Il-lax yinh tzet eliko huneꞌ naj ay ismul
5
Xahul isqꞌumal wetan tato ay huneꞌ naj texol tuꞌ yiqꞌkanh iskabꞌ miꞌ,
huneꞌ mule tuꞌ kaw nanxa islowi.
Xol anma mach ohtanhe Komam Dios,
machi bꞌay chijabꞌe yuni hakaꞌ tuꞌ.
2 Yajaꞌ wal hex tiꞌ xin,
kaw kanhheye cheyabꞌe,
estam chiꞌok nino bꞌiskꞌulal yinh hekꞌul yu huneꞌ tuꞌ.
Naj uten huneꞌ istxꞌojal tuꞌ kaw yilal heyinilo naj texol.
3 Wal hanintiꞌan waxanhka machijinan texol,
yaj hakaꞌojtam ayinikojan texol.
Yuxin yinh isbꞌi Komam Jesucristo chiwalan yinh tzet chiꞌeliko naj.
4 Yet chekutxbꞌan hebꞌa hewatxꞌen huneꞌ tuꞌ hakaꞌojtam ayinikojan texol yebꞌ aypaxiko yip Komam Jesucristo texol.
5 Wal huneꞌ naj yako ismul tuꞌ awekanto naj yul isqꞌabꞌ naj matzwalil yunhe iskꞌaytzelaxilo isnimanil naj,
kat iskolchakano yanma naj yet chihul Komam Jesucristo.
6 Hex tiꞌ mach kꞌuloj ta cheyikanh hebꞌa yu huneꞌ istxꞌojal iswatxꞌe naj tuꞌ texol.
¿Tom mach heyohtajo xin tato hanikꞌnhe yanhal ixim pan chiꞌok xol ixim harina,
kaw xin sunil ixim chisipkꞌa yu?
7 Wal xin bꞌejwekano sunil istxꞌojal chexetantoj.
Hak tuꞌ xin lahanxa chexeliko hakaꞌ ixim pan lanhanto iswatxꞌi,
machi yanhal aykoj,
chiwahlax yinh qꞌinh Pascua.
Hakexojabꞌ tuꞌ yul sat Komam Cristo,
yuto haꞌ Komam yako isbꞌa xahanbꞌalil iskam yu komul,
hakaꞌ chu ispotxꞌni ebꞌnaj Israel noꞌ meꞌ isxahanbꞌalo yinh qꞌinh Pascua.
8 Yuxin konabꞌaweti iskamikal Komam Jesucristo yinh istoholal yebꞌ isyelal;
mach yinho istxꞌojal yebꞌ mule,
yuto hunteqꞌan istxꞌojal tuꞌ,
lahan hakaꞌ yanhal pan.
9 Yinh huneꞌ incartahan watojan teyet waltojan tato mach chu hehunbꞌan hebꞌa yebꞌ mak chito ixli maka chito winajli.
10 Yajaꞌ machi waltojan tato matxa chehunbꞌa hebꞌa yebꞌ anma mach ohtanheho Komam Dios,
machoj,
yuto haꞌ anma tuꞌ chito ixli maka chiwinajli,
maka chito yocheko tzet ay yet anmahil,
chiꞌelqꞌawi,
chito ay jahno sata tioxh.
Qꞌinalo tato haꞌ anma tuꞌ chiwalan,
kaw yilalmi chexel yul sat yibꞌanhqꞌinal tiꞌ,
chal tuꞌ.
11 Wal xin haꞌ hunteqꞌan anma chiwaltojan teyet tiꞌ haꞌ ton mak chihalni ta ayxako yul isqꞌabꞌ Komam,
yajaꞌ xin chito ixli maka chito winajli yebꞌ chito yocheko tzet ay yul isqꞌabꞌ hunu yet anmahil,
yebꞌ chito ay jahno sata tioxh,
yebꞌ chito bꞌahwahi yebꞌ chito ukꞌi,
yebꞌ chito elqꞌawi.
Hunteqꞌan mak hakaꞌ tuꞌ mach chu hehunbꞌan hebꞌa yebꞌi,
nitam heyay tzꞌonhno waꞌo yebꞌi.
12-13 Hanintiꞌan mach chu walnihan yinh tzet chiꞌeliko anma maxhto ayoko yul isqꞌabꞌ Komam Dios,
wal xin kachannhe Komam chu yalni tzet chiꞌelikoj.
Yajaꞌ wal hex ayexxako yul isqꞌabꞌ Komam,
chu heyilni yinh tzet chiꞌeliko hunu mak texol.
Yuxin huneꞌ naj issay ismul tuꞌ iwelo naj texol.