Ismunil ebꞌyaꞌ ischejabꞌ Komam Jesucristo
4
Kaw kꞌul tato mach jinhojanh cheyako heyanma,
yuto ischejabꞌnhe Komam Jesucristo jehanh.
Aqꞌbꞌil kochejbꞌanilanh jaqꞌnihanh ohtanhelaxo hunteqꞌan tzet ewan ye yu Komam Dios.
2 Yuxin haꞌ mak bꞌay chiꞌaqꞌlax hunu chejbꞌanile yilal yijem chute isbꞌa.
3 Wal intiꞌan xin,
machi wokan yinh ta chexok heyilaꞌ yinh tzet chinwatxꞌehan,
maka hunuxa mak chiꞌok ilnoj.
Hakintuꞌan mach chinokan wilaꞌan yinh tzet chinwatxꞌehan.
4 Walka xin machi hunu istxꞌojal chinwatxꞌehan,
yajaꞌ maxhtaj yu huneꞌ tuꞌ yuxin chiwalan tato kꞌulinxahan,
wal xin to hanhkꞌanhe Komam Dios Yahawil chu yalni yinh tzet chinwatxꞌehan.
5 Yuxin mach chexok heyalaꞌ tinanh yinh tzet heye hunun hex.
Wal xin echmawe yul Komam Dios Jahawil,
kat isyenilo Komam yinh kaw habꞌan tzet ewanyehi,
kat yaqꞌni Komam ohtanhelaxolo tzet ayayto yul yanma hunun anma.
Chaqꞌni Komam istzalabꞌal kokꞌul hatatikꞌa hanta tzet chikowatxꞌe.
6 Hex wuxhtaj,
hex wanabꞌ,
chiwalan hunteqꞌan tiꞌ yu iskꞌulalo teyinh.
Ilweto inbꞌeybꞌalan,
yebꞌ isbꞌeybꞌal juxhta Apolos,
yuto chijako kobꞌahanh yecheloj yunhe hebꞌeybꞌalnhen kobꞌeybꞌalanh.
Haꞌ hunteqꞌan tzet chikowatxꞌe tiꞌanh,
haꞌ chiꞌok yecheloj yunhe mach chexpalkꞌon yibꞌanh tzet tzꞌibꞌnhebꞌilkanoj.
Yebꞌpaxo yunhe mach cheloloꞌnhe hebꞌa heyaniko iswinajil hunuxa maka,
kat heyintanhenkanilto hunuxa maka.
7 Mach chu kololoꞌnhen kobꞌa walka kꞌulonh sata hunuxa maka,
yuto sunil tzet chisje kowatxꞌeni haꞌ Komam Dios chiꞌaqꞌni jet.
Yuxin mach chu jinikanh kobꞌa yu hunteqꞌan tuꞌ,
to haꞌ Komam chiꞌaqꞌni jet.
8 Wal hex hex tiꞌ,
kochnhe kaw qꞌalomexxa,
yuto sunil tzet cheyoche ay teyet.
Kaw xin hakaꞌxapaxo rey heye heyalni,
matxa tzet chonhokanh heyu.
Yajaꞌ tzettam saqꞌal ta rey hex,
wal tuꞌ ayonhmikojanh teyintaj.
9 Chintxuman hanintiꞌan tato hanhonh ischejabꞌonh Komam Dios tiꞌanh,
konhyakojanh Komam yinh sat anma hakaꞌ hunu mak kaw islahobꞌalxa yehi,
hakaꞌ hunu mak chipotxꞌlax yilaꞌ anma.
Hakaꞌ hunu tzet ye tuꞌ tonhe chimatzꞌelaxi,
hak tuꞌ jehanh yul sat anma yul sat yibꞌanhqꞌinal tiꞌ,
yebꞌ yul sat ebꞌnaj ángel.
10 Hanhonhtiꞌanh chonhhal-laxanh sukal yu chijalikꞌojanh Istzotiꞌ Komam Jesucristo.
Wal hex hex tiꞌ xin kaw helan hex yinh Komam Jesucristo heyalni.
Hanhonhtiꞌanh kaw machi jipanh,
wal hex xin kaw aykano heyip.
Kaw matzet jelapnojanh yul hesat,
wal hex xin kaw aykano heyelapnoj.
11 Tinanh xin yexnhe jijlenanh wahil yebꞌ tajintiꞌal,
yebꞌ manh xilqꞌapehal.
Chonhmaqꞌlaxpaxojanh yu anma,
yebꞌ machi jatutanh.
12 Kaw xin chonhsikihanh komunlahanh,
yuto yinh koqꞌabꞌanh kaw kokꞌulanh.
Hayet chonhbꞌahlaxanh yu anma haꞌ iskꞌulal Komam chijalanh tet.
Ay bꞌay chiꞌekꞌyaꞌ janmahanh yu anma,
yajaꞌ chijaqꞌ techahojanh.
13 Kaw txꞌoj istzotel anma jetanh,
wal hanhonhanh xin kaw aqꞌankꞌulal chu kotzotelanh tet.
Haktikꞌapax tuꞌ tinanh,
hakaꞌ isqꞌalemal yebꞌ isyahbꞌenal tzet ay yul sat yibꞌanhqꞌinal,
hak tuꞌ jehanh yul sat anma.
14 Maxhtaj yu kexwaqꞌni txꞌixwojan yuxin chintzꞌibꞌnhetojan hunteqꞌan tiꞌ teyet.
Wal xin to yu waqꞌnihan hekuybꞌanil,
hakaꞌojtam kaw wuninalan heyehi yuto kaw xahan ay hex wuhan.
15 Waxanhka ay 10 (lahonhebꞌo) mil mak chexkuyni yinh Istzotiꞌ Komam Jesucristo,
yajaꞌ hakaꞌtanhe huneꞌnhe hemam.
Hanintiꞌan hakaꞌ hemam wehan,
yuto haninan bꞌabꞌel walan Tzotiꞌ yet kolbꞌanile teyet,
hak tuꞌ xin yu hechahni Komam Jesucristo yul heyanma.
16 Yuxin kaw chiwalan teyet bꞌeybꞌalnhewe hakaꞌ inbꞌeybꞌalan.
17 Tinanh xin chinchejtojan juxhta Timoteo texol.
Haꞌ naj tiꞌ,
hakaꞌ inkꞌaholan ye naj,
kaw xahan ay naj wuhan yebꞌ kaw yijem naj tet Komam Dios Jahawil.
Haꞌ naj chinaniti inbꞌeybꞌalan teyet yinh Komam Jesucristo,
hakaꞌtikꞌa chu inkuywahan xol anma ayxako yul isqꞌabꞌ Komam Dios yul hunun konhobꞌ bꞌay chinekꞌan.
18 Ay mak texol tuꞌ kaw chikanh isbꞌa,
ham yalni tato matxa chinapnihan kexwilaꞌan.
19 Wal xin ta xhi Komam ayxatikꞌako yinh inkꞌulan intohan kexwilnojan yinh anhe.
Hato tuꞌ chiwilan tato kaw yeli helan hunteqꞌan ebꞌnaj loloꞌ tuꞌ,
maka tonhe chitzotel ebꞌnaj xin.
20 Yuto maxhtaj yu tzet chijala chiꞌixtanhwiloj tato ayonhxa yul isqꞌabꞌ Komam Dios,
wal xin to yu chisyelo yip Komam jinh.
21 Wal tinanh xin,
¿tzet cheyoche chinto wubꞌan texol?
¿Tom cheyoche chintohan kexinhateꞌan yu hetxꞌojal?
mato ¿cheyoche ta kꞌulchꞌan chiwute inkꞌulan teyinh?