Anma chisqꞌanle yinh tet naj alkal
6
Hayet ay howal texol,
¿tzet yinh yuxin haꞌ tet ebꞌnaj alkal yul sat yibꞌanhqꞌinal tiꞌ chextohi yu iswatxꞌenayo ebꞌnaj huneꞌ howal tuꞌ?
¿Tzet yinh xin maxhtaj tet yuninal Komam Dios chextohi?
2 ¿Tom mach heyohtajo xin tato hanhonh ayonhxako yul isqꞌabꞌ Komam tiꞌ,
hanhonh chonhok jilaꞌ yinh tzet chiꞌeliko anma ay yul sat yibꞌanhqꞌinal tiꞌ?
Yuxin tato chonhok jilaꞌ yinh tzet chiꞌeliko anma yet bꞌaqꞌinh,
¿haꞌ tom xin nixhte howal chꞌah texol,
mach chu hewatxꞌenayoj?
3 ¿Tom xin maxhto heyohtajopaxoj tato hanhonh tiꞌ chonhok jilaꞌpaxo yinh tzet chiꞌeliko ebꞌnaj ángel yet bꞌaqꞌinh?
Hajxam tzet ye tuꞌ yul sat yibꞌanhqꞌinal tiꞌ,
¿tom mach chu kowatxꞌenayo heyalni?
4 Yuxin yet ay howal chꞌah texol,
¿tzet yinh xin sata ebꞌnaj machi yok yinh yuninal Komam Dios chexto hewatxꞌeyoj?
5 Chiwaltojan huneꞌ tiꞌ teyet yunhe hetxꞌixwikanh.
¿Tom machi hunu mak texol chu iswatxꞌenayo howal chꞌah xol ebꞌnaj juxhtaj tuꞌ?
6 Wal xin mach tonhe cheyaqꞌle howal,
to cheqꞌanlepaxo teyinh sata ebꞌnaj alkal,
ebꞌnaj yul sat yibꞌanhqꞌinal tiꞌ.
7 Hayet cheyaqꞌni howal teyinh hunun hex kaw txꞌoj huneꞌ tuꞌ yul sat Komam Dios.
¿Tzet yinh xin mach cheyaqꞌ techahoj tato ay hunu mak chiwatxꞌen istxꞌojal teyinh?
¿Tzet yinh xin mach cheyaqꞌ nimankꞌulal tato ay hunu mak chiꞌelqꞌanilo hunu tzet ye tuꞌ teyet?
8 Wal xin to hextikꞌa chewatxꞌe tzet ye tuꞌ mach kꞌuloj,
kat heyelqꞌawipaxo yinh ebꞌnaj juxhtaj.
9-10 ¿Tom mach heyohtajo xin tato mak chiwatxꞌen istxꞌojal mach chu yok yul isqꞌabꞌ Komam Dios?
Wal xin mach cheyaqꞌ subꞌchaho hebꞌa,
yuto mak chiꞌixli yebꞌ mak chiwinajli,
yebꞌ mak chisjahbꞌa isbꞌa sata tioxh,
yebꞌ mak ay yixal kat issayni hunuxa ix,
yebꞌ mak ay yichamil kat issayni hunuxa winaj,
yebꞌ ebꞌnaj winaj chilauten mule yebꞌ yet winajil,
yebꞌ xin mak elqꞌom,
yebꞌ mak peqꞌ melyu,
yebꞌ mak ukꞌum teꞌ,
yebꞌ mak hobꞌomkanh tzotiꞌ yinh yet anmahil,
yebꞌ mak chiꞌiqꞌni ismelyu yinh leqꞌtiꞌal,
mach chu yok yul isqꞌabꞌ Komam Dios.
11 Ay hex tiꞌ hak tuꞌ heyeko yet yalanhtokanoj,
yajaꞌ wal tinanh sajxa ye heyanma yebꞌ yetxa Komam Dios heyehi.
Xakexok kꞌulal yul sat Komam Dios yu Komam Jesucristo,
yebꞌ yu Yespíritu Komam Dios.
Yetxa Komam Jesucristo ye konimanil
12 Ay mak chihalni,
tato chisje kowatxꞌen sunil tzet chal kokꞌul,
kaw yeli yajaꞌ matxa jeto ye kowatxꞌen sunil tzet ye tuꞌ.
Hanintiꞌan chisje inwatxꞌenan sunil tzet chal inkꞌulan,
yajaꞌ mach chiwaqꞌan hamanil tet hunteqꞌan tuꞌ yunhe mach chiꞌok kinyijbꞌaꞌan yinh tzet chala.
13 Aypaxo mak chalni hakaꞌ tiꞌ:
«Haꞌ tzet chikolo yet kokꞌul yehi,
haꞌ kokꞌul tuꞌ xin yet tzet chikolo yehi,»
xhi.
Yeli hakton tuꞌ yehi,
yajaꞌ tzet chikolo tuꞌ yebꞌ kokꞌul tuꞌ chiꞌapni istzꞌayikal bꞌay chitanhilo yu Komam Dios.
Wal konimanil xin mach yeto ixloj maka winajlo yehi.
Wal xin to yetxa Komam Jesucristo Jahawil ye konimanil tiꞌ,
yetxapaxo konimanil ye Komam.
14 Hakaꞌ yu yaqꞌni itzitzbꞌokanh Komam Dios Komam Jesucristo Jahawil xol kamom,
hak tuꞌ chu konhyaqꞌni itzitzbꞌokanh Komam yu yip.
15 ¿Tom mach heyohtajoj tato huneꞌ konimanil tiꞌ kaw yetbꞌixa isbꞌa yebꞌ isnimanil Komam Jesucristo?
¿Tom xin chu jinito isnimanil Komam tuꞌ kat kohunbꞌan yebꞌ isnimanil hunu ix ix txꞌoj ye iswiꞌ?
¡Machoj!
16 ¿Tom mach heyohtajo xin,
tato yet chishunbꞌan isnimanil hunu naj yebꞌ hunu ix ix txꞌoj ye iswiꞌ,
hunxanhe anmahil chukano naj yebꞌ ix?
Yuto chal yul Yum Komam Dios hakaꞌ tiꞌ:
«Hunxanhe anmahil chukano iskawanhil,»a
xhihayoj.
17 Hayet chijaniko kobꞌa yul isqꞌabꞌ Komam Jahawil hunxanhe chijukano yebꞌ Komam.
18 Wal xin nannhe heyu,
machojabꞌ cheyaqꞌ hamanil tet ixloj maka winajloj.
Tzijxanhe mule chako hunu mak,
maxhtaj isnimanil chetatoj,
yajaꞌ wal mak chiꞌixli maka chiwinajli,
kaw haꞌ yinh isnimanil chako ismul.
19 ¿Tom mach heyohtajo xin,
tato yatutxa Komam Espíritu Santo ye henimanil,
Komam aqꞌbꞌil teyet yu Komam Dios yunhe yeh yul heyanma?
Yuxin matxa heyeto hebꞌa hechukil.b
20 Wal xin loqꞌbꞌil hexxa yu Komam Dios,
yuxin watxꞌewe iskꞌulal yinh henimanil,
haxinwal chiꞌok ismay Komam Dios heyu,
yuto yetxa Komam heyehi.