Kuybꞌanile yinh mohyilal
7
Tinanh xin chiwatojan ispaj hunteqꞌan heqꞌambꞌebꞌal heyati yul hecarta wetan.
Kꞌul tato mach chiqꞌ ebꞌnaj winaj yixal.
2 Yajaꞌ yunhe mach chiꞌaykꞌay ebꞌnaj maka ebꞌix ix yinh mule,
yuxin yilal yiqꞌni ebꞌnaj yixal,
yebꞌ yiqꞌnipaxo ebꞌix ix yichamil.
3 Naj ichamile yilal yochen naj yixal,
hakpax tuꞌ ix ixale yilal yochen ix yichamil.
4 Yuto ix ixale matxa yeto isbꞌa ix ischukil,
wal xin to yetxa yichamil ix yehi.
Hakpax tuꞌ naj ichamile,
matxa yeto isbꞌa naj ischukil,
to yetxa yixal naj yehi.
5 Yuxin mach chu hemanhkꞌon heyochelen hebꞌa hunun hex,
kachan tato lahtiꞌxa ye heyu hemanhkꞌon hebꞌa teyet hunun hex yinh hayebꞌo tzꞌayik yu hetxahli tet Komam Dios yinh sunil heyanma.
Yajaꞌ xin yilal hehunbꞌanpaxo hebꞌa hunelxa,
yuto kꞌuxantaxka mach chitecha heyu yinh tzet choche henimanil,
kat yok naj matzwalil kexyilwenoj kat heyaykꞌayi kat heyaniko hemul.
6 Hunteqꞌan chiwaltotiꞌan mach kaw chejbꞌanile chukanikoj,
wal xin tonhe chiwaltojan teyet yu heyilni tato chu heyijeni.
7 Wal intiꞌan,
ay walaꞌan sunil mak chikan hakaꞌ wetiꞌan,
yajaꞌ nananta konabꞌal hununonh yu Komam Dios.
Yuto ay mak mach choche chiqꞌ yixal,
aypaxo mak mach chꞌekꞌ yu tato mach chiqꞌ yixal.
8 Chiwalan tet mak maxhto chimohyi,
yebꞌ tet ebꞌix kamnaxa yichamil,
kꞌul tato mach chiqꞌ yetbꞌi hakaꞌ wetiꞌan.
9 Yajaꞌ ta ay mak mach chitecha yu ye ischukil chabꞌe,
yilal ismohyi sata tonhe choche chiꞌekꞌ ixloj maka winajloj.
10 Yajaꞌ wal tet mak mohyinaxa xin,
chiwaqꞌan hunteqꞌan chejbꞌanile tet,
hunteqꞌan chejbꞌanile tiꞌ mach wetojan,
to yet Komam Dios yehi.
Hex ixale mach chepohle hebꞌa yebꞌ heyichamil.
11 Yajaꞌ tato ay hunu ix ix chispohle isbꞌa yebꞌ yichamil,
matxa chu yiqꞌni ix hunuxa winaj,
kachannhe yebꞌ yichamil ix tuꞌ chisje ishunbꞌan isbꞌa hunelxa.
Hakpax tuꞌ naj ichamile,
mach chu ispohni isbꞌa naj yebꞌ yixal.a
12 Wal tet hunmajanxa xin chiwaltojan hunteqꞌan tiꞌ,
yajaꞌ mach ischejbꞌanilo Komam Dios,
to haninan chiwaltojan:
Tato ay hunu naj juxhtaj maxhto chako isbꞌa yixal yul isqꞌabꞌ Komam Dios,
yajaꞌ tato chitzala iskꞌul ix iskꞌatanh naj,
huneꞌ naj juxhta tuꞌ,
mach chu ispohni isbꞌa naj yebꞌ ix.
13 Yebꞌ xin tato ay hunu ix janabꞌ,
maxhto chako isbꞌa yichamil yul isqꞌabꞌ Komam,
yajaꞌ chitzala iskꞌul naj yebꞌ ix,
mach chu ispohni isbꞌa ix yebꞌ naj.
14 Yuto waxanhka maxhto ayoko yichamil ix yul isqꞌabꞌ Komam,
yajaꞌ hakojtam yetxa Komam Dios ye naj,
yuto hunye naj yebꞌ huneꞌ ix ix ayxako yul isqꞌabꞌ Komam Dios.
Hakpax tuꞌ ix maxhto ayoko yul isqꞌabꞌ Komam,
hakojtam yetxa Komam Dios ye ix,
yuto hunye ix yebꞌ huneꞌ naj ayxako yul isqꞌabꞌ Komam.
Qꞌinalo ta maxhto yeto Komam ye iskawanhil,
lahanmi chiꞌeliko yuninal hakaꞌ yuninal anma maxhto ayoko yul isqꞌabꞌ Komam Dios,
wal xin to hakaꞌxa yuninal Komam Dios yehi.
15 Yajaꞌ ta naj ichamile maka ix ixale maxhto ayoko yul isqꞌabꞌ Komam tuꞌ,
choche ispohle isbꞌa yebꞌ yetbꞌi,
ispohabꞌ isbꞌa.
Yinh hakaꞌ tuꞌ chikankano naj juxhtaj maka ix janabꞌ tuꞌ yinh aqꞌankꞌulal,
yuto choche Komam Dios tato chexekꞌ yinh aqꞌankꞌulal.
16 Yuto hach ixale hach tiꞌ maxhto hawohtajoj tato chikolcha hawichamil tuꞌ yu iskꞌulal chabꞌeybꞌalnhe,
maka hach ichamile hach tiꞌ maxhto hawohtajoj tato chikolcha hawixal tuꞌ yu iskꞌulal chabꞌeybꞌalnhe,
wal xin kꞌul ta mach chepohle hebꞌa.
17 Wal hununonh xin,
hakaꞌtikꞌa jehi yet konhyawten Komam Dios,
hak tuꞌ chu koyijen yinh tzet xayaqꞌ Komam jet.
Hak tuꞌ chejbꞌanil waqꞌan tet makta ayxako yul isqꞌabꞌ Komam yul hunun konhobꞌ.
18 Tato ay hunujex ayxako circuncisión yinh henimanil yet kexyawten Komam,
mach chu heyebꞌan huneꞌ circuncisión tuꞌ.
Maka tato maxhto circuncisión teyinh yet kexyawten Komam,
matxa yilalo cheyaqꞌ circuncidar hebꞌa.
19 Yuto haꞌ huneꞌ kaw yilal yehi haꞌ heyijen ischejbꞌanil Komam Dios,
machi yok yinh ta ayxako circuncisión teyinh maka machoj.
20 Hakaꞌojabꞌ heye yet kexyawten Komam Dios yuninaloj,
hakojabꞌ tuꞌ cheyukanoj.
21 Tato ay hunu mak ayikto yalanh yip hunu maka yet yawtelax yu Komam,
machojabꞌ chitak iskꞌul yinh huneꞌ tuꞌ,
yajaꞌ tato ay tzet chu yelti yalanh yip huneꞌ mak tuꞌ kaw kꞌultopaxoj.
22 Haꞌ mak ayikto yalanh yip hunu maka yet yawtelax yu Komam,
tinanh xin yetxa isbꞌa ischukil yinh isyijen tzet chal Komam Dios.
Hakpax tuꞌ xin mak mach chejabꞌo yehi yet yawtelax yu Komam,
tinanh xin ischejabꞌxa Komam yehi.
23 Wal xin kaw ay istohol aqꞌbꞌil hex yu Komam,
yuxin mach cheyakto hebꞌa yalanh yip hunuxa maka.
24 Tinanh xin,
hex wuxhtaj hex wanabꞌ,
haꞌ yul sat Komam Dios kꞌul kokankano hakaꞌtikꞌa jehi yet konhyawten Komam Dios yuninaloj.
25 Wal mak maxhto mohyinajoj machi chejbꞌanile yaqꞌkano Komam wetan yinh,
wal hunteqꞌan chejbꞌanile tiꞌ,
haninan chiwaltojan,
yajaꞌ yilal kaw ay yelapno yul hesat,
yuto yu iskꞌulal iskꞌul Komam Dios winhan yuxin yaqꞌ huneꞌ inmuniltiꞌan yinh inkuywahan.
26 Yul wetan,
tato ay hunu naj maxhto yixal,
kꞌul ta mach chiqꞌ naj yixal,
yuto hunteqꞌan tiempo bꞌay ayonh tinanh kaw yaꞌtaxa.
27 Haꞌ mak ayxa yixal,
machojabꞌ chispoh isbꞌa yebꞌ yixal.
Haꞌ mak maxhto yixal,
kꞌul ta mach chissay yixal.
28 Tato ay hex chexmohyi,
mach muleho huneꞌ tuꞌ;
taka hunu ix qꞌopo chimohyi xin,
mach txꞌojopaxo huneꞌ tuꞌ.
Yajaꞌ wal mak chimohyi kaw ay isyaꞌtajil chila.
Ay walaꞌan mach chaqꞌle hunteqꞌan isyaꞌtajil tuꞌ.
29 Hex wuxhtaj,
hex wanabꞌ,
haꞌ chalilo hunteqꞌan chiwaltotiꞌan to hanikꞌxanhe tiempo ayonhikꞌoj,
yuxin hex ay heyixal,
machojabꞌnhetaj yinh heyixal cheyako henabꞌal,
wal xin yilal heyaqꞌni hamanil yinh yet Komam.
30 Haxa mak bꞌiskꞌulal ye xin,
hakaꞌojtam mach bꞌiskꞌulalo yehi,
haxa mak ayko yinh tzalahilal xin,
hakaꞌojtam mach tzalahilalo yehi.
Haꞌ mak chiloqꞌni hunu tzet ye tuꞌ hakaꞌojtam mach yeto tzet chisloqꞌ tuꞌ.
31 Haxa mak chiꞌokniko tzet ay yul sat yibꞌanhqꞌinal tiꞌ yu,
hakaꞌojtam mach lanhan yocheni yuto huneꞌ yul sat yibꞌanhqꞌinal tiꞌ chitanhiloj.
32 Ay walaꞌan matzet cheyako yinh hekꞌul.
Yet maxhto chiqꞌ yixal hunu naj tzeh,
yinhnhe yet Komam ayko yanma naj,
hanhe tzet chal Komam haꞌ chisyije naj.
33 Wal hunu naj ayxa yixal xin,
haxa yinh tzet ay yul sat yibꞌanhqꞌinal tiꞌ haꞌ chako yinh iskꞌul,
yebꞌ yinh tzet chu yaqꞌni tzalaho iskꞌul yixal.
34 Hakpax tuꞌ ebꞌix qꞌopo maxhto chimohyi yebꞌ ebꞌix maxhtikꞌa yichamil,
haꞌ yinh yet Komam bꞌay ayko yanma ebꞌix yebꞌ sunil isnabꞌal.
Wal ebꞌix ay yichamil xin,
haꞌ tzet ay yul sat yibꞌanhqꞌinal tiꞌ,
yebꞌ tzet choche yichamil,
haꞌ ayko yinh iskꞌul ebꞌix iswatxꞌeni.
35 Chiwalan hunteqꞌan tiꞌ,
yajaꞌ maxhtaj yu kexinkachnihan,
to yu iskꞌulalo teyinh,
yebꞌ yu hebꞌeybꞌalnhen hakaꞌ choche Komam Dios,
kat hemunla yinh ismunil Komam yinh sunil heyanma.
36 Ta ay hunu naj juxhta choche chimohyi yebꞌ hunu ix janabꞌ yuto istiempohalxa yiqꞌni yixal,
chisje ismohyi,
mach txꞌojo huneꞌ tuꞌ.
37 Yajaꞌ xin ta ay hunu mak mach chisje iskꞌul chiqꞌ yixal,
chixin istꞌinhbꞌako yinh yanma yekꞌ yu ischukil,
qꞌakꞌul ta mach chimohyi.
38 Yuxin ta chimohyi huneꞌ mak tuꞌ,
kꞌul,
yajaꞌ ta mach chimohyi xin,
ekꞌbꞌal kꞌultopaxoj.
39 Yet itzitzto yichamil hunu ix ix,
aytokto ix yalanh ischejbꞌanil yichamil.
Yajaꞌ ta chikam naj xin kaw yetxa isbꞌa ix ischukil,
xaꞌisje ismohyi ix yebꞌ mak bꞌay chal iskꞌul,
yajaꞌ tanhe yebꞌ hunu mak ayxako yul isqꞌabꞌ Komam.
40 Yajaꞌ wal intxumnihan,
ekꞌbꞌalto saqꞌal yet ix ta mach chiqꞌ yichamil ix.
Hak tuꞌ chiwute walnihan yuto haꞌ hun Komam Espíritu Santo ayko wetbꞌihojan,
haꞌ chꞌaqꞌni walaꞌan.