3 Hak tiꞌ chu inpajtzenan tet ebꞌnaj chitzotel winhan.

4 Hanintiꞌan ay wokan yinh inchahnihan tzet chinlohan yinh inmunilan texol.

5 Qꞌinalo ta ay hunu ix janabꞌ chiꞌok wixalojan tinanh,

¿tom mach chu winikꞌojan ix wintajan hakaꞌ chu yaꞌ Pedro yebꞌ hunteqꞌanxa ebꞌyaꞌ ischejabꞌ Komam Jesucristo,

yebꞌ ebꞌyaꞌ yuxhta Komam?

6 ¿Tom haninxanhehan yebꞌ yaꞌ Bernabé mach chiꞌaqꞌlax tzet chiꞌokniko juhanh yet chonhmunlahanh yinh Istzotiꞌ Komam Dios?

7 Hakaꞌ ebꞌnaj soldado tinanh,

¿tom yinh ebꞌnaj ayko tzet chiꞌokniko yu?

Hakaꞌpaxo hunu naj chitzꞌunni teꞌ uva,

¿tom mach chislo naj hunu sat teꞌ xin?

Hakaꞌpaxo hunu naj tanhem wakax,

¿tom mach chukꞌ naj yal yim noꞌ?

8 Tajka chetxumu tato haninnhehan chiwalan huneꞌ tiꞌ,

wal xin hak tuꞌ yalnipaxo yinh isley yaꞌ Moisés.

9 Yinh ley tuꞌ tzꞌibꞌnhebꞌilkano hakaꞌ tiꞌ:

«Mach cheyako tzꞌispa yinh istiꞌ noꞌ wakax yet chixanhwi trigo noꞌ,»^a

xhihayoj.

Yajaꞌ maxhtaj noꞌ wakax ayko yinh iskꞌul Komam yet yalni huneꞌ tuꞌ.

10 Wal xin hanhonh ayonhiko yinh iskꞌul Komam yet yalni huneꞌ tuꞌ.

Yuxin hakaꞌ naj tꞌokom txꞌotxꞌ yebꞌ naj chixanhnilti ixim trigo,

haꞌ ismunil ebꞌnaj tuꞌ ayko yipo yanma,

yuto yinh ismunil ebꞌnaj tuꞌ chiꞌel tzet chislo.

11 Hanhonhtiꞌanh kotzꞌunanh Istzotiꞌ Komam Dios texol,

yuxin mach txꞌojoj ta cheyaqꞌ hanikꞌ tzet chiꞌokniko juhanh.

12 Ta haꞌ hunmajanxa ebꞌnaj chiꞌekꞌ texol cheyaqꞌ tzet chiꞌokniko yu,

hajonhxamanh ay yilal kochahni jetanh.

Yajaꞌ xin machi hunelo koqꞌananh teyet,

kaw tonhe jijlehanh yunhe mach chiꞌok linhno jalnikꞌojanh Istzotiꞌ Komam Jesucristo.

13 Hex tiꞌ heyohtaj tato ebꞌyaꞌ chimunla yul Yatut Komam Dios,

haꞌ tzet chihaltelax tet Komam yul yatut tuꞌ,

haꞌ chiꞌaqꞌni ekꞌo yu ebꞌyaꞌ.

Haꞌ chal yelapno tuꞌ,

to yaꞌ sacerdote chiꞌaniko xahanbꞌal tet Komam Dios,

ay yok yaꞌ yinh tzet lanhan yalten tuꞌ.

14 Hakton tuꞌ ye ebꞌyaꞌ chimunla yinh yalnikꞌo Tzotiꞌ yet kolbꞌanile,

halbꞌilkano yu Komam Dios tato yilal yaqꞌlax tzet chiꞌokniko yu ebꞌyaꞌ yinh huneꞌ munil bꞌay chimunlako tuꞌ.

15 Wal hanintiꞌan xin,

machi hunelo inqꞌanan teyet yinh tzet okniko wuhan waxanhka xin kaw yilal inchahnihan.

Yajaꞌ maxhtaj yu heyaqꞌni yuxin chintzꞌibꞌnhetojan huneꞌ carta tiꞌ teyet,

wal xin ay huneꞌ intzalahilalan yuto machi hunu tzet ye tuꞌ inqꞌanan teyet.

Qꞌaꞌkꞌulmi chinkaman sata inqꞌannihan hunu tzet ye tuꞌ teyet.

16 Hanintiꞌan mach chinloloꞌnhe hinbꞌahan yu chiwalikꞌojan Tzotiꞌ yet kolbꞌanile tet anma,

yuto chejbꞌil hinan walnikꞌojan.

Kaw kꞌanchꞌaninan ta mach chiwalan Tzotiꞌ yet kolbꞌanile.

17 Qꞌinalo ta yul wetan chiwitijan wekꞌan walnokꞌojan,

kaw yilalmi inchahnipaxojan intoholan.

Wal xin chiwalikꞌojan yuto haꞌ Komam Dios aqꞌnhe huneꞌ inmuniltiꞌan.

18 Wal xin,

haꞌ huneꞌ ispaj yet chinekꞌan walnokꞌojan Tzotiꞌ yet kolbꞌanile haꞌ ton tzalahilal.

Machi intoholan chinqꞌanan,

waxanhka yet ay inqꞌannihan intoholan yinh inmunil tuꞌan yu yekꞌ wuhan.

19 Mach ayinikojan yalanh yip hunu maka,

yajaꞌ xawako hinbꞌahan hakaꞌ chejabꞌ tet sunil anma,

yunhe kaw txꞌiꞌal anma chiꞌokkano yul isqꞌabꞌ Komam wuhan.

20 Yet chinekꞌan xol ebꞌnaj wet konhobꞌ Israelan,

hakaꞌ isbꞌeybꞌal ebꞌnaj tuꞌ hak tuꞌ chiwute inbꞌeybꞌalan,

yunhe yok haywanho ebꞌnaj yul isqꞌabꞌ Komam,

kat yelkanti ebꞌnaj yalanh ley,

yuxin hakaꞌtanhe chiwakto hinbꞌahan yalanh isley yaꞌ Moisés.

Yajaꞌ yinh kaw isyelal mach ayiniktojan yalanh ley tuꞌ.

21 Hakpax tuꞌ yet chinekꞌan xol anma mach Israeloj,

anma mach ayokto yalanh isley yaꞌ Moisés,

hakaꞌ isbꞌeybꞌal ebꞌnaj tuꞌ hak tuꞌ chiwutepaxo hinbꞌahan,

yunhe yok haywanho ebꞌnaj yul isqꞌabꞌ Komam.

Yajaꞌ yinh kaw isyelal yalanh ischejbꞌanil Komam Dios ayiniktojan,

yuto yijem hinan yinh ischejbꞌanil Komam Jesucristo.

22 Haxa yet ayinikojan xol ebꞌnaj maxhto bꞌin yip yinh yet Komam xin,

hakaꞌtanhe hunu mak machi yip,

hak tuꞌ chiwute hinbꞌahan,

yunhe kaw yiqꞌni yip yanma ebꞌnaj yinh Komam.

Wal xin wute hinbꞌahan hakaꞌ anma tuꞌ,

yunhe ischahnikano iskolbꞌanil haywanho anma tuꞌ.

23 Yu kuybꞌanile yet kolbꞌanile,

yuxin hak tuꞌ wute hinbꞌahan,

yunhe haꞌ huninan chinchahan iskꞌulal yu.

24 Hakaꞌ yinh hunu anhe tinanh,

txꞌiꞌal mak chaqꞌ anhe,

yajaꞌ huneꞌnhe mak chiꞌiqꞌwahi.

Tinanh xin,

hakaꞌ chu ebꞌnaj chꞌaqꞌni anhe tuꞌ,

hakojabꞌ tuꞌ cheyute hebꞌa yinh yet Komam,

haxinwal chechah ispaj selel.

25 Sunil ebꞌnaj chaqꞌ anhe,

yet chiskuyni isbꞌa ebꞌnaj kaw kam chil ebꞌnaj ta machi hunu tzet ye tuꞌ chiꞌetanto isnimanil ebꞌnaj yunhe yiqꞌni ebꞌnaj ismatan yet chiyaqꞌni ebꞌnaj anhe.

Yajaꞌ huneꞌ matan chiqꞌ ebꞌnaj tuꞌ pet chiꞌetaxtoj,

wal huneꞌ matan chijiqꞌ hanhonh tiꞌ yinh ismunil Komam,

machi bꞌaqꞌinh chiꞌetaxtoj.

26 Hakaꞌ ebꞌnaj chaqꞌ anhe tuꞌ chaqꞌ yanma ebꞌnaj yapni bꞌay chiꞌaqꞌlax ismatan,

hak tuꞌ wehan hanintiꞌan.

Hakaꞌpaxo ebꞌnaj chiꞌalaxiko yaqꞌleno howal hakintuꞌan,

mach nabꞌnheho chiꞌelto inqꞌabꞌan.

Wal xin yinh kaw sunil wanmahan chinmunlahan yinh ismunil Komam Dios.

27 Kaw chinkachan innimanilan,

chiwanikojan isyijeno yinh tzet chiwochehan,

yuto kꞌuxantaxka lahwi wawtenan anma yul isqꞌabꞌ Komam Dios,

haxataxka chiꞌelikoj matxa chinchahan ispaj selel tzet tzumbꞌebꞌil wuhtiꞌan.