꞌay chala:

«Istzilayo ebꞌnaj xil inqꞌapan yinh,

yilwenpaxo isbꞌa ebꞌnaj yinh mak chiꞌinito xil inqꞌapan hukan yehi,»^a

xhikanayoj.

Yaj xin kaw yeli,

hak tuꞌ yute ebꞌnaj soldado tuꞌ.

25 Iskawilal bꞌay aykanh Komam yinh kulus tuꞌ xin,

linhankanh ismiꞌ Komam yebꞌ xin isnoh ismiꞌ,

yebꞌ xin ix María yixal naj Cleofas,

yebꞌ xin ix María ah Magdala.

26 Iskꞌatanh ismiꞌ Komam tuꞌ xin,

linhankanh huneꞌ yaꞌ iskuywom Komam kaw xahankano ay yu.

Yet yilni Komam ismiꞌ tuꞌ,

yalni Komam:

—Miꞌ,

yaꞌ linhankanh takꞌatanh tuꞌ,

hakaꞌ hawunin chiyukaniko yaꞌ,

xhi Komam.

27 Yalnipaxo Komam tet yaꞌ iskuywom tuꞌ:

—Inmiꞌtiꞌan,

kaw hakaꞌ hamiꞌ chiyukanikoj,

xhi Komam tet yaꞌ.

Hak tuꞌ xin yu yok yaꞌ yilno ismiꞌ Komam bꞌey yatut.^b

28 Lahwi tuꞌ xin,

yohtanhenilo Komam Jesús tato kaw yijkano isbꞌa sunil tzet yilal iswatxꞌeni,

yuxinto yal hakaꞌ tiꞌ:

—Kaw chitaj intiꞌan,

xhi Komam.

Yal Komam huneꞌ tuꞌ yunhe yijnikano isbꞌa tzet tzꞌibꞌnhebꞌilkano yinh Istzotiꞌ Komam Dios yet payat.^c

29 Bꞌey tuꞌ xin,

ayayo huneꞌ xhalu vinagre,

islabꞌanayto ebꞌnaj huneꞌ esponja xol,

yaniko ebꞌnaj huneꞌ esponja tuꞌ yinh iswiꞌ huneꞌ teꞌ hisopo,

yanahto ebꞌnaj yinh istiꞌ Komam.

30 Yet lahwi yukꞌni Komam vinagre tuꞌ xin,

yalni hakaꞌ tiꞌ:

—Mayijkano isbꞌa sunil tinanh,

xhikano Komam.

Lahwi tuꞌ xin,

yay xulna iswiꞌ Komam,

iskamiloj.

31 Kaw xin hekalxanhe qꞌinh Pascua yebꞌ xin istzꞌayikal xewilal,

yuxinto mach chisje iskꞌul ebꞌnaj Israel tato chikankano isnimanil ebꞌnaj aykanh yinh kulus bꞌey tuꞌ,

yuto kaw aykano yelapno huneꞌ tzꞌayik xewilal tuꞌ yul sat ebꞌnaj.

Yuxinto bꞌey ebꞌnaj isqꞌanaꞌ tet naj Pilato tato chischej naj qꞌahlaxoto isbꞌajil isbꞌul Komam yebꞌ ebꞌnaj alaxkanh yinh kulus yinta Komam tuꞌ,

yunhe iskamilo yinh anhe kat xin yilaxayo isnimanil yinh kulus.

32 Yuxin apni ebꞌnaj soldado isqꞌahaꞌlto isbꞌajil isbꞌul naj bꞌabꞌel yebꞌ xin naj iskabꞌ.

33 Yet yapni ebꞌnaj yinh Komam Jesús xin,

yilni ebꞌnaj tato xakamnalo Komam,

yuxinto matxa isqꞌahilto ebꞌnaj isbꞌajil isbꞌul Komam.

34 Yaj xin ay huneꞌ naj soldado hopchan ismotx Komam yu islanza,

yelilo chikꞌ yebꞌ ha haꞌ yul ismotx Komam.

35 Wal xin haninan kaw wilan hun tiꞌ yuxinto chiwalan teyet,

kaw chiwalan isyelal teyet yunhe heyanayto yul heyanma tato kaw hak tuꞌ yuhi.

Kaw wohtajan tato kaw isyelal tzet chiwaltiꞌan.

36 Matxa qꞌahlaxto isbꞌajil isbꞌul Komam yunhe yijnikano isbꞌa tzet tzꞌibꞌnhebꞌilkano yul Yum Komam Dios yet payat bꞌay chal hakaꞌ tiꞌ:

«Machi hunu isbꞌajil chiqꞌahlaxtoj,»

xhi.

37 Chalpaxo hakaꞌ tiꞌ yinh Istzotiꞌ Komam Dios:

«Chiꞌil-lax huneꞌ naj hopchabꞌil yu chꞌen lanza,»^d

xhi.

38 Ay xin huneꞌ naj José isbꞌi,

ah Arimatea.

Haꞌ naj tuꞌ xin tzujantikꞌa yinh tzet chal Komam Jesús,

tonhe xin mach chisyelo naj yuto kaw chixiw naj tet ebꞌnaj yahawil yeko yinh anma Israel.

Isbꞌey naj isqꞌanno tet naj Pilato ta chiyiyo naj isnimanil Komam yinh kulus.

39 Haꞌ hun naj Nicodemo,

naj bꞌeykꞌo ilno Komam yet aqꞌbꞌalil yet yalanhtokanoj,

apni bꞌey tuꞌ,

iqꞌbꞌil oxebꞌ arroba hunteqꞌan anh kaw xuqꞌ sam yu naj,

mirra isbꞌi,

sombꞌil yebꞌ hunteqꞌan anh chiyij áloes.

40 Lahwi tuꞌ xin,

yinito ebꞌnaj isnimanil Komam,

ispichniko ebꞌnaj qꞌap yebꞌ anh kaw xuqꞌ sam tuꞌ yinh isnimanil Komam;

yuto hak tuꞌ chiyute anma Israel yinh iskamom yet chimujlaxi.

41 Iskawilal bꞌay alaxkanh Komam yinh kulus tuꞌ,

ay huneꞌ peyabꞌ yet tzꞌunubꞌ,

haꞌ tuꞌ xin ay huneꞌ chꞌen chꞌen holbꞌil yul bꞌay chiꞌalaxikto kamom.

Kaw xin akꞌto chꞌen,

kaw maxhto hunu kamom chiꞌalaxikto yul chꞌen.

42 Yu yichixa tzꞌayik xewilal,

yebꞌ xin yu kawil yeko huneꞌ chꞌen chꞌen tuꞌ,

yuxin haꞌ tuꞌ yakanikto ebꞌnaj isnimanil Komam.