Mach chu jinayo kobꞌa tet ej tioxh
10
Hex wuxhtaj hex wanabꞌ,
chiwochehan mach chenahulnheto yinh tzet yaqꞌle ebꞌnaj jichmam yet yijbꞌalaxikꞌo ebꞌnaj yu yaꞌ Moisés yet payat.
Sunil ebꞌnaj bꞌelwi yalanh huneꞌ moyan,
yebꞌ xin sunil ebꞌnaj ekꞌpaxto yiktabꞌal haꞌ Kajinh Mar.a
2 Hakaꞌtanhe ahkano haꞌ iswiꞌ ebꞌnaj ishunikaniko yinta yaꞌ Moisés yu huneꞌ moyan tuꞌ,
yebꞌ yet yekꞌto ebꞌnaj yiktabꞌal haꞌ mar tuꞌ,
hakaꞌtanhe ahkano haꞌ iswiꞌ ebꞌnaj.
3 Islohnipaxo ebꞌnaj hunteqꞌan tzet chilolax yati Komam Dios yul satkanh.b
4 Yebꞌpaxo xin sunil ebꞌnaj ukꞌni ha haꞌ yaqꞌ Komam Dios elti yinh iskꞌul huneꞌ chꞌen chꞌen.
Haꞌ huneꞌ chꞌen chꞌen tuꞌ yechel Komam Jesucristo ye chꞌen,
haꞌ hun Komam tzujan yinta ebꞌnaj jichmam yinh isbꞌel.c
5 Waxanhka yaqꞌ Komam Dios hunteqꞌan tuꞌ tet ebꞌnaj,
yajaꞌ ay ebꞌnaj mach isyije yinh tzet yal Komam Dios,
yuxin kaw txꞌiꞌal ebꞌnaj kami,
iskankano pakꞌno isnimanil ebꞌnaj sat txꞌotxꞌ desierto yinh isbꞌel tuꞌ.
6 Sunil hunteqꞌan yu ebꞌnaj tuꞌ kokuybꞌanil yukanoj yunhe matxa chijocheko istxꞌojal hakaꞌ yu ebꞌnaj.
7 Mach cheyiyo hebꞌa tet ej tioxh hakaꞌ yu txꞌiꞌal ebꞌnaj tuꞌ,
hakaꞌ yekano istzotiꞌal ebꞌnaj yul Yum Komam Dios hakaꞌ tiꞌ:
«Ay tzꞌonhno ebꞌnaj,
yok ebꞌnaj waꞌoj yebꞌ ukꞌuj.
Lahwi tuꞌ xin yah bꞌulna ebꞌnaj,
yok ebꞌnaj kanhalwoj,
yaqꞌni ebꞌnaj tzet chal iskꞌul,»d
xhihayoj.
8 Machojabꞌ chexixli hakaꞌ yu txꞌiꞌal ebꞌnaj tuꞌ.
Yu huneꞌ tuꞌ yuxin tanhilo 23 (oxebꞌ iskawinaj) mil ebꞌnaj yinh huneꞌ tzꞌayik.
9 Machojabꞌpaxo xin cheyako Komam Jesucristo yinh ilwebꞌal,
hakaꞌ yu anma tuꞌ.
Yu huneꞌ tuꞌ yuxin kaw txꞌiꞌal mak chilax yu noꞌ labꞌa,
iskamiloj.e
10 Machojabꞌ chexbꞌuchwa yinh Komam Dios hakaꞌ yu anma tuꞌ.
Yu huneꞌ tuꞌ yuxin txꞌiꞌal mak kam yu naj ángel aqꞌomkamo anma.
11 Sunil hunteqꞌan tzet yu ebꞌnaj jichmam tuꞌ,
kuybꞌanile yekano jinh tinanh,
tzꞌibꞌnhebꞌilpaxkanayoj yunhe johtanheni ta mach chu kowatxꞌen istxꞌojal,
yuto hanhonh tiꞌ ayonhxako yinh islahobꞌal tzꞌayik tiꞌ.
12 Yuxin haꞌ mak kaw kꞌul yeko chabꞌe,
yilal kaw kam chil isbꞌa haxinwal mach chiꞌaykꞌayi.
13 Tzijxanhe ilwebꞌal chilaay jibꞌanh,
lahan hakaꞌ ilwebꞌal chiꞌay yibꞌanh sunil anma.
Yajaꞌ chikawxi kokꞌul yinh Komam Dios tato mach chischayo Komam hunu ilwebꞌal jibꞌanh mach chitecha ju.
Wal xin,
hayet chiꞌapni ilwebꞌal jinh,
haꞌ Komam chiyeni jet tzet chu kokolcha tet ilwebꞌal tuꞌ,
hak tuꞌ xin chu istecha ju.
14 Tinanh xin hex wuxhtaj hex wanabꞌ,
hex xahan ay wuhan,
mach cheyiyo hebꞌa tet ej tioxh.
15 Chiwaltojan hunteqꞌan tiꞌ teyet yuto kaw helanexxa,
chisje heyok heyilnoj ta kꞌul hunteqꞌan chiwaltotiꞌan.
16 Yet chijekꞌtzen santa cena chijaqꞌni yuchꞌandiosal yinh tzet ayayto yul chꞌen vaso kat jukꞌni,
haꞌ chiyeniloj tato hunxanhe je yebꞌ Komam Jesucristo yu ischikꞌil.
Haxa yet chikoqꞌaxponayo ixim pan kat kowahni ixim,
haꞌ chꞌaqꞌni konabꞌaꞌ tato hunxanhe chonhelkaniko yinh Komam Jesucristo.
17 Waxanhka kaw txꞌiꞌalonh,
yajaꞌ huneꞌnhe haꞌ ixim pan chikowah kosunil,
haꞌ chiyeniloj tato hunxanhe nimanile je kosunil.
18 Naweti yinh konhobꞌ Israel,
hayet chiskꞌuxni ebꞌnaj noꞌ chibꞌe chiꞌaqꞌlax yinh xahanbꞌalil tet Komam Dios,
hunxanhe chukano ebꞌnaj yinh Komam.
19 Yaj mach lanhano walnihan tato ay yip tioxh,
yebꞌ ta ay tzet chal yelapno noꞌ chibꞌe chihaltelax tet.
20 Haꞌ chalilo huneꞌ chiwaltiꞌan,
to hayet chaqꞌni ebꞌnaj mach Israelo isxahanbꞌal,
maxhtaj tet Komam Dios chalte ebꞌnaj isxahanbꞌal tuꞌ,
wal xin to haꞌ tet ebꞌnaj ischejabꞌ naj matzwalil chalte ebꞌnaj isxahanbꞌal.
Haꞌ huneꞌ tiꞌ machojabꞌ cheyako hebꞌa yetbꞌiho ebꞌnaj ischejabꞌ naj matzwalil.
21 Mach chu jukꞌni tzet ay yul isvaso Komam Dios kat jukꞌnipaxo tzet ay yul isvaso ebꞌnaj ischejabꞌ naj matzwalil.
Mach chu jokpaxo tzꞌonhno waꞌo sat ismexha Komam Dios,
chilahwi tuꞌ kat jokpaxo tzꞌonhno waꞌo sat ismexha ebꞌnaj ischejabꞌ naj matzwalil.
22 Wal xin machojabꞌ chikowatxꞌe hunteqꞌan tuꞌ,
haxinwal mach chijaqꞌtij ishowal Komam jinh yuto mach ekꞌbꞌalo jip yibꞌanh Komam.
Mach chu jetanto isnabꞌal hunuxa anma
23 Ay mak chihalni:
«Chisje kowatxꞌen sunil tzet chal janma,»
xhi.
Kaw yeli,
yajaꞌ hanhonh tiꞌ matxa jeto ay kowatxꞌen hunteqꞌan tuꞌ.
Chu kowatxꞌen sunil tzet chal kokꞌul,
yajaꞌ mach sunilo chikolwa jinh konhyaqꞌni chꞌibꞌo yinh yet Komam Dios.
24 Machojabꞌnhetaj iskꞌulal jet chikosayikꞌoj,
wal xin yilal kosayni iskꞌulal yinh jet anmahil.
25 Sunil noꞌ chibꞌe chitxonhlax yul txonhbꞌal chu hekꞌuxni noꞌ,
mach yilalo cheqꞌambꞌe tzet ye noꞌ haxinwal mach chikabꞌkon heyanma hekꞌuxni noꞌ.
26 Yuto huneꞌ yul yibꞌanhqꞌinal tiꞌ,
yebꞌ sunil tzet ayayo sat,
yet Komam Dios yehi.
27 Tato chexawtelax waꞌo yu hunu mak maxhto ayoko yul isqꞌabꞌ Komam,
chu hetohi.
Ta chisje hekꞌul,
chu hekꞌuxni noꞌ chibꞌe chiꞌalaxayo yinh hesat.
Mach cheqꞌambꞌe tzet ye noꞌ haxinwal mach chikabꞌkonkanh heyanma yet chekꞌuxni noꞌ.
28 Yajaꞌ ta ay mak chalni hakaꞌ tiꞌ:
«Noꞌ chibꞌe tiꞌ xaꞌaqꞌlax noꞌ yinh xahanbꞌalil tet tioxh,»
ta xhi,
mach chekꞌux noꞌ,
yu iskꞌulalo yinh huneꞌ mak chalni tuꞌ.
29 Chiwaltojan hunteqꞌan tiꞌ yunhe mach chiꞌetaxto isnabꞌal huneꞌ mak maxhto yip isnabꞌal tuꞌ,
maxhtaj yu henabꞌal hex tiꞌ.
Yajaꞌ ayexmi chetxum hakaꞌ tiꞌ:
«¿Tzet yinh yuxin chinkach hinbꞌahan inkꞌuxnihan noꞌ chibꞌe chiꞌaqꞌlax yinh xahanbꞌalil tuꞌ yu anma chinanon iskꞌul iskꞌuxni noꞌ?
30 Ta chiwaqꞌan yuchꞌandiosal yinh noꞌ chibꞌe chinkꞌux tuꞌan,
matxa mak chu yok bꞌuchwal yinh huneꞌ tuꞌ,»
kexchimi.
31 Wal xin chiwalan teyet,
ta ay hunu tzet ye tuꞌ cheloh yebꞌ cheyukꞌu,
maka hunuxa tzet ye tuꞌ cheyu,
haꞌojabꞌ ismay Komam Dios cheyako yinh tzet chewatxꞌe tuꞌ.
32 Wal xin machojabꞌ cheyetato isnabꞌal ebꞌnaj Israel maka ebꞌnaj mach Israeloj,
maka makta ayxako yul isqꞌabꞌ Komam Jesucristo yu tzet chewatxꞌe.
33 Hakaꞌ hanintiꞌan,
kaw chiwaqꞌ wanmahan inwatxꞌenan iskꞌulal sata anma,
maxhtaj iskꞌulal wetan chinsayikꞌojan,
to iskꞌulal yet anma,
yunhe istzujcha apno iskolbꞌanil anma yu.