Noꞌ chibꞌe chiꞌaqꞌlax yinh xahanbꞌalil tet tioxh
8
Wal tinanh xin,
chiwaltojan teyet yinh noꞌ chibꞌe chihaltelax tet ej tioxh.
Hunteqꞌan tiꞌ kaw johta kosunil,
yajaꞌ kohelanil tuꞌ ay ismay jinikanh kobꞌa yu.
Wal ta xahan chijil kobꞌa hununonh,
chonhchꞌibꞌ yinh yet Komam hakaꞌ tuꞌ.
2 Tato ay hunu mak kaw ay isnabꞌal chute istxumni,
maxhto isnabꞌal huneꞌ mak tuꞌ yinh hakaꞌ kaw yelapno yehi.
3 Wal mak ayko yanma yinh Komam Dios,
kaw ohtabꞌil yu Komam.
4 Wal yinh iskꞌuxlax noꞌ chibꞌe chiꞌaqꞌlax yinh xahanbꞌalil tet ej tioxh,
kaw matzet chaliloj yuto hunteqꞌan tioxh tuꞌ kaw johtaj tato kaw machi yelapno ye yul sat yibꞌanhqꞌinal tiꞌ,
yuto huneꞌnhechꞌan Komam Dios.
5 Yajaꞌ waxanhka xin ay mak chihalni ta ay txꞌiꞌal dios satkanh,
yebꞌ yul sat yibꞌanhqꞌinal tiꞌ,
yinh hakaꞌ tuꞌ txꞌiꞌal dios yebꞌ txꞌiꞌal yahaw yul sat ebꞌnaj.
6 Yajaꞌ wal hanhonh tiꞌ,
huneꞌnhechꞌan koDiosal,
haꞌ ton Komam Dios mame.
Haꞌ Komam tuꞌ yichebꞌanil sunil tzet ye tuꞌ,
yetpaxo Komam je hanhonh tiꞌ.
Huneꞌnhechꞌanpaxo Jahawil,
haꞌ ton Komam Jesucristo.
Yu Komam tuꞌ,
yuxin ay sunil tzet ye tuꞌ,
yebꞌ yu Komam yuxin ayonh.
7 Yajaꞌ mach sunilo ebꞌnaj juxhta chinachalo huneꞌ tiꞌ yu.
Yuto ay ebꞌnaj chitikꞌa yiyo isbꞌa tet tioxh yet yalanhtokanoj,
yuxin yet chiskꞌuxni ebꞌnaj noꞌ chibꞌe haltebꞌilxa yinh xahanbꞌalil tet tioxh tuꞌ,
chito kabꞌkon iskꞌul,
chistxumni ebꞌnaj ta chꞌetaxto ebꞌnaj yu.
8 Yajaꞌ maxhtaj yu tzet chikolo,
yuxin chonhkan kꞌulal yul sat Komam Dios,
maxhtaj yu kokꞌuxni noꞌ chibꞌe tuꞌ,
yuxin chonhkꞌulbꞌiloj,
maka yu mach chikolo yuxin chonhkan txꞌojal.
9 Kaw cheyil hebꞌa,
tajka yu chisje heloni yuxin cheyaqꞌ aykꞌayo hunu mak maxhto yip yinh yet Komam.
10 Tajka yu heyohtaxa ta mach txahulo hekꞌuxni noꞌ chibꞌe tuꞌ,
yuxin chexay tzꞌonhno waꞌo yul yatut tioxh,
yajaꞌ ta ay ebꞌnaj juxhta chexilni yinh hakaꞌ tuꞌ,
mach ismunil hex kaw hex cheyijbꞌa ebꞌnaj iskꞌuxni noꞌ chibꞌe haltebꞌil tet tioxh tuꞌ.
11 Ta hak tuꞌ cheyute,
cheyaqꞌ aykꞌayo hunu mak maxhto yip yinh yet Komam,
wal xin haꞌ yinh huneꞌ mak tuꞌ kampaxo Komam Jesús.
12 Yuxin tato heyu yuxin chiꞌetaxto isnabꞌal hunu heyuxhta maxhto yip yinh Komam,
cheyako hemul yinh hakaꞌ tuꞌ yul sat Komam Jesucristo.
13 Yuxin ta yunhe inkꞌuxnihan noꞌ chibꞌe yuxin chiwaqꞌ aykꞌayojan hunu wuxhtajan,
qꞌakꞌul tom mach chinkꞌuxan noꞌ chibꞌe tuꞌ,
haxinwal machi hunu mak chako ismul wuhan.