Ishel isbꞌa yil-lax yinh Komam Jesús
17
Wajebꞌxa tzꞌayik xin,
ishekꞌnilo isbꞌa Komam Jesús xol anma yinito Komam yaꞌ Pedro,
yaꞌ Jacobo yebꞌ yuxhtaj,
haꞌ ton yaꞌ Juan,
yinh iswiꞌ huneꞌ witz kaw nahat yekanh.
2 Haꞌ bꞌey tuꞌ xin ishel isbꞌa yil-lax yinh Komam,
kaw toxanhe chitzejtzon sat Komam hakaꞌ tzꞌayik.
Wal xil isqꞌap Komam xin,
kaw sajhoponhe elikoj.
La transfiguración (Mateo 17.1-13)
3 Lanhantotikꞌa xin yilni ebꞌyaꞌ yaꞌ Elías yebꞌ yaꞌ Moisés,
lanhan istzotel ebꞌyaꞌ yebꞌ Komam.
4 Yalnikanh yaꞌ Pedro tet Komam Jesús:
«Mamin,
kaw kꞌul ta wal je bꞌey tiꞌ,
ta chisje hakꞌul chu kowatxꞌenanh oxebꞌo nixhte pat;
hunu hawet,
hunu yet yaꞌ Moisés,
yebꞌ hunu yet yaꞌ Elías tiꞌ,»
xhi yaꞌ Pedro.
5 Hayet lanhan yalni yaꞌ Pedro huneꞌ tuꞌ xin,
yayilo huneꞌ moyan kaw sajhoponhe,
yok hoyno yinh ebꞌyaꞌ yebꞌ Komam.
Yabꞌen ebꞌyaꞌ huneꞌ yul nuqꞌe xol moyan tuꞌ yalni hakaꞌ tiꞌ:
«Haꞌ yaꞌ tiꞌ Inkꞌaholan kaw xahan ay wuhan,
kaw chintzalahan yinh;
abꞌewe tzet chal yaꞌ,»
xhi xol moyan tuꞌ.
6 Hayet yabꞌen ebꞌyaꞌ oxwanh iskuywom Komam huneꞌ tuꞌ,
kaw xiwkanh ebꞌyaꞌ,
yaykano xulno ebꞌyaꞌ sat txꞌotxꞌ.
7 Lahwi tuꞌ,
ishitziko Komam iskꞌatanh ebꞌyaꞌ,
yanayo Komam isqꞌabꞌ yibꞌanh ebꞌyaꞌ,
yalni Komam:
«Ahanhwewanoj,
mach chexxiwi,»
xhi Komam.
8 Hayet yilniti ebꞌyaꞌ xin,
matxa mak linhankanh iskꞌatanh Komam.
9 Haxa yet lanhan yayti Komam yinh iswiꞌ witz tuꞌ yebꞌ ebꞌyaꞌ iskuywom,
yalni Komam:
—Machi bꞌay cheyal huneꞌ maxeyil tiꞌ masanto yet chinitzitzbꞌikanhan xol kamom,
Hanin Aqꞌbꞌilintijan texol yu Komam Dios,
xhi Komam tet ebꞌyaꞌ.
10 Lahwi tuꞌ isqꞌambꞌen ebꞌyaꞌ tet Komam:
—¿Tzet yinh xin chal ebꞌnaj kuywawom yinh isley yaꞌ Moisés tato yilal bꞌabꞌel chul yaꞌ Elías sata yaꞌ Cristo?
xhi ebꞌyaꞌ tet Komam.
11 Istaqꞌwi Komam tet ebꞌyaꞌ iskuywom tuꞌ:
—Yeli hak tuꞌ,
yilal yul yaꞌ Elías tuꞌ bꞌabꞌel yunhe isnahni isbꞌa anma kat yok yinh istoholal.
12 Yajaꞌ chiwalan teyet tato xahul yaꞌ Elías tuꞌ yajaꞌ mach txumchalo yaꞌ yu anma,
yuxin iswatxꞌe anma bꞌaytet yal iskꞌul yinh yaꞌ Elías tuꞌ.a
Hak tuꞌ xin chinutelaxan Hanin Aqꞌbꞌilintijan texol yu Komam Dios,
chiꞌekꞌyaꞌ wanmahan yu anma,
xhi Komam.
13 Lahwi tuꞌ xin,
istxumchalo yu ebꞌyaꞌ tato haꞌ yinh yaꞌ Juan anikanh haꞌ iswiꞌ anma,
tzotel Komam.
Yilo Komam Jesús ischejabꞌ naj matzwalil yinh huneꞌ naj nichꞌan tzeh
14 Yet yayilo Komam yebꞌ iskuywom xol anma xin,
ishitziko huneꞌ naj iskꞌatanh Komam,
yay jahno naj sata Komam,
yalni naj:
15 —Mamin,
kaw tzꞌayojabꞌ hakꞌul yinh inkꞌaholtiꞌan yuto kaw chilow huneꞌ yaxkamik yinh naj,
kaw chiꞌekꞌyaꞌ yanma naj yu.
Txꞌiꞌalxa el chito naj yul qꞌaꞌ yebꞌ xol ha haꞌ.
16 Mawitijan naj tet ebꞌyaꞌ hakuywom tiꞌ,
yajaꞌ xin machi yu yaqꞌni kawxo ebꞌyaꞌ naj,
xhi naj tet Komam.
17 Yalni Komam:
—Hex tiꞌ,
kaw mach cheyako heyanma yinh Komam Dios,
kaw txꞌoj hexkanoj.
Kaw nimanxa tiempo ayinikꞌojan texol.
¿Hantatokꞌanabꞌ tiempo chextecha wuhan?
Kaw yaꞌxa wanmahan heyu.
Iweti naj bꞌey tiꞌ,
xhi Komam.
18 Ischejnilo Komam ischejabꞌ naj matzwalil ayko yinh naj tzeh tuꞌ.
Lanhantotikꞌa xin iskawxilo naj.
19 Haxa yet ischukilxanhe Komam Jesús yebꞌ ebꞌyaꞌ iskuywom tuꞌ,
isqꞌambꞌen ebꞌyaꞌ tet Komam:
—Mamin,
¿tzet yinh xin machi mayu jinilojanh ischejabꞌ naj matzwalil yinh naj tzeh tiꞌ?
xhi ebꞌyaꞌ.
20 Istaqꞌwi Komam:
—Yuto hex tiꞌ ayto mach chiꞌapni heyaniko heyanma yinh Komam Dios.
Yinh kaw isyelal chiwalan teyet ta chikawxi hekꞌul yinh Komam Dios waxanhka txannhe yeko heyanma yinh Komam hakaꞌnhe hunu nichꞌan yinhatil teꞌ mostaza,
chu heyalni tet hunu witz hakaꞌ tiꞌ:
“Hekꞌilo habꞌa bꞌey tiꞌ,
asiꞌ hunuxa bꞌayah,”
ta kexchi,
chisyije huneꞌ witz tuꞌ tzet cheyala.b
Sunil chu hewatxꞌeni ta ayko heyanma yinh Komam Dios.
21 Yuto hunteqꞌan ischejabꞌ naj matzwalil tiꞌ,
machi el yinh anma ta mach chextxahli yebꞌ heyaqꞌlen wahil hetxahli tet Komam Dios,
xhi Komam Jesús.
Yal Komam Jesús yinh iskayelal yinh tzet chu yaqꞌlax kamoj
22 Hayet yekꞌ Komam Jesús yebꞌ ebꞌyaꞌ iskuywom yul ismajul Galilea,
yalni Komam tet ebꞌyaꞌ:
«Hanin Aqꞌbꞌilintijan texol yu Komam Dios chinalaxikojan yul isqꞌabꞌ anma.
23 Chinaqꞌlax kamojan,
yajaꞌ yinh yox tzꞌayik xin kat witzitzbꞌikanhan hunelxa,»
xhi Komam.
Hayet yabꞌen ebꞌyaꞌ huneꞌ tuꞌ kaw okkano bꞌiskꞌulal yinh yanma ebꞌyaꞌ.
Chꞌen tohlabꞌal chiꞌaqꞌlax yinh Yatut Komam Dios
24 Hayet yapni Komam Jesús yebꞌ ebꞌyaꞌ iskuywom bꞌey konhobꞌ Capernaúm,
yapni ebꞌnaj chiꞌinilo chꞌen tohlabꞌal yinh Yatut Komam Dios,
iskꞌatanh yaꞌ Pedro.
Isqꞌambꞌen ebꞌnaj tet yaꞌ:
—¿Chimyaqꞌ naj chaxhkuyni istohlabꞌal yinh Yatut Komam Dios?
xhi ebꞌnaj.
25 Istaqꞌwi yaꞌ Pedro:
—Hoꞌ,
chitohlawi yaꞌ,
xhi yaꞌ.
Hayet yokto yaꞌ Pedro tuꞌ yul nha,
haꞌ Komam bꞌabꞌel qꞌambꞌen tet yaꞌ:
—Simón,
¿tzet chu hatxumni yinh huneꞌ tiꞌ?
Mak tet chisqꞌan ebꞌnaj yahaw konhobꞌ chꞌen tohlabꞌal,
¿ham tet yet konhobꞌ ebꞌnaj,
mato tet anma nan konhobꞌal?
xhi Komam.
26 Istaqꞌwi yaꞌ Pedro:
—Haꞌ anma nan konhobꞌal,
haꞌ chꞌaqꞌni chꞌen,
xhi yaꞌ.
Yalni Komam:
—Ta hak tuꞌ,
haꞌ mak yuninaltikꞌa konhobꞌ yehi mach yilalo chaqꞌ chꞌen.
27 Yajaꞌ yunhe mach chꞌok ishowal ebꞌnaj jinh,
asiꞌ istiꞌ haꞌ lago kat hawanayto chꞌen iqꞌomati kay xol haꞌ.
Haꞌ xin yul istiꞌ noꞌ bꞌabꞌel kay chiꞌahti hawu ayikto huneꞌ chꞌen melyu kꞌuxan isqꞌoji istohlan hawet yebꞌ wetan.
Chawiti chꞌen,
kat hato hawaqꞌnokano chꞌen tet ebꞌnaj chichahni chꞌen tohlabꞌal tuꞌ,
xhi Komam tet yaꞌ Pedro.